1-2. Ke dilo dife tšeo di bego di ka dira gore Mareka le Timotheo ba se ke ba nyaka go hlankela Jehofa ka mo go oketšegilego?

 BANA babo rena ba baswa, na le nyaka go hlankela Jehofa ka mo go oketšegilego le go thuša ba bangwe ka phuthego ya gabo lena? Ga go pelaelo gore le nyaka go dira bjalo. Go kgahliša kudu go bona bana babo rena ba bantšhi ba baswa ba ikemišeditše go thuša ba bangwe. (Ps 110:3) Le ge go le bjalo, go ka no se be bonolo gore o hlankele Jehofa ka mo go oketšegilego. Na o tšhaba go oketša tirelo ya gago ka ge ditlalemeso di sa tsebje? Na o kile wa gana go amogela kabelo e itšego ka ge o nagana gore o ka se e kgone? Ge eba o ile wa ikwa ka tsela yeo, tseba gore ga o noši.

² Mareka le Timotheo le bona ba ile ba ikwa ka tsela yeo. Eupša ga se ba dumelela go se tsebe ditlalemeso goba go se be le phihlelo go ba dira gore ba ikwe ba sa swanelege go oketša tirelo ya bona go Jehofa. Go ka direga gore Mareka o be a dula le mmagwe ka ntlong e botse ge moapostola Paulo le Baranaba ba be ba mo kgopela gore a sepele le bona leetong la bona la mathomo la boromiwa. (Dit. 12:​12, 13, 25) Eupša Mareka o ile a tloga ga gabo gore a hlankele Jehofa ka mo go oketšegilego. O ile a hudugela Antiokia pele ke moka a sepela le Paulo le Baranaba go ya mafelong a kgole. (Dit. 13:​1-5) Ka mo go swanago, go ka direga gore Timotheo le yena o be a dula le batswadi ba gagwe ge Paulo a be a mo kgopela gore a ye go dira bodiredi le yena. Ka ge Timotheo e be e sa le yo moswa ebile a se na phihlelo,  go ka direga gore o be a ikwa a sa swanelege go sepela le Paulo. (Bapiša 1 Bakorinthe 16:​10, 11 le 1 Timotheo 4:12) Le ge go le bjalo, o ile a dumela go sepela le Paulo ebile o ile a šegofatšwa ka ditsela tše dintšhi ka ge a be a hlankela Jehofa.—Dit. 16:​3-5.

3. (a) Re tseba bjang gore Paulo o be a tšeela godimo Mareka le Timotheo? (2 Timotheo 4:​6, 9, 11) (Bona le diswantšho.) (b) Re tlo araba dipotšišo dife sehlogong se?

³ Mareka le Timotheo ba ile ba ithuta go phethagatša maikarabelo a mantšhi ka phuthegong e sa le ba baswa. Ge Paulo a be a le kgauswi le go bolawa, o ile a kgopela baswa ba gore ba tle go yena ka ge a be a ba tšeela godimo kudu. (Bala 2 Timotheo 4:​6, 9, 11.) Ke dika dife tšeo Timotheo le Mareka ba bego ba e na le tšona tšeo di dirilego gore Paulo a ba tshepe? Bana babo rena ba baswa ba ka ba ekiša bjang? Keletšo ya Paulo e ka ba hola bjang lehono?

EKIŠA MAREKA KA GO IKEMIŠETŠA GO HLANKELA JEHOFA LE BA BANGWE

4-5. Mareka o ile a bontšha bjang gore o be a ikemišeditše go hlankela batho ba bangwe?

⁴ Go ya ka sengwalwa se sengwe, go hlankela ba bangwe go akaretša go thuša batho le go tšwela pele o dira seo le ge go ka ba boima. Mareka o beile mohlala o mobotse tabeng yeo. Go ka direga gore Mareka o be a kwele bohloko ge Paulo a be a gana go ya le yena leetong la bobedi la go yo dira boboledi. (Dit. 15:​37, 38) Eupša seo ga se sa dira gore Mareka a tlogele go hlankela bana babo le dikgaetšedi.

⁵ Mareka le motswala wa gagwe Baranaba, ba ile ba ya go hlankela Jehofa lefelong le lengwe. Ka morago ga mengwaga e 11, Mareka e be e le yo mongwe wa batho bao ba ilego ba kgothatša Paulo ge a be a golegilwe kua Roma. (Fil. 23, 24) Go bontšha gore Paulo o be a leboga thekgo yeo Mareka a mo filego yona, o ile a re Mareka o be a mo thuša le go mo ‘matlafatša.’—Bakol. 4:​10, 11.

6. Mareka o ile a holega bjang ka go fetša nako e ntšhi le Bakriste bao ba godilego moyeng? (Bona mongwalo wa tlase.)

⁶ Mareka o ile a holega kudu ka ge a be a gwerana le Bakriste bao ba gotšego moyeng. Ka morago ga gore Mareka a fetše nako e ntšhi a na le Paulo kua Roma, o ile a ya Babilona le Moapostola Petro. Ba ile ba tlwaelana kudu moo Petro a ilego a re “Mareka [ke] morwa wa ka.” (1 Pet. 5:13) Ge ba be ba dutše ba šoma  mmogo, go ka direga gore Paulo o be a mmotša dilo tše dintšhi tšeo di kgahlišago ka bophelo bja Jesu le bodiredi bja gagwe tšeo Mareka a ilego a di ngwala Ebangeding ya gagwe. a

7. Ngwanabo rena Seung-Woo, o ile a ekiša bjang mohlala wa Mareka? (Bona le seswantšho.)

⁷ Mareka o be a swaregile kudu ka go hlankela Jehofa ebile a fetša nako le Bakriste bao ba godilego. O ka ekiša Mareka bjang? Ge eba o sa swanelege go ba mogolo goba mohlanka wa bodiredi gona bjale, o se ke wa fela pelo. Leka go hwetša ditsela tše dingwe tšeo o ka hlankelago Jehofa ka tšona le go thuša ba bangwe ka phuthegong. Nagana ka mohlala wa ngwanabo rena Seung-Woo, yoo ga bjale a hlankelago e le mogolo. Ge e be e sa le moswa, o be a rata go ipapetša le bana babo rena ba bangwe ba baswa. Ba bangwe bona ba be ba hwetša dikabelo tše dingwe ka phuthegong gomme yena a sa di hwetše. Seo se ile sa mo kweša bohloko gomme a botša bagolo kamoo a ikwago ka gona. Yo mongwe wa bagolo o ile a mo kgothaletša gore a dire sohle seo a ka se kgonago go hlankela ba bangwe le ge go ka se be le motho yo a bonago dilo tše dibotse tšeo a di dirago. Keletšo yeo ile ya thuša Seung-Woo gore a dule a ikemišeditše go thuša batšofadi le bao hlokago senamelwa sa go ya dibokeng. O re: “Ge ke nagana ka taba yeo, ke ile ka kwešiša gabotse gore go hlankela batho ba bangwe go be go e ra gore’ng. Ruri go thuša batho ba bangwe go be go dira gore ke thabe.”

EKIŠA TIMOTHEO KA GO BONTŠHA GORE O TSHWENYEGA KA BATHO BA BANGWE

8. Ke ka baka la’ng Paulo a ile a kgetha Timotheo gore a sepele le yena? (Bafilipi 2:​19-22)

⁸ Paulo o be a nyaka batho bao ba nago le sebete gore ba sepele le yena ge a be a boela metseng yeo a ilego a ganetšwa. O ile a thoma ka go kgetha Silase, yo e bego e le Mokriste yo a nago le phihlelo gore a sepele le yena. (Dit. 15:​22, 40) Ka morago o ile a kgetha Timotheo. Ke ka baka la’ng a ile mo kgetha? Ka gobane Timotheo o be a bolelwa gabotse. (Dit. 16:​1, 2) Lebaka le lengwe ke gore o be a tloga a na le taba le batho ba bangwe.—Bala Bafilipi 2:​19-22.

