Novalian-tsoa ny Fahasahiany

MARO NY TANORA VAVOLOMBELON’I JEHOVAH manome ohatra tsara amin’ny fahasahiana miresaka momba ny finoany. Diniho ny ohatr’i Stella, zatovovavy avy any Thessalonique, Gresy. Nitantara izy hoe: “Nodinihina nandritra ny fivorianay ny fomba hampiasana ireo vidéos an’ny Vavolombelon’i Jehovah, mba hanampiana ny olona hahafantatra an’i Jehovah. Noeritreretiko ny fomba ho azoko ampiasana ilay vidéo hoe Ny Vavolombelon’i Jehovah—Ilay Fandaminana ao Ambadik’ilay Anarana. Niresaka tamin’ny talen’ny sekoly aho, ny ampitson’iny, ary nanome soso-kevitra ny hampiseho an’ilay vidéo tao am-pianarana. Gaga aho rehefa nilaza izy fa tsy laviny raha manaiky ny mpampianatra.

Androtr’izay ihany dia nilaza tamiko ilay tale fa azo jerena amin’ny herinandro manaraka ilay vidéo, saingy tsy mandritra ny ora fianarana fa rehefa mirava. Nandiso fanantenana ahy izany! Nieritreritra aho mantsy hoe tsy handany ny fotoanany hijerena azy io ny mpiara-mianatra amiko. Nasaiko ihany anefa ny ankizy rehetra ny ampitso. Nanaiky ry zareo, sady nanasa mpianatra avy tany amin’ny kilasy hafa koa. Nisy mpampianatra enina tonga nijery ilay vidéo; mpampianatra teolojia ny iray.

Nanaraka tsara an’ilay vidéo daholo ry zareo. Nasain’ny tale nitarika dinidinika aho taorian’izay. Nampiaiky ny ankamaroan’ny mpianatra ny asa an-tsitrapo atao any amin’ny foiben’ny Vavolombelon’i Jehovah, naseho tao amin’ilay vidéo. Niteny ny mpianatra iray hoe: ‘Faly izy ireo manao ny asany na dia tsy mikarama aza.’

Nolazaiko tamin’ny mpijery rehetra fa manana boky sy gazety ara-baiboly isika. Nozaraiko tamin’izy ireo koa ny Vaovao Momba Ilay Fanjakana No. 36, mitondra ny lohateny hoe ‘Ny Taonarivo Vaovao—Inona no Ampanantenain’ny Hoavy ho Anao?’ Nangataka maromaro tamin’izy io ny tale, mba homeny an’ireo mpampianatra tsy teo.

Niresaka tamin’ny namany momba ilay vidéo ireo mpianatra. Faly aho fa nahay nanararaotra nitory. Manjary manaja ahy kokoa ny mpiara-mianatra amiko, ary ny tena zava-dehibe dia izao: Manaja ilay Andriamanitra ivavahako izy ireo!”