O ka Kgotlelela Bjang Bodireding?

NA O ile wa ikwa o lapile kudu moo o ilego wa nyaka go kgaotša go tšwela pele ka modiro wa boboledi? Kganetšo e matla, dipelaelo, bolwetši, kgatelelo ya dithaka goba go hloka batho bao ba arabelago go ka leka kgotlelelo ya rena. Lega go le bjalo, nagana ka mohlala wa Jesu. O ile a kgotlelela diteko tše matla kudu “ka baka la lethabo leo le bego le beilwe pele ga gagwe.” (Baheb. 12:2) O be a tseba gore ka go hlatsela gore ditatofatšo ka moka tšeo di bego di dirwa kgahlanong le Modimo e be e le tša maaka, o be a dira gore pelo ya Jehofa e thabe.—Die. 27:11.

Ka go kgotlelela bodireding, le wena o ka dira gore pelo ya Jehofa e thabe. Lega go le bjalo, go thwe’ng ge e ba mapheko a mangwe a bonala a go fetša matla moyeng? Krystyna, yo a tšofetšego le yo a babjago, o dumela ka gore: “Gantši ke ikwa ke lapile e bile ke nyemile moko. Mathata a-ka ao a sepedišanago le botšofadi, a bjalo ka go se phele gabotse mmeleng le go belaela mabapi le bophelo bja letšatši le letšatši, a ka fokodiša phišego ya-ka ka nakwana.” O ka kgotlelela bjang bodireding go sa šetšwe mapheko a?

Ekiša Baporofeta

E le gore ba kgotlelele modirong wa boboledi, bagoeledi ba botegago ba Mmušo ba ka katanela go ba le boemo bja kgopolo bja go swana le bja baporofeta ba bogologolo. Ka mohlala, nagana ka Jeremia. Ge a be a bitšwa gore a tle go hlankela e le moporofeta, mathomong o ile a dika-dika. Lega go le bjalo, Jeremia o ile a kgona go kgotlelela kabelo ya gagwe e thata ka nywaga e 40 ka baka la ge a ithutile go bota Modimo ka mo go feletšego.—Jer. 1:6; 20:7-11.

Henryk o matlafatšwa ke mohlala wa Jeremia. O re: “Nywageng e fetago e 70 yeo ke e feditšego ke le bodireding, ka nako e nngwe ke ile ka nyamišwa ke tsela yeo batho ba arabelago ka yona—bonaba bja bona goba go se šetše ga bona. Ka dinako tšeo, ke ikgopotša mohlala wa Jeremia. Go rata ga gagwe Jehofa le go tia moyeng di mo matlafaditše gore a tšwele pele a porofeta.” (Jer. 1:17) Rafał le yena o ile a kgothatšwa ke mohlala wa Jeremia. O re: “Jeremia o ile a ithekga ka Modimo go e na le go lebiša tlhokomelo go yena le maikwelong a gagwe. O ile a tšwela pele ka sebete go sa šetšwe bonaba bjo bo bego bo mo dikologile. Ke leka go dula ke nagana ka seo.”

Moporofeta yo mongwe yo mohlala wa gagwe o thušago ba bantši go kgotlelela bodireding ke Jesaya. Modimo o ile a mmotša gore batho ba naga ya gabo ba ka se mo theetše. Jehofa o itše: “Retetša ’pelo tša sethšaba sé, ’tsêbê tša bôná di thibalê.” Na go be go letetšwe gore Jesaya a palelwe? E sego go ya ka pono ya Modimo! Ge a be a kgethwa go ba moporofeta o ile a re: “Ké nna é, nthomê!” (Jes. 6:8-10) Jesaya o ile a kgomarela kabelo ya gagwe. Na o arabela ka tsela yeo taelong ya gore re dire boboledi?

