Kite Pawòl Bondye a anseye w

Ki jan w ka rekonèt adorasyon ki kòrèk la?

Atik sa a soulve kèk kesyon petèt ou konn ap poze tèt ou e li montre ki kote ou kapab li repons yo nan pwòp bib ou. Temwen Jewova yo ap byen kontan pale sou repons sa yo avè w.

1. Èske se yon sèl vrè relijyon ki genyen?

Jezi te anseye disip li yo sou yon sèl relijyon, vrè relijyon an. Vrè relijyon an sanble ak yon wout ki mennen nan lavi. Men sa Jezi te di konsènan wout sa a: “Se kèk grenn moun ki jwenn li.” ​(Matye 7:14). Sèl adorasyon Bondye aksepte se adorasyon ki baze sou Pawòl verite l la. Tout vrè adoratè yo ini nan yon sèl lafwa. — Li Jan 4:23, 24; 14:6; Efezyen 4:4, 5.

2. Poukisa anpil relijyon ki diferan youn ak lòt pretann yo se kretyen?

Fo pwofèt yo kòwonp krisyanis la e yo sèvi avè l nan pwòp enterè yo. Jan Jezi te anonse sa, yo prezante tèt yo kòm “mouton” l, men yo aji tankou lou ki grangou (Matye 7:13-15, 21, 23). Se sitou apre apot Jezi yo fin mouri fo krisyanis la te vin pran chè. — Li Travay 20:29, 30.

3. Ki diferan aspè ki pèmèt moun rekonèt adorasyon ki kòrèk la?

Vrè adoratè yo respekte Bib la antanke Pawòl Bondye. Yo fè efò pou yo viv selon prensip ki ladan l yo. Donk, vrè relijyon an pa menm ak relijyon ki baze sou ide lèzòm yo (Matye 15:7-9). Vrè adoratè yo pa preche yon bagay epi yo fè yon lòt bagay. — Li Jan 17:17; 2 Timote 3:16, 17.

Vrè relijyon an onore non Bondye, Jewova. Jezi te fè konn non Bondye. Li te ede moun yo pou yo konnen Bondye e li te anseye yo pou yo priye pou non Bondye vin sen (Matye 6:9). Nan zòn kote w rete a, ki relijyon ou wè ki sèvi ak non Bondye? — Li Jan 17:26; Women 10:13, 14.

  4. Ki jan w ka rekonèt vrè adoratè yo?

Vrè kretyen yo preche konsènan Wayòm Bondye a. Bondye te voye Jezi preche konsènan Wayòm nan. Se Wayòm Bondye a ki sèl espwa limanite. Jezi te kontinye pale konsènan Wayòm Bondye a rive jis jou l mouri a (Lik 4:43; 8:1; 23:42, 43). Li te di disip li yo pou yo preche konsènan Wayòm Bondye a. Si yon moun vin pale avè w konsènan Wayòm Bondye a, nan ki relijyon sandout moun sa a ye? — Li Matye 10:7; 24:14.

Disip Jezi yo pa fè pati monn mechan sa a. Yo pa patisipe ni nan politik ni nan konfli sosyal ki genyen yo (Jan 17:16). Epitou, yo pa imite move bagay k ap fèt nan monn nan e yo pa imite atitid monn nan. — Li Jak 1:27; 4:4.

5. Ki sa prensipalman k ap pèmèt moun idantifye vrè krisyanis la

Vrè kretyen yo gen yon lanmou estrawòdinè youn pou lòt. Grasa Pawòl Bondye a, yo aprann respekte tout kalite moun. Souvan, fo relijyon yo bay lagè nasyon yo ap fè yo anpil jarèt, men vrè adoratè yo refize fè sa (Miche (Mika) 4:1-4). Okontrè, moun ki nan vrè relijyon an itilize tan yo ak sa yo genyen pou yo ede lòt moun e pou yo ankouraje yo, san se pa yon enterè y ap defann. — Li Jan 13:34, 35; 1 Jan 4:20, 21.

Ki gwoup moun ki baze tout ansèyman y ap bay sou Pawòl Bondye a, ki onore non Bondye e ki pwoklame Wayòm Bondye a kòm sèl espwa limanite? Ki gwoup moun ki demontre lanmou e ki pa apiye lagè? Tout prèv montre se Temwen Jewova yo. — 1 Jan 3:10-12.

Pou plis enfòmasyon, gade chapit 15 nan liv Ki sa Labib anseye toutbonvre? a. Se Temwen Jewova ki pibliye l.

[Foto nan paj 26]

“An piblik, yo deklare yo konnen Bondye, men yo nye l nan aksyon yo.” — Tit 1:16.