1. Ke’ng seo se re kgahlago kudu ka Jesu? Hlalosa.

SE SENGWE sa dilo tšeo di kgahlišago kudu ka Jesu ke bokgoni bjo a nago le bjona bja go kwešiša mathata ao re lebeletšanago le ona ka ge re sa phethagala. Ge Jesu a be a sa le mo lefaseng, o be a ‘thaba le bao ba thabago e bile a lla le bao ba llago.’ (Baroma 12:15) Ka mohlala, ge barutiwa ba gagwe ba 70 ba be ba boa ba thabile ka morago ga gore ba atlege go boleleng ditaba tše dibotse, Jesu o ile “a thaba kudu ka moya o mokgethwa.” (Luka 10:17-21) Ka lehlakoreng le lengwe, ka morago ga gore a bone gore lehu la Latsaro le kwešitše batho bao ba bego ba rata Latsaro bohloko, o ile a “tsetsela moyeng gomme a huduega.”—Joh. 11:33.

2. Ke’ng seo se thušitšego Jesu go kwela batho bohloko?

² Ke’ng seo se dirilego gore monna yo yoo a phethagetšego a bontšhe batho bao ba sa phethagalago kgaugelo le kwelobohloko? Lebaka le legolo ke gore Jesu o be a rata batho. Go etša ge re kwele sehlogong se se fetilego, Jesu o be a ‘kgahlwa ke bana ba batho.’ (Die. 8:31) Ka ge a be a rata batho, lerato leo le mo tutueleditše gore a kwešiše kamoo batho ba naganago ka gona. Moapostola Johane o hlalosa Jesu ka gore: “O be a tseba seo se lego mothong.” (Joh. 2:25) Jesu o be a kwela batho bohloko. Batho ba be ba bona gore o a ba rata gomme ba theetša molaetša wa Mmušo wa Modimo. Le rena ge re ka rata batho, re tlo kgona go ba thuša ge re ba botša ka molaetša wa Beibele.—2 Tim. 4:5.

3-4. (a) Ge e ba re bontšha batho kwelobohloko, re tlo lebelela modiro wa rena wa go bolela ditaba tše dibotse bjang? (b) Re tlo ithuta ka’ng sehlogong se?

³ Moapostola Paulo o be a tseba gore o be a swanetše go botša batho ditaba tše dibotse, le rena re a tseba gore re swanetše go  dira bjalo. (1 Bakor. 9:16) Lega go le bjalo, ge e ba re rata batho, re ka se no ba botša ditaba tše dibotse feela go no phetha molao. Eupša lerato le tlo dira gore re ba bontšhe gore re tloga re tshwenyegile ka bona e bile re nyaka go ba thuša. Re a tseba gore “go na le lethabo le legolo go neeng go feta go amogeleng.” (Dit. 20:35) Ge re ka dula re gopola seo, re tlo ipshina ka go botša batho ditaba tše dibotse.

⁴ Sehlogong se re tlo ithuta kamoo re ka bontšhago batho kwelobohloko ge re le tšhemong. Sa pele, re tlo bona kamoo Jesu a bego a ikwa ka gona ka batho. Ke moka re ithute ka ditsela tše nne tšeo ka tšona re ka mo ekišago.—1 Pet. 2:21.

5-6. (a) Jesu o ile a bontšha bomang kwelobohloko? (b) Go ya ka Jesaya 61:1, 2, ke ka baka la’ng Jesu a ile a kwela bohloko batho bao a bego a ba botša ditaba tše dibotse?

⁵ Nagana ka mohlala wa Jesu wa go bontšha kwelobohloko. Nakong e nngwe, Jesu le barutiwa ba gagwe ba be ba lapile kudu ka ge ba be ba feditše nako e telele ba bolela ditaba tše dibotse ba sa khutše. Ba ile ba ba ba se be le “nako ya . . . go ja dijo.” Ka gona Jesu o ile a tšea barutiwa ba gagwe a ba iša “lefelong le le lego lekatana” gore ba “[khutše] go se nene.” Eupša lešaba le legolo le ile kitimela moo ba bego ba eya gona gomme la ba fihlela pele. Ge Jesu a fihla moo gomme a bona lešaba leo, o ile a dira’ng? Beibele e re o ile “a le šokela * gobane le be le le bjalo ka dinku tše di se nago modiši. A thoma go le ruta dilo tše dintši.”—Mar. 6:30-34.

⁶ Ke ka baka la’ng Jesu a ile a kwela batho bao bohloko? O ile a bona “[ba] le bjalo ka dinku tše di se nago modiši.” Mohlomongwe Jesu o ile a bona gore ba bangwe ba bona ba be ba diila e bile ba šoma diiri tše dintši gore ba hlokomele malapa a bona. Mohlomongwe ba bangwe ba be ba hwetšwe ke batho bao ba ba ratago. Ge e ba go be go le bjalo, gona Jesu o be a kwešiša boemo bja bona. Go etša ge re kwele sehlogong se se fetilego, mohlomongwe Jesu le yena o ile a lebeletšana le a mangwe a mathata ao. Jesu o  be a kwela batho bohloko gomme a nyaka go ba homotša.—Bala Jesaya 61:1, 2.

7. Re ka ekiša mohlala wa Jesu bjang?

⁷ Re ithuta’ng mohlaleng wo wa Jesu? Go swana le Jesu, le rena re phela le batho bao ba lego “bjalo ka dinku tše di se nago modiši.” Ba lebeletšane le mathata a mantši. Ee, re na le selo seo ba se hlokago, e lego molaetša wa Mmušo wa Modimo. (Kut. 14:6) Ka gona re ekiša Mong wa rena gomme re bolela ditaba tše dibotse ka gobane re ‘kwela babotlana le badiidi bohloko.’ (Ps. 72:13) Re kwela batho bohloko, ka gona re nyaka go dira se sengwe go ba thuša.

8. Ke tsela efe e nngwe yeo re ka bontšhago batho kwelobohloko ge re le tšhemong? Nea mohlala.

⁸ Ke’ng seo se ka re thušago go bontšha batho bao re ba botšago ditaba tše dibotse kwelobohloko? Re ka thušwa ke go ipea boemong bja bona le go ba swara ka tsela yeo le rena re bego re tla nyaka go swarwa ka yona. * (Mat. 7:12) Anke ga bjale re bolele ka ditsela tše nne tšeo ka tšona re ka dirago seo. Sa pele, Nagana ka dinyakwa tša motho yo mongwe le yo mongwe. Re ka swantšha modiro wa rena wa go bolela ditaba tše dibotse le ngaka yeo e thušago balwetši ba yona. Ngaka yeo e nago le bokgoni e nagana ka dinyakwa tša molwetši yo mongwe le yo mongwe. E botšiša molwetši wa yona dipotšišo gomme e theetša ka kelohloko ge molwetši yoo a dutše a hlalosa kamoo a ikwago ka gona. Go e na le gore ngaka e no fa molwetši sehlare seo se tlago pele ka hlogong, e ka tšea nako go hlahlobišiša gore ge e le gabotse molwetši o swerwe ke eng, gore e tle e mo fe dihlare tša maleba. Ka mo go swanago, ga se ra swanela go no diriša mokgwa o tee ge re botša batho ditaba tše dibotse. Go e na le moo, re swanetše go leka go kwešiša maemo a motho yo mongwe le yo mongwe le dinyakwa tša gagwe.

9. Ke’ng seo re swanetšego go phema go se nagana ge re le tšhemong? Hlalosa.

⁹ Ge o kopana le motho tšhemong, o se ke wa kitimela go nagana gore o šetše o kwešiša maemo a gagwe goba seo a se dumelago le gore ke ka baka la eng a dumela seo. (Die. 18:13) Go e na le moo, botšiša motho yoo dipotšišo ka šedi e le gore o tsebe se sengwe ka yena le seo a se dumelago. (Die. 20:5) Ge e ba go swanetše setšong sa gabo lena, mmotšiše gore o šoma go dira eng, mmotšiše ka lapa la gagwe, gore o tšwa kae le seo a se naganago. Ge re botšiša batho dipotšišo, ge e le gabotse re ba dumelela gore ba re botše gore ke ka baka la eng ba hloka go kwa ditaba tše dibotse. Ge re tseba seo, re ka kgona go ba bontšha kwelobohloko ge ba hloka thušo, go no swana le ge Jesu a ile a dira bjalo.—Bapiša le 1 Bakorinthe 9:19-23.

10-11. Go ya ka 2 Bakorinthe 4:7, 8, ke tsela efe ya bobedi yeo re ka bontšhago ba bangwe kwelobohloko? Nea mohlala.

¹⁰ Sa bobedi, leka go nagana gore bophelo bja bona bo ka ba bo le bjang. Ka dinako tše  dingwe, re ka kgona go kwešiša maemo a bona. Le gona, ga se ra phethagala go swana le bona, le rena re lebeletšana le mathata ao ba lebeletšanago le ona. (1 Bakor. 10:13) Re a tseba gore bophelo lefaseng le bo boima. Re kgona go kgotlelela feela ka thušo ya Jehofa. (Bala 2 Bakorinthe 4:7, 8.) Eupša nagana ka batho bao ba se nago tswalano e botse le Jehofa. Go boima go bona go phela ntle le thušo ya Jehofa. Go swana le Jesu, re ba kwela bohloko gomme re ikwa re tutueletšega go ba botša “ditaba tše dibotse tša se sekaone.”—Jes. 52:7.

¹¹ Nagana ka mohlala wa ngwanabo rena yo a bitšwago Sergey. Pele Sergey a ka ithuta therešo, o be a na le dihlong e bile e le motho wa go homola. O be a thatafalelwa ke go bolela le batho ba bangwe. Ge nako e dutše e eya, o ile a thoma go ithuta Beibele le Dihlatse tša Jehofa. Sergey o re: “Ge ke be ke dutše ke ithuta Beibele, ke ile ka bona gore Bakriste ba swanetše go botša ba bangwe ka ditumelo tša bona. Ke be ke nagana gore nka se tsoge ke kgonne go dira bjalo.” Eupša Sergey o ile a nagana ka batho bao ba sego ba kwa ka therešo, o ile a nagana gore ruri bophelo bja bona bo swanetše go ba bo le boima ka ge ba sa tsebe Jehofa. O re: “Dilo tše difsa tšeo ke bego ke ithuta tšona di ile tša ntira gore ke thabe e bile ke be le khutšo ya monagano. Ke be ke tseba gore ba bangwe le bona ba swanetše go tseba ditherešo tše.” Ge maikwelo a Sergey a go kwela batho bohloko a dutše a gola, o ile a lemoga gore o na le sebete sa go botša ba bangwe ditaba tše dibotse. O re: “Selo sa go mmakatša kudu ke gore go botša ba bangwe ka Beibele go ile gwa ntira gore ke itshepe. Go ile gwa tiiša le tumelo ya ka.” *

12-13. Ke ka baka la’ng ge re ithuta le batho Beibele re se ra swanela go ba felela pelo? Nea mohlala.

¹² Sa boraro, ge o ithuta le batho Beibele, o se ke wa ba felelela pelo. Gopola gore batho bao o ithutago le bona Beibele ba ka ba ba se ba ka ba nagana ka tše dingwe tša ditherešo tša Beibele tšeo rena re šetšego re di tseba. Le gona ba bantši ba kgodišegile gore seo ba šetšego ba se dumela ke therešo. Mohlomongwe ba bona bodumedi bja bona bo le bohlokwa kudu ka ge bo dira gore ba dule ba le boteeng le malapa a bona, setšo sa gabo bona le go phedišana gabotse le  batho ba moo ba dulago gona. Re ka ba thuša bjang?

¹³ Nagana ka papišo ye: Ke’ng seo se diregago ge leporogo la kgale le senyegile gomme le hloka go lokišwa? Gantši batho ba tšwela pele ba diriša leporogo leo la kgale ge go sa dirwa le lefsa. Ke moka gateetee ge leporogo le lefsa le feditšwe, leporogo la kgale le a senywa. Ka mo go swanago, pele re ka botša batho gore ba tlogele ditumelo tša bona tša kgale, re swanetše go thoma pele ka go ba thuša gore ba tsebe le go rata ditherešo tše difsa, e lego dithuto tša Beibele tšeo ba bego ba sa di tsebe ge re be re thoma go ithuta le bona. Ke feela ka morago ga moo, moo ba tlago go tlogela ditumelo tša bona. Go ka tšea nako go ba thuša gore ba dire diphetogo tše bjalo.—Baroma 12:2.

14-15. Re ka thuša bjang batho bao ba sa tsebego selo ka kholofelo ya go tlo phela paradeiseng mo lefaseng? Nea mohlala.

¹⁴ Go bontšha gore ga re felele batho pelo, re ka se letele gore ba kwešiše therešo ya Beibele goba ba e amogele ka lekga la mathomo. Go e na le moo, kwelobohloko yeo re nago le yona e tla re tutueletša gore re ba thuše go naganišiša ka seo Beibele e se bolelago le go dira diphetogo ge nako e dutše e eya. Ka mohlala, nagana kamoo re ka thušago motho go kwešiša kholofelo yeo re nago le yona ya go tlo phela ka mo go sa felego lefaseng la paradeise. Batho ba bantši ga ba tsebe selo ka thuto ye. Ba ka ba ba dumela gore ge motho a ehwa go fedile ka yena. Goba ba ka ba ba nagana gore batho ka moka ba go loka ge ba ehwa ba ya legodimong. Re ka ba thuša bjang?

¹⁵ Ngwanabo rena yo mongwe o re botša ka tsela yeo yena a thušago batho go kwešiša thuto ye. Sa pele, o bala Genesi 1:28. Ke moka o botšiša mong wa ntlo gore Modimo o be a nyaka gore batho ba phele kae le gore ba phele bjang. Batho ba bantši ba araba ka gore, “O be a nyaka gore ba phele mo lefaseng, ba thabile.” Ke moka ngwanabo rena o bala lengwalo la Jesaya 55:11 gomme o botšiša motho yoo ge e ba morero wa Modimo o fetogile. Gantši mong wa ntlo o araba ka gore aowa. Mafelelong, ngwanabo rena o bala Psalme 37:10, 11, ke moka o botšiša mong wa ntlo gore batho ba tlo phela bjang nakong e tlago. Ka go diriša Beibele ka tsela yeo, ngwanabo rena o thušitše batho ba bantši gore ba kwešiše gore Modimo o sa nyaka batho ba bantši ba go loka gore ba tle ba phele mo lefaseng ka mo go sa felego.

16-17. Go ya ka Diema 3:27, ke ka ditsela dife re ka bontšhago ba bangwe kwelobohloko? Nea mohlala.

¹⁶ Sa bone, nagana ka seo o ka se dirago go bontšha batho gore o ba kwela bohloko. Ka mohlala, na o kile wa ya go mong wa ntlo ka nako yeo e bego e se ya maleba? Re ka kgopela tshwarelo gomme ra mo kgopela go boa ka nako ya maleba. Eupša go thwe’ng ge e ba mong wa ntlo a hloka thušo mohlomongwe ka selo se se nyenyane? Goba go thwe’ng ge e ba mong wa ntlo a babja kudu goba a tšofetše kudu moo a sa kgonego go tšwa ka gae gomme a hloka motho yo a ka mo direlago dilo tše itšego tše bjalo ka go mo yela lebenkeleng? Maemong a bjalo, re ka thuša motho yoo.—Bala Diema 3:27.

 ¹⁷ Kgaetšedi yo mongwe o ile a ba le mafelelo a mabotse ka morago ga gore a dire selo se bjalo seo se bego se ka bonagala se se bohlokwa. Kwelobohloko e ile ya mo tutueletša gore a ngwalele lapa leo le bego le hlokofaletšwe ke ngwana letšatšing leo a belegwego ka lona. Lengwalong leo o ile a tsenya le mangwalo a Beibele ao a homotšago. Lapa leo le ile la ikwa bjang? Mmago ngwana yoo o ile a ngwala gore: “Maabane ke be ke nyamile kudu. Ga o tsebe kamoo lengwalo leo o re ngwaletšego lona le re thušitšego ka gona. Ke leboga kudu lengwalo le leo le re homoditšego kudu. Maabane nka no ba ke badile lengwalo le ka makga a fetago a 20. Ruri ke be ke thoma go bona lengwalo la go homotša le la go kgothatša ka tsela ye. Re leboga kudu.” Ga go pelaelo gore re tla ba le mafelelo a mabotse ge e ba re ipea maemong a batho bao ba kwelego bohloko gomme re dira se sengwe go ba thuša.

18. Go ya ka 1 Bakorinthe 3:6, 7, re swanetše go dula re gopola’ng ka modiro wa rena wa go bolela ditaba tše dibotse, gona ka baka la’ng?

¹⁸ Re swanetše go kwešiša seo Jehofa a se letetšego go rena ge re botša batho ditaba tše dibotse. Re dule re gopola gore re kgatha karolo e bohlokwa tabeng ya go thuša ba bangwe gore ba ithute ka Modimo. Eupša ga se rena re kgathago karolo e bohlokwahlokwa ya modiro wo. (Bala 1 Bakorinthe 3:6, 7.) Jehofa ke yena a dirago gore batho ba tle go yena. (Joh. 6:44) Go sa šetšwe gore motho o tlo amogela therešo goba go se bjalo, seo se ithekgile ka pelo ya gagwe. (Mat. 13:4-8) Gopola gore batho ba bantši ga se ba ka ba amogela molaetša wa Jesu, eupša re a tseba gore e be e le Morutiši yo mogolo yo go sa kago gwa ba le motho wa go kgona go ruta go swana le yena! Ka gona, ga se ra swanela go nyama ge e ba batho bao re lekago go ba thuša go tseba therešo ba sa nyake go kwa molaetša wa rena.

19. Re tlo ba le mafelelo afe tšhemong ge re bontšha batho kwelobohloko?

¹⁹ Re tlo ba le mafelelo a mabotse tšhemong ge re bontšha batho kwelobohloko. Re tlo rata modiro wa rena wa go bolela ditaba tše dibotse le go feta. Re tlo hwetša lethabo le legolo leo tlišwago ke go nea. Le gona re tlo dira gore go be bonolo go “bao ba nago le tshekamelo e swanetšego ka bophelo bjo bo sa felego” gore ba amogele ditaba tše dibotse. (Dit. 13:48) Ka gona “ge feela re sa na le sebaka, anke re direleng bohle botse.” (Bagal. 6:10) Ge re dira bjalo, re tlo thaba kudu ka ge re tla be re dira gore Tatago rena wa legodimong a retwe.—Mat. 5:16.