1. Ke eng seo bana babo rena ba bangwe ba bego ba se boifa?

 A RE boneng mathata a mangwe ao bana babo rena ba kopanago le ona. Nestor le mosadi wa gagwe María, ba be ba nyaka go hlankela mo go nago le tlhokagalo. b E le gore ba kgone go dira seo, ba be ba swanetše go ithuta go diriša tšhelete gabotse. Eupša ba be ba boifa gore ba ka se thabe ge ba ka phela ka tšhelete e nyenyane. Ge Biniam a eba yo mongwe wa Dihlatse tša Jehofa nageng yeo modiro wa rena o thibetšwego, o ile a tšhošwa ke gore ka letšatši le lengwe a ka tlaišwa. Eupša seo se bego se mo tšhoša kudu ke gore lapa la gabo le be le tlo reng ge le ekwa gore ke yo mongwe wa Dihlatse tša Jehofa. Valérie o be a na le bolwetši bjo šoro bja kankere, ka gona go be go le thata gore a hwetše ngaka yeo e tlago go mo thuša e bile e hlompha seo Beibele e se bolelago ka go tšhela Madi. Le gona o be a tšhaba gore o tlo hwa.

2. Ke ka baka la’ng re swanetše go ithuta go laola poifo ya rena?

² Na o ile wa boifa go swana le bana babo rena bao re boletšego ka bona? Bontši bja rena re ile ra boifa. Ge re ka se ithute go laola poifo ya rena, re ka dira dipheto tše mpe tšeo di ka senyago segwera sa rena le Jehofa. Seo ke se Sathane a se nyakago. A ka diriša poifo gore re se kwe melao  ya Jehofa go akaretša le go se bolele ditaba tše dibotse. (Kut. 12:17) Le ge Sathane e le yo mobe, a le šoro e bile a na le matla, re ka kgona go itšhireletša go yena. Bjang?

3. Re tlo thušwa ke eng gore re fenye poifo?

³ Ge re kgodišegile gore Jehofa o a re rata e bile o a re thekga, re tlo fenya Sathane. (Ps. 118:6) Ka mohlala, mongwadi wa Psalme 118 o ile a kopana le maemo a nyamišago kudu. O be a na le manaba a mantši, e bile a mangwe a manaba ao e be e le batho bao ba tumilego (ditemana 9, 10). Ka dinako tše dingwe o be a gateletšega kudu (temana 13). Le gona Jehofa o ile a mo phošolla ka bogale (temana 18). Le ga go le bjalo, Mopsalme yoo o ile a tšwela pele ka go opela gore: “Nka se boife.” Ke eng seo se ilego sa dira gore a ikwe a šireletšegile e bile a sa boife? O be a tseba gore le ge Jehofa a mo phošolotše, eupša o be a mo rata kudu. Mopsalme yoo o be a kgodišegile gore go sa šetšwe gore o kopana le mathata afe, Modimo o be a ikemišeditše go mo thekga.—Ps. 118:29.

4. Ke dilo dife tšeo re ka kgonago go di fenya ge re tshepa gore Jehofa o a re rata?

⁴ Re swanetše go kgodišega gore Jehofa o a re rata. Seo se tlo re thuša go fenya dilo tše tše tharo, e lego: (1) go boifa go se kgone go hlokomela lapa; (2) go boifa batho, le (3) go boifa lehu. Bana babo rena bao re boletšego ka bona mathomong a sehlogo, ba ile ba kgona go fenya poifo ka gobane ba be ba kgodišegile gore Jehofa o a ba rata.

5. Ke maemo afe ao dihlogo tša malapa di tshwenyegago ka ona? (Bona seswantšho sa letlakala la ka ntle.)

⁵ Dihlogo tša malapa a Bakriste di tšeela godimo boikarabelo bja tšona bja go hlokomela malapa a tšona ka tša boiphedišo. (1 Tim. 5:8) Ge e ba o le hlogo ya lapa, mohlomongwe nakong ye ya leuba la bolwetši o ka ba o ile wa tshwenyega gore o tlo felelwa ke mošomo. O ka ba o ile wa tshwenyega ka gore o ka se kgone go rekela lapa la gago dijo, goba go lefelela ditshenyagalelo tša lefelong leo o dulago go lona. O ka ba o ile wa boifa le gore ge o ka lahlegelwa ke mošomo wa gago o ka se kgone go hwetša o mongwe. Go swana le Nestor le María, o ka ba o tshwenyega ka gore wena le lapa la gago le ka se kgone go phela ka tšhelete e nyenyane. Sathane o ile a atlega ka go dira gore bahlanka ba bantši ba Modimo ba tlogele go mo hlankela ka ge ba ile ba ikwa ka tsela ye.

6. Sathane o leka go re dira gore re nagane eng?

⁶ Sathane o nyaka re dumela gore Jehofa ga a na taba le rena e bile a ka se re thuše go hlokomela malapa a rena. Seo se ka dira gore re dire dilo ka moka tšeo re ka di kgonago gore re šireletše mešomo ya rena le go hlokomela malapa a rena, le ge e ba seo se ka senya segwera sa rena le Jehofa.

7. Ke eng seo Jesu a re kgodišago sona?

⁷ Jesu o tseba Tatago rena wa legodimong gabotse kudu go feta batho ka moka. Ka gona o re kgodiša gore: ‘Modimo wa rena o tseba dilo tšeo re di nyakago le pele re mo kgopela.’ (Mat. 6:8) Le gona Jesu o a tseba gore Jehofa o dula a ikemišeditše go re hlokomela le go hlokomela dinyakwa tša rena. Bjalo ka Bakriste, re ditho tša lapa la Modimo. Ka ge Jehofa e le hlogo ya lapa, re ka kgodišega gore o tla dira go ya le kamoo Lengwalo la 1 Timotheo 5:8 le bolelago ka gona.

8. (a) Ke eng seo se tlago go re thuša go fenya poifo ya go se kgone go hlokomela malapa a rena? (Mateo 6:31-33) (b) Re ka ekiša bjang banyalani bao ba abelanago dijo le kgaetšedi?

 ⁸ Ge re kgodišegile gore Jehofa o a re rata e bile o rata le malapa a rena, re tshepa gore o tlo re nea le dilo tšeo re di hlokago. (Bala Mateo 6:31-33.) Jehofa ke Modimo yo lerato, yo a ratago go nea e bile o nyaka go re hlokomela! Ge a be a bopa lefase, o re neile dilo ka moka tšeo re di hlokago tšeo di re thušago gore re kgone go phela. E bile o re neile dilo tše dintši tšeo di re thabišago kudu. (Gen. 2:9) Ge ka dinako tše dingwe re na le dilo tšeo re di hlokago, re swanetše go dula re gopola gore Jehofa ke yena a re neilego dilo tšeo. (Mat. 6:11) Re swanetše go dula re gopola gore Jehofa o tlo re hlokomela ka dilo ka moka tšeo re di hlokago gona bjale e bile nakong e tlago o tlo re nea bophelo bjo bo sa felego. Se ke seo Nestor le María ba ilego ba se bona.—Jes. 65:21, 22.

9. O ithuta eng mohlaleng wa Nestor le María?

⁹ Nestor le María ba be ba phela bophelo bja manobonobo kua Colombia. Ba itše: “Re be re nagana go nolofatša maphelo a rena le go oketša tirelo ya rena, eupša re be re boifa gore re ka se thabe ge re ka phela ka tšhelete e nyenyane.” Ba thušitšwe ke eng go fenya poifo yeo? Ba ile ba thušwa ke go nagana ka ditsela tše dintši tšeo Jehofa a ba bontšhitšego gore o a ba rata. Ba ile ba tlogela mešomo ya bona yeo e lefago tšhelete e ntši ka ge ba be ba tseba gore Jehofa o tlo ba hlokomela. Ba ile ba rekiša ntlo ya bona ke moka ba ya nageng yeo go nago le tlhokagalo ya bagoeledi. Ba ile ba ikwa bjang ka phetho ya bona? Nestor o re: “Re ile ra bona go phethagala ga Lengwalo la Mateo 6:33. Ga se ra ka ra hloka selo, e bile re thabile kudu.”

10. Ke ka baka la’ng batho ba na le lebaka le le kwagalago la go boifa batho ba bangwe?

¹⁰ Ga e sa le Adama le Efa ba senyeditše Jehofa, batho ba tsebega ka go gobatša ba bangwe. (Mmo. 8:9) Ka mohlala, batho ba diriša matla a bolaodi gampe, disenyi di tlaiša batho, bomphenyašilo ba tlaiša bana ba bangwe sekolong e bile batho ba bangwe ga ba sware ba gabo bona gabotse.  Ka gona ga go makatše gore batho ba tšhaba batho ba bangwe! Sathane o gakatša bjang boemo ka go dira gore re boife batho?

11-12. Sathane o re hlasela bjang a diriša taba ya go tšhaba batho?

¹¹ Sathane o leka go dira gore re tšhabe batho, e lego seo se ka dirago gore re tlogele go bolela ditaba tše dibotse le go dira dilo tšeo Jehofa a re laelago gore re di dire. Sathane o dira gore mebušo e thibele modiro wa rena le go re tlaiša. (Luka 21:12; Kut. 2:10) Mo lefaseng leo le laolwago ke Sathane, batho ba phatlalatša ditaba tša maaka ka Dihlatse tša Jehofa. Batho bao ba tshepago maaka ao, ba ka re kwera, ba re tlaiša goba ba re lahla. (Mat. 10:36) Na dilo tšeo Sathane a di dirago di a re makatša? Le gatee. Ke kgale a di dira.—Dit. 5:27, 28, 40.

¹² Go ganetšwa ke mmušo ga se sebetša se nnoši seo Sathane a se dirišago. Ba bangwe ba tšhaba seo malapa a gabo bona a ka se naganago ka bona ge ba eba Dihlatse tša Jehofa. Ba rata ba gabo bona kudu e bile ba nyaka gore le bona ba tsebe Jehofa le go mo rata. Ba kwa bohloko ge ba ekwa ba gabo bona ba bolela gampe ka Modimo le go nyatša bahlanka ba gagwe. Eupša ka dinako tše dingwe bao ba bego ba sa nyake go kwa selo ka Modimo, ba feleletša e le bahlanka ba gagwe. Eupša re swanetše go dira’ng ge ba malapa a gabo rena ba sa nyake go kwa selo ka seo re ithutago sona?

13. Tsela yeo Jehofa a re ratago ka yona e re thuša bjang ge ba lapa ba re ganetša? (Psalme 27:10)

¹³ Re kgothatšwa ke mantšu a mabotse ao re a balago go Psalme 27:10. (Bala.) Re ka se tšhabe go ganetšwa ge re gopola gore Jehofa o a re rata. Re a tseba gore o tlo re putsa ka baka la kgotlelelo ya rena. Jehofa o tlo re nea dilo ka moka tšeo re di hlokago gore re phele, re dule re thabile e bile re be bagwera ba gagwe! Se ke seo se boletšwego ke Biniam yo re boletšego ka yena pejana.

14. O ithutile eng mohlaleng wa Biniam?

¹⁴ Biniam e bile yo mongwe wa Dihlatse tša Jehofa le ge a be a tseba gore o tlo ganetšwa. Go tseba gore Jehofa o a mo rata go mo thušitše gore a se ke a tšhaba batho.  O boletše gore. “Ke ile ka tlaišwa go feta kamoo ke bego ke nagana ka gona. Selo seo ke bego ke se tšhaba go feta go tlaišwa ke mmušo, e be e le go ganetšwa ke ba lapa la gešo.” Ke be ke tšhaba gore ge ke eba Hlatse ya Jehofa ke be ke tlo nyamiša tate yo e bego e se Hlatse e bile ba lapa la gešo ba be ba ka se sa ntlhompha. Eupša Biniam o be a kgodišegile gore Jehofa o dula a hlokomela bao a ba ratago. O re: “Ke ile ka naganišiša kamoo Jehofa a thušitšego batho ba bangwe go kgotlelela mathata a tša ditšhelete, go se swarwe gabotse le go ganetšwa ke setšhaba. Ke be ke tseba gore ge nka dula ke botegela Jehofa o tlo ntšhegofatša. Ge ke be ke dula ke golegwa e bile ke tlaišwa ke ile ka bona kamoo Jehofa a thušago bao ba mmotegelago.” Jehofa o ile a ba Tate wa kgonthe go Biniam gomme bahlanka ba gagwe ba ba bjalo ka lapa la gabo.

15. Ke ka baka la’ng re tšhaba lehu?

¹⁵ Beibele e re lehu ke lenaba. (1 Bakor. 15:25, 26) Re ka ikwa re tšhoga ge re nagana ka lehu kudukudu ge go na le wa leloko yo a babjago kudu. Ke ka baka la’ng re tšhaba lehu? Ka gobane Jehofa ga se a re bopela gore re hwe. (Mmo. 3:11) Ka dinako tše dingwe go tšhaba lehu go ka re šireletša. Ka mohlala seo se ka re thuša gore re itlhokomele, re je gabotse, re itšhidulle, re ye ngakeng ge go hlokega e bile re se ke ra dira dilo tšeo di tlago go bea bophelo bja rena kotsing.