9. Timotheo o ile a bontšha bjang gore o tloga a na le taba le bana babo le dikgaetšedi?

⁹ Ge Timotheo a be a thoma go šoma le Paulo, o ile a bontšha gore o na le taba le batho ba bangwe. Ge Paulo a tloga Berea, o be a kgodišegile gore Timotheo o tla šala a kgothatša bana babo bao ba sa tšwago go ba Bakriste.  (Dit. 17:​13, 14) Ga go pelaelo gore Timotheo o ile a ithuta dilo tše dintšhi go Silase, yoo le yena a bego a šetše Berea. Ka morago, Paulo o ile a roma Timotheo a nnoši gore a yo kgothatša Bakriste ba motseng wa Thesalonika. (1 Bathes. 3:2) Ge nako e dutše e eya, Timotheo o ile a ‘lla le bao ba llago’ le go kwela bao ba tlaišegago bohloko. (Baroma 12:15; 2 Tim. 1:4) Bana babo rena ba baswa ba ka ekiša Timotheo bjang?

10. Ke’ng seo se thušitšego ngwanabo rena Woo Jae gore a kgone go bontšha batho ba bangwe gore o na le taba le bona?

¹⁰ Ngwanabo rena Woo Jae o ile a ithuta gore go bohlokwa go tshwenyega ka batho ba bangwe. Ge e be e sa le moswa, o be a thatafalelwa ke go boledišana le bana babo le dikgaetšedi bao ba godilego. Ge a fihla dibokeng o be a no ba dumediša fela ke moka a tloga. Mogolo yo mongwe o ile a mo kgothaletša gore a thome poledišano ka go botša bana babo gore o rata eng ka bona. Mogolo yoo o ile a mo kgothaletša le gore a nagane le ka dilo tšeo motho yo mongwe a ka bago a di rata. Woo Jae o ile a diriša keletšo yeo. Ga bjale ngwanabo rena Woo Jae ke mogolo. O re: “Gona bjale ke kgona go boledišana le batho ba mengwaga ya go fapafapana ka dilo tšeo di agago. Ke thabišwa ke go tseba dilo tšeo di tshwenyago batho ba bangwe, gomme ka kgona go ba thuša.”

11. Bana babo rena ba baswa ba ka bontšha bjang gore ba na le taba le batho ba bangwe? (Bona le seswantšho.)

¹¹ Bana babo rena ba baswa, le lena le ka kgona go bontšha batho ba bangwe gore le na le taba le bona. Ge le le dibokeng, iphe nako ya go boledišana le batho ka moka go sa šetšwe gore ba na le mengwaga e mekae le gore ba tšwa kae. Ba botšiše gore ba tsoga bjang ke moka o ba theetše, seo se tlo dira gore o bone kamoo o ka ba thušago ka gona. Mohlomongwe o ka hwetša gore banyalani bao ba godilego ba hloka thušo ya go šomiša JW Library^® goba ba hloka motho yo ba ka yago bodireding le yena. O ka ruta batho bao go diriša didirišwa tša bona tša elektroniki goba go ya le bona bodireding. O ka bea mohlala o mobotse ka phuthegong ge eba o thuša batho ba bangwe.

KELETŠO YA PAULO E KA GO HOLA

12. Keletšo yeo Paulo a e neilego Timotheo e ka hola bjang bana babo rena ba baswa?

¹² Paulo o ile a nea Timotheo keletšo yeo e ilego ya mo thuša bophelong le bodireding. (1 Tim. 1:18; 2 Tim. 4:5) Bana babo rena ba baswa, keletšo ya Paulo e ka le hola bjang? Bala mangwalo a mabedi ao Paulo a a ngwaletšego Timotheo gomme o a bale eka a ngwaletšwe  wena, ke moka o bone gore o ka a diriša bjang bophelong bja gago. Nagana ka mehlala yeo e latelago.

