27 DESAMBRA 2023 | VAOVAO FARANY: 6 MARTSA 2024
ROSIA

VAOVAO FARANY: NOGADRAINA IREO RAHALAHY | Tsy Kivy ny Rahalahintsika na dia Migadra Ela Be sy Ambenana any An-tranony Aza

HANDEFA

Nomelohin’ny Fitsaram-paritr’i Oktyabrskiy any Irkoutsk ny Rahalahy Nikolay Martynov, Sergey Kosteyev, Yaroslav Kalin, Mikhail Moysh, Igor Popov, Denis Sarazhakov, Aleksey Solnechniy, Andrey Tolmachev, ary Sergey Vasiliyev, tamin’ny 5 Martsa 2024. Voaheloka higadra fito taona avy i Nikolay, Sergey Kosteyev, Yaroslav, Mikhail, Aleksey, ary Andrey. I Igor sy Denis kosa voaheloka higadra enin-taona sy efa-bolana avy. I Sergey Vasiliyev indray voaheloka higadra telo taona, dia tonga dia naiditra am-ponja izy rehefa vita ilay fitsarana. Ireo rahalahy hafa moa efa tany am-ponja talohan’ilay fitsarana, dia mijanona any ihany ry zareo.

Ireo voampanga

Nikolay Martynov

Teraka: 1958 (Bandarka, Faritr’i Irkoutsk)

Mombamomba azy: Mpamily no asany taloha

Nanambady an’i Irina tamin’ny 1982. Manan-janaka roa izy mivady

Nanomboka nianatra Baiboly tamin’ny Vavolombelon’i Jehovah i Irina tamin’ny 1997. Resy lahatra i Nikolay hoe nianatra ny fahamarinana rehefa nahita hoe tanteraka ny faminanian’ny Baiboly. Niara-natao batisa tamin’ny 1998 izy mivady

Resadresaka nifanaovana tamin’i Irina, vadin’i Nikolay a

Inona no manampy ny vadinao tsy ho kivy na dia efa roa taona mahery aza izay izy no any am-ponja miandry ny fitsarana azy?

Zatra mamaky Baiboly sy misaintsaina foana izy, dia matetika izy no miteny hoe mamaly ny vavaka ataony i Jehovah. Fa na izany aza, dia tena mafy be aminy ilay izy tafasaraka aminay. Tena vady tsara i Nikolay sady dada mahafinaritra be. Nanome an’izay nilainay foana izy hatramin’izay, dia kivy izy hoe tsy afaka manao an’izany izy izao. Lasa milamin-tsaina indray anefa izy rehefa teneninay azy hoe mampiasa ny anadahy sy rahavavy i Jehovah mba hikarakarana anay. Miteny koa izy hoe manampy azy hiaritra, hono, ny maka sary an-tsaina anay mianakavy kely any amin’ny tontolo vaovao. Efa vitany planina hoe hoatran’ny ahoana no hanaovany ny tranonay rehefa any, dia inona avy no voankazo tiany hambolena.

Yaroslav Kalin

Teraka: 1960 (Pivovarikha, Faritr’i Irkoutsk)

Mombamomba azy: Lehibe tao anaty fianakaviana Vavolombelon’i Jehovah. Natao sesitany tany Siberia ny ray aman-dreniny sy ny dadabe sy bebeny tamin’ny 1951

Mpanamboatra tele sy radio simba no asany taloha

Natao batisa sy lasa Vavolombelon’i Jehovah tamin’ny 1987

Nanambady an’i Tatyana tamin’ny 1991. Nanan-janaka lahy roa sy vavy roa izy mivady. Maty tamin’ny 2007 ny zanaky ry zareo faralahy

Resadresaka nifanaovana tamin’i Tatyana, vadin’i Yaroslav b

Inona no olana atrehin’ny vadinao any am-ponja, ary inona no manampy azy hiaritra?

I Yaroslav irery no ao amin’ilay efitra figadrana misy azy. Efa roa taona mahery izy izay no tao, dia tena mafy be aminy ilay izy. Izy mantsy tena tia miaraka aman’olona sy miresadresaka. Lasa manahy be sy kivy ary malemilemy izy amin’ilay izy mitokana irery ao. Fa izy anefa tena miezaka be mba tsy ho kivy be na hitsetra tena. Matetika izy no miresaka ny Kolosianina 1:11 rehefa manoratra taratasy ho anay. Izao no resahin’io andininy io: “Enga anie Andriamanitra hampiasa ny heriny be voninahitra, ka hanatanjaka anareo sy hanome anareo an’izay hery rehetra ilainareo! Amin’izay ho vitanareo ny hiaritra ny zava-drehetra, sady hanam-paharetana sy ho falifaly.” Tapa-kevitra izy hoe tsy hivadika mihitsy sady hatoky an’i Jehovah foana. Fantatro fa fantatr’i Yaroslav tsara hoe zava-dehibe sady tena ilaina ny hoe manao ny sitrapon’i Jehovah foana dieny izao sy ho mandrakizay.

Mikhail Moysh

Teraka: 1987 (Ukraine)

Mombamomba azy: Niasa tamin’ny resaka fanorenana sy varotra

Nanambady an’i Yelena tamin’ny 2009. Manan-janakalahy roa izy mivady

Natao batisa tamin’ny 2010 i Yelena. Nanomboka niara-nivory taminy i Mikhail. Natao batisa tamin’ny 2016 izy

Resadresaka nifanaovana tamin’i Yelena, vadin’i Mikhail c

Ahoana no mbola ikarakaran’i Mikhail anareo telo mianaka foana eo amin’ny ara-panahy, na dia efa roa taona mahery aza izay izy no any am-ponja?

Efa 12 taona izao ny zanakay lahimatoa. Ilay zandriny indray roa taona sy tapany amin’izao, fa vao enim-bolana izy tamin’i Mikhail nosamborina sy naiditra am-ponja vonjimaika. Tena tsy azony mihitsy hoe fa maninona ny dadany no tsy ao an-trano. Tena malahelo be azy izy roa lahy. Fa manoratra matetika ho azy roa lahy anefa i Mikhail. Mandefa tononkalo izy, mampianatra an-dry zareo momba ny biby sy ny vorona, manamboatra kilalao ho an-dry zareo, dia indraindray aza ry zareo asainy manao fikarohana kely mihitsy. Manampy ahy koa izy rehefa ilay kivy iny aho. Nisy fotoana izao aho lasa saina hoe: ‘Fa maninona no isika e? Fa maninona no tratran’izao ny fianakaviantsika?’ Nanome toky ahy i Mikhail tao amin’ny taratasiny anankiray hoe tsy hoe lasa malemy, hono, ny finoako raha manontany hoatr’izany aho. Izao no nosoratany tao: “Ny tena zava-dehibe dia ny hoe inona no ataontsika rehefa mahatsapa hoatr’izany isika. Aleo manao hoatran’i Joba hoe mamela an’i Jehovah hanitsy ny fomba fisainantsika. Hanampy antsika i Jehovah amin’izay, dia hatanjaka indray ny finoantsika sady lasa hanana ny fomba fijeriny isika.” Tena nanatanjaka ahy io taratasy io.

Igor Popov

Teraka: 1987 (Kazakhstan)

Mombamomba azy: Valo mianadahy ry zareo. Maty ny dadany tamin’izy 11 taona

Manao ny pitsipitsiny farany amin’ny fanamboarana ny ao anaty trano sy mpikarakara fantson-drano no asany taloha

Nanomboka nianatra Baiboly ny maman’i Igor sy ny zokiny lahy rehefa maty ny dadan-dry zareo. Niara-nianatra tamin-dry zareo koa i Igor, dia tena nampahery azy ilay hoe mbola hatsangana ny maty. Natao batisa tamin’ny 2006 i Igor sy ny mpianakaviny fito hafa

Nanambady an’i Mangira tamin’ny 2013

Resadresaka nifanaovana tamin’i Mangira, vadin’i Igor d

Inona no andinin-teny manampy anareo mivady hiatrika an’izao fotoan-tsarotra izao?

Tsy maintsy nitokana nandritra ny fotoana lava be i Igor. Niresaka ny Salamo 118:5 izy tao amin’ny taratasiny anankiray. Hoy ilay andininy hoe: “Niantso an’i Jah aho tao anatin’ny sarotra, dia namaly ahy i Jah ka nitondra ahy nankeo amin’ny toerana tsy mampidi-doza.” Dia izao no nosoratan’i Igor hoe: “Azo adika hoe ‘toerana malalaka’ koa ilay hoe toerana tsy mampidi-doza. Rehefa mieritreritra zavatra mahakivy isika, dia mahatsapa hoe hoatran’ny voafandrika sy tapi-dalan-kaleha izany. Afaka mamaly ny vavaka ataontsika anefa i Jehovah amin’izay, dia hoatran’ny manafaka antsika rehefa manampy antsika ho tony sy hilamin-tsaina.” Tsapanay foana tao anatin’izay fotoan-tsarotra rehetra izay hoe mahita hevitra hanampiana anay foana i Jehovah sady tsy hanary anay mihitsy, na aiza na aiza misy anay.

Denis Sarazhakov

Teraka: 1988 (Sayanogorsk, Repoblikan’i Khakassie)

Mombamomba azy: Niasa tamin’ny fanaovana dokam-barotra

Vavolombelon’i Jehovah ny ray aman-dreniny, dia nanampy azy ho tia an’i Jehovah sy ho lasa namany. Lasa resy lahatra hoe mahasoa ny mampihatra ny torolalan’ny Baiboly. Natao batisa tamin’ny 2004

Nanambady an’i Olesiya tamin’ny 2007

Resadresaka nifanaovana tamin’i Olesiya, vadin’i Denis e

Ahoana no ampaherezan’i Denis anao?

Mifanoratra foana izahay sy Denis, dia ireny taratasy ireny no tena ifampiresahanay. Mahazo mifampiresaka amin’ny telefaonina dimy minitra eo ho eo indray mandeha isan-kerinandro koa izahay. Ankoatra an’izay, dia afaka mitsidika azy indroa isam-bolana koa aho, dia afaka miresaka eo izahay mandritra ny adiny iray. Misy fitaratra fotsiny manasaraka anay, dia telefaonina no ifampiresahanay. Mizara zavatra mampahery avy ao amin’ny Baiboly amiko foana i Denis, isaky ny tafaresaka izahay. Ampahatsiahiviny foana aho hoe tsy tokony hieritreritra izahay hoe tsy misy azo antenaina intsony. Tokony ho faly aza izahay amin’ny zavatra vitanay noho izao mahazo anay izao. Tsy nampalemy anay mihitsy izao zava-tsarotra iainanay izao, fa vao mainka aza manatanjaka anay.

Aleksey Solnechniy

Teraka: 1976 (Abakan, Faritanin’i Krasnoïarsk)

Mombamomba azy: Elektrisianina no asany taloha

Nianatra Baiboly tamin’ny Vavolombelon’i Jehovah ny maman’i Aleksey sy ny zandriny vavy, tamin’i Aleksey lasa nanao miaramila. Rehefa nody izy dia lasa liana tamin’ny Baiboly dia nanomboka nianatra. Natao batisa tamin’ny 2004

Nanambady an’i Alyona tamin’ny 2011

Resadresaka nifanaovana tamin’i Alyona, vadin’i Aleksey f

Inona no manampy ny vadinao tsy ho kivy amin’izao izy any am-ponja izao?

Mivavaka foana i Aleksey mba hahatadidy hoe faly aminy i Jehovah. Miezaka hitadidy foana koa izy hoe manao ny asany fotsiny ny manam-pahefana sy ny mpitsara. Nanampy azy izany mba tsy hifantoka be amin’ny tenany sy amin’ny zava-tsarotra mahazo azy, fa hifantoka kokoa amin’ny hoe voninahitra be izany hoe miaro ny anaran’i Jehovah izany. Malahelo ahy sy ny fianakaviany ary ny namany aloha izy e! Fa na izany aza, dia miezaka ny tsy ho kivy izy. Mbola tia mivazivazy foana aza izy.

Sergey Vasiliyev

Teraka: 1951 (Irkoutsk, Faritanin’i Irkoutsk)

Mombamomba azy: Niasa tao amin’ny farmasia iray

Voavalin’ny Baiboly ny fanontaniany momba ny hoe fa maninona isika no misy. Natao batisa tamin’ny 2002

Resadresaka nifanaovana taminy

Inona no nianaranao momba an’i Jehovah avy amin’izao zavatra iainanao izao?

Nampian’i Jehovah ho tony be aho, tamin’ilay niditra tampoka tao aminay ny manam-pahefana dia nisavasava tao. Lasa azoko kokoa hoe inona no tian’i Paoly hotenenina tamin’izy nanoratra an’ilay Filipianina 4:13 hoe: “Fa manana ny hery hiatrehana an’izay rehetra mitranga aho, noho ilay manome hery ahy.” Tena resy lahatra tanteraka aho hoe afaka miantehitra tanteraka amin’i Jehovah mba hanampy ahy hilamin-tsaina amin’ny fotoana ilako an’izany.

Tafasaraka amin’ny fianakaviany aloha izao ireo rahalahy malalantsika ireo. Na izany aza anefa dia matoky isika hoe tsy misy mampisaraka an-dry zareo amin’Andriamanitra ka hahatonga azy tsy ho tia an-dry zareo intsony, satria ry zareo miaritra sady tsy mivadika aminy.—Romanina 8:35-39.

Zava-nitranga

4 Oktobra 2021

Tranona Vavolombelon’i Jehovah maromaro no nosavana tany amin’ny Faritr’i Irkoutsk. Nampangaina hoe nanao heloka bevava i Nikolay, Sergey Kosteyev, Yaroslav, Mikhail, Aleksey, Andrey, ary Sergey Vasiliyev. Naiditra am-ponja izy fito lahy
5 Oktobra 2021

Nafindra fonja i Yaroslav sy Mikhail ary Aleksey, dia tany no niandry ny fitsarana azy
6 Oktobra 2021

Nafindra fonja i Sergey Kosteyev sy Nikolay ary Andrey, dia tany no niandry ny fitsarana azy. Nafahana avy tany am-ponja i Sergey Vasiliyev, dia lasa nambenana tany an-tranony
30 Novambra 2021

Nisy trano hafa koa nosavana. Nosamborina i Denis sy Igor, dia nentina tany Irkoutsk, any amin’ny 1 500 kilaometatra miala any amin-dry zareo
1 Desambra 2021

Naiditra am-ponja i Igor dia tany no niandry ny fitsarana azy
2 Desambra 2021

Naiditra am-ponja i Denis dia tany no niandry ny fitsarana azy
29 Desambra 2022

Nanomboka ny fitsarana

a b c d e f Tany am-ponja niandry ny fitsarana azy ny Rahalahy Martynov, Kalin, Moysh, Popov, Sarazhakov, ary Solnechniy, dia tsy azo natao ny nanadinadina an-dry zareo.

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO