Navoakan’ny Rahalahy Juan Angel Hernandez, anisan’ny Komitin’ny Sampan’i Amerika Afovoany, ireo boky efatra voalohany amin’ny Soratra Grika Kristianina​—Fandikan-tenin’ny Tontolo Vaovao amin’ny teny nahuatl (Huasteca), tamin’ny 7 Jolay 2023. Natao tao Hidalgo, Meksika, tamin’izay ilay fivoriambe tamin’ny teny nahuatl (Huasteca) hoe “Manàna Faharetana”!, ary tamin’ny andro voalohany tamin’io fivoriambe io no navoaka ireo boky ireo. Nalefa tamin’ny Internet koa ilay lahateny namoahana an’ireo boky ireo, ka afaka nanaraka an’ilay izy ny mpanatrika ny fivoriambe tany amin’ny Fanjakan’i Mexico sy Nuevo León, any Meksika. Nisy 2 401 no nanatrika an’ilay fandaharana, raha atambatra. Navoaka koa ny endrika elektronika sy ny raki-peon’ireo boky ireo, taorian’ilay lahateny.

Efa misy ny Baiboly amin’ny fiteny nahuatl (Huasteca), saingy tsy ahitana ny anaran’i Jehovah izy ireny. Tsy vitan’izay koa fa tsy mora azo ny teny ampiasaina ao amin’izy ireny. Hoy ny mpandika teny iray: “Hoatran’ny hoe mijery amin’ny fitaratra manjavozavo ianao rehefa mampiasa an’ireo Baiboly fandikan-teny hafa. Hoatran’ny fitaratra mazava be kosa anefa ity fandikan-teny vaovao ity. Tsy lany fotoana miezaka mba hahazo ny dikan’izay vakiny intsony izao ny mpamaky, fa lasa manana fotoana betsaka kokoa hisaintsainana ny hevitry ny Tenin’Andriamanitra. Fanomezana tsara be avy amin’i Jehovah ilay izy!”

Matoky isika hoe hanampy olona maro miteny nahuatl (Huasteca) ilay fandikan-teny vaovao amin’ny bokin’i Matio, Marka, Lioka, ary Jaona. Amin’izay izy ireny ‘hahafantatra an’i Jehovah, ilay hany tena Andriamanitra, sy Jesosy Kristy, ilay nirahiny.’​—Jaona 17:3.