16. Ke eng seo Sathane a lekago go se dira ka ge a tseba gore re tšhaba lehu?

¹⁶ Sathane o a tseba gore re tšeela bophelo godimo. O bolela gore re ka senya segwera sa rena le Jehofa e le gore re phele. (Jobo 2:4, 5) Ao ke maaka a matala! Ka ge e le yena a ‘bakago lehu,’ a ka diriša se go dira gore re tlogele go hlankela Jehofa. (Baheb. 2:14, 15) Ka dinako tše dingwe, batho bao Sathane a ba dirišago ba re tšhošetša ka gore ba tlo re bolaya ge re sa tlogele go hlankela Jehofa. Le gona Sathane a ka dira gore re tlogele go hlankela Jehofa ge e ba re lebeletšane le bolwetši bjo šoro. Dingaka goba ditho tša lapa la gabo rena di ka re gapeletša gore re tšhele madi e lego seo se thulanago le molao wa Modimo. Goba motho yo mongwe a ka re gapeletša gore re tšee mohuta o itšego wa kalafo woo o thulanago le melao ya motheo ya Beibele.

17. Go ya ka Baroma 8:37-39, ke ka baka la’ng re se ra swanela go tšhaba lehu ka mo go feteletšego?

¹⁷ Ga re nyake go hwa, eupša re a tseba gore le ge re ka hwa Jehofa o tlo no dula a re rata. (Bala Baroma 8:37-39.) Ge bagwera ba Jehofa ba ehwa, o tlo dula a ba gopola bjalo ka ge eka ba sa phela. (Luka 20:37, 38) O fela pelo ya go ba tsoša. (Jobo 14:15) Jehofa o re file topollo gore re “be le bophelo bjo bo sa felego.” (Joh. 3:16) Jehofa o re rata kudu e bile o a re hlokomela. Ka gona, go ena le gore re hlanogele Jehofa ge re babja, re swanetše go ithekga ka yena gore a re homotše le go re nea bohlale le matla. Se ke seo Valérie le monna wa gagwe ba se dirilego.—Ps. 41:3.

18. O ithutile eng mohlaleng wa Valérie?

¹⁸ Ge Valérie a be a na le mengwaga e 35, dingaka di ile tša mmotša gore o na le kankere e šoro. Bonang kamoo lerato le ilego  la mo thuša gore a se ke a tšhaba lehu. O re: “Ge nna le monna wa ka re ekwa gore ke na le kankere, bophelo bja rena bo ile bja fetoga. Ke be ke swanetše go dira ophareišene gore ke phele. Ke ile ka ya dingakeng tše dintši eupša tša gana go ntira ophareišene ka ge ke be ke sa tšhele madi. Le ge ke be ke tšhogile, ke ile ka gana go tšhela madi ka gobane molao wa Modimo o be o sa dumelelane le seo! Jehofa o mpontšhitše gore o a nthata bophelo bja ka ka moka. Gona bjale lenna ke be ke swanetše go mmontšha gore ke a mo rata. Nako e nngwe le e nngwe ge ke be ke ekwa ditaba tše mpe, ke be ke ikemišetša le go feta gore ke thabiše Jehofa e sego Sathane Mafelelong ba ile ba ntira ophareišene ba sa ntšhele madi. Le ge gona bjale ke sa babja, eupša Jehofa o sa tšwela pele a mpha dilo tšeo ke di hlokago. Ka mohlala, beke pele ke ekwa gore ke na le kankere, dibokeng re ile ra ithuta ka sehlogo seo se rego: ‘Go Lebeletšana le Mathata a Lehono ka Sebete.’ c Sehlogo se se ile sa re kgothatša kudu. Re se badile gantši. Dihlogo tša go swana le se, le dikgatišo tše dingwe tša mokgatlo di thušitše nna le monna wa ka gore re dire diphetho tše dibotse.”

19. Go tlo direga eng e se kgale?

¹⁹ Jehofa o thušitše Bakriste ba bantši lefaseng ka moka gore ba kgone go fenya diteko tša Diabolo. (1 Pet. 5:8, 9) Le wena a ka go thuša. Jehofa o tlo laela Jesu le bao ba bušago le yena gore ba fediše “mediro ya diabolo.” (1 Joh. 3:8) Ka morago ga moo bahlanka ba Modimo bao ba lego mo lefaseng, ‘ba ka se boife selo e bile ba ka se tšhoge.’ (Jes. 54:14; Mika 4:4) Eupša ge re sa dutše re letile, re swanetše go šoma ka thata e bile re se ke ra boifa.

20. Ke eng seo e ka re thušago gore re se ke ra boifa?

²⁰ Re swanetše go dula re tiiša tumelo ya rena go Jehofa re gopola gore o rata bahlanka ba gagwe le go ba šireletša. Seo se tla dira gore re se ke ra boifa. Go naganišiša kamoo Jehofa a ilego a thuša bahlanka ba gagwe ba nakong e fetilego go tlo re thuša gore re se ke ra boifa. Re swanetše le go gopola ka tsela yeo a ilego a re thuša go lebeletšana le mathata ka gona. Ka thušo ya Jehofa re ka se boife selo!—Ps. 34:4.