Mu 1987, Lyman Swingle, umwe mu bari bagize Inama Nyobozi y’Ivyabona vya Yehova, yarashikirije insiguro abantu 63.580 bari bakoraniye mu kibanza c’inkino Plaza Monumental mu gisagara ca Valencia muri Venezuwela. Benshi muri bo bari baraye baragenda n’amabisi baje kumwumviriza. Umuvukanyi Swingle yabwiye isinzi ryari aho ati: “Ntimukiri agashami gatoyi. Ubu muri ishami rigereranye. Kandi ndabihweje, nta gihe kinini gisigaye mutagiye mu mugwi w’amashami afise abavugabutumwa 100.000!”

Mu 1987, muri Venezuwela hari abavugabutumwa barenga 38.000, ni ukuvuga Ivyabona vya Yehova bariko baramamaza inkuru nziza y’Ubwami bw’Imana. Muri ico gihe, ibihugu umunani vyonyene ni vyo vyari bifise abavugabutumwa barenga 100.000.

Iyongerekana ry’Ivyabona vya Yehova kw’isi yose ryamye ritangaje. Inyuma y’Intambara ya mbere y’isi yose, ibihumbi bikeyi gusa ni bo bariko baramamaza ku mugaragaro Ubwami bw’Imana. Ivyo vyarahindutse. Igitabu c’umwaka c’Ivyabona vya Yehova co mu 1943 kigira giti: “Raporo yose hamwe yo mu 1942, naho ituzuye kubera ingorane yo guhanahana amakuru, ni nziza cane . . . , kuko yerekana ko kw’isi yose hari abavugabutumwa barenga 106.000 bagira uruhara mu gikorwa [co kwamamaza inkuru nziza].” Mbere no mu ntureka y’Intambara ya kabiri y’isi yose, abantu benshi barakiriye neza ukuri kwo muri Bibiliya. Mu 1950, igihugu ca Leta Zunze Ubumwe za Amerika conyene cararengeje abavugabutumwa 100.000.

Igihugu cakurikiye gushikana abavugabutumwa 100.000 cabaye Nijeriya mu 1974.

Mu mwaka wakurikiye, igitigiri c’abavugabutumwa muri Brezile no mu Budagi cararenze 100.000. Iryo yongerekana ryabaye muri ivyo bihugu bine biri mu turere dutandukanye two kw’isi rirerekana ko ukuri kwo muri Bibiliya kwariko kurakirwa neza kw’isi yose.

Kw’isi yose, igitigiri c’abantu bakira inkuru nziza kiguma congerekana. Ivyo birahuye n’ivyo Bibiliya yari yaravuze iti: “Umutoyi azocika igihumbi, uwo hasi na we acike ihanga rikomeye. Jewe Yehova, nzovyihutisha mu gihe cavyo.”​—Yesaya 60:22.

Twisunze raporo yo mu 2014, ibihugu bimaze kurenza Ivyabona 100.000 ni 24. Aho harimwo na Venezuwela, ikaba yashikanye ico gitigiri kidasanzwe mu 2007. Kw’isi yose hari amashengero 115.416 y’Ivyabona vya Yehova hamwe n’abavugabutumwa 8.201.545.