MURI Kigarama 2009 no muri Nzero 2010, zibiri muri sentare nkurunkuru zo mu Burusiya zaratangaje ko ivyo Ivyabona vya Yehova bemera mu vy’idini ari ivyiyumviro nk’ivy’intagondwa. Vyasa n’uko hasubiye kuba ivyari vyarabaye muri kahise. Igihe Uburusiya bwatwarwa n’Abasoviyeti, Ivyabona vya Yehova ibihumbi n’ibihumbi baragirijwe ibinyoma vy’uko ngo ari abansi b’igihugu. Barangajwe, baratabwa mu mabohero bongera barashirwa ku gahato mu makambi akorerwamwo ibikorwa vy’umuruho. Inyuma y’aho iyo ntwaro isenyuriwe, Ivyabona vya Yehova barambitswe izera. Intwaro nshasha yarabasubije icese izina ryiza bari bafise. * Muri iki gihe, abantu bamwebamwe basa n’abiyemeje gusubira gusiga iceyi Ivyabona vya Yehova.

Mu ntango z’umwaka wa 2009, abategetsi baragavye igitero ku mwidegemvyo wo gusenga Ivyabona vya Yehova bafise. Mu kwezi kwa Ruhuhuma kwonyene, abatuburanya baragize amatohoza arenga 500 mu gihugu cose. Kubera iki ivyo vyose vyagizwe? Kugira ngo bamenye neza ivyitwa ngo ni ukurenga amategeko kwagizwe n’Ivyabona vya Yehova. Mu mezi yakurikiye, igipolisi carateye aho Ivyabona vya Yehova bariko bagirira amakoraniro ajanye n’ivy’idini mu mahoro mu Ngoro z’Ubwami no mu mazu y’abantu. Carafashe ibitabu be n’ibindi bintu bari batunze. Abategetsi barirukanye abashingwamanza b’abanyamahanga bariko barafasha mu kuburanira Ivyabona vya Yehova, barababuza no gusubira kwinjira mu gihugu.

 Kw’igenekerezo rya 5 Gitugutu 2009, abakora ku mupaka uri hafi y’i Saint-Pétersbourg barafashe ibitabu bishingiye kuri Bibiliya. Ivyo bitabu vyari vyacapuriwe mu Budagi, bikaba vyari bigenewe amashengero menshi yo mu Burusiya. Urwego rudasanzwe rw’abakora ku mipaka rwo mu Burusiya rusuzuma ibintu bitemewe n’amategeko biteye akaga vyinjira canke bisohoka, ni rwo rwasuzumye ivyo bitabu. Uti ni kubera iki babisuzumye? Urwandiko ruvuye muri Leta rwavuze ngo ivyo bitabu “bishobora kuba birimwo ibintu bigenewe kuremesha amacakubiri y’amadini.”

Ukwo kwama baburabuzwa ntikwatevye gukomera. Sentare Nkuru zo mu Burusiya no muri Repubulika ya Altaï (ino ikaba ikukira Uburusiya) zavuze ko ibitabu bitari bike bikoreshwa n’Ivyabona vya Yehova, harimwo n’iki kinyamakuru uriko urasoma, birimwo ivyiyumviro nk’ivy’intagondwa. Ivyabona vya Yehova barasavye kwunguruza kandi n’amakungu yarerekanye ko arajwe ishinga n’ico kibazo, ariko nta cavuyemwo! Ingingo yafashwe na sentare ntirahinduka, ikaba ituma ukwinjiza n’ugukwiragiza ivyo bitabu bishingiye kuri Bibiliya biba ibitemewe n’amategeko mu Burusiya.

None Ivyabona vya Yehova bakiriye gute ivyo bintu vyakozwe mu ntumbero yo kubasiga iceyi no kuburabuza igikorwa cabo? Kandi ingingo z’izo Sentare zagize ico zikoze gute ku mwidegemvyo w’ivy’idini w’abanyagihugu bose bo mu Burusiya?

Ku wa gatanu igenekerezo rya 26 Ruhuhuma 2010, Ivyabona vya Yehova nka 160.000 bo hirya no hino mu Burusiya baratanguye gukwiragiza amakopi imiliyoni 12 y’agapapuro kadasanzwe kari gafise umutwe uvuga ngo Vyoba vyosubira gushika? Ikibazo kibajijwe abanyagihugu bo mu Burusiya. Nk’akarorero, mu gisagara kimwe co mu karere ka Siberiya ca Usol’ye-Sibirskoye, Ivyabona vya Yehova amajana barahuriye ku mabarabara isaha 11 n’iminota 30 zo mu gitondo. Muri bo harimwo abari barangarijwe muri Siberiya mu 1951 bahowe ukwizera kwabo. Kugira ngo bakwiragize udupapuro 20.000 bari bahawe, bararinze imbeho y’amadogere 40 munsi y’ubusa.

