9 DESAMBRA 2024
ROSIA

“Fanomezana Manokana sy Sarobidy”

HANDEFA

Nomelohin’ny Fitsaran’i Lesnoï, ao amin’ny Faritr’i Sverdlovsk, ny Rahalahy Andrey Bannykh sy Andrey Kozhushko ary Pavel Loshchinin, tamin’ny 25 Novambra 2024. Samy nahazo sazy mihantona enin-taona izy ireo. Mbola tsy migadra aloha ry zareo izao.

Ilay voampanga

Andrey Kozhushko

Teraka: 1975 (tany Kazakhstan)

Batisa: 1994

Mombamomba azy: Nianatra nanamboatra fiara simba, saingy tsy afaka nanohy noho ny olana ara-batana

Antony niampangana azy: Nitarika fivorian’ny Vavolombelon’i Jehovah tamin’ny alalan’ny vidéoconférence

Saziny: Sazy mihantona enin-taona

Resadresaka nifanaovana taminy

Inona no lesona lehibe nianaranao nandritra an’iny fotoan-tsarotra iny?

Vavaka nataon’ny mpanompon’i Jehovah anankiray ny Salamo faha-102. Olona nijaly sy very fanantenana izy io. Izao no nosoratany eo amin’ny andininy faha-6: “Hoatran’ny gisandrano any an-tany efitra aho.” Nisy fotoana koa aho nahatsiaro ho hoatran’ny ‘gisandrano nanirery’, rehefa tena mafy ny nanjo ahy. Hitako anefa hoe tsy tsara ny mitokantokana. Izaho mihitsy no mila manao zavatra, dia mangataka fanampiana amin’ireo rahalahy sy anabaviko. Tsy tokony hanantena aho hoe hain-dry zareo foana izay tsapako. Mila miahy ny hafa koa aho, amin’izay aho tsy mifantoka be loatra amin’izay manjo ahy. Rehefa manao an’izany aho, dia lasa tsapako hoe mifankatia sy mifanohana isika. Tena fanomezana manokana sy sarobidy avy amin’i Jehovah tokoa ny mpiara-manompo.

Na dia ‘miaritra fitsapana samihafa’ aza isika, dia mampahery antsika ny mahalala hoe tia sy vonona hanampy antsika i Jehovah sy ireo rahalahy sy anabavy.—1 Petera 1:6.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO