Demontre nou gen lanmou ak respè lè nou metrize lang nou

“ Se pou chak moun an patikilye renmen madanm li konