Thušang Banna go Gola Moyeng

“Go tloga bjale go ya pele o tla be o swara batho ba phela.”—LUKA 5:10.

1, 2. (a) Banna ba ile ba arabela bjang molaetšeng wa Jesu wa boboledi? (b) Go tla ahlaahlwa eng sehlogong se?

NAKONG ya ge Jesu le barutiwa ba gagwe ba le leetong la go dira boboledi go phatša Galilea, ba ile ba namela sekepe gore ba ye lefelong leo le lego lekatana. Eupša mašaba a ile a ba šala morago ka maoto. Bao ba ilego ba tla letšatšing leo e be e le ba palo ya “mo e ka bago banna ba dikete tše hlano (5 000), go sa akaretšwe basadi le bana.” (Mat. 14:21) Lebakeng le lengwe gape, lešaba la batho le ile la tla go Jesu, le nyaka go alafša le go mo kwa a bolela. Gare ga bona go be go na le “banna ba dikete tše nne (4 000) ge go sa balwe basadi le bana.” (Mat. 15:38) Go molaleng gore banna ba bantši ba be ba le gare ga batho bao ba ilego ba tla go Jesu gomme ba bontšha gore ba kgahlwa ke thuto ya gagwe. Ge e le gabotse, o be a letetše gore ba bangwe ba bantši ba arabele, ka gobane ka morago ga go dira gore barutiwa ba gagwe ba sware dihlapi ka mohlolo, Jesu o ile a botša morutiwa wa gagwe Simone gore: “Go tloga bjale go ya pele o tla be o swara batho ba phela.” (Luka 5:10) Barutiwa ba gagwe ba be ba tla theošetša malokwa a bona ka lewatleng la seswantšhetšo leo le nago le batho gomme ba letele gore ba tla swara banna ba bantši.

² Ka mo go swanago lehono, banna ba kgahlwa ke molaetša wa Mangwalo woo re o bolelago gomme ba arabela gabotse. (Mat. 5:3) Lega go le bjalo, banna ba bantši ba a dikadika gomme ba palelwa ke go gola moyeng. Re ka ba thuša bjang? Le ge Jesu a se a rulaganya bodiredi bjo bo kgethegilego bja gore go nyakwe banna feela, o ile a bolela ka ditaba tšeo di bego di tshwenya banna ba mehleng ya gagwe. Ka go diriša mohlala wa gagwe, anke re hlahlobeng kamoo re ka thušago banna go swaragana le dilo tše tharo tšeo di ba tshwenyago lehono: (1) ditaba tša boiphedišo, (2) go boifa seo batho ba bangwe ba se naganago le (3) go ikwa ba sa ikholofele.

Ditaba tša Boiphedišo

3, 4. (a) Banna ba bantši ba tshwenyegile kudu ka eng? (b) Ke ka baka la eng banna ba bangwe ba etiša pele ditaba tša boiphedišo go ena le go phegelela dilo tša moya?

³ Monna yo mongwe wa bamangwalo o ile a re go Jesu: “Morutiši, ke tla go latela kae le kae mo o tlago go ya gona.” Lega go le bjalo, ge Jesu a be a mmotša gore “Morwa wa motho ga a na mo a ka latšago hlogo ya gagwe gona,” monna yoo o ile a thoma go belaela. Go bonagala go se kgonthišege ga gagwe gore o tla hwetša bjang dijo goba gore o tla latša kae hlogo di ile tša dira gore a belaele, ka gobane ga go bonagale a ile a fetoga molatedi wa Kriste.—Mat. 8:19, 20.

⁴ Gantši banna ba etiša pele taba ya go šireletšega ka tša ditšhelete go ena le gore ba phegelele dilo tša moya. Bontši bja bona ba etiša pele taba ya go hwetša thuto e phagamego le go šoma mošomo o lefago tšhelete e ntši. Go ya kamoo ba naganago ka gona, mohola wa go dira tšhelete ke o mogolo kudu e bile o bontšha go ba le tlhaologanyo go feta mehola le ge e le efe yeo e ka tlišwago ke go ithuta Mangwalo le go nyaka go ba le tswalano ya kgauswi le Modimo. Ba ka kgahlwa ke seo Beibele e se rutago, eupša “dipelaelo tša lefase le gotee le matla a forago a mahumo” di bipa kgahlego le ge e le efe yeo ba ka bago ba na le yona. (Mar. 4:18, 19) Ela hloko kamoo Jesu a thušitšego barutiwa ba gagwe gore ba lokiše tsela yeo ba bego ba lebelela dilo tšeo di tlago pele bophelong bja bona.

5, 6. Ke eng seo se thušitšego Andrea, Petro, Jakobo le Johane go lokiša pono ya bona ka dilo tšeo di tlago pele bophelong magareng ga go tšea karolo modirong wa boboledi le taba ya boiphedišo?

⁵ Andrea le Simone Petro ngwanabo e be e le badirišani kgwebong ya go rea dihlapi. Johane,  Jakobo ngwanabo le tatago bona Tsebedeo, le bona e be e le badirišani kgwebong ya dihlapi. Kgwebo ya bona e be e atlegile ka mo go lekanego gore ba thwale banna ba bangwe. (Mar. 1:16-20) Ge Andrea le Johane ba be ba thoma go tseba ka Jesu lekgeng la mathomo go tšwa go Johane Mokolobetši, ba ile ba kgodišega gore ba hweditše Mesia. Andrea o ile a botša Simone Petro ngwanabo ditaba tšeo, gomme go ka direga gore Johane le yena o ile a botša Jakobo ngwanabo. (Joh. 1:29, 35-41) Dikgweding tše di latetšego, ka bone bja bona ba ile ba fetša nako le Jesu ge a dutše a dira boboledi Galilea, Judea le Samaria. Ke moka barutiwa bao ba bane ba ile ba boela kgwebong ya bona ya go rea dihlapi. Ba be ba kgahlegela ditaba tša moya, eupša bodiredi e be e se selo se segolo seo ba bego ba tshwenyegile ka sona.

⁶ Nakwana ka morago, Jesu o ile a laletša Petro le Andrea gore ba mo latele gomme e be “barei ba batho.” Ba ile ba arabela bjang? “Gateetee ba tlogela malokwa a bona ba mo latela.” Jakobo le Johane le bona ba ile ba dira se se swanago. “Gateetee ba tlogela sekepe le tatago bona ba mo latela.” (Mat. 4:18-22) Ke’ng seo se thušitšego banna ba gore ba tsenele bodiredi bja nako e tletšego? Na ba be ba gapilwe ke maikwelo, ba dirile phetho ka lephakuphaku? Le gatee! Dikgweding tšeo di bego di sa tšwa go feta, banna ba ba ile ba theetša Jesu, ba mmona a dira mehlolo, ba bona kamoo a bego a fišegela toko ka gona, gomme ba lemoga kamoo batho ba bego ba arabela ka gona modirong wa gagwe wa boboledi. Ka baka leo, tumelo ya bona go Jehofa le go mmota ga bona di ile tša matlafala!

7. Re ka thuša bjang barutwana ba Beibele go bota taba ya gore Jehofa o kgona go hlokomela batho ba gagwe?

⁷ Re ka ekiša bjang Jesu tabeng ya go thuša barutwana ba rena ba Beibele gore ba bote Jehofa? (Die. 3:5, 6) Tsela yeo re rutago ka yona e kgoma kudu karabo ya potšišo yeo. Ge re ba ruta, re ka gatelela kholofetšo ya Modimo ya gore o tla re šegofatša kudu ge e ba re etiša dikgahlego tša Mmušo pele. (Bala Maleaki 3:10; Mateo 6:33.) Le ge re ka diriša mangwalo a fapafapanego go gatelela kamoo Jehofa a hlokomelago batho ba gagwe ka gona, ga se ra swanela go tšeela fase kamoo mohlala woo re o beago o nago le matla ka gona. Go botša barutwana ka diphihlelo tša rena tša bophelo go ka ba thuša kudu gore ba ithekge ka Jehofa. Re ka ba botša le ka diphihlelo tše di kgothatšago tšeo re di badilego ka dikgatišong tša rena. *

8. (a) Ke ka baka la’ng go le bohlokwa gore morutwana wa Beibele a ‘latswe a be a bone gore Jehofa o lokile’? (b) Re ka thuša bjang morutwana wa rena go bona ka boyena go loka ga Jehofa?

⁸ Go ba le tumelo e matla go akaretša se se fetago go fo bala le go kwa kamoo ba bangwe ba ilego ba bona ge Jehofa a ba šegofatša. Morutwana wa Beibele le yena o swanetše go bona ka boyena ge Jehofa a mmontšha gore o lokile. Mopsalme o opetše ka gore: “Latswang le be le boneng gore Jehofa o lokile; go thaba monna yo a tšhabelago go yena.” (Ps. 34:8) Re ka thuša bjang morutwana go bona gore Jehofa o lokile? A re re morutwana yo a nago le mathata a ditšhelete o katanela go lahla mekgwa e mebe, e bjalo ka go kgoga, go petšha goba go nwa kudu. (Die. 23:20, 21; 2 Bakor. 7:1; 1 Tim. 6:10) Na go ruta ga gago morutwana go rapelela gore Modimo a mo thuše go lahla mokgwa woo o mobe go ka se mo thuše go bona go loka ga Jehofa? Le gona nagana ka seo se ka diregago ge re kgothaletša morutwana gore a etiše dilo tša  moya pele bophelong ka gore a dire nako ya go ithuta Beibele beke le beke le go lokišetša diboka tša Bokriste le go ba go tšona. Ruri ge a dutše a bona ka boyena ge Jehofa a šegofatša maiteko a gagwe, seo se tla matlafatša tumelo ya gagwe!

Go Boifa Seo Batho ba Bangwe ba se Naganago

9, 10. (a) Ke ka baka la’ng Nikodemo le Josefa wa Arimathea ba ile ba uta taba ya gore ba rata Jesu? (b) Ke ka baka la’ng banna ba bangwe lehono ba dikadika go latela Kriste?

⁹ Banna ba bangwe ba ka dikadika go latela Kriste ka botlalo ka baka la kgateletšo ya dithaka. Nikodemo le Josefa wa Arimathea ba ile ba uta taba ya gore ba rata Jesu ka gobane ba be ba boifa seo Bajuda ba bangwe ba bego ba ka se bolela goba ba se dira ge ba be ba ka tseba ka taba yeo. (Joh. 3:1, 2; 19:38) Poifo yeo ya bona e be e se ya boikgopolelo. Mafelelong lehloyo leo baetapele ba bodumedi ba bego ba hloile Jesu ka lona le ile la gola go fihla bokgoleng bja gore motho le ge e le ofe yo a bego a bolela gore o a mo dumela, o be a lelekwa sinagogeng.—Joh. 9:22.

¹⁰ Mafelong a mantši lehono, ge e ba monna a thoma go kgahlwa ke ditaba tša Modimo, Beibele goba bodumedi, a ka tlaišwa ke bašomigotee le yena, bagwera ba gagwe goba ba leloko. Mafelong a mangwe, go ka ba gwa ba kotsi ge motho a ka bolela gore o fetoša bodumedi bja gagwe. Kgateletšo ya dithaka e ka ba e matla kudu ge monna a hlankela sešoleng, a le dipolitiking goba e le yo mongwe wa baetapele setšhabeng sa gabo. Ka mohlala, monna yo mongwe kua Jeremane o dumetše ka gore: “Seo lena Dihlatse le se rutago ka Beibele ke therešo. Eupša ge e ba ke fetoga Hlatse bošegong bjo, ge go esa batho ka moka ba tla be ba tseba ka taba yeo. Batho ba tla nagana’ng ka nna mošomong, go akaretša le baagišani ba ka le lekgotla leo lapa la ka le lego go lona? Seo nka se se kgotlelele.”

11. Jesu o thušitše bjang barutiwa ba gagwe gore ba se ke ba boifa batho?

¹¹ Le ge go be go se le o tee wa baapostola ba Jesu yo e bego e le lefšega, ka moka ga bona ba be ba na le bothata bja go boifa batho. (Mar. 14:50, 66-72) Jesu o ba thušitše bjang gore ba dire tšwelopele go sa šetšwe kgateletšo e kgolo ya dithaka tša bona? Jesu o ile a gata megato ya go lokišeletša barutiwa ba gagwe go lebeletšana le kganetšo yeo ba bego ba tlo lebana le yona ka morago. O itše: “Go thaba lena neng le neng ge batho ba le hloya, le neng le neng ge ba le hlaola, ba le goboša gomme ba nyatša leina la lena bjalo ka ge eka ke le lebe ka baka la Morwa wa motho.” (Luka 6:22) Jesu o ile a lemoša balatedi ba gagwe gore ba swanetše go letela go gobošwa. Kgobošo le ge e le efe e be e tla tla “ka baka la Morwa wa motho.” Le gona Jesu o ile a ba kgonthišetša gore Modimo o be a tla ba thekga ge feela ba be ba ithekgile ka Yena gore a ba thuše le go ba nea matla. (Luka 12:4-12) Go oketša moo, Jesu o ile a kgothaletša bao ba bego ba sa tšwa go ba badumedi gore ba tlwaelane ka bolokologi le barutiwa ba gagwe gomme e be bagwera.—Mar. 10:29, 30.