13. Re swanetše go dira’ng gore re dule re botegela Jehofa?

¹³ “O itlwaetše gomme pakane ya gago e be go bontšha boineelo go Modimo.” (1 Tim. 4:7b) Go bontšha boineelo go Modimo go bolela eng? Go bolela gore motho o botegela Jehofa le go dira seo se mo thabišago. Ka ge re belegwa re se na seka se, re swanetše go dira eng gore re be le sona? Lentšu la Segerika leo le fetoletšwego e le ‘go itlwaetša’ gantšhi le be le dirišwa go hlalosa tsela yeo boradipapadi ba bego ba itlwaetša ka yona pele ba ka ya go phadišana. Boradipapadi bao ba swanetše go dira dilo tšeo di tlago go ba thuša gore ba kgone go thopa sefoka. Ka tsela e swanago, le rena re swanetše go dira dilo tšeo di ka re thušago gore re be le segwera se sebotse le Jehofa.

14. Morero wa rena o mogolo e swanetše go ba ofe ge re bala Beibele? Nea mohlala.

¹⁴ Ge o dutše o itlwaetša go bala Beibele ka mehla, dula o gopola gore morero o mogolo wa go dira seo ke gore o batamele kgauswi le Jehofa. Ka mohlala, o ithuta’ng ka Jehofa ge o bala ka pego ya Jesu le lesogana la mohumi? (Mar. 10:​17-22) Lesogana leo le be le dumela gore Jesu e be e le Mesia eupša le be le se na tumelo e feletšego gore e ka ba molatedi wa gagwe. Le ge go le bjalo, Jesu o ile “a ikwa a rata lesogana leo” ebile o ile a boledišana le lona gabotse. Ga go pelaelo gore Jesu o be a nyaka gore lesogana leo le thabele go hlankela Modimo. Tsela yeo Jesu a ilego a ikwa ka yona ka lesogana le, e bontšha gabotse tsela yeo Jehofa le yena a bego a ikwa ka yona ka lona. (Joh. 14:9) Ge o dutše o naganišiša ka pego ye le maemo a gago o ka ipotšiša gore, ‘Nka dira’ng gore ke be le segwera se sebotse le Jehofa ke be ke thuše ba bangwe?’

15. Ke ka baka la’ng ngwanabo rena wa moswa a swanetše go naganišiša ka mohlala wo a o beelago ba bangwe? Nea mohlala (1 Timotheo 4:​12, 13)

¹⁵ “E ba mohlala o mo botse go bao ba botegago.” (Bala 1 Timotheo 4:​12, 13.) Paulo o ile a kgothaletša Timotheo gore a se ke a ba le bokgoni bja go bala le go ruta feela, eupša a be le dika tše dibotse tša go swana le lerato, tumelo le boitshwaro. Ka baka la’ng? Ka gobane seo motho a se dirago se bohlokwa kudu go feta seo a se bolelago. A re re o filwe polelo yeo e bolelago ka gore o ka bontšha bjang gore o na le mafolofolo bodireding. Ge eba o šoma ka thata bodireding o ka se be le dihlong tša go fa polelo yeo. Ge batho ba bona gore o bolela ka selo seo o se dirago ba tlo go theetša.—1 Tim. 3:13.

16. (a) Ke dikarolong dife tše tlhano tšeo baswa ba Bakriste ba ka beago mohlala go tšona? (b) Ngwanabo rena wa moswa a ka bea bjang mohlala o mobotse “ka dilo tšeo a di bolelago”?

¹⁶ Lengwalong la 1 Timotheo 4:​12, Paulo o boletše ka dilo tše tlhano tšeo bana babo rena ba baswa ba ka di dirago gore ba kgone go bea mohlala o mo botse. Ge o dira thuto ya motho ka noši, iphe nako ka go naganišiša ka dintlha tše tše tlhano. A re re o nyaka go bea mohlala o mo botse “ka seo o se bolelago.” Nagana ka dilo tšeo o ka di bolelago gore o kgothatše ba bangwe. Ge e ba o sa dula le batswadi ba gago, gore’ng o sa leke go bontšha gore o leboga dilo ka moka tšeo ba go direlago tšona? Ka morago ga diboka na o ka botša ngwanabo rena goba kgaetšedi yoo a bego a ena le polelo gore ke’ng seo o se ratilego ka polelo ya gagwe? O ka leka le go araba ka mantšu a gago ge o le dibokeng. Ge o šoma ka thata gore o bee mohlala o mobotse ka seo o se bolelago, batho ba bangwe ba tlo bona gore o kaonefatša dika tša Bokriste.—1 Tim. 4:15.

17. Ngwanabo rena wa moswa a ka thušwa ke’ng go fihlelela dipakane tša gagwe? (2 Timotheo 2:22)

¹⁷ “Ka gona tšhaba dikganyogo tša bofsa, eupša phegelela toko.” (Bala 2 Timotheo 2: 22.) Paulo o ile a kgothaletša Timotheo gore a bapalele kgole le selo le ge e le sefe seo se ka mo šitišago go hlankela Jehofa goba seo se ka senyago segwera ya gagwe le Jehofa. O ka ba o lemogile gore go na le dilo tše dingwe tšeo e sego phošo go di dira eupša wa hwetša o fetša nako e ntšhi o di dira go ena le go diriša nako yeo o hlankela Jehofa. Ka mohlala, nagana ka nako yeo o e fetšago o bapala dipapadi, o diriša inthanete, goba o bapala dipapadi tša dibidio. O ka fetša nako e ntšhi o hlankela Jehofa go e na le go swarega ka dilo tšeo. Mohlomongwe o ka ithaopela go thuša go hlokomela Holo ya Mmušo goba wa dira modiro wa boboledi ka teroli. Ge o dutše o dira dilo tše, o tlo hwetša bagwera bao ba ka go thušago go fihlelela dipakane tša gago.

O TLO THABELA BOPHELO GE E BA O KA THUŠA BA BANGWE

18. Ke ka baka la’ng re ka re Mareka le Timotheo ba phetše bophelo bjo bo kgotsofatšago le bjo bo thabišago?

¹⁸ Mareka le Timotheo ba ile ba itima dilo tše dintšhi gore ba thuše batho ba bangwe gomme seo se ile sa dira gore ba thabele bophelo. (Dit. 20:35) Mareka o ile a ya mafelong a go fapafapana gore a thuše bana babo le dikgaetšedi. O ile a ba a ngwala ka pego yeo e kgahlišago ka bophelo le bodiredi bja Jesu kriste. Timotheo o thušitše Paulo go hloma diphuthego tše dintšhi le go kgothatša bana babo le kgaetšedi. Ga go pelaelo gore Jehofa o be a bona dilo ka moka tšeo Mareka le Timotheo ba bego ba di dira gore ba mo thabiše.

19. Ke ka baka la’ng bana babo rena ba baswa ba swanetše go latela keletšo yeo Paulo a ilego a e nea Timotheo, gona seo se tlo ba hola bjang?

¹⁹ Lengwalo leo Paulo a ilego a le ngwalela mogwera wa gagwe wa moswa e lego Timotheo, le be le tloga le bontšha gore o a mo rata. Mangwalo a ao Jehofa a ilego a diriša Paulo go a ngwala, a bontšha gore Jehofa o le rata kudu lena bana babo rena ba baswa. O nyaka gore le mo hlankele le thabile. Ka gona dira’ng sohle seo le ka se kgonago go latela keletšo ya Paulo. Ge le ka dira bjalo, le tlo thabela go phela le go “[swarelela] ka go tia bophelong bja kgonthe” bjoo re tlago go bo hwetša nakong e tlago.—1 Tim. 6:​18, 19.