Láàárọ̀ kùtù February 24, 2022, àwọn ọmọ ogun Rọ́ṣíà bẹ̀rẹ̀ sí í gbógun ja orílẹ̀-èdè Ukraine, bó tiẹ̀ jẹ́ pé àwọn aláṣẹ kárí ayé ń sapá kí ogun má bàa wáyé. Báwo logun yìí ṣe máa kan gbogbo ayé? António Guterres tó jẹ́ akọ̀wé àgbà fún Àjọ Ìṣọ̀kan Àgbáyé sọ lọ́jọ́ mélòó kan sẹ́yìn pé: “Ìyà tó máa jẹ àwọn èèyàn àtàwọn nǹkan tó máa bà jẹ́ láwọn orílẹ̀-èdè tó wà ní Yúróòpù máa kúrò ní kèrémí, ó sì máa ṣàkóbá fún ọ̀rọ̀ ààbò kárí ayé.”

•   Jésù Kristi sọ pé ìgbà kan ń bọ̀ tí “orílẹ̀-èdè máa dìde sí orílẹ̀-èdè àti ìjọba sí ìjọba.” (Mátíù 24:7) Ka àpilẹ̀kọ “Kí Ni Àmì ‘Àwọn Ọjọ́ Ìkẹyìn’ Tàbí ‘Àkókò Òpin’?” kó o lè rí bí Bíbélì ṣe jẹ́ ká mọ̀ pé àwọn ogun tó ń jà lónìí ń mú àsọtẹ́lẹ̀ Jésù ṣẹ.

•   Ìwé Ìfihàn nínú Bíbélì fi ẹni tó ń gun ẹṣin “aláwọ̀ iná” ṣàpèjúwe bí ogun á ṣe máa jà láyé. Ó tiẹ̀ sọ pé, ó “mú àlàáfíà kúrò ní ayé.” (Ìfihàn 6:4) Ka àpilẹ̀kọ “Ta Ni Àwọn Ẹlẹ́ṣin Mẹ́rin Náà?” kó o lè mọ bí àsọtẹ́lẹ̀ yìí ṣe kan ogun tó ń jà lónìí.

•   Ìwé Dáníẹ́lì sọ tẹ́lẹ̀ pé “ọba àríwá” àti “ọba gúúsù” á máa bá ara wọn díje. (Dáníẹ́lì 11:25-45) Wo fídíò náà Àsọtẹ́lẹ̀ Tó Ṣẹ​—Dáníẹ́lì Orí 11, kó o lè mọ ìdí tá a fi sọ pé Rọ́ṣíà àtàwọn alátìlẹyìn rẹ̀ ni ọba àríwá. a

•   Ìwé Ìfihàn tún sọ̀rọ̀ nípa “ogun ọjọ́ ńlá Ọlọ́run Olódùmarè.” (Ìfihàn 16:14, 16) Àmọ́, kì í ṣe irú ogun táwọn orílẹ̀-èdè ń bá ara wọn jà lónìí ló ń sọ. Tó o bá fẹ́ mọ̀ sí i nípa ogun tó máa jà lọ́jọ́ iwájú yìí, ka àpilẹ̀kọ náà “Kí Ni Ogun Amágẹ́dọ́nì?”

•   Bíbélì sọ pé Ọlọ́run máa “fòpin sí ogun kárí ayé.” (Sáàmù 46:9) Tó o bá fẹ́ mọ̀ sí i nípa àwọn ìlérí ti Ọlọ́run ṣe nípa ọjọ́ iwájú, ka àpilẹ̀kọ náà “Ìdí Tó Fi Dá Wa Lójú Pé Ọ̀la Máa Dáa.”

•   Jésù kọ́ àwọn ọmọlẹ́yìn ẹ̀ pé kí wọ́n máa gbàdúrà pé kí Ìjọba Ọlọ́run dé. (Mátíù 6:9, 10) Ọ̀run ni Ìjọba náà á ti máa ṣàkóso, á sì mú kí ìfẹ́ Ọlọ́run ṣẹ láyé. Lára ohun tí Ọlọ́run fẹ́ ni pé kí àlàáfíà wà kárí ayé. Tó o bá fẹ́ mọ̀ sí i nípa àǹfààní tí Ìjọba Ọlọ́run máa ṣe fún ẹ, wo fídíò Kí Ni Ìjọba Ọlọ́run?

 Àwọn Ẹlẹ́rìí Jèhófà tó lé ní ẹgbẹ̀rún mọ́kàndínláàádóje (129,000) ló ń gbé ní orílẹ̀-èdè Ukraine. Bíi tàwọn Ẹlẹ́rìí Jèhófà kárí ayé, àwọn náà ń fara wé Jésù ní ti pé wọn ò dá sọ́rọ̀ òṣèlú, wọn ò sì lọ́wọ́ sí ogun. (Jòhánù 18:36) Kárí ayé, àwa Ẹlẹ́rìí Jèhófà ń kéde pé Ìjọba Ọlọ́run nìkan ló máa mú ogun àtàwọn ìṣòro míì tí aráyé ń dojú kọ kúrò. (Mátíù 24:14) Jọ̀wọ́ kàn sí wa tó o bá fẹ́ mọ̀ sí i nípa àwọn ìlérí amọ́kànyọ̀ tó wà nínú Bíbélì.