1, 2. Ki sa Wayòm Bondye a pral akonpli, e poukisa nou kapab gen asirans Wayòm nan ap vini?

NAN prentan ane 31 epòk nou an, pandan Jezi Kris ak disip li yo te sou tèt yon mòn ki toupre Kapènawòm, Jezi te aprann disip li yo pou yo priye konsa: “Se pou wayòm ou an vini.” (Mat. 6:10). Jodi a, gen anpil moun k ap mande tèt yo si Wayòm Bondye a ap janm vini vre! Sepandan, nou gen konfyans Bondye ap reponn priyè sensè nou fè pou Wayòm li an vini an.

² Jewova pral sèvi ak Wayòm li an pou l fè tout moun ki fè pati fanmi l genyen an vin fè yon sèl, kit se sa ki nan syèl la kit se sa ki sou tè a. Objektif sa a Bondye genyen an ap reyalize kanmenm (Iza. 55:10, 11). Anfèt, Jewova gentan vin Wa nan epòk nou an! Gen yon bann evènman estrawòdinè ki te rive pandan 100 an ki sot pase yo ki montre sa. Bondye ap reyalize yon seri bèl bagay pou plizyè milyon moun ki fidèl anvè l yo (Zek. 14:9; Rev. 15:3). Sepandan, vini Jewova vin Wa a pa menm bagay ak vini Wayòm Bondye a ap vini an, Wayòm Jezi te anseye nou pou n priye pou li a. Ki diferans ki genyen ant de evènman sa yo, e ki efè yo gen sou nou?

3. a) Ki lè Jezi te vin Wa, e ki kote? b) Ki prèv ou t ap bay pou w montre Wayòm nan te etabli an 1914? (Gade nòt anba paj la.)

³ Nan fen 19^yèm syèk la, Etidyan Labib yo te kòmanse jwenn kèk eklèsisman sou yon pwofesi nou jwenn nan liv Dànyèl la ki gen  2 500 an depi l te ekri. Men sa l di: “Nan jou wa sa yo, Bondye nan syèl la ap tabli yon wayòm ki pap janm kraze.” (Dàn. 2:44, NW). Etidyan Labib yo te pase plizyè dizèn ane ap fè moun konnen ane 1914 t ap yon ane ki espesyal. Anpil moun nan epòk sa a te gen yon pwennvi pozitif. Yo te gen menm pwennvi ak yon ekriven ki te di: “An 1914, monn nan te chaje ak espwa ak pwomès.” Sepandan, pwofesi biblik yo te vin tounen yon reyalite lè Premye Gè mondyal la te eklate nan menm ane a. Gwo grangou ki te vin genyen, tranblemanntè, epidemi ansanm ak akonplisman lòt pwofesi biblik yo te montre aklè Jezi Kris te kòmanse dirije kòm Wa nan Wayòm Bondye a an 1914 *. Anfèt, lè Jewova te met Pitit gason l lan Wa nan Wayòm Mesi a, Jewova te tou vin Wa nan yon lòt sans.

4. Ki aksyon nouvo Wa Bondye nome a te fè san pèdi tan, e sou ki moun li te fikse je l apre sa?

⁴ Premye aksyon nouvo Wa Bondye nome a te fè, se te lagè li t al fè kont Satan, pi gwo Advèsè Papa l la. Jezi ansanm ak zanj li yo te met Dyab la ansanm ak demon yo deyò nan syèl la. Sa te fè gen anpil kè kontan nan syèl la, men tou, sa te pote kalamite pou tè a, yon kalamite ki potko janm genyen anvan sa. (Li Revelasyon 12:7-9, 12.) Apre sa, Wa a te fikse je l sou moun l ap dirije sou tè a yon fason pou l rafine yo, fòme yo epi òganize yo pou yo fè volonte Bondye. Ann wè kòman moun sa yo kite yon bèl egzanp pou nou jodi a nan fason yo te byen reyaji nan twa domèn sa yo kote Wayòm nan t ap dirije yo.

5. Ki netwayaj ki te fèt soti ane 1914 rive nan kòmansman ane 1919?

⁵ Apre Jezi, Wa Jewova nome a, te fin debarase syèl la ak move enfliyans Satan ak demon yo, Jewova te ba l lòd pou l al verifye kondisyon espirityèl moun k ap suiv li yo sou tè a, epi rafine kondisyon espirityèl moun sa yo. Pwofèt Malaki te pale de enspeksyon sa a kòm yon netwayaj nan domèn espirityèl (Mal. 3:1-3). Listwa montre netwayaj sa a te fèt soti ane 1914 rive nan kòmansman ane 1919 *. Pou n vin fè pati fanmi inivèsèl Jewova a, nou dwe pwòp oswa sen (1 Pyè 1:15, 16). Nou pa dwe kite okenn bagay ki soti nan fo relijyon oswa nan zafè politik monn sa a kontamine nou.

