“Fotoana tokony hanaovan-javatra izao mba hahatonga ny ady tsy hitatra intsony. Amin’izao mihitsy ny rehetra no tokony hiezaka hifehy tena be.” Izany no nolazain’i António Guterres, Sekretera Jeneralin’ny Firenena Mikambana, mahakasika ny fanafihan’i Iran mivantana an’i Israely tamin’ny asabotsy 13 Aprily 2024.

 Santionany iray fotsiny amin’ny zava-mitranga maneran-tany ny ady any Israely.

 “Mbola tsy nisy ady mahatsiravina be dia be hoatr’izao hatramin’ny nisian’ny Ady Lehibe II. Olona roa arivo tapitrisa, izany hoe ampahefatry ny mponina eran-tany, no mipetraka any amin’ny tany misy ady.”​—Filan-kevi-pilaminan’ny Firenena Mikambana, 26 Janoary 2023.

 Ireto avy ny toerana anisan’ny ahitana ady mahatsiravina amin’izao: Israely, Gaza, Syria, Azerbaïjan, Ukraine, Soudan, Etiopia, Niger, Myanmar, ary Haïti. a

 Rahoviana no hitsahatra ny ady? Ho vitan’ny mpitondra eo amin’izao tontolo izao ve ny hampisy filaminana? Inona no lazain’ny Baiboly?

 Ny fisian’ny ady maneran-tany amin’izao dia mampiseho fa kely sisa dia tsy hisy intsony ny ady. Manatanteraka ny faminanian’ny Baiboly momba ny androntsika ireny ady ireny, ary mampiseho fa “efa akaiky ny faran’izao tontolo izao.”​—Matio 24:3.

•   “Haheno ady ianareo ary hisy hilaza aminareo koa hoe misy ady any an-toeran-kafa. . . . Hisy firenena hiady amin’ny firenena, ary hisy fanjakana hiady amin’ny fanjakana.”​—Matio 24:6, 7.

 Vakio ilay lahatsoratra hoe “Inona ny Famantarana ny ‘Andro Farany’?” mba hahitana hoe nahoana ny ady amin’izao no manatanteraka ny faminanian’ny Baiboly.

 Milaza ny Baiboly fa hifarana ny ady ataon’ny olombelona. Ahoana no hahatanterahan’izany? Tsy avy amin’ny ezaka ataon’ny olombelona fa amin’ny alalan’ny Aramagedona, izay antsoin’ny Baiboly hoe “adin’ny andro lehiben’ilay Andriamanitra Mahery Indrindra.” (Apokalypsy 16:14, 16) Aorian’io ady io, dia hotanterahin’Andriamanitra ilay fampanantenany hoe hiadana mandrakizay ny olombelona.​—Salamo 37:10, 11, 29.

 Raha tianao ny hahafantatra bebe kokoa momba an’ilay ady iray hamarana ny ady rehetra, dia vakio ilay lahatsoratra hoe “Inona no Atao hoe Ady Aramagedona?”