Ny 8 Desambra 2022 no hatao ao amin’ny Fitsarana eo Anivon’ny Distrikan’i Gwangju, any Korea Atsimo, ny fitsarana ny Rahalahy Hye-min Kim. Nanda tsy hanao raharaha miaramila i Hye-min noho ny feon’ny fieritreretany. Tsy nanaiky hanao fanompoana sivily anefa izy, satria mafy loatra ilay izy. Izy no olona voalohany nanda hoatr’izany. Mety hahazo sazy hatramin’ny telo taona any am-ponja izy, sady ho voasokajy hoe mpanao heloka bevava.

Maharitra telo taona ny fanompoana sivily any Korea Atsimo, ary io no sazy lava indrindra eran-tany. Mbola avo roa heny noho ny fotoana anaovana raharaha miaramila izany. Atao hoatran’ireny olona ambenana ao an-tranony ireny ilay olona mandritra an’ireo telo taona ireo, ao amin’ireo trano fatoriana ao amin’ny faritry ny fonja. Be dia be koa ny zavatra tsy azony atao. Tsy zavatra hafa atao solon’ny raharaha miaramila àry no fahitan’ny manam-pahaizana any amin’ny tany maro ny fanompoana sivily omen’i Korea Atsimo, fa “fanasaziana amin’ny endriny hafa.” a

Namoaka didy niavaka ny Fitsarana Momba ny Lalàm-panorenana any Korea Atsimo tamin’ny 28 Jona 2018. Neken’izy io tamin’izay fa miaro ny zon’ny olona mandà tsy hanao raharaha miaramila noho ny feon’ny fieritreretana ny Lalàm-panorenana any Korea. Nampitandrina an’ireo mpahay lalàna mamaritra ny atao hoe fanompoana sivily àry io fitsarana io. Izao no nolazainy: “Raha maharitra loatra na mafy loatra amin’ny olona mandà tsy hanao raharaha miaramila ny fanompoana sivily, ka matahotra ny hanao an’ilay izy ry zareo, dia tsy fanompoana sivily no iantsoana an’izany fa fanasaziana. Mandika ny zo hafa ananan’ny olona ilay izy raha izay.”

Ny Vaomieran’ny Firenena Mikambana Miaro ny Zon’olombelona no namaritra ny karazana fanompoana sivily tokony harahin’ny firenena rehetra, araka ny fanapahan-kevitra nolanina tamin’ny 1998. Raha zavatra tsy maintsy atao ny raharaha miaramila ao amin’ny tany iray, dia nasaina omena karazana asa “fanasoavam-bahoaka fa tsy fanasaziana” ireo mandà tsy hanao raharaha miaramila noho ny feon’ny fieritreretana.

Tsy vao tamin’io akory i Hye-min no nampangaina ho mpanao heloka bevava. Nanafaka azy madiodio ny Fitsarana Tampon’i Korea Atsimo tamin’ny Septambra 2020, ka tsy voatery manao raharaha miaramila izy noho ny feon’ny fieritreretany. Nangataka hanao fanompoana sivily izy, herinandro vitsivitsy taorian’izay. Tamin’ny 7 Febroary 2022 izy vao voantso hanao fanompoana sivily. Hitany anefa hoe mafy loatra ilay izy, dia nanapa-kevitra izy hoe tsy hanao an’ilay izy.

Raha manome rariny an’i Hye-min ny fitsarana, dia tokony mba hovan’ny fanjakana hitovy amin’ny fenitra iraisam-pirenena ny fanompoana sivily any Korea. Handray soa avy amin’izany ny vahoaka koreanina, anisan’izany ireo rahalahintsika any Korea Atsimo sy ny fianakaviany. Mandra-pahatongan’izay anefa, dia mivavaka isika mba hiantehitra amin’i Jehovah foana izay voakasik’ity raharaha ity ka hampiany “hiaritra ny zava-drehetra, sady hanam-paharetana sy ho falifaly.”​—Kolosianina 1:11.