6. Ki jan nou fè jwenn manje nan domèn espirityèl, e poukisa sa enpòtan?

⁶ Apre sa, Jezi te sèvi ak otorite l genyen antanke Wa a pou l etabli yon “esklav fidèl ki prevwayan”. Esklav sa a t ap gen pou l bay tout moun ki fòme “yon sèl twoupo” k ap suiv Jezi yo bonjan manje nan domèn espirityèl regilyèman (Mat. 24:45-47; Jan 10:16). Depi 1919, gen yon ti gwoup frè Bondye chwazi pou al nan syèl ki montre yo fidèl nan fason y ap ranpli gwo responsablite sa a ki se bay “domestik” yo manje. Kantite manje nou jwenn nan domèn espirityèl pa mwayen ti gwoup moun sa a pèmèt nou vin gen plis lafwa. Li fè n vin gen plis detèminasyon pou n kontinye kenbe panse nou pwòp, epi pou n rete pwòp nan domèn espirityèl, moral ak fizik. Manje espirityèl sa a fòme nou tou, epi l ban nou tout sa n bezwen pou n bay tout nou menm nan travay ki pi enpòtan k ap fèt sou tè a jodi a. Èske w byen pwofite manje sa a?

7. Ki travay enpòtan Jezi te kòmanse fè lè l te sou tè a, e jis ki lè travay sa a t ap kontinye fèt?

⁷ Men sa Jezi te di lè l te fèk kòmanse ministè l sou tè a: “Mwen dwe al anonse bon nouvèl wayòm Bondye a nan lòt vil yo tou, paske se pou sa Bondye te voye m.” (Lik 4:43). Pandan twazan edmi, Jezi te fè travay sa a tounen bagay ki te pi enpòtan  nan lavi l. Men ki enstriksyon l te bay disip li yo: “Toutpandan nou prale, preche. Men sa pou nou di: ‘Wayòm syèl la vin pi pre.’” (Mat. 10:7). Apre Jezi te fin resisite, li te fè konnen disip li yo t ap gen pou yo simaye mesaj sa a “jis nan zòn ki pi lwen sou tè a”. (Tra. 1:8.) Li te pwomèt yo li t ap avèk yo nan travay enpòtan sa a rive jis nan epòk nou an. — Mat. 28:19, 20.

8. Ki jan Wa a te ankouraje moun l ap dirije sou tè a pou yo preche?

⁸ Apati ane 1919, “bon nouvèl [...] wayòm nan” te vin pran yon lòt nivo (Mat. 24:14). Wa a t ap dirije nan syèl la, e l te rasanble yon ti gwoup moun sou tè a. San pèdi tan, ti gwoup moun sa a te obeyi lòd Jezi te ba yo a ki se: Preche bon nouvèl konsènan Wayòm Bondye etabli a sou tout tè a (Tra. 10:42). Pa egzanp, nan mwa septanm 1922, te gen prèske 20 000 moun ki t ap soutni Wayòm nan ki te rasanble nan yon kongrè entènasyonal ki te fèt nan Cedar Point, Ohio, Ozetazini. Eseye imajine jan moun sa yo te kontan lè frè Rutherford, ki t ap bay yon diskou ki gen tit “Wayòm nan”, te di pawòl ki vin annapre yo: “Tande sa, Wa a ap dirije. Se nou menm ki pou fè piblisite pou li. Se sa k fè nou dwe pwoklame, pwoklame, pwoklame Wa a ak Wayòm li an.” Gen 2 000 delege ki te byen reyaji devan envitasyon sa a lè yo te patisipe nan yon jounen predikasyon espesyal. Yo t al preche rive jis nan yon distans 72 kilomèt parapò ak kote yo t ap fè kongrè a. Gen youn nan delege yo ki te tèlman jwenn ankourajman pou l preche ki te di: “Mwen pa gendwa janm bliye envitasyon nou te jwenn pou n pwoklame Wayòm nan ansanm ak antouzyas foul moun ki te la yo te demontre!” Se pa t li menm sèlman ki te santi l konsa.

9, 10. a) Ki dispozisyon yo te pran pou fòme pwoklamatè Wayòm nan? b) Ki byenfè w te jwenn grasa fòmasyon sa a?

⁹ Apati ane 1922, te gen plis pase 17 000 pwoklamatè Wayòm nan ki t ap preche nan 58 peyi sou tè a. Sepandan, yo te bezwen fòmasyon. Nan premye syèk la, Wa Bondye chwazi a te bay disip li yo bonjan enstriksyon sou ki sa yo dwe preche, kote pou yo preche ak kòman yo dwe preche (Mat. 10:5-7; Lik 9:1-6; 10:1-11). Jodi a, Jezi sèvi ak menm metòd sa a pou l fòme tout moun k ap patisipe nan travay predikasyon Wayòm nan epi pou l fè yo jwenn tout sa yo bezwen pou yo preche yon fason ki efikas (2 Tim. 3:17). Jezi sèvi ak kongregasyon an pou l fòme moun l ap dirije yo pou travay predikasyon an. Youn nan fason li fè sa se pa mwayen Lekòl ministè teyokratik la, yon lekòl yo kondui nan plis pase 111 000 kongregasyon sou tout kò tè a. Grasa fòmasyon sa a, kounye a, gen plis pase sèt milyon pwoklamatè ki jwenn tout sa yo bezwen pou yo preche epi anseye yon fason ki atire “tout kalite moun”. — Li 1 Korentyen 9:20-23.

¹⁰ Anplis Lekòl ministè teyokratik la, gen lòt lekòl ankò ki la pou fòme ansyen  yo, pyonye yo, frè selibatè yo, mari ak madanm ki kretyen yo, manm Komite filyal yo ak madanm yo, siveyan itineran yo ak madanm yo epi misyonè yo *. Men ki sa kèk etidyan nan yon klas Lekòl biblik pou mari ak madanm ki kretyen te di pou yo montre jan yo apresye lekòl la: “Fòmasyon espesyal nou te resevwa a fè nou vin gen plis lanmou pou Jewova, e l fè n pi byen ekipe pou n ede lòt moun.”

11. Ki jan pwoklamatè Wayòm nan rive andire malgre yo jwenn opozisyon?

¹¹ Satan, ènmi an, pa fèmen je l sou kokennchenn travay predikasyon sa a ansanm ak efò k ap fèt pou anseye moun yo konsènan Wayòm nan. Se sa k fè, li sèvi ak atak dirèk ansanm ak atak anba anba, ni kont mesaj Wayòm nan ni kont moun k ap preche mesaj sa a, yon fason pou l eseye kanpe travay la. Men, se pou granmèsi ènmi an ap fè tout efò sa yo. Jewova met Pitit gason l lan nan yon pozisyon ki “pi wo lontan pase tout gouvènman, tout otorite, tout pisans [ak] tout dominasyon”. (Efe. 1:20-22.) Antanke Wa, Jezi sèvi ak otorite l genyen an pou l pwoteje disip li yo epi pou l gide yo yon fason pou l asire l volonte Papa l ap fèt *. Bon nouvèl la kontinye ap preche, e gen plizyè milyon moun ki gen kè sensè ki rive jwenn fòmasyon pou yo adore Jewova. Se pa ti privilèj nou genyen pou n patisipe nan kokennchenn travay sa a!

12. Fè yon ti pale konsènan kèk amelyorasyon ki fèt nan fason nou òganize depi lè Wayòm nan fin etabli.

¹² Depi lè Wayòm nan fin etabli nan ane 1914, Wa a kòmanse rafine fason sèvitè Bondye yo te òganize pou yo fè volonte Papa l. (Li Izayi 60:17.) Nan ane 1919, yo te nome yon direktè sèvis nan chak kongregasyon pou pran latèt nan travay predikasyon an. Nan ane 1927, yo te pran dispozisyon pou yo preche kay an kay chak dimanch. Nan ane 1931, moun k ap soutni Wayòm nan te jwenn ankourajman pou yo fè plis travay toujou lè yo te adopte non biblik Temwen Jewova a (Iza. 43:10-12). Nan ane 1938, yo te sispann fè eleksyon pou chwazi frè ki responsab nan kongregasyon yo, epi yo fè sa yon fason teyokratik pito. Nan ane 1972, olye te gen yon sèl siveyan kongregasyon, te vin gen yon gwoup ansyen pou siveye kongregasyon an. Tout frè ki te kalifye yo te jwenn ankourajman pou yo bay èd yo nan “pran swen twoupo Bondye” a (1 Pyè 5:2). Nan ane 1976, Kolèj santral la te vin òganize an sis komite pou sipèvize travay Wayòm nan sou tout kò tè a. Vrèmanvre, tikras pa tikras, Wa  Jewova nome a te òganize moun l ap dirije yo yon fason teyokratik oswa selon fason Bondye dirije.

13. Ki efè travay Wayòm nan gentan reyalize pandan 100 ane ki pase yo gen sou lavi w?

¹³ Ann konsidere sa Wa Mesyanik la gentan akonpli pandan 100 premye ane rèy li an! Li te pirifye yon pèp pou non Jewova. L ap dirije travay predikasyon bon nouvèl Wayòm nan nan 239 peyi, e l anseye plizyè milyon moun chemen Jewova yo. Li fè plis pase sèt milyon moun k ap suiv li fidèlman viv nan inite, e yo chak ofri tèt yo volontèman pou yo fè volonte Papa l (Sòm 110:3). Vrèmanvre, travay Jewova ap fè grasa Wayòm Mesi a, se yon travay ki estrawòdinè e ki bèl anpil. Gen evènman ki pi bèl toujou k ap ret tann nou pi devan!

14. a) Ki sa nou mande Bondye nan priyè nou fè lè n di “se pou Wayòm ou an vini” an? b) Ki tèks nou chwazi pou ane 2014 la, e poukisa tèks sa a byen tonbe?

¹⁴ Byenke Jewova te kouwone Jezi Kris, Pitit gason l lan, Wa Mesyanik an 1914, aksyon sa a pa t bay yon repons konplè pou priyè nou fè lè n di “se pou wayòm ou an vini” an (Mat. 6:10). Jan Jewova te gentan anonse sa, Jezi t ap gen pou l “domine nan mitan ènmi [l] yo”. (Sòm 110:2, NW.) Gouvènman lèzòm yo, ki anba kontwòl Satan, toujou ann opozisyon ak Wayòm nan. Lè n priye pou Wayòm Bondye a vini, se mande nou mande Bondye pou Wa Mesyanik la ansanm ak moun k ap dirije avè l yo vin met fen nan gouvènman lèzòm yo epi detwi tout moun sou tè a ki opoze ak Wayòm nan. Aksyon sa a pral akonpli pawòl nou jwenn nan Dànyèl 2:44 la (NW) ki fè konnen Wayòm Bondye a “pral kraze tout wayòm sa yo, e l ap mete yon fen nan yo”. Li pral elimine tout gouvènman ki kont Wayòm nan (Rev. 6:1, 2; 13:1-18; 19:11-21). Pa ret anpil tan menm pou sa fèt. Tèks pou ane 2014 la ki soti nan Matye 6:10 byen tonbe. Men sa l di: “Se pou Wayòm ou an vini.” Ane 2014 la fè 100 an depi Wayòm Bondye a etabli nan syèl la!

15, 16. a) Ki bèl evènman ki pral rive pandan rèy mil an an? b) Ki dènye aksyon Jezi pral fè antanke Wa Mesyanik, e ki sa sa pral vle di konsènan objektif Jewova genyen pou tout kreyasyon l lan?

¹⁵ Apre Wayòm Mesi a fin detwi ènmi Bondye yo, li pral lage Satan ak demon l yo nan twou san fon an pou mil an (Rev. 20:1-3). Etandone Dyab la pap ka enfliyanse lèzòm ankò, Wayòm nan pral travay pou l aplike byenfè sakrifis ranson Jezi a, epi l ap elimine efè peche Adan an genyen an. Wa a pral resisite plizyè milyon moun k ap dòmi nan tonm, epi l pral òganize yon gwo pwogram ansèyman pou l aprann moun sa yo konnen Jewova (Rev. 20:12, 13). Tout tè a pral tounen yon paradi menm jan ak jaden Edenn nan. Tout moun ki fidèl yo pral vin pafè.

¹⁶ Nan fen rèy mil an Kris la, Wayòm Mesi a ap gentan fin akonpli objektif li. Lè sa a, Jezi pral remèt Papa l Wayòm nan. (Li 1 Korentyen 15:24-28.) Pitit Jewova yo ki sou tè a pap bezwen pou yon moun sèvi kòm entèmedyè ant yo menm ak Jewova ankò. Tout pitit Bondye yo ki nan syèl la ak tout pitit li yo ki sou tè a pral ini ansanm ak Papa yo antanke moun ki fè pati fanmi inivèsèl li a.

17. Ki detèminasyon w pran konsènan Wayòm nan?

¹⁷ Tout bèl bagay ki gentan fèt pandan 100 an Wayòm nan fè ap dirije a ban nou asirans Jewova gen kontwòl tout bagay, e objektif li gen pou tè a ap reyalize san mank. Annou kontinye montre nou fidèl anvè Jewova, e annou kontinye pwoklame Wa a ak Wayòm li an. N ap fè sa toutpandan nou gen yon konfyans total, talè konsa, Jewova pral reponn priyè sensè nou abitye fè lè n di: “Se pou Wayòm ou an vini”!