Zaburi 12:1-8
-
Yehova agira ahaguruke
-
Amajambo y’Imana aratyoroye (6)
-
Ku mukuru w’abaririmvyi: ikwiye kuba iregereye kw’ijwi ryo hasi*. Ni zaburi ya Dawidi.
12 Ewe Yehova, nunkize kuko intahemuka zaherengeteye.Abantu b’abizigirwa bahonye.
2 Abantu baguma babwirana ibinyoma,baguma basigana inkore ku maso*, bakavugana udutima tubiri+.
3 Yehova azoca iminwa y’abantu bose basigana inkore ku maso,hamwe n’ururimi rw’abantu bose biyemera+,
4 barya birata ngo: «Ururimi rwacu ruzotuma dutsinda.
Turashobora kuvuga ivyo dushatse vyose.Ni nde yoshobora kutuganza+?»
5 «Kubera yuko abagorwa bariko baracinyizwa,kubera yuko abakene bariko baraboroga+,ngira mpaguruke», ni ko Yehova avuze,
«ngira ndabatabare abariko barabahahaza.»
6 Amajambo ya Yehova aratyoroye+.Ameze nk’ifeza zatyorowe incuro indwi mw’ifuru y’ibumba*.
7 Ewe Yehova, uzobazigama+.Umwe wese uzomukingira ababisha b’iki gihe ibihe vyose.
8 Ababisha baguma bitemberera ata nkomanzi,kubera yuko abantu bashira imbere ibibi vy’agahomerabunwa+.
Utujambo tw'epfo
^ Mu giheburayo havuga ngo «kuri sheminiti.» Raba Insiguro y’amajambo (Sheminiti).
^ Mu giheburayo havuga ngo «bavugana akarimi gasosa.»
^ Hashobora kandi kuvugwa ngo «mw’ifuru ishongesha ivyuma yubatswe hasi.»