E le gore re kgotlelele bodireding go sa šetšwe batho bao ba sa arabelego, bjalo ka ge Jesaya a dirile, re swanetše go phema go šetša dikarabelo tše sa kgahlišego tšeo re kopanago le tšona. Rafał o swaragana le go nyama ka tsela ye: “Ke leka go phema go lebiša tlhokomelo dipolelong tše di sa kgahlišego. Batho ba tšhemong yeo ke lego go yona ba na le tshwanelo ya go arabela ka tsela le ge e le efe yeo ba e nyakago.” Anna o oketša ka gore: “Ga ke dumelele monagano wa-ka go dula kudu dilong tše di sa kgahlišego goba tše di nyamišago. Se se nthušago go dira bjalo ke thapelo le go hlahloba temana ya letšatši pele ke e-ya tirelong ya tšhemo. Dikgopolo le ge e le dife tše di fošagetšego di a phumoga ka bjako.”

 Moporofeta Hesekiele o hlanketše kua Babilona gare ga mathopša a Bajuda a dinganga. (Hesek. 2:6) Ge nkabe moporofeta a ile a se botše batho lentšu la Modimo gomme motho yo kgopo a hwa a se a kwa temošo, Hesekiele o be a tla rwala boikarabelo. Jehofa o boditše Hesekiele gore: “Madi a xaxwe ke tlo a lata seatleng sa xaxo.”—Hesek. 3:17, 18.

Henryk o leka go ba le pono e swanago le ya Hesekiele, o re: “Ke nyaka go hlweka molatong wa madi a batho bohle. Maphelo a bohlokwa a batho a kotsing.” (Dit. 20:26, 27) Zbigniew le yena o na le maikwelo a swanago, o re: “Hesekiele o be a swanetše go tšwela pele go sa šetšwe seo ba bangwe ba bego ba se nagana. Se se nthuša go bona modiro wa boboledi go ya ka pono ya Mmopi.”

Ga o Noši

Ge o le modirong wa boboledi ga o noši. Go fo swana le moapostola Paulo, re ka re: “Re badirišani ba Modimo.” (1 Bakor. 3:9) Krystyna, yo a dumelago gore ka dinako tše dingwe o a nyama, o re: “Ke ka baka leo ke dulago ke lopa Jehofa gore a mphe matla. Ga a ke a nnyamiša.” Ee, re nyaka moya wa Modimo gore o re thekge bodireding bja rena!—Sak. 4:6.

Ge re le tirelong ya tšhemo, moya o mokgethwa le wona o re thuša go bontšha dika tša “dienywa tša moya.” (Bagal. 5:22, 23) Seo ka lehlakoreng le lengwe se re thuša go kgotlelela modirong wa boboledi go sa šetšwe seo se ka re diragalelago. Henryk o re: “Go tšea karolo tirelong ya tšhemo go nthuša go kaonefatša semelo sa-ka. Ke ithuta go se fele pelo le go naganela ba bangwe le go se langwe ka pela.” Go kgotlelela bodireding go sa šetšwe mathata a fapa-fapanego go ka go thuša go hlagolela dienywa tše dintši tša moya.

Jehofa o diriša barongwa ba gagwe go hlahla modiro wo wa moswananoši. (Kut. 14:6) Beibele e utolla gore go na le dibopiwa tše bjalo tša moya tše “dimiriate tša dimiriate le dikete tša dikete.” (Kut. 5:11) Ka taelo ya Jesu, barongwa ba thekga bahlanka ba Modimo lefaseng. Na o dula o gopola seo ge o le tirelong?

Anna o re: “Go naganišiša ka ntlha ya gore barongwa ba ba le rena bodireding go a nkgothatša.” “Ke tšeela godimo thekgo yeo ba e neago ka tlase ga bolebeledi bja Jehofa le Jesu.” Ke tokelo e kgolo gakaakang go dirišana le barongwa ba botegago!

Go thwe’ng ka bagoeledi-gotee le rena ba Mmušo? Re šegofaditšwe ka go tsebana le lešaba le legolo la Dihlatse tše di botegago. Ga go pelaelo gore o bone therešo ya seema sa Beibele se se rego: “Thsipi e kxaritša thsipi; le mahlô a batho a a kxaritšana.”—Die. 27:17.

