1-2. Mohlala wa moapostola Paulo o ka thuša bjang bagolo lehono?

 MOAPOSTOLA Paulo o be a rata bana babo. O ile a šoma ka thata gore a ba hlokomele. (Dit. 20:31) Seo se ile sa dira gore bana babo le dikgaetšedi ba mo rate kudu. Ka nako e nngwe ge bagolo ba Efeso ba ekwa gore ba ka se sa bona moapostola Paulo, go ile “gwa tsoga sello se segolo gare ga bona.” (Dit. 20:37) Lehono bagolo ba rata bana babo bona le dikgaetšedi kudu e bile ba dira sohle seo ba ka se kgonago go ba thuša. (Bafil. 2:16, 17) Ka dinako tše dingwe bagolo ba ka hwetša go le thata go dira dilo ka moka tšeo ba swanetšego go di dira. Ba ka thušwa ke eng?

² Bagolo ba ka ithuta mohlaleng wa Paulo. (1 Bakor. 11:1) E be e se morongwa, le yena o be a na le mafokodi. O be a se a phethagala, e bile ka dinako tše dingwe o be a thatafalelwa ke go dira seo se lokilego. (Baroma 7:18-20) Le gona o be a na le mathata a mantši. Eupša ga se a ka a fela matla goba a nyama. Ge bagolo ba ka latela mohlala wa moapostola Paulo ba tla tšwela pele ba hlankela Jehofa ba thabile le ge ba na le mathata. Ga bjale re tlo ithuta kamoo ba ka dirago seo ka gona.

3. Re tlo boledišana ka eng sehlogong se, gona se tlo thuša bagolo bjang?

³ Sehlogong se re tlo boledišana ka dilo tše nne tšeo go sego bonolo gore bagolo ba ka di dira: (1) Go ba le nako e lekanego ya go bolela ditaba tše dibotse le ya go dira mešomo e mengwe, (2) go ba le nako ya go kgothatša bana babo bona le dikgaetšedi, (3) go se nyamišwe ke mafokodi a bona, (4) go dirišana le batho ba bangwe bao ba sego ba phethagala. Re tlo boledišana le ka gore ke eng seo Paulo a ilego a se dira ge a kopana le mathata a, le gore bagolo ba ka mo ekiša bjang.

4. Ke ka baka la’ng ka dinako tše dingwe go ka se be bonolo gore bagolo ba bee mohlala o mobotse wa go bolela ditaba tše dibotse?

⁴ Ke ka baka la’ng go ka se be bonolo gore ba dire seo? Bagolo ba na le mešomo e mentši go akaretša le wa go botša batho ditaba tše dibotse. Ka dinako tše dingwe mogolo a ka swanelwa ke go ba modulasetulo dibokeng tša gare ga beke le go swara Thuto ya Beibele ya Phuthego. A ka nea le dipolelo tše dingwe. Bagolo ba tlwaetša bahlanka ba bodiredi ka phuthegong e bile ba thabela go kgothatša bana babo rena le dikgaetšedi. (1 Pet. 5:2) Bagolo ba bangwe ba thuša ka go aga le go hlokomela Diholo tša Mmušo le meago e mengwe ya mokgatlo. Go swana le bagoeledi ba bangwe ka phuthegong, mošomo o mogolo woo bagolo ba nago le wona ke wa go bolela ditaba tše dibotse.—Mat. 28:19, 20.

5. Paulo o beile mohlala ofe wa go bolela ditaba tše dibotse?

⁵ Bagolo ba ka ithuta’ng mohlaleng wa Paulo? Bafilipi 1:10 e re botša gore ke ka baka la’ng moapostola Paulo a ile a atlega go bolela ditaba tše dibotse. E re: “Le kgonthišetše dilo tše bohlokwa kudu.” Paulo ile a dira sona seo a bego a se bolela. O be a laetšwe gore a bolele ditaba tše dibotse. Go bontšha gore modiro wo o be o le bohlokwa kudu go yena, o ile a fetša mengwaga e mentši a o dira. O ile a bolela “phatlalatša le ka ntlo le ntlo.” (Dit. 20:20) O be a sa no ya tšhemong ka go ithola kgwara. O be a bolela ditaba tše dibotse kae le kae le ka dinako ka moka. Ka mohlala, ge a be a emetše bana babo bao a bego a sepela le bona kua Athene, o ile a botša sehlopha se itšego ditaba tše dibotse gomme ba bangwe ba bona ba amogela therešo. (Dit. 17:16, 17, 34) Le gona ge Paulo a be a golegilwe ka ntlong o ile a bolela ditaba tše dibotse go bao ba bego ba le kgauswi le yena.—Bafil. 1:13, 14; Dit. 28:16-24.

6. Moapostola Paulo o ile a ruta batho ba bangwe go dira’ng?

⁶ Paulo o ile a diriša nako ya gagwe gabotse. Gantši o be a mema batho ba bangwe ge a be a yo botša batho ditaba tše dibotse. Ka mohlala, leetong la gagwe la pele o ile a sepela le Johane yo a reetšwego leina la Mareka gomme leetong la gagwe la bobedi a sepela le Timotheo. (Dit. 12:25; 16:1-4) Paulo o ile a ruta banna ba gore ba swanetše go rulaganya phuthego bjang, go dira maeto a bodiši le go ba barutiši bao ba nago le bokgoni.—1 Bakor. 4:17.

7. Go ya ka Baefeso 6:14, 15 bagolo ba ka latela seo Paulo a se boletšego bjang?

⁷ Seo bagolo ba ka ithutago sona. Bagolo ba ka ekiša mohlala wa Paulo, e sego feela ka go bolela ditaba tše dibotse ka ntlo le ntlo eupša ka go bolela ditaba tše dibotse gohle  moo batho ba hwetšagalago gona le ka dinako tšohle. (Bala Baefeso 6:14, 15) Ka mohlala, ba ka bolela ditaba tše dibotse ba le mabenkeleng goba ba le mošomong. Goba ge ba thuša ka go aga Holo ya Mmušo ba ka botša batho bao ba dulago kgauswi le yona ditaba tše dibotse goba ba di botša bao ba rekišago. Bagolo ba ka ekiša Paulo ka go tlwaetša ba bangwe ge ba le tšhemong goba ba tlwaetša bahlanka ba bodiredi.

8. Ka dinako tše dingwe mogolo a ka swanelwa ke go dira eng?

⁸ Bagolo ga se ba swanela go swarega kudu ka maikarabelo a phuthego moo ba feleletšago ba sa hwetše nako ya go bolela ditaba tše dibotse. E le gore ba be le tekatekano ka nako e nngwe ba ka swanelwa ke go gana dikabelo tše itšego. Ka morago ga go rapela le go naganišiša, ba ka lemoga gore ge e ba ba ka amogela dikabelo tše itšego ba ka tla ba palelwa ke go dira dilo tše bohlokwa. Dilo tšeo di ka akaretša go swara borapedi bja lapa beke le beke, go bolela ditaba tše dibotse ka mafolofolo le go tlwaetša bana babo bona go bolela ditaba tše dibotse. Ba bangwe ba ka hwetša go le thata go gana kabelo e itšego eupša ba ka kgodišega gore Jehofa o a kwešiša gore ba nyaka go ba le tekatekano.

9. Bagolo bao ba nago le mošomo o montši ba ka kopana le mathata afe?

⁹ Ke ka baka la’ng go ka se be bonolo gore ba dire seo? Bahlanka ba Jehofa ba kopana le mathata a mantši. Mehleng ye ya bofelo ka moka ga rena re nyaka go kgothatšwa, go thekgwa le go homotšwa. Ka dinako tše dingwe ba bangwe ba ka swanelwa ke go thušwa gore ba se ke ba dira selo seo Modimo a sa se ratego. (1 Bathes. 5:14) Ke nnete gore bagolo ba ka se tloše mathata ka moka ao bahlanka ba Modimo ba kopanago le ona. Eupša Jehofa o nyaka gore bagolo ba dire sohle seo ba ka se kgonago go kgothatša le go šireletša batho ba gagwe. Bagolo bao ba šetšego ba na le mošomo o montši ba ka hwetša kae nako ya go thuša bana babo bona le dikgaetšedi?

10. Go ya ka 1 Bathesalonika 2:7 Paulo o be a hlokomela batho ba Jehofa bjang?

¹⁰ Bagolo ba ka ithuta’ng mohlaleng wa Paulo? Paulo o be a ikemišeditše go reta le go kgothatša bana babo le dikgaetšedi. Ke mo gobotse gore bagolo ba ekiše mohlala wa Paulo ka go swara bana babo bona le dikgaetšedi ka botho le ka lerato. (Bala 1 Bathesalonika 2:7.) Paulo o ile a botša bana babo le dikgaetšedi gore o a ba rata le gore Jehofa o a ba rata. (2 Bakor. 2:4; Baef. 2:4, 5) Paulo o be a fetša nako e ntši a na le bana babo le dikgaetšedi e bile a ba swara bjalo ka bagwera ba gagwe. O bontšhitše gore o a ba tshepa ka go bolela dilo tšeo di bego di mo tshwenya le mafokodi a gagwe. (2 Bakor. 7:5; 1 Tim. 1:15) Paulo o be a sa lebelela mathata a gagwe a nnoši eupša o be a nyaka go thuša bana babo le dikgaetšedi.

11. Ke ka baka la’ng Paulo a ile a nea bana babo le dikgaetšedi keletšo?

 ¹¹ Ka dinako tše dingwe Paulo o be a swanelwa ke go nea bana babo le dikgaetšedi keletšo. Eupša o be a sa ba nee yona a galefile. O be a ba nea yona ka ge a be a ba rata e bile a nyaka go ba šireletša go dilo tšeo di bego di tla ba gobatša. O ile a ba nea keletšo ka tsela yeo ba tlago go e kwešiša, e bile a nyaka gore ba e amogele. Ka mohlala, o ile a ngwalela Bakorinthe lengwalo gomme a ba nea keletšo e matla. Ka morago ga go ba ngwalela lengwalo leo o ile a romela Tito go bona. O be a nyaka go tseba gore ba amogetše keletšo ya gagwe bjang. O ile a thaba kudu ge a ekwa gore ba e amogetše gabotse le gore ba a e diriša.— 2 Bakor. 7:6, 7.

12. Bagolo ba ka matlafatša bjang Bakristegotee le bona?

¹² Seo bagolo ba ka ithutago sona. Bagolo ba ka ekiša mohlala wa Paulo ka go fetša nako ba na le Bakristegotee le bona. Tsela e nngwe yeo ba ka dirago se ka yona ke ka go fihla e sa le kapela dibokeng gore ba kgone go kgothatšana le bona. Ba ka kgona go kgothatša ngwanabo rena goba kgaetšedi ka metsotso e sego kae feela. (Baroma 1:12; Baef. 5:16) Mogolo yo a ekišago mohlala wa Paulo a ka matlafatša bana babo ka go diriša Lentšu la Modimo le ka go ba kgonthišetša gore Jehofa o a ba rata. Le gona o dira gore ba bone gore le yena o a ba rata. O dula a nyaka dibaka tša go boledišana le bona le go ba reta. O diriša Beibele ge a ba nea keletšo. O nea keletšo ka botho le go kgonthišetša gore bana babo ba a e kwešiša ka ge a nyaka gore ba e diriše.—Bagal. 6:1.

13. Diphošo tšeo bagolo ba di dirago di ka dira gore ba ikwe bjang?

¹³ Ke ka baka la’ng go ka se be bonolo gore ba dire seo? Bagolo ga se ba phethagala. Le bona ba dira diphošo. (Baroma 3:23) Ka dinako tše dingwe ba ka no se lemoge ge ba dira diphošo, mola ka dinako tše dingwe ge ba bona diphošo tšeo ba di dirago ba ka nyama. Ba bangwe ba ka no bona diphošo tšeo ba di dirago di sa tshwenye gomme ba se bone bohlokwa bja go dira diphetogo.

14. Go ya ka Bafilipi 4:13, boikokobetšo bo thušitše Paulo bjang gore a lemoge mafokodi a gagwe?

¹⁴ Bagolo ba ka ithuta’ng mohlaleng wa Paulo. Ka ge Paulo a be a ikokobeditše o ile a lemoga gore o na le mafokodi le gore o swanetše go thušwa. O be a ithekgile ka matla a Modimo. Mathomong Paulo o be a tlaiša Bakriste gomme ka morago a lemoga gore o dira phošo ke moka a ikemišetša go fetoša semelo sa gagwe. (1 Tim. 1:12-16) Jehofa o ile a thuša Paulo gore e be mogolo yo lerato, yo a kwelago ba bangwe bohloko le yo a ikokobeditšego.  O be a tseba gore o na le mafokodi eupša ga se a ka a dulela go nagana ka ona ka ge a be a tseba gore Jehofa o tlo mo lebalela. O be a tseba gore o dira diphošo. O ile a šoma ka thata go kaonefatša dika tša gagwe tša Bokriste le go ithekga ka Jehofa gore a mo thuše go phetha bodiredi bja gagwe.—1 Bakor. 9:27; bala Bafilipi 4:13.

15. Bagolo ba swanetše go lebelela bjang diphošo tša bona?

¹⁵ Seo bagolo ba ka ithutago sona. Bagolo ga ba kgethwe ka gobane ba phethagetše. Eupša Jehofa o letetše gore ba amogele diphošo tša bona le go kaonefatša dika tša bona tša Bokriste. (Baef. 4:23, 24) Mogolo o swanetše go diriša Beibele gore e mo thuše go bona moo a swanetšego go kaonefatša gona ke moka a dire diphetogo. Ge a ka dira bjalo, Jehofa o tlo mo thuša gore a thabe le gore a be mogolo yo botse.—Jak. 1:25.

16. Go ka direga’ng ge mogolo a šetša diphošo tša ba bangwe?

¹⁶ Ke ka baka la’ng go ka se be bonolo gore ba dire seo? Ka ge bagolo ba fetša nako e ntši ba na le bana babo bona le dikgaetšedi ka phuthegong, go tlo ba bonolo gore ba bone diphošo tšeo ba di dirago. Ge bagolo ba ka se hlokomele, ba ka thoma go swayaswaya batho diphošo, ba tenega goba ba se sa ba swara ka botho. Paulo o ile a lemoša Bakriste gore Sathane o a thaba ge ba dira seo.—2 Bakor. 2:10, 11.

17. Paulo o be a lebelela bana babo le dikgaetšedi bjang?

¹⁷ Bagolo ba ka ithuta’ng mohlaleng wa Paulo? O be a dula a nagana dilo tše dibotse ka bana babo le dikgaetšedi. O be a tseba gore ba dira diphošo ka gobane ka dinako tše dingwe ba be ba mo kweša bohloko. Eupša Paulo o be a tseba gore ge motho a dirile phošo ga se gore ke motho yo mobe. O be a rata bana babo e bile a lebelela dika tše dibotse go bona. Ge bana babo le dikgaetšedi ba be ba thatafalelwa ke go dira selo se se lokilego, o be a tšea gore ba nyaka go dira selo se sebotse ba no ba ba hloka thušo.

18. O ithuta’ng tseleng yeo Paulo a ilego a rarolla bothata bja Ebodia le Sintike ka gona? (Bafilipi 4:1-3)

¹⁸ Ka mohlala, nagana kamoo Paulo a ilego a thuša dikgaetšedi tše pedi tša phuthego ya Filipi. (Bala Bafilipi 4:1-3) Go bonagala Ebodia le Sintike ba be ba sa kwane ka selo se itšego e bile e se sa hlwa e le bagwera. Paulo ga se a ba galefela, eupša o ile a lebelela dika tša bona tše dibotse. Dikgaetšedi tše tšeo di botegago di be di hlanketše Jehofa ka nako e telele. Paulo o be a tseba gore Jehofa o rata dikgaetšedi tše. Ka ge Paulo a be a ba rata o ile a ba kgothaletša gore ba lokiše ditaba gomme ba boele e be bagwera. Seo se ile sa dira gore Paulo a dule a thabile le go ba le segwera se sebotse le ba bagwe ka phuthegong.

19. (a) Bagolo ba ka dira’ng gore ba lebelele dika tše dibotse go bana babo bona le dikgaetšedi? (b) O ithuta’ng seswantšhong sa mogolo yo a hlwekišago Holo ya Mmušo?

 ¹⁹ Seo bagolo ba ka ithutago sona. Bagolo, lebelelang dika tše dibotse tšeo bana babo lena le dikgaetšedi ba di bontšhago. Ga se ba phethagala eupša yo mongwe le yo mongwe wa bona o na le dika tše dibotse. (Bafil. 2:3) Ke nnete gore bagolo ba ka swanelwa ke go fela ba eletša bana babo bona le dikgaetšedi. Bagolo ba swanetše go ekiša mohlala wa Paulo ka go lebelela dilo tše dibotse go bana babo bona le dikgaetšedi go e na le go tenwa ke mantšu ao ba a bolelago le dilo tšeo ba di dirago. Ba swanetše go lemoga gore ngwanabo bona o rata Jehofa, o dula a mo hlankela le ge a na le mathata le gore o nyaka go dira seo se lokilego. Bagolo ba swanetše go se kgopišege ge bana babo bona ba bolela goba ba dira dilo ka tsela e itšego. Bagolo bao ba lebelelago dika tše dibotse go ba bangwe ba dira gore bana babo bona le dikgaetšedi ba ikwe ba ratwa ka phuthegong.

20. Mohlala wa Paulo o ka dula o thuša bagolo bjang?

²⁰ Bagolo, le tlo holega ge le tšwela pele le ekiša mohlala wa Paulo. Ka mohlala le ka bala sehlogo seo se rego: “Ba Bolela ka Sebete ka Matla a Jehofa” ka pukung ya “‘Go Nea Bohlatse bjo bo Tletšego’ ka Mmušo wa Modimo” Ge o dutše o bala dikgatišo tše di bontšhitšwego mo ipotšiše gore, ‘Mohlala wa Paulo o ka nthuša bjang gore ke dule ke thabile ge ke dutše ke phetha boikarabelo bja ka bjalo ka mogolo?’

21. Bagolo ba ka kgodišega ka eng?

²¹ Bagolo, gopolang gore Jehofa ga a le kgopele gore le be bao ba phethagetšego, go e na le moo, o le kgopela gore le mo hlankele ka go botega. (1 Bakor. 4:2) Jehofa o ile a thaba ge Paulo a be a šoma ka thata go mo hlankela, e bile a botega. Kgodišegang gore Jehofa o thabela mošomo wo le mo direlago wona. A ka se lebale “modiro wa lena le lerato leo le le bontšhitšego leineng la gagwe, ka ge le hlanketše bakgethwa e bile le tšwela pele le ba hlankela.”—Baheb. 6:10.