Mu gutangaza iryo sekeza ry’imisi itatu, Ivyabona vya Yehova barahaye ikiganiro abamenyeshamakuru i Moscou, umugwa mukuru w’Uburusiya. Mu bari batumiwe kugira ico bashikirije, harimwo umushingantahe Lev Levinson, umuhinga wo mu Kigo kiraba ivy’agateka ka zina muntu. Yaravuze mu ncamake ivyerekeye ukuburabuzwa be n’uruhamo bitagira ishingiro vyashikiye Ivyabona vya Yehova mu Budagi bw’Abanazi no muri Leta Zunze Ubumwe z’Abasoviyeti, aravuga n’ukuntu mu nyuma bambitswe izera n’ubutegetsi. Yavuze kandi ati: “Amadini yose yahamwe mu gihe c’Abasoviyeti yarasubijwe umutamana n’itegeko ry’Umukuru w’igihugu Yeltsin. Kandi ibintu vyose  yari yaratakaje yabwirizwa kuba yamaze kubisubizwa. Ivyabona vya Yehova bobo nta matongo canke amatungo abegukira bari bafise mu gihe c’intwaro ya Leta Zunze Ubumwe z’Abasoviyeti, mugabo barasubijwe izina ryiza bari bafise.”

Iryo zina ryiza ry’Ivyabona vya Yehova ubu ryasubiye kugeramirwa. Umushingantahe Levinson yavuze ati: “Muri ca gihugu nyene cari cavuze ko kibabajwe n’ivyabaye, abo bantu bariko barashikirwa n’uruhamo rutagira ishingiro na ritoyi.”

Rya sekeza ryo gukwiragiza ka gapapuro ryoba ryarashitse ku ntumbero yaryo? Umushingantahe Levinson yavuze ati: “Igihe nariko ndaza kuri iki kiganiro [gihawe abamenyeshamakuru] nabonye abantu bari bicaye iruhande y’amabarabara y’indarayi aca mu kuzimu bariko barasoma udupapuro Ivyabona vya Yehova bariko baratanga hirya no hino mu Burusiya uno musi. . . . Abantu baricara bakadusoma, kandi badusoma bitonze.” * Nk’akarorero, raba ibi bintu vyabaye.

Umutamakazi umwe wo mu karere kabamwo abisilamu ko hagati mu Burusiya yarakiriye ako gapapuro maze arabaza ivyo kavuga. Abwiwe ko kavuga ivy’agateka ka zina muntu n’umwidegemvyo mu Burusiya, yavuze atangaye ati: “Emwe, hagiye haboneka abantu bavyitaho! Kuri ico kibazo, Uburusiya bwarasubiye muri ya misi y’intwaro ya Leta Zunze Ubumwe z’Abasoviyeti. Murakoze cane. Igikorwa ciza!”

Umukenyezi umwe w’i Chelyabinsk bari bahaye ako gapapuro yavuze ati: “Namaze kuronka ako gapapuro kandi nagasomye. Ndabashigikiye cane. Nta rindi dini nzi ryoburanira ukwizera kwaryo mu buryo butunganije neza nk’ubu. Ndakunda ukuntu mwambara, kandi mwama muvugana ubugenge. Biraboneka neza ko mwajijutse cane ku vyo mwemera. Mbona ko Imana iri kumwe namwe.”

 I Saint-Pétersbourg, umugabo umwe yavuze ko yari amaze kuronka ako gapapuro, baramubajije nimba yarashimye ivyo yasomye. Yishuye ati: “Egome. Igihe nariko ndagasoma, naramerereje ndakorora n’amosozi. Nyokuru yaraburabujwe [mu gihe c’intwaro y’Abasoviyeti] kandi yarambariye vyinshi ku bijanye n’abantu bari bapfunganywe na we. Hariyo inkozi z’ikibi nyinshi, ariko hariyo n’abantu ata co bazira bari bapfunzwe bahorwa ukwizera kwabo. Nibaza ko bose bakwiye kumenya ivyabaye. Muriko rero mukora igikorwa ciza.”

Ivyabona vya Yehova baraha agaciro umwidegemvyo bari bafise mu Burusiya mu myaka 20 iheze. Naho ari ukwo, barazi neza ukuntu vyoroshe ko bakwa umwidegemvyo. Isekeza riherutse kuba ryo kubasiga iceyi ryoba ryerekana ko Uburusiya buriko busubira inyuma buja mu kindi kiringo kibi c’ukuburabuza abantu? Nta wubizi, reka tubirorere.

Ariko Ivyabona vya Yehova biyemeje bashikamye kubandanya gukora igikorwa cabo co kwamamaza ubutumwa bw’amahoro kandi butanga icizigiro bwo muri Bibiliya, naho hoza iki. Ka gapapuro kadasanzwe karavuga mu ncamake umwiyemezo wabo gati: “Ukuburabuzwa nta co kuzokwigera gushikako. Ntituzoreka kuvuga tubigiranye ubugenge n’icubahiro ivyerekeye Yehova Imana n’Ijambo ryiwe Bibiliya. (1 Petero 3:15) Ntitwahagaritse mu gihe ca ya mabi y’agahomerabunwa twakorerwa mu Budagi bw’Abanazi, ntitwahagaritse muri ya misi mibi y’ukuburabuzwa muri iki gihugu cacu, kandi n’ubu ntituzohagarika.​—Ivyakozwe 4:18-20.”