Ny Baiboly ihany no milaza izay ilainao mba hahatakarana izay voalaza ao amin’izy io. Na manao ahoana na manao ahoana fahaizanao, dia “tsy sarotra loatra aminao” ny mahatakatra izay lazain’ny Baiboly.​—Deoteronomia 30:11.

Ireto avy no ilainao:

1.   Mila manana toe-tsaina tsara. Ekeo hoe Tenin’Andriamanitra ny Baiboly. Manetre tena fa tsy tian’Andriamanitra ny olona manambony tena. (1 Tesalonianina 2:13; Jakoba 4:6) Aza minomino befahatany izay rehetra vakinao. Tian’Andriamanitra ‘hampiasa saina’ mantsy ianao.​—Romanina 12:1, 2.

2.   Mivavaha mba hanana fahendrena. Hoy ny Ohabolana 3:5: “Aza miantehitra amin’ny fahaizanao.” Aleo kosa ‘tsy mitsahatra mangataka’ fahendrena amin’Andriamanitra, mba hahatakarana izay lazain’ny Baiboly.—Jakoba 1:5.

3.   Mianara tsy tapaka. Be dia be kokoa ny soa horaisinao raha mianatra Baiboly tsy tapaka ianao fa tsy tsindraindray fotsiny.​—Josoa 1:8.

4.   Ianaro isaky ny foto-kevitra ny Baiboly. Ho fantatrao izay ampianarin’ny Soratra Masina raha dinihinao isaky ny foto-kevitra izay voalaza ao. Atombohy amin’ny “abidim-pianarana” izany, ary avy eo ny “fampianarana sahaza ny olon-dehibe.” (Hebreo 6:1, 2, Dikan-teny Iombonana Eto Madagasikara) Afaka mampitaha andinin-teny ianao rehefa manao izany. Ho hitanao amin’izay fa ny andinin-teny ao ihany no manazava ny andinin-teny hafa, eny fa na dia ireo “saro-takarina” aza.​—2 Petera 3:16.

5.   Mangataha fanampiana. Mampirisika antsika ny Baiboly mba hitady fanampiana any amin’izay efa mahatakatra ny Baiboly. (Asan’ny Apostoly 8:30, 31) Mampianatra Baiboly maimaim-poana ny Vavolombelon’i Jehovah, ary ny fomba fampianaran’ny Kristianina fahiny no arahin’izy ireo rehefa manao izany. Mampiasa boky ara-baiboly izy ireo mba hanampiana ny olona hahafantatra hoe inona marina no ampianarin’ny Baiboly.​—Asan’ny Apostoly 17:2, 3.

Ireto no tsy ilainao:

1.   Fahaizana be. Nahatakatra ny Soratra Masina ny apostoly 12 sady afaka nampianatra ny hafa, na dia noheverin’ny olona hoe ‘tsy dia nahita fianarana sady olon-tsotra’ aza izy ireo.—Asan’ny Apostoly 4:13.

2.   Vola. Tsy mila mandoa vola ianao dia efa mahalala izay lazain’ny Baiboly. Hoy mantsy i Jesosy tamin’ny mpianany: “Efa nahazo maimaim-poana ianareo, ka manomeza maimaim-poana.”​—Matio 10:8.