Ry Ray Aman-dreny,

Sahirana ny ankizy rehefa mihalehibe. Toy ny hoe zaza vao miana-mandeha indray izy. Tsy matoky tena ilay zaza isaky ny mamindra, ary matahotra mihitsy aza. Satrinao indraindray ny hisakana azy tsy handeha. Marina fa tsy afaka manao an’izany ianao, nefa afaka mitantana azy kosa, rehefa ilaina izany, mba tsy hianjerany. Raha manan-janaka tanora àry ianao, dia ianao no voalohany tokony hanampy azy tsy ho kivy, na eo aza ny zava-tsarotra mahazo azy. Ianao koa no tena afaka manampy azy ho lasa olon-dehibe mahay mandray andraikitra.

Marina fa mora tenenina izany saingy sarotra tanterahina. Toy ny hoe vao omaly ilay zanakao lahy no hitanao nipelipelika tetsy sy teroa. Tsy nikombona mihitsy koa ny vavany. Mitokantokana anefa izy izao, ary tsy mety miresaka aminao. Toa vao omaly koa ny zanakao vavy no nidongy hanaraka anao hatraiza hatraiza. Menatra be anefa izy izao raha vao hoe hiaraka aminao eny imason’olona!

Aza kivy anefa raha miova toy izany ny zanakao. Nahoana? Satria misy boky afaka manome fahendrena sy tari-dalana tena tsara ho anao sy ho azy. Tsy inona izany fa ny Baiboly.

Natao hanomezana torohevitra avy ao amin’ny Baiboly ho an’ny zanakao àry, ny Manontany ny Tanora—Torohevitra Mahasoa, Boky Faha-2. Jereo ange ny pejy 4 sy 5 e! Misy loha hevitra maro be ao. Ny tena zava-misy no resahin’ity boky ity. Tsy izay ihany anefa, fa misy zavatra mampiavaka azy koa. Ireto ny sasany:

1) Asaina manoratra ny heviny ny tanora ato. Imbetsaka izy no ampirisihina hanao izany. Jereo, ohatra, ilay hoe “Inona no Hatao Raha Taomin’ny Ankizy Haditra?”, eo amin’ny pejy 132 sy 133. Asaina mieritreritra izy hoe inona  no fakam-panahy tena mahazo azy, ary inona no azony atao mba handresena izany. Ankoatra izany, dia misy hoe “Ny Diariko” any amin’ny faran’ny fizarana tsirairay. Azon’ny zanakao soratana ao ny heviny momba izay zavatra vao avy novakiny.

2) Natao hampirisihana ny ray aman-dreny sy zanaka hifampiresaka ity boky ity. Jereo, ohatra, ilay efajoro hoe “Hiresaka Firaisana Amin’i Dada sy Neny Hoe?”, eo amin’ny pejy 63 sy 64. Misy efajoro hoe “Ahoana ny Hevitrao?” koa eo amin’ny faran’ny toko tsirairay. Tsy natao hamerenana ny hevi-dehibe fotsiny izy io, fa azonareo iaraha-midinika koa. Misy an’ilay hoe “Zavatra Eritreretiko Hatao!” koa isaky ny toko. Ahitana an’ity fehezanteny ity ao: “Izao no hanontaniako ny ray aman-dreniko momba izany...” Natao hampirisihana ny tanora hangataka torohevitra amin’ny ray aman-dreny izy io isaky ny manana olana izy, mandra-pahalehibeny.

Aza vakina anefa ny bokiny. Tsy ho menatra hanoratra izay tena ao am-pony izy amin’izay. Mety mbola holazainy aminao ihany ilay izy, rehefa mandeha ny fotoana.

Tsara raha manana ny bokinao ianao. Vakio tsara ilay izy, ary miezaha mitadidy izay nanjo anao tamin’ny ianao mbola tanora. Mba efa niady saina sy nitebiteby koa ianao. Mbetika ianao faly, ary mbetika tezitra na nalahelo. Raha ilaina, dia tantarao amin’ny zanakao izay nanjo anao, fa mety hitantara ny manjo azy koa izy. Henoy tsara izy amin’izay! Aza kivy anefa, raha tsy mety miresaka izy. Tadidio fa ny tenin’ny ray aman-dreny mazàna no henoin’ny ankizy kokoa noho ny an’ny namany, na dia mody tsy miraharaha an’izany aza izy.

Faly izahay manome anao sy ny zanakao an’ity boky ara-baiboly ity. Enga anie ka hahasoa anareo izy ity.

Ny Mpampanonta