2 | “Ìtùnú Látinú Ìwé Mímọ́”
BÍBÉLÌ SỌ PÉ: “Gbogbo ohun tí a kọ ní ìṣáájú ni a kọ fún wa láti gba ẹ̀kọ́, kí á lè ní ìrètí nípasẹ̀ ìfaradà wa àti nípasẹ̀ ìtùnú látinú Ìwé Mímọ́.”—RÓÒMÙ 15:4.
Ohun Tó Túmọ̀ Sí
Àwọn ọ̀rọ̀ ìtùnú tó wà nínú Bíbélì máa ń fún wa lókun, ó sì máa ń jẹ́ ká lè fara dà á tí èrò òdì bá ń wá sí wa lọ́kàn. Bíbélì tún jẹ́ ká mọ̀ pé láìpẹ́, gbogbo ìṣòro tó ń fa ẹ̀dùn ọkàn fún wa ò ní sí mọ́.
Àǹfààní Tó Máa Ṣe Ẹ́
Gbogbo wa ni nǹkan máa ń tojú sú nígbà míì, àmọ́ ní tàwọn tó ní ìdààmú ọkàn tàbí tí àníyàn máa ń gbà lọ́kàn, ojoojúmọ́ ni wọ́n máa ń ní ẹ̀dùn ọkàn tó lágbára gan-an. Báwo ni Bíbélì ṣe lè ràn ẹ́ lọ́wọ́?
Bíbélì jẹ́ ká mọ ọ̀pọ̀ nǹkan rere tá a lè máa ronú lé lórí tí ò ní jẹ́ ká máa ro èrò òdì. (Fílípì 4:8) Ọ̀rọ̀ inú Bíbélì máa ń tù wá nínú, ó máa ń tù wá lára, kò sì ní jẹ́ ká ṣinú rò.—Sáàmù 94:18, 19.
Tá a bá ń ronú pé a ò wúlò fún nǹkan kan, Bíbélì á jẹ́ ká gbé èrò náà kúrò lọ́kàn.—Lúùkù 12:6, 7.
Ọ̀pọ̀ ẹsẹ Bíbélì ló fi wá lọ́kàn balẹ̀ pé Ọlọ́run Ẹlẹ́dàá wa wà pẹ̀lú wa, àti pé ó mọ gbogbo bó ṣe ń ṣe wá.—Sáàmù 34:18; 1 Jòhánù 3:19, 20.
Bíbélì sọ pé ìgbà kan ń bọ̀ tí Ọlọ́run máa mú gbogbo èrò tó ń fa ẹ̀dùn ọkàn fún wa kúrò. (Àìsáyà 65:17; Ìfihàn 21:4) Tá a bá ń rántí ìlérí yìí nígbà tá a bá ní ìdààmú ọkàn, ó máa fún wa lókun.
O Tún Lè Wo
OHUN TÍ BÍBÉLÌ SỌ
Ṣé Mo Lè Rí Àwọn Ọ̀rọ̀ Tó Máa Tù Mí Nínú Nínú Bíbélì?
Àwọn ẹsẹ Bíbélì tó ti tu àwọn tó ní ìṣòro àti ẹ̀dùn ọkàn nínú.
