ഈസ്റ്ററിനെക്കുറിച്ച് ബൈബിൾ എന്തു പറയുന്നു?
ബൈബിളിന്റെ ഉത്തരം
ഈസ്റ്റർ ബൈബിളധിഷ്ഠിതമായ ഒരു ആഘോഷമല്ല. നിങ്ങൾ അതിന്റെ ചരിത്രം ഒന്നു പരിശോധിച്ചാൽ ഈസ്റ്റർ എന്ന ആഘോഷത്തിന്റെ പിന്നിൽ ശരിക്കും എന്താണെന്നു മനസ്സിലാകും. അതിന്റെ പാരമ്പര്യം പണ്ടുകാലത്ത് വിളവു വർധിപ്പിക്കാൻ നടത്തിയിരുന്ന ചടങ്ങുമായി ബന്ധപ്പെട്ടിരിക്കുന്നു. പിൻവരുന്ന കാര്യങ്ങൾ കാണുക.
പേര്: ബ്രിട്ടാനിക്ക സർവവിജ്ഞാനകോശം (ഇംഗ്ലീഷ്) പറയുന്നു: “ഈസ്റ്റർ എന്ന ഇംഗ്ലീഷ് പേര് എവിടെനിന്ന് വന്നതാണെന്നു വ്യക്തമല്ല. ആംഗ്ലോ സാക്സൺ വിശ്വാസമനുസരിച്ച് വസന്തത്തിന്റെ ദേവതയായ ഈസ്ട്രയുടെ പേരിൽനിന്നാണ് ഈസ്റ്റർ വന്നത് എന്ന് 8-ാം നൂറ്റാണ്ടിൽ ജീവിച്ചിരുന്ന ആംഗ്ലോ-സാക്സൺ പുരോഹിതൻ സംപൂജ്യനായ ബീഡ് അനുമാനിച്ചു.” ഫലപുഷ്ടിയുടെ ഫിനീഷ്യൻ ദേവതയായ അസ്റ്റാർട്ടീയുടെ പേരിൽനിന്നാണ് ഈസ്റ്റർ വന്നതെന്ന് മറ്റു ചിലർ പറയുന്നു. ബാബിലോൺകാർ ഈ ദേവതയെ ഇഷ്തർ എന്നാണ് വിളിക്കുന്നത്.
മുയൽ: ഇത് ഫലപുഷ്ടിയുടെ പ്രതീകമാണ്. “യൂറോപ്പിലും മധ്യപൂർവദേശത്തും വസന്തകാലത്ത് നടത്തുന്ന പുറജാതീയ ഉത്സവങ്ങളിലെ ചടങ്ങുകളിൽനിന്നും പ്രതിരൂപങ്ങളിൽനിന്നും വന്നതാണ്” ഈ പ്രതീകം.—ബ്രിട്ടാനിക്ക സർവവിജ്ഞാനകോശം (ഇംഗ്ലീഷ്).
മുട്ടകൾ: ഫങ്കിന്റെയും വോഗ്നൽസിന്റെയും, പുരാണകഥകളുടെയും ഐതിഹ്യങ്ങളുടെയും ഇതിഹാസങ്ങളുടെയും പ്രമാണനിഘണ്ടു (ഇംഗ്ലീഷ്) പറയുന്നതനുസരിച്ച് ഈസ്റ്റർമുയൽ കൊണ്ടുവരുന്നതായി കരുതപ്പെടുന്ന ഈസ്റ്റർ മുട്ടകൾക്കുവേണ്ടിയുള്ള തിരച്ചിൽ “വെറും ഒരു കുട്ടിക്കളിയല്ല, പകരം ഫലപുഷ്ടിയുമായി ബന്ധപ്പെട്ട ഒരു ആചാരത്തിന്റെ ബാക്കിപത്രമാണ്.” അലങ്കരിച്ച ഈസ്റ്റർ മുട്ടകൾക്ക്, “സന്തോഷവും ഐശ്വര്യവും ആരോഗ്യവും സംരക്ഷണവും നൽകാനുള്ള മാന്ത്രികശക്തിയുണ്ട്” എന്നു ചില സംസ്കാരങ്ങളിൽപ്പെട്ട ആളുകൾ വിശ്വസിക്കുന്നു.—പരമ്പരാഗത ഉത്സവങ്ങൾ (ഇംഗ്ലീഷ്).
ഈസ്റ്ററിനു ധരിക്കുന്ന പുത്തൻ വസ്ത്രങ്ങൾ: “വസന്തത്തിന്റെ സ്കാൻഡനേവിയൻ ദേവതയെ, അഥവാ ഈസ്ട്രയെ, പുതുവസ്ത്രങ്ങളിലല്ലാതെ വണങ്ങുന്നത് ഒരു അപമര്യാദയായും അതുകൊണ്ടുതന്നെ ഭാഗ്യക്കേടായും ആണ് കണക്കാക്കിയിരുന്നത്.”—അന്ധവിശ്വാസങ്ങളുടെ ഭീമൻഗ്രന്ഥം (ഇംഗ്ലീഷ്).
സൂര്യോദയശുശ്രൂഷകൾ: “സൂര്യനെയും, വളരുന്ന എല്ലാ വസ്തുക്കൾക്കും പുതുജീവൻ നൽകാനുള്ള സൂര്യന്റെ മഹാശക്തിയെയും സ്വാഗതം ചെയ്യാനായി വസന്തവിഷുവത്തിൽ നടത്തുന്ന” പണ്ടുകാലത്തെ സൂര്യാരാധകരുടെ ആചാരങ്ങളുമായി ഇതിനു ബന്ധമുണ്ട്.—ആഘോഷങ്ങൾ—അമേരിക്കൻ വിശേഷദിവസങ്ങളുടെ സമ്പൂർണഗ്രന്ഥം (ഇംഗ്ലീഷ്).
ദിവസങ്ങളെക്കുറിച്ചുള്ള അമേരിക്കൻ ഗ്രന്ഥം (ഇംഗ്ലീഷ്) ഈസ്റ്ററിന്റെ ഉത്ഭവത്തെക്കുറിച്ച് ഇങ്ങനെ പറയുന്നു: “തിരുസഭ അതിന്റെ ആരംഭദശയിൽ, പണ്ടുകാലത്തെ പുറജാതീയ ആചാരങ്ങൾ കടമെടുത്ത് അവയ്ക്ക് ഒരു ക്രിസ്തീയ പരിവേഷം നൽകി എന്നതിനു സംശയമില്ല.”
ദൈവത്തെ അപ്രീതിപ്പെടുത്തുന്ന ആചാരങ്ങളും പാരമ്പര്യങ്ങളും പിന്തുടർന്നുകൊണ്ട് ദൈവത്തെ ആരാധിക്കുന്നതിന് എതിരെ ബൈബിൾ മുന്നറിയിപ്പു തരുന്നു. (മർക്കോസ് 7:6-8) 2 കൊരിന്ത്യർ 6:17 ഇങ്ങനെ പറയുന്നു: ‘“‘അവരിൽനിന്ന് അകന്നുമാറൂ, അശുദ്ധമായതു തൊടരുത്;’” . . . എന്ന് യഹോവ പറയുന്നു.’ ഈസ്റ്റർ വ്യാജമതവുമായി ബന്ധമുള്ള ഒരു വിശേഷദിവസമാണ്. ദൈവത്തെ സന്തോഷിപ്പിക്കാൻ ആഗ്രഹിക്കുന്നവർ അത് ആഘോഷിക്കില്ല.