1. Ke ka baka la’ng re swanetše go latela tlhahlo yeo Jehofa a re neago yona? Nea mohlala.

 NAGANA o le lešokeng. Go na le dilo tše kotsi tše bjalo ka diphoofolo tša naga, dikhunkhwane tšeo di nago le malwetši, mehlare yeo e nago le mpholo le ditsela tše di nago le maswika. O ka thaba kudu ge go ka tšwelela motho yoo a tsebago lefelo leo gabotse ke moka a go ntšha kotsing yeo o ka bago o le go yona le go go bontšha gore o ka sepela ka tsela efe. Lefase le le swana le lešoka la mohuta woo. Le tletše ka dilo tše kotsi tšeo di ka senyago segwera sa rena le Jehofa, eupša Jehofa a ka kgona go re hlahla gabotse. O re tloša go dilo tše kotsi gomme o tlo re fihliša moo re yago gona, e lego lefaseng le leswa moo re tla bego re phela ka mo go sa felego.

2. Jehofa o re hlahla bjang?

² Jehofa o re hlahla bjang? O diriša Lentšu la gagwe e lego Beibele. O diriša le batho bao ba mo emelago legato gore ba re hlahle. Ka mohlala, o diriša “mohlanka yo a botegago le wa temogo” go re nea dijo tša moya tšeo di re thušago go dira diphetho tše bohlale. (Mat. 24:45) Jehofa o diriša le banna ba bangwe bao ba nago le bokgoni gore ba re hlahle. Ka mohlala, balebeledi ba tikologo le bagolo ba phuthego ba re nea kgothatšo le tlhahlo yeo e ka re thušago dinakong tše tše thata. Re tloga re leboga tlhahlo e botegago yeo re e hwetšago mehleng ye e thata ya bofelo! Tlhahlo ye e re thuša gore re dule re le bagwera ba Jehofa le go thabela bophelo gona bjale ge re dutše re sepela tseleng e išago bophelong bjo sa felego.

3. Re tlo boledišana ka’ng sehlogong se?

³ Ka dinako tše dingwe go ka ba boima go amogela tlhahlo yeo e tšwago go Jehofa, kudukudu ge re e newa ke banna bao ba sa phethagalago. Ka baka la’ng? Tlhahlo yeo e ka no ba e thulana le selo seo re se ratago goba e le selo seo re sa nyakego  go se kwa. Goba re ka bona eka tlhahlo yeo re e hwetšago ga e bohlale gomme ra phetha ka gore ga e tšwe go Jehofa. Ka dinako tšeo, re swanetše go kgodišega gore Jehofa ke yena a etelelago batho ba gagwe pele le gore re tlo hwetša ditšhegofatšo ge re ka latela tlhahlo ya gagwe. Sehlogong se re tlo kwa gore (1) Jehofa o ile a hlahla bjang batho ba gagwe mehleng ya Beibele, (2) o re hlahla bjang lehono, le gore (3) re holega bjang ge re latela tlhahlo ya gagwe.

KAMOO JEHOFA A BEGO A HLAHLA BAISIRAELE KA GONA

4-5. Jehofa o ile a bontšha bjang gore o be a diriša Moshe go hlahla Baisiraele? (Bona seswantšho sa letlakala la ka ntle.)

⁴ Jehofa o ile a kgetha Moshe gore a ntšhe setšhaba sa Baisiraele Egepeta. O ile a ba bontšha le gore ke yena a ba hlahlago a diriša Moshe. Ka mohlala, o ile a ba nea thololo ya leru gore e ba hlahle mosegare gomme a ba nea thololo ya mollo gore e ba hlahle bošego. (Ek. 13:21) Moshe o ile a šala thololo yeo morago ke moka ya dira gore yena le Baisiraele ba fihle Lewatleng le Lehwibidu. Batho ba ile ba tšhoga ge ba be ba nagana gore ba tlo palelwa ke go tshela lewatle nakong ya ge Baegepeta ba ba rakediša. Ba ile ba phetha ka gore Moshe o dirile phošo ka go ba iša Lewatleng le Lehwibidu, eupša e be e se phošo. Jehofa o be a dirile gore Moshe a iše batho ba gagwe moo. (Ek. 14:2) Modimo o ile a ba phološa ka tsela e makatšago.—Ek. 14:​26-28.

