ICIGWA CA 39
Ingene Imana ibona amaraso
Amaraso ni ngirakamaro cane. Nta n’umwe yobaho atayafise. Kubera ko Imana ari Umuremyi wacu, irafise uburenganzira bwo kutubwira ukuntu twoyakoresha. None ni ibiki yavuze ku bijanye n’amaraso? Twoba dushobora kuyarya canke bakayadutera mu mitsi? Kandi ni gute wofata ingingo nziza mu bijanye no gukoresha amaraso?
1. Yehova abona gute amaraso?
Yehova yabwiye abasavyi biwe ba kera ati: “Ubuzima bw’ikiri n’umubiri cose [ni] amaraso yaco.” (Abalewi 17:14) Yehova abona ko amaraso ari ubuzima. Rero kubera ko ubuzima ari bweranda bukaba ari ingabire iva ku Mana, amaraso na yo nyene ni meranda.
2. Ni uburyo ubuhe bwo gukoresha amaraso Imana yiyamiriza?
Yehova yategetse abasavyi biwe ba kera kutarya amaraso. (Soma Itanguriro 9:4 n’Abalewi 17:10.) Yarasubiyemwo iryo tegeko igihe inama nyobozi yabwira abakirisu ‘kuguma birinze amaraso.’—Soma Ivyakozwe 15:28, 29.
Kwirinda amaraso bisobanura iki? Hamwe umuganga yogutegeka kwirinda inzoga, birumvikana ko utozinywa. Ariko none woba worya ibifungurwa birimwo inzoga canke ukemera ko bazigutera mu mitsi? Birumvikana ko ata vyo wokora. Muri ubwo buryo nyene, itegeko ry’Imana ridusaba kwirinda amaraso risigura ko twirinda kuyarya, kuyanywa canke gufungura inyama zitakuwemwo amaraso. Vyongeye, ntidukwiye kurya ibifungurwa bashizemwo amaraso.
Bite ho ku bijanye no gukoresha amaraso mu vy’ubuvuzi? Uburyo bumwebumwe burarenga ku mategeko y’Imana mu buryo buboneka. Aho harimwo guterwa amaraso yose uko yakabaye canke vya bihimba bine nyamukuru biyagize na vyo akaba ari utugingo ngengabuzima dutukura, utugingo ngengabuzima twera, ivyitwa plaquettes n’ivyitwa plasma. Ubundi buryo bwo kuvura bwoshobora kuba butibonekeza ko burenga canke butarenga ku mategeko y’Imana. Nk’akarorero, uburyo bumwebumwe burajamwo ivyo gukoresha uduhimba dutoduto dukuwe muri vya bihimba bine nyamukuru. Ubundi buryo burimwo kuvura umuntu hakoreshejwe amaraso yiwe bwite. Igihe turimbura ico twohitamwo, umwe wese akwiye kwifatira ingingo. a—Abagalatiya 6:5.
TWINJIRE MU MIZI
Nusuzume ukuntu wohitamwo uburyo bwo kuvurwa wokoresha.
3. Nuhitemwo uburyo bwo kuvurwa buhimbara Yehova
Wohitamwo gute uburyo bwo kuvurwa buhuje n’ukuntu Imana ibona amaraso? Nimurabe iyo VIDEWO, muce muganira ku gituma bihambaye gukurikiriza izi ntambwe zikurikira:
-
Nusenge usaba ubukerebutsi.—Yakobo 1:5.
-
Nurondere ingingo ngenderwako zo muri Bibiliya, urabe n’ingene wozishira mu ngiro.—Imigani 13:16.
-
Nurondere uburyo bwo kuvurwa bushoboka aho iwanyu.
-
Nurabe uburyo wewe utokwemera gukoresha.
-
Niwiyemeze ko ingingo yose ufata izotuma ugumana ijwi ryiza ryo mu mutima.—Ivyakozwe 24:16. b
-
Numenye yuko ata n’umwe yaba uwo mwubakanye, umukurambere canke uwukwigisha Bibiliya akwiye kukubwira ico wokora mu bintu vyega ijwi ryawe ryo mu mutima.—Abaroma 14:12.
-
Niwandike ingingo ufashe.
4. Ivyabona vya Yehova bararondera uburyo bwo kuvurwa bwiza cane
Birashoboka ko twisunga itegeko ry’Imana rijanye n’amaraso kandi tukavurwa neza batarinze kuyakoresha. Nimurabe iyo VIDEWO.