12. Ke ka ditsela dife re ka thušago barutwana ba sa tšwago go kopanela gore ba se ke ba boifa batho?

¹² Le rena re swanetše go thuša barutwana ba rena ba Beibele gore ba se ke ba boifa batho. Gantši go bonolo go lebeletšana le tlhohlo ge e ba o e letetše. (Joh. 15:19) Ka mohlala, go re’ng o sa thuše morutwana wa gago go lokišetša dikarabo tše bonolo le tše kwagalago tšeo di theilwego Beibeleng  tša dipotšišo goba dikganetšo tšeo bašomigotee le yena goba ba bangwe ba ka di rotošago? Go oketša tabeng ya gore re be mogwera wa gagwe, re ka mo tsebiša ditho tše dingwe tša phuthego, kudukudu tšeo di ka bago di na le selo seo di swanago le yena ka sona. Se segolo le go feta, re swanetše go mo ruta go rapela ka mehla go tšwa pelong. Se se ka mo thuša gore a batamele Modimo gomme a dire gore Jehofa e be Sebo sa gagwe le Leswika la gagwe.—Bala Psalme 94:21-23; Jakobo 4:8.

Go Ikwa ba sa Ikholofele

13. Maikwelo a go se ikholofele a ka dira bjang gore ba bangwe ba dikadike go tšea karolo dilong tša moya?

¹³ Banna ba bangwe ba dikadika go tšea karolo dilong tša moya ka ge ba sa kgone go bala gabotse goba ba sa kgone go bolela ka go thelela goba ba na le dihlong ka tlhago. Banna ba bangwe ga ba ikwe ba lokologile go ntšha sa mafahleng a bona goba go bolela dipono tša bona ge ba le gare ga batho ba bangwe. Taba ya gore ba swarelwe thuto, ba arabe dibokeng tša Bokriste, goba ba botše ba bangwe seo ba se dumelago e ka bonala e le selo se boima go bona. Ngwanabo rena yo mongwe wa Mokriste o dumela ka gore: “Ge ke be ke sa le yo monyenyane, ke be ke tla phakiša ka ya mojakong wa motho, ka itira tše nkego ke a kokota, gomme kapelapela ke tloge moo ka setu, ke holofetše gore ga go motho yo a tlago go nkwa goba go mpona. . . . Taba ya gore ke be ke swanetše go tsena ka ntlo le ntlo e be e mpolaiša mala.”

14. Ke ka baka la’ng barutiwa ba Jesu ba paletšwe ke go fodiša mošemane yo a bego a tlaišwa ke motemona?

¹⁴ Nagana ka go se ikholofele moo go ilego gwa wela barutiwa ba Jesu ge ba be ba palelwa ke go alafa mošemane yo a bego a tlaišwa ke motemona. Tatagwe o ile a tla go Jesu gomme a re go yena: “Morwa wa ka . . . o na le bolwetši bja go wa gomme o a babja, gobane o wela gantši mollong le ka meetseng, ke mo tlišitše go barutiwa ba gago, eupša ba paletšwe ke go mo fodiša.” Jesu o ile a leleka motemona yoo, ka go re’alo a fodiša mošemane yoo. Ka morago barutiwa ba gagwe ba ile ba tla go Jesu ba mmotšiša gore: “Ke ka baka la’ng re se ra kgona go leleka motemona yola?” Jesu o ile a ba araba ka gore: “Ke ka baka la tumelo ya lena e nyenyane. Gobane ruri ke re go lena, ge e ba le na le tumelo e lekanago le thoro ya sehlare sa mosetata, le tla re go thaba ye: ‘Tloga mo o ye mola,’ ke moka ya tloga gomme go ka se be le seo se le palelago.” (Mat. 17:14-20) Go nyakega gore motho a be le tumelo go Jehofa e le gore a fenye mapheko ao a lekanago le dithaba. Go direga’ng ge e ba motho a lahlegelwa ke pono yeo gomme a thoma go ithekga ka bokgoni bja gagwe? Ge a palelwa ke go atlega o feleletša a se sa ikholofela.

