Genesise 22:1-24
22 Manje ngemva kwalokho uNkulunkulu weqiniso wamvivinya + u-Abrahama, wathi kuye: “Abrahama!” yena waphendula wathi: “Ngilapha!”
2 UNkulunkulu wabe esethi: “Ngicela uthathe indodana yakho, okuwukuphela kwendodana oyithanda kakhulu, + u-Isaka, + uhambe uye ezweni laseMoriya + uyinikele lapho njengomnikelo oshiswayo kwenye yezintaba engizokubonisa yona.”
3 Ngakho u-Abrahama wavuka ekuseni kakhulu wabophela imbongolo yakhe, wathatha ezimbili ezincekwini zakhe kanye nendodana yakhe, u-Isaka. Wacanda izinkuni zomnikelo oshiswayo, wayesesuka wahamba waya endaweni uNkulunkulu weqiniso ayekhulume ngayo.
4 Ngosuku lwesithathu u-Abrahama waphakamisa amehlo wayibona leyo ndawo esekude.
5 U-Abrahama wathi ezincekwini zakhe: “Nina hlalani lapha kanye nembongolo, kodwa mina nomfana sizoya laphaya siyokhonza uNkulunkulu bese sibuyela kini.”
6 Ngakho u-Abrahama wathatha izinkuni zomnikelo oshiswayo wazithwesa indodana yakhe u-Isaka. Wabe esethatha umlilo nommese,* bobabili bahamba ndawonye.
7 Ngemva kwalokho u-Isaka wathi kuyise u-Abrahama: “Baba!” Yena waphendula: “Yebo, ndodana yami!” U-Isaka waqhubeka wathi: “Nanku umlilo nezinkuni, kodwa iphi imvu yomnikelo oshiswayo?”
8 U-Abrahama wathi: “UNkulunkulu uzoyilungiselela ngokwakhe imvu yomnikelo oshiswayo + ndodana yami.” Bobabili baqhubeka behamba ndawonye.
9 Ekugcineni bafika endaweni uNkulunkulu weqiniso ayekhulume ngayo, u-Abrahama wakha i-altare kuyo, wahlela izinkuni phezu kwalo. Wabopha indodana yakhe u-Isaka izandla nezinyawo, wayeseyibeka e-altare phezu kwezinkuni. +
10 Ngemva kwalokho u-Abrahama welula isandla wathatha ummese* ukuze abulale indodana yakhe. +
11 Kodwa ingelosi kaJehova yambiza isezulwini yathi: “Abrahama, Abrahama!” yena waphendula wathi: “Ngilapha!”
12 Yabe isithi: “Ungamlimazi umfana, ungenzi lutho nhlobo kuye, ngoba manje ngiyazi ukuthi uyamesaba uNkulunkulu ngoba awungigodlelanga indodana yakho, okuwukuphela kwayo.” +
13 U-Abrahama wabe esephakamisa amehlo, laphaya phambi kwakhe kwakukhona inqama ibambeke ngezimpondo ezihlahleni. Ngakho u-Abrahama wahamba wayothatha inqama wanikela ngayo njengomnikelo oshiswayo esikhundleni sendodana yakhe.
14 U-Abrahama waqamba leyo ndawo ngokuthi iJehova-jire.* Yingakho kusathiwa nanamuhla: “Entabeni kaJehova, uyolungiselela izinto ezidingekayo.” +
15 Ingelosi kaJehova yambiza okwesibili u-Abrahama isezulwini,
16 yathi: “‘Ngizifunga mina ngokwami,’ kusho uJehova, + ‘ukuthi ngenxa yokuthi wenze le nto wangayigodla indodana yakho okuwukuphela kwayo, +
17 nakanjani ngiyokubusisa, nakanjani ngiyoyandisa inzalo* yakho ibe ngangezinkanyezi zamazulu nangangesihlabathi esisogwini lolwandle, + inzalo* yakho iyodla ifa ledolobha* lezitha zayo. +
18 Ngenzalo* + yakho zonke izizwe zomhlaba ziyozitholela isibusiso ngenxa yokuthi ulalele izwi lami.’” +
19 Ngemva kwalokho u-Abrahama wabuyela ezincekwini zakhe, zasukuma bahamba ndawonye baya eBheri-sheba; + u-Abrahama waqhubeka ehlala eBheri-sheba.
20 Ngemva kwalokho kwabikwa ku-Abrahama: “UMilka naye umzalele amadodana uNahori umfowenu. +
21 U-Uze izibulo lakhe, uBuzi umfowabo, uKhemuweli uyise ka-Aramu,
22 uKesedi, uHazo, uPhilidashe, uJidilafu noBhetuweli.” +
23 UBhetuweli wazala uRebheka. + UMilka wazalela umfowabo ka-Abrahama uNahori laba abangu-8.
24 Isancinza sakhe, esigama laso kwakunguRewuma, naso sazala amadodana: uTheba, uGahamu, uThahashi noMahakha.
Imibhalo yaphansi
^ Noma, “nommese wokuhlaba.”
^ Noma, “ummese wokuhlaba.”
^ Incazelo: “UJehova Uyolungiselela; UJehova Uyobona.”
^ NgesiHebheru, “imbewu.”
^ NgesiHebheru, “imbewu.”
^ NgesiHebheru, “lesango.”
^ NgesiHebheru, “Ngembewu.”