Nimusome Tito 3:2, muce muganira kuri iki kibazo:
-
Kubera iki dukwiye kwama tugaragaza icubahiro n’ubwitonzi igihe tuganira n’abaganga?
|
Ntivyemewe |
Umukirisu arifatira ingingo |
|---|---|
|
Plasma |
Uduhimba dukurwa muri plasma |
|
Utugingo ngengabuzima twera |
Uduhimba dukurwa mu tugingo ngengabuzima twera |
|
Plaquettes |
Uduhimba dukurwa muri plaquettes |
|
Utugingo ngengabuzima dutukura |
Uduhimba dukurwa mu tugingo ngengabuzima dutukura |
5. Ibijanye na twa duhimba dutoduto tw’amaraso
Amaraso agizwe n’ibihimba bine nyamukuru: utugingo ngengabuzima dutukura, utugingo ngengabuzima twera, ivyitwa plaquettes n’ivyitwa plasma. Ivyo bihimba nyamukuru bine birimwo utundi duhimba dutoduto twinshi. c Tumwetumwe muri utwo duhimba baradukoramwo imiti irwanya indwara canke ifasha guhagarika ivirirana ry’amaraso.
Ku bijanye na twa duhimba dutoduto tw’amaraso, umukirisu wese ategerezwa kwifatira ingingo yisunze ijwi ryiwe ryo mu mutima ryamenyerejwe na Bibiliya. Bamwe barashobora kwanka uburyo bwo kuvurwa hakoreshejwe uduhimba dutoduto tw’amaraso. Abandi na bo ijwi ryabo ryo mu mutima rirashobora kubemerera kuvurwa hakoreshejwe ubwo buryo.
Igihe uriko urafata ingingo, nurimbure iki kibazo:
-
Nosigurira gute umuganga igituma nanse canke nemeye kuvurwa hakoreshejwe uduhimba dutoduto tw’amaraso?
HARI UWOBAZA ATI: “Kwemera guterwa amaraso bitwaye iki?”
-
Uvyibaza ko iki?
INCAMAKE
Yehova yipfuza yuko tubona ko amaraso ari meranda.
Wize iki?
-
Kubera iki Yehova abona ko amaraso ari meranda?
-
Twemezwa n’iki yuko itegeko ry’Imana ridusaba kwirinda amaraso ririmwo no kwirinda kuyaterwa?
-
Ni gute wofata ingingo ibereye mu bijanye no kuvurwa hakoreshejwe amaraso?
RONDERA N’IBINDI
Ni ibiki wozirikana imbere y’uko ufata ingingo mu bijanye no kuvurwa hakoreshejwe amaraso yawe bwite?
“Ibibazo vy’Abasomyi” (Umunara w’Inderetsi, 1 Munyonyo 2000)
Ni ibiki ukwiye kwisunga imbere y’uko wemera canke wanka uduhimba dutoduto tw’amaraso?
“Ibibazo vy’abasomyi” (Umunara w’Inderetsi, 15 Ruheshi 2004)
Nurabe icafashije umuganga umwe kwemera ko uburyo Yehova abona amaraso bwumvikana?
“Naremeye kubona amaraso nk’uko Imana iyabona” (Be maso!, 8 Kigarama 2003 mu gifaransa)
Nurabe ukuntu abakurambere bakorera muri Komite zija inama n’ibitaro bashigikira abavukanyi na bashiki bacu.
a Raba Icigwa ca 35, kivuga ngo “Ivyodufasha gufata ingingo nziza.”
b Nurabe iciyumviro ca 5 kivuga ngo “Ibijanye na twa duhimba dutoduto tw’amaraso hamwe n’ Akajambo ko ku mpera ka 3, kavuga ngo “Uburyo bwo kuvura bujamwo ibijanye n’amaraso.”
c Hari abaganga bafata ko vya bihimba bine nyamukuru ari uduhimba dutoduto tw’amaraso. Ku bw’ivyo, hari aho wokenera gusigurira abaganga ingingo wafashe yo kudaterwa amaraso yose uko yakabaye canke utugingo ngengabuzima dutukura, utugingo ngengabuzima twera, ivyitwa plaquettes n’ivyitwa plasma.
Raba kandi
IBIBAZO BIKUNZE KUBAZWA
Ivyigwa mutanga vya Bibiliya bigirwa gute?
Mu vyigwa vya Bibiliya Ivyabona vya Yehova batanga ku buntu, urashobora gukoresha Bibiliya iyo ari yo yose. Urashobora gutumira umuryango wawe wose canke abagenzi bawe.