15, 16. Re ka thuša bjang morutwana wa Beibele gore a fenye maikwelo a go se ikholofele?

¹⁵ Tsela e kaone ya go thuša motho yo a tlaišwago ke maikwelo a go se ikholofele ke go mo kgothaletša gore a dule a nagana ka Jehofa go e na le go nagana ka yena ka noši. Petro o ngwadile gore: “Ikokobetšeng tlase ga seatla se matla sa Modimo gore a le godiše nakong e swanetšego; ge le dutše le lahlela dipelaelo tša lena ka moka go yena.” (1 Pet. 5:6, 7) Seo se nyaka gore re thuše morutwana wa rena wa Beibele gore a hlagolele bomoya bja gagwe. Motho yo a ratago dilo tša moya o tšeela godimo ditaba tša moya. O rata Lentšu la Modimo gomme o bonagatša “dika tšeo di enywago ke moya” bophelong bja gagwe. (Bagal. 5:22, 23) O phela ka thapelo. (Bafil. 4:6, 7) Go oketša moo, o ithekga ka Modimo gore a mo nee sebete le matla ao a a nyakago gore a lebeletšane le boemo le ge e le bofe goba go phetha kabelo le ge e le efe ka katlego.—Bala 2 Timotheo 1:7, 8.

¹⁶ Barutwana ba bangwe ba ka ba ba nyaka thušo e lebanyago ya go ithuta go bala gabotse, go boledišana le ba bangwe goba go nea dipolelo. Ba bangwe ba ka ikwa ba sa swanelege go hlankela Modimo ka baka la dilo tše mpe tšeo ba di  dirilego pele ga ge ba tseba Jehofa. Go sa šetšwe gore boemo ke bofe, go ba thuša ga rena ka lerato le ka go se fele pelo e ka ba e le sona seo ba se nyakago. Jesu o itše: “Batho ba ba phetšego gabotse ga ba nyake ngaka, eupša ba babjago ba a e nyaka.”—Mat. 9:12.

‘Reang’ Banna ba Oketšegilego

17, 18. (a) Re ka fihlelela bjang banna ba oketšegilego ge re le bodireding bja rena? (b) Re tla ithuta’ng sehlogong se se latelago?

¹⁷ Kganyogo ya rena ke gore banna ba oketšegilego ba arabele molaetšeng o kgotsofatšago kudu woo o hwetšwago feela ka Beibeleng. (2 Tim. 3:16, 17) Ka gona re ka fihlelela bjang banna ba oketšegilego ge re le bodireding bja rena? Ka go fetša nako e oketšegilego re nea bohlatse mantšiboa, mathapameng a mafelobeke goba matšatšing a maikhutšo ge bontši bja banna ba le gona ka gae. Ge e ba go kgonega, re ka kgopela go bolela le mong wa lapa leo. Anke re neeng bohlatse bjo bo sa rulaganyetšwago go banna bao re šomago le bona ge e ba maemo a dumela gomme re katanele go bolela le banna bao ba sa dumelego bao e lego balekane ba dikgaetšedi tšeo re nago le tšona ka phuthegong.

¹⁸ Ge re dutše re bolela le motho yo mongwe le yo mongwe yo re kopanago le yena, re ka kgodišega gore bao ba nago le dipelo tše di nago le tebogo ba tla arabela gabotse. Anke re se fele pelo ge re thuša bohle bao ba tlogago ba bontšha gore ba kgahlegela therešo. Lega go le bjalo, re ka thuša bjang banna bao ba kolobeditšwego ka phuthegong gore ba katanele go swanelegela boikarabelo ka mokgatlong wa Modimo? Sehlogo se se latelago se tla araba potšišo ye.

[Mongwalo wa tlase]

O be o tla Araba Bjang?

• Banna ba ka thušwa bjang go etiša dilo tša moya pele?

• Re ka thuša bjang bao ba sa tšwago go kopanela gore ba lebeletšane ka katlego le kgateletšo ya dithaka?

• Ke’ng seo se ka thušago ba bangwe gore ba fenye maikwelo a go se ikholofele?

[Dipotšišo tša Thuto]

[Seswantšho go letlakala 25]

Na o bula dibaka tša gore o boledišane le banna ka ditaba tše dibotse?

[Seswantšho go letlakala 26]

O ka lokišetša bjang morutwana wa Beibele go lebeletšana le diteko?