Go šoma le ba bangwe bodireding go re nea sebaka se sebotse sa go bona mekgwa e šomago yeo e ka bago e mefsa go rena. Elżbieta o re, “Go šoma le bagoeledi ba fapa-fapanego go nnea sebaka sa go bontšha lerato go badumedi-gotee le go batho bao re kopanago le bona.” Leka go dira boboledi le bagoeledi ba fapa-fapanego. Se se tla dira gore bodiredi bja gago e be bjo bo kgahlišago.

Itlhokomele

Gore re dule re le mafolofolo bodireding, re swanetše go rulaganya gabotse, re be le lenaneo le lebotse la thuto ya motho ka noši gomme re khutše ka mo go lekanego. Ka mantšu a mangwe, re swanetše go itlhokomela moyeng le nameng.

Beibele e re: “’Kêlêllô tša serôtô di iša mokhoreng.” (Die. 21:5) Zygmunt, yo ga bjale a nago le nywaga e 88, o re: “Go ba le lenaneo le lebotse tirelong ya-ka go nthuša go dira gore tirelo ya-ka e be le morero. Ke rulaganya nako ya-ka ka kelohloko gore ke be le nako e lekanego ya go nea bohlatse.”

Tsebo e tseneletšego ya Mangwalo e a re matlafatša le go re hlamela bodiredi. Bjalo ka ge re nyaka go ja dijo tša nama gore re tšwele pele re phela, re swanetše go ja dijo tša moya ka mehla e le gore re tšwele pele re tšea karolo modirong wa boboledi. Go iphepa ka Lentšu la Modimo ka mehla le go ja ‘dijo ka nako e swanetšego’ go ka re matlafaletša bodiredi.—Mat. 24:45-47.

Elżbieta o ile a dira diphetogo tše dikgolo bophelong bja gagwe e le gore a ka kaonefatša bodiredi bja gagwe. O re: “Ke fokoditše kudu nako yeo ke e fetšago ke lebeletše thelebišene e le  gore ke be le nako e oketšegilego ya go lokišeletša bodiredi. Ge ke bala Beibele mantšiboeng a mangwe le a mangwe, ke nagana ka batho bao ke kopanego le bona tšhemong. Ke lebelela mangwalo le dihlogo tšeo di ka ba thušago.”

Go khutša ka mo go lekanego go ka go thuša go dula o matlafetše le go dira gore o tšee karolo bodireding ka mo go lekanego. Ka lehlakoreng le lengwe, nako e ntši ya boithabišo e ka senya bohlokwa bja mošomo wa gago. Andrzej, mogoeledi yo mafolofolo, o bolela gore: “Go se khutše ka mo go lekanego go dira gore motho a lape kudu, gomme go tloga go šala ganyenyane gore a nyame. Ke dira sohle seo nka se kgonago go phema seo.”—Mmo. 4:6.

Go sa šetšwe maiteko a rena, ke batho ba mmalwa feela bao ba amogelago ditaba tše dibotse. Lega go le bjalo, Jehofa a ka se ke a lebala modiro wa rena. (Baheb. 6:10) Gaešita le ge ba bantši ba sa nyake go boledišana le rena, ba ka botša ba bangwe ka ketelo ya rena ka morago ga ge re sepetše. Mafelelo a ka swana le seo re se balago mabapi le Hesekiele, gore: Batho ba tla “[tseba] xobane ba be ba na le moporofeta.” (Hesek. 2:5) Ge e le gabotse, bodiredi bja rena ga bo bonolo, eupša re holwa kudu ke bjona gomme le batho bao ba bo amogelago ba tla holega.

Zygmunt o re: “Go tšea karolo bodireding go re thuša go apara motho yo mofsa le go bontšha gore re rata Modimo le baagišani ba rena.” Andrzej o oketša ka gore: “Ke tokelo go tšea karolo modirong wo wa go phološa maphelo. O ka se ke wa bušeletšwa gape ka tsela ye goba wa dirwa ka tlase ga maemo a swanago.” Le wena o ka hwetša ditšhegofatšo tše dintši ka baka la go kgotlelela ge o le bodireding lehono.—2 Bakor. 4:1, 2.

[Diswantšho go letlakala 31]

Go hlokomela dinyakwa tša rena tša nama le tša moya go re thuša go kgotlelela bodireding