Usizi olukhulu luzoletha isikhathi esinzima kunazo zonke kubantu. Ngokweziprofetho zeBhayibheli, luzoba khona “ezinsukwini zokugcina,” noma ‘esikhathini sokuphela.’ (2 Thimothewu 3:1; Daniyeli 12:4) Luzoba “usizi olukhulu olungakaze lube khona kusukela ekuqaleni kwezwe kuze kube manje, cha, futhi olungasayikuphinde lube khona.”—Marku 13:19; Daniyeli 12:1; Mathewu 24:21, 22.

Izenzakalo zaphakathi nosizi olukhulu

• Ukubhujiswa kwenkolo yamanga. Kuzobhujiswa inkolo yamanga ngokushesha okumangalisayo. (IsAmbulo 17:1, 5; 18:9, 10, 21) Imibuso yezombusazwe emelelwe yiZizwe Ezihlangene izobe ifeza intando kaNkulunkulu lapho yenza lokhu.​—IsAmbulo 17:3, 15-18. a

• Ukuhlaselwa kwenkolo yeqiniso. Izizwe eziwumfelandawonye, ezibizwa ngokuthi ‘uGogi wezwe lakwaMagogi’ embonweni kaHezekeli, ziyozama ukubhubhisa labo abasenkolweni yeqiniso. Nokho, uNkulunkulu uyobavikela abamkhonzayo, bangabhujiswa.​—Hezekeli 38:1, 2, 9-12, 18-23.

• Ukwahlulelwa kwabahlala emhlabeni. UJesu uyokwahlulela bonke abantu futhi “[uyohlukanisa] abantu omunye komunye, njengoba nje umalusi ehlukanisa izimvu ezimbuzini.” (Mathewu 25:31-33) Umuntu ngamunye uyokwahlulelwa ngokuthi uye wabasekela noma wangabasekela kangakanani “abafowabo” bakaJesu, labo abayobusa naye ezulwini.—Mathewu 25:34-46.

• Ukubuthwa kwabayobusa ezulwini. Abathembekile abakhethwe ukuba bayobusa noKristu bayophetha inkambo yabo yokuphila kwasemhlabeni bavuselwe ekuphileni kwasezulwini.—Mathewu 24:31; 1 Korinte 15:50-53; 1 Thesalonika 4:15-17.

• I-Armagedoni. Le ‘mpi yosuku olukhulu lukaNkulunkulu uMninimandla onke’ ibizwa nangokuthi “usuku lukaJehova.” (IsAmbulo 16:14, 16; Isaya 13:9; 2 Petru 3:12) Labo abayolahlwa yisahlulelo sikaKristu bayobhujiswa. (Zefaniya 1:18; 2 Thesalonika 1:6-10) Kuyobhujiswa nesimiso sezwe sezombusazwe, esifanekiselwa yisilo esinamakhanda ayisikhombisa eBhayibhelini.—IsAmbulo 19:19-21.

Izenzakalo zangemva kosizi olukhulu

• Ukuvalelwa kukaSathane namademoni. Ingelosi enkulu iyophonsa uSathane namademoni “kwalasha,” indawo efanekisela isimo sokungakwazi kwenza lutho njengasekufeni. (IsAmbulo 20:1-3) Isimo uSathane ayobe ekuso kwalasha singafaniswa nokuba sejele; ngeke akwazi ukuthonya okwenzeka ngaphandle.—IsAmbulo 20:7.

• Ukuqala kweMinyaka Eyinkulungwane. UMbuso kaNkulunkulu uyoqala ukubusa kwawo kweminyaka eyinkulungwane, okuyolethela abantu izibusiso ezinkulu. (IsAmbulo 5:9, 10; 20:4, 6) “Isixuku esikhulu” esiyisibalo esingashiwongo ‘siyophuma osizini olukhulu’ siphila, sibone ukuqala kweMinyaka Eyinkulungwane emhlabeni.—IsAmbulo 7:9, 14; IHubo 37:9-11.