Raba ako gahungu kari kuri iyo foto. Gasa n’akumva kari konyene kandi gafise ubwoba, si vyo? Vyoba bimaze gushika ukiyumva gutyo?— Rimwe na rimwe umuntu uwo ari we wese birashika akiyumva gutyo. Bibiliya iravuga abagenzi ba Yehova na bo nyene bumvise umengo ni bonyene bongera baragira ubwoba. Umwe muri bo yari Eliya. Reka turabe ibimwerekeye.

Eliya yabaye muri Isirayeli kera cane, imbere y’uko Yezu avuka. Ahabu, umwami wa Isirayeli, ntiyasenga Imana y’ukuri Yehova. Ahabu n’umugore wiwe Yezebeli basenga imana y’ikinyoma Bayali. Rero, abantu bo muri Isirayeli nka bose na bo nyene baratanguye gusenga Bayali. Umwamikazi Yezebeli yari ameze nabi cane kandi yashaka kwica abantu bose basenga Yehova, harimwo na Eliya! Urazi ico Eliya yaciye akora?—

 Eliya yaciye ahunga! Yagiye kure mu gahinga maze yinyegeza mw’isenga ry’ibuye. Wibaza ko ivyo yabigize kubera iki?— Yari afise ubwoba. Ariko Eliya ntiyari akwiye kugira ubwoba. Uti kubera iki? Kubera ko yari azi yuko Yehova yari gushobora kumufasha. Imbere y’aho Yehova yari yareretse ububasha bwiwe Eliya. Igihe kimwe, Yehova yarishuye isengesho rya Eliya mu kurungika umuriro uvuye mw’ijuru. Birumvikana rero ko Yehova yari gufasha Eliya no muri ico gihe!

Igihe Eliya yari muri iryo senga ry’ibuye, Yehova yaramuvugishije, amubaza ati: ‘Uriko ukora iki ng’aha?’ Eliya yishuye ati: ‘Ni jewe jenyene nkigusenga. Ndi jenyene, kandi ndafise ubwoba kubera ko nshobora kwicwa.’ Eliya yibaza ko abandi basavyi ba Yehova bose bari barishwe. Ariko Yehova yabwiye Eliya ati: ‘Oya, ivyo si vyo. Hariho abandi bantu 7.000 bakinsenga. Ntugire ubwoba. Hariho ikindi gikorwa nshaka ko ukora!’ Wibaza ko Eliya yahimbawe no kwumva ico kintu?—

Ni igiki wokwigira kuri Eliya?— Ntukwiye kwigera wumva ko uri wenyene canke ngo ugire ubwoba. Urafise abagenzi bakunda Yehova kandi nawe bagukunda. N’ikindi kandi, Yehova arafise ububasha bwinshi kandi azokwama agufasha! Woba uryohewe no kumenya ko utigera uba wenyene vy’ukuri?—