Iza no Hampanjaka ny Fiadanana Mandrakizay?

NAHOANA Andriamanitra no tsy namaly ny vavaka ho an’ny fiadanana, nataon’ny mpitondra fivavahana isan-karazany? Mahavariana ny valiny omen’ny Baiboly. Tsy hoe tsy tia fiadanana akory Andriamanitra. Izy aza mbola maniry kokoa ny hisian’ny fiadanana noho ireo mpitondra fivavahana nivavaka momba izany. Raha ny marina aza dia efa nalamin’Andriamanitra tsara ny fomba hampanjakana ny fiadanana eran-tany. Efa nanao dingana lehibe sasany izy mba hahavitana izany, ary nohazavainy tsara tamin’ny olombelona ny fikasany. Mampalahelo anefa fa tsy miraharaha ny tenin’Andriamanitra ny ankamaroan’ny fivavahana.

Efa ela Andriamanitra no nampanantena “taranaka” na mpitondra, ary hazavain’ny Baiboly miandalana ny momba azy io. (Genesisy 3:15; 22:18; 49:10) Nanoratra faminaniana miavaka maro momba ny Mesia i Isaia ary nilaza izy fa io Mpitondra io no ho lasa “Andrian’ny fiadanana” eran-tany, ka ‘tsy hanam-pahataperana ny fiadanana’ rehefa izy no hitondra. (Isaia 9:5, 6) Avy any an-danitra ilay Mesia no hitondra, ary haringany ny ratsy fanahy ka hovany ho paradisa ny tany. Tsy hisy intsony ny tsy rariny, ny aretina, ny fahantrana, na ny fahafatesana. Hanjaka ny fiadanana ary hiaina mandrakizay ny olona. (Salamo 72:3, 7, 16; Isaia 33:24; 35:5, 6; Daniela 2:44; Apokalypsy 21:4) Rahoviana izany no hitranga?

Antomotra ny fiadanana eran-tany

Nilaza tamin’ny mpianany i Jesosy fa hisy loza miavaka maro hiara-mitranga maneran-tany, ho famantarana ny fifaranan’ity tontolo ratsy ity sy ny fanombohan’ny tontolo vaovaon’olombelona. (Matio 24:3, 7-13) Nitranga indraindray ihany ny ankamaroan’izy ireny taloha, na ny ady na ny mosary na ny horohoron-tany, raha ireo fotsiny aza no hotononina. Mbola tsy niara-nitranga naneran-tany mihitsy anefa izy ireny ary mbola tsy nampahory mafy ny olona, raha tsy tamin’ny androntsika. Mahatsiravina be noho ny hatramin’izay koa ny vokatr’ireny loza ireny, satria lasa be loatra ny mponina eto an-tany.

 Efa nolazain’ny Baiboly koa ny fanimban’ny olona ny tontolo iainana. (Apokalypsy 11:18) Ankoatra izany, dia tsy maintsy hotontosaina alohan’ny farany ilay asa fampitandremana maneran-tany, dia ny fitoriana ny “filazantsaran’ny fanjakana.” Manao io asa io maneran-tany ny Vavolombelon’i Jehovah ankehitriny.—Matio 24:14.

Vaovao tsara ho an’ny olona manam-pinoana ny fahatanterahan’ireny faminaniana ireny. Antomotra tokoa ilay tontolo vaovao hanjakan’ny fiadanana voalazan’ny faminaniana! Azo antoka fa tsy hisy fankahalana sy fampihorohoroana intsony mihitsy amin’izay. Manazava ny Baiboly hoe: “Tsy handratra na hanimba eran’ny tendrombohitro masina izy; fa ny tany ho henika ny fahalalana an’i Jehovah, tahaka ny anaronan’ny rano ny fanambanin’ny ranomasina.”—Isaia 11:9.

Vavaka henoin’Andriamanitra

Tsy very maina na fombafomba tsy misy dikany ny vavaka atao amin’Andriamanitra, satria antsoin’ny Baiboly hoe “Mpihaino vavaka” i Jehovah. (Salamo 65:2) Henoiny foana àry ny vavaka tsy hita isa ataon’ny olona tso-po etỳ an-tany. Misy fepetra takina ve anefa mba hihainoany ny vavaka atao? Milaza ny Baiboly fa tokony hampihatra izay ianarany ny olona mianatra amim-pahatsorana ny fahamarinana momba an’Andriamanitra, ka ho lasa “tena mpivavaka” izay mivavaka aminy amin’ny “fanahy sy ny fahamarinana.” (Jaona 4:23) Tsy valian’Andriamanitra kosa ny vavak’ireo tsy mankatò ny didiny: “Izay manentsin-tadìny tsy hihaino ny [lalàn’Andriamanitra], na ny fivavahany aza dia fahavetavetana.”—Ohabolana 28:9.

Mampalahelo fa tsy mampianatra ny fikasan’Andriamanitra hampanjaka ny fiadanana ny mpitondra fivavahana, sady tsy mivavaka momba izany fikasana izany. Mivavaka kosa izy ireo mba hahitan’ny fanjakan’olombelona vahaolana, nefa efa milaza mazava tsara ny Tenin’Andriamanitra fa tsy “an’ny mpandeha ny hahalavorary ny diany.”—Jeremia 10:23.

Milaza ny faminaniana fa “any am-parany”, izany hoe amin’ny androntsika, dia hitanjozotra hankany amin’ny “tendrombohitra misy ny tranon’i Jehovah”, na ny fivavahana marina, ny olona tia fiadanana. Hanova tanteraka ny fiainany ireny olona ireny: “Hanefy ny sabany ho fangady ireny, ary ny lefony ho fanetezam-boaloboka; ny firenena tsy hanainga sabatra hifamely na hianatra ady intsony.”—Isaia 2:2-4.

Misy mpivavaka miezaka hampihatra ireo teny ireo ve ankehitriny? Sa kosa ny fivavahana rehetra miresaka momba ny fiadanana fotsiny nefa mitarika ady ihany? Asainay ianao handinika momba ny fiadanana miaraka amin’ny Vavolombelon’i Jehovah rehefa mifankahita amin’izy ireo, ary hamantatra izay fivavahana mampianatra ny olona hitandro fihavanana.