⁵ Moshe o be a dutše a ithekgile ka thololo ya leru ge a be a etelela setšhaba sa Modimo pele ka mengwaga e masomenne kua lešokeng. a Ka nakwana, Jehofa o ile a bea thololo yeo godimo ga tente ya Moshe moo Baisiraele ka moka ba bego ba ka kgona go e bona. (Ek. 33:​7, 9, 10) Jehofa o ile a bolela le Moshe a le thololong ya leru gomme yena a nea setšhaba ditaelo tša Jehofa. (Ps. 99:7) Baisiraele ba be ba tloga ba bona gore Jehofa o diriša Moshe gore a ba hlahle.

6. Baisiraele ba ile ba arabela bjang tlhahlong yeo Jehofa a bego a ba nea yona? (Numeri 14:​2, 10, 11)

⁶ Ka maswabi, Baisiraele ba bantšhi ba ile ba gana bohlatse bjo bo lego molaleng bja gore Jehofa o diriša Moshe bjalo ka moemedi wa gagwe. (Bala Numeri 14:​2, 10, 11.) Ba ile ba gana ka makga mantšhi go dumela gore Jehofa o diriša Moshe go ba hlahla. Ka baka la seo, moloko woo wa Baisiraele o ile wa palelwa ke go tsena Nageng ya Kholofetšo.—Num. 14:30.

7. Nea mehlala ya batho bao ba ilego ba latela tlhahlo ya Jehofa. (Numeri 14:24) (Bona le seswantšho.)

⁷ Baisiraele ba bangwe ba ile ba latela tlhahlo ya Jehofa. Ka mohlala, Jehofa o ile a bolela gore: “Kalebe . . . o ntatetše ka botlalo.” (Bala Numeri 14:24.) Modimo o ile a putsa Kalebe a ba a mo dumelela gore a kgethe naga yeo a e ratago kua Kanana. (Josh. 14:​12-14) Moloko wo o latelago wa Baisiraele o ile wa bea mohlala o mobotse wa go latela tlhahlo ya Jehofa. Ge Joshua a be a hlatlama Moshe bjalo ka moetapele wa Baisiraele, ba ile “ba mmoifa mehleng yohle ya bophelo bja gagwe.” (Josh. 4:14) Ka baka la se, Jehofa o ile a ba šegofatša ka go ba tsentšha nageng yeo a bego a ba holofeditše yona.—Josh. 21:​43, 44.

8. Jehofa o be a hlahla bjang batho ba gagwe mehleng ya dikgoši? (Bona le seswantšho.)

⁸ Ka morago Jehofa o ile a kgetha baahlodi gore ba hlahle batho ba gagwe. Ka morago ga moo, mehleng ya dikgoši, Jehofa o ile a kgetha baporofeta gore ba hlahle batho ba gagwe. Dikgoši tše di botegago di ile tša kwa keletšo ya baporofeta. Ka mohlala, Kgoši Dafida o ile a  amogela ka boikokobetšo ge moporofeta Nathane a be a mo phošolla. (2 Sam. 12:​7, 13; 1 Dikor. 17:​3, 4) Kgoši Jehoshafate o ile a ithekga ka moporofeta Jahasiele gore a mo hlahle a ba a kgothatša batho ba Juda ka gore: “E bang le tumelo go baporofeta [ba Modimo].” (2 Dikor. 20:​14, 15, 20) Ge Kgoši Hesekia a be a le ka tlase ga kgatelelo o ile a kgopela moporofeta Jesaya gore a mo thuše. (Jes. 37:​1-6) Ka mehla ge dikgoši di be di ekwa tlhahlo ya Jehofa, di be di hwetša ditšhegofatšo e bile setšhaba se hwetša tšhireletšo ya Jehofa. (2 Dikor. 20:​29, 30; 32:22) Go swanetše go ba go be go le molaleng gore Jehofa o be a diriša baporofeta go hlahla batho ba gagwe. Lega go le bjalo, dikgoši tše dintšhi le batho ba bangwe ba be ba gana baporofeta ba Jehofa.—Jer. 35:​12-15.

KAMOO JEHOFA A BEGO A HLAHLA BAKRISTE BA LEKGOLONG LA PELE LA MENGWAGA KA GONA

9. Jehofa o be a diriša bomang go hlahla Bakriste ba lekgolong la pele la mengwaga? (Bona le seswantšho.)

⁹ Jehofa o ile a hloma phuthego ya Bokriste lekgolong la pele la mengwaga. O ile a hlahla bjang Bakriste ba nakong yeo? O ile a kgetha Jesu gore e be hlogo ya phuthego. (Baef. 5:23) Eupša Jesu o be a sa bolele le motho yo mongwe le yo mongwe ka go lebanya. O ile a diriša baapostola le banna ba bagolo ba Jerusalema gore ba etelele phuthego pele. (Dit. 15:​1, 2) Le gona bagolo ba ile ba kgethwa gore ba hlahle diphuthego.—1 Bathes. 5:12; Tito 1:5.

10. (a) Bakriste ba bantšhi ba lekgolong la pele la mengwaga ba ile ba arabela bjang go tlhahlo yeo ba bego ba e hwetša? (Ditiro 15:​30, 31) (b) Ke ka baka la’ng batho ba bangwe mehleng ya Beibele ba ile ba se amogele bao Jehofa a bego a ba kgethile gore ba etelele pele? (Bona lepokisi leo le rego “ Ba Bangwe ba Ile ba Gana go Amogela Bohlatse bjo bo Bego bo le Molaleng.”)

¹⁰ Bakriste ba lekgolong la pele la mengwaga ba ile ba arabela bjang? Ba bantšhi ba be ba thabela go latela ditaelo tšeo ba bego ba di hwetša. Ge e le gabotse, “ba ile ba thabela kgothatšo” yeo ba bego ba e hweditše. (Bala Ditiro 15:​30, 31.) Bjale Jehofa o be a dutše a hlahla batho ba gagwe bjang mehleng ye ya rena?

KAMOO JEHOFA A RE HLAHLAGO KA GONA LEHONO

11. Jehofa o hlahla bjang bao ba etelelago pele lehono? Nea mohlala.

¹¹ Jehofa o sa dutše a etelela batho ba gagwe pele le lehono. O be a dutše a dira bjalo a diriša  Lentšu la gagwe le Morwa wa gagwe e lego hlogo ya phuthego. Re kgona go bona bohlatse bja gore Modimo o sa dutše a tšwela pele a diriša batho bao ba mo emelago. Ka mohlala, nagana ka dilo tšeo di diregilego mengwageng ya bo 1800. Charles Taze Russell le badirišani ba gagwe ba ile ba lemoga gore ngwaga wa 1914 e tlo ba wa bohlokwa kudu ka ge go tla be go hlongwa Mmušo wa Modimo. (Dan. 4:​25, 26) Ba ile ba ithekga ka boporofeta bja Beibele gore ba fihlelele phetho yeo. Na Jehofa o be a ba hlahla ge ba be ba dira nyakišišo yeo ya Beibele? Go bjalo. Dilo tšeo di diregilego ka 1914 di ile tša bontšha gore Mmušo wa Modimo o thomile go buša. Ntwa ya Pele ya Lefase e ile ya thoma, ya latelwa ke mauba a malwetši, ditšhišinyego tša lefase le tlhaelelo ya dijo. (Luka 21:​10, 11) Go molaleng gore Jehofa o be a diriša banna bao ba botegago go thuša batho ba gagwe.

12-13. Ke dilo dife tšeo di ilego tša dirwa gore ditaba tše dibotse di kgone go bolelwa nakong ya Ntwa ya Bobedi ya Lefase?

¹² Ga bjale a re boledišaneng ka seo se diragetšego nakong ya Ntwa ya Bobedi ya Lefase. Ka morago ga gore bana babo rena bao ba ikarabelago kua ntlongkgolo ya Dihlatse tša Jehofa ba bale lengwalo la Kutollo 17:​8, ba ile ba phetha ka gore ntwa yeo e ka se re iše go Haramagedone eupša e be e tlo dira gore go be le nako ya khutšo yeo e tla dirago gore Dihlatse tša Jehofa di kgone go bolela ditaba tše dibotse ka mo go oketšegilego. Mokgatlo wa Jehofa o ile wa hloma Sekolo sa Gilead gore o kgone go tlwaetša baromiwa gore ba bolele ditaba tše dibotse dinageng tše dintšhi le ge seo se be se bonagala se ka se kgonege ka nako yeo. Baromiwa ba ile ba ba gona le ge ntwa e be e dutše e tšwela pele. Go oketša moo, mohlanka yo a botegago o ile a dira gore go be le Sekolo sa Bodiredi sa Pušo ya Modimo  b moo bohle ka diphuthegong ba bego ba tlwaetšwa gore e be bagoeledi ba babotse le barutiši ba bakaone. Dikolo tše di ile tša thuša batho ba Modimo gore ba itokišeletše go bolela ditaba tše dibotse.

¹³ Lehono re kgona go bona gore Jehofa o be a dutše a hlahla batho ba gagwe le dinakong tše thata. Ga e sa le go tloga ka Ntwa ya Bobedi ya Lefase, bahlanka ba Jehofa ba be ba  dutše ba thabela go bolela ditaba tše dibotse dinageng tše dintšhi. Ge e le gabotse batho ba bantšhi ba ile ba kgona go ithuta ka Jehofa.

14. Ke ka baka la’ng re ka bota tlhahlo yeo re e hwetšago go tšwa go mokgatlo le go bagolo? (Kutollo 2:1) (Bona le seswantšho.)

¹⁴ Lehono ditho tša Sehlopha se Bušago di sa tšwela pele di hlahlwa ke Kriste. Ba nyaka gore go bonagale gore ditaelo tšeo ba di neago bana babo bona le dikgaetšedi di tšwa go Jehofa. Ka morago, balebeledi ba tikologo le bagolo ba nea diphuthego ditaelo tšeo. c Bagolo bao ba tloditšwego ba ka “seatleng sa le letona” sa Kriste. (Bala Kutollo 2:1.) Re a tseba gore bagolo ba ga se ba phethagala e bile ba fela ba dira diphošo. Moshe, Joshua le baapostola le bona ba be ba fela ba dira diphošo. (Num. 20:12; Josh. 9:​14, 15; Baroma 3:23) Le ga go le bjalo, Kriste o hlahla mohlanka yo a botegago le bagolo, e bile o tlo tšwela pele a dira bjalo “matšatši ka moka go fihla bofelong bja tshepedišo ya dilo.” (Mat. 28:20) Ka gona, re na le mabaka a kwagalago a go bota tlhahlo yeo a re neago yona a diriša bao a ba kgethilego gore ba re etelele pele.

GO DULA RE LATELA TLHAHLO YA JEHOFA GO A RE HOLA

15-16. O ithuta’ng mohlaleng wa bao ba ilego ba latela tlhahlo ya Jehofa?

¹⁵ Le rena ge re dutše re latela tlhahlo ya Jehofa re tlo hwetša ditšhegofatšo. Ka mohlala, Andy le Robyn ba ile ba kwa keletšo ya gore ba nolofatše bophelo bja bona. (Bapiša le Baheberu 13:5.) Se se ile sa dira gore ba kgone go thuša go aga meago ya mokgatlo. Robyn o re: “Re ile ra dula mafelong a manyenyane kudu ao ka dinako tše dingwe a bego a se na lefelo la go apeela. Le gona, ke ile ka swanelwa ke go rekiša dilo tšeo ke bego ke di diriša go tšea dinepe, e lego selo seo ke se ratago. Ke be ke nyamile ge ke di rekiša. Eupša go swana le mosadi wa Aborahama e lego Sara, ke be ke ikemišeditše go lebelela pele, e sego morago.” (Baheb. 11:15) Banyalani ba ba ile ba holega bjang? Robyn o re: “Re ikwa re kgotsofetše ka ge re tseba gore re nea Jehofa sohle seo re nago le sona. Ge re phetha dikabelo tša rena re kgona go bona ganyenyane gore lefaseng le leswa go tla be go le bjang.” Andy le yena o re: “Re tloga re kgotsofatšwa ke go dira sohle gore re thekge Mmušo wa Modimo.”

¹⁶ Re holega bjang gape ka go latela tlhahlo ya Jehofa? Ka morago ga gore Marcia a fetše  sekolo se se phagamego, o be a nyaka go tsenela tirelo ya nako e tletšego. (Mat. 6:33; Baroma 12:11) O re: “Ke ile ka newa sebaka sa go tsena yunibesithi mahala ka mengwaga e mene. Eupša ke be ke nyaka go hlankela Jehofa ka mo go oketšegilego. Ka gona, ke ile ka ya sekolong sa go ithutela mešomo ya diatla gomme ka ithutela selo seo se ka tlago sa nthuša go itlhokomela ge ke hlankela Jehofa. Ye e bile e nngwe ya diphetho tše dibotse kudu tšeo ke ilego ka di dira bophelong. Ga bjale ke thabela go ba mmulamadibogo wa ka mehla e bile mošomo wo ke nago le ona o dira gore ke kgone go thuša Bethele ka matšatši a itšego le go thabela ditokelo tše dingwe tša tirelo.”

17. Re hwetša ditšhegofatšo dife tše dingwe ge re latela tlhahlo ya Jehofa? (Jesaya 48:​17, 18)

¹⁷ Ka dinako tše dingwe re hwetša keletšo yeo e ka re thušago gore re se ke ra rata dilo tše di bonagalago goba go dira dilo tšeo di ka dirago gore re robe melao ya Modimo. Ge re dira bjalo re hwetša ditšhegofatšo tša go latela tlhahlo ya Modimo. Re dula re na le letswalo le le hlwekilego e bile re phema go ba le mathata a mantšhi. (1 Tim. 6:​9, 10) Ka baka la seo, re kgona go hlankela Jehofa ka mo go tletšego gomme seo se re tlišetša lethabo, khutšo le kgotsofalo.—Bala Jesaya 48:​17, 18.

18. Ke ka baka la’ng o ikemišeditše go dula o latela tlhahlo ya Jehofa?

¹⁸ Go molaleng gore Jehofa o tlo tšwela pele a diriša batho go re nea tlhahlo nakong ya masetlapelo a magolo le nakong ya Pušo ya Mengwaga e Sekete. (Ps. 45:16) Eka re ka dula re latela tlhahlo yeo re e hwetšago le ge e ba e thulana le dilo tšeo re di ratago. Bophelo bja rena bo ithekgile ka go amogela tlhahlo yeo Jehofa a re neago yona gona bjale. Ka gona, eka re ka dula re latela tlhahlo yeo Jehofa a re neago yona a diriša banna bao a ba kgethilego gore ba re hlokomele. (Jes. 32:​1, 2; Baheb. 13:17) Go dira bjalo go tlo re thuša gore re tshepe Mohlahli wa rena Jehofa, yo a re etelelago pele le go re iša mo re yago gona, e lego lefaseng le leswa moo re tla bego re phela ka mo go sa felego.