Navoakan’ny rahalahy roa anisan’ny Komitin’ny Sampan’i Myanmar Ny Baiboly: Ny Vaovao Tsara Nosoratan’i Matio, amin’ny fiteny roa ampiasaina any. Nandritra ny faran’ny herinandro roa misesy no nanaovana an’izany, ka tamin’ny 3 Septambra 2023 ny Rahalahy Sai Hlua no namoaka an’ilay izy tamin’ny teny chin (Hakha). Tamin’ny 10 Septambra 2023 kosa ny Rahalahy Clifton Ludlow no namoaka an’ilay izy tamin’ny teny mizo.

Nisy fandaharana manokana efa nalaina video mialoha, ary tamin’io fandaharana io ilay fampandrenesana no natao. Naparitaka tamin’ny alalan’ny JW Box tany amin’ny fiangonana miteny chin (Hakha) any Myanmar ilay izy avy eo. Nisy 397 no nijery an’ilay izy tany amin’ny Efitrano Fanjakana manerana an’i Myanmar. Raha vao nifarana ilay izy, dia nomena boky vita pirinty tamin’io bokin’i Matio io ny mpanatrika. Efa azo nalaina koa ny endrika elektronika sy ny raki-peon’io boky vaovao io.

Ny olona mipetraka any amin’ny Tendrombohitr’i Chin, any avaratra-andrefan’i Myanmar no tena mampiasa ny teny chin (Hakha). Maherin’ny 200 000 kosa eran-tany ny isan’ny olona mampiasa an’io fiteny io. Misy 220 mahery ny mpitory any amin’ny fiangonana dimy miteny chin (Hakha) sy any amin’ny antoko-mpitory iray. Misy fiangonana iray sy antoko-mpitory iray mampiasa an’io fiteny io koa any Etazonia.

Hoy ny rahalahy iray: “Efa tsy andriko ny hampiasa an’ity bokin’i Matio ity eny amin’ny fanompoana. Mora azon’ny olona miteny chin (Hakha) mantsy ny fomba nanoratana an’ity fandikan-teny ity.”

Nalaina video mialoha ny fandaharana nisy an’ilay fampandrenesana hoe nivoaka ilay boky vaovao, ary nalefa tany amin’ny Efitrano Fanjakana anankiroa tany Myanmar. Nomena boky vita pirinty tamin’ilay bokin’i Matio ireo olona 173 nanatrika, rehefa vita ilay lahateny. Efa azo nalaina koa ny endrika elektronika sy ny raki-peon’ilay boky vaovao.

Any Bangladesy sy Myanmar ary any amin’ny Fanjakan’i Mizoram any Inde no tena be mpampiasa ny fiteny mizo, izay nantsoina koa taloha hoe lushai. Misy 1,3 tapitrisa eo ho eo eran-tany ny olona mampiasa an’io fiteny io. Mpitory 250 eo ho eo izao no manompo any amin’ny fiangonana dimy miteny mizo any Myanmar sy Inde.

Tany amin’ny Biraon’ny Fandikan-teny Mitokana (BFM) teo am-pototry ny Tendrombohitr’i Chin ny ekipa mpandika teny ho an’ny fiteny chin (Hakha) sy mizo no niasa taloha. Nisy ady an-trano nipoaka anefa tany tamin’ny Aprily 2021 ka tsy maintsy niala tao amin’ilay BFM ireo ekipa ireo. Ao amin’ny BFM vaovao any Yangon, any amin’ny 4,5 kilaometatra eo ho eo miala ao amin’ny biraon’ny sampan’i Myanmar izao ireo ekipa ireo no miasa.

Faly isika hoe voadika amin’ny teny chin (Hakha) sy mizo ny ‘vaovao tsara be voninahitra momba an’i Kristy’, ka afaka mamaky an’ilay izy amin’ny fiteniny ny rahalahy sy anabavy ary olon-kafa be dia be.​—2 Korintianina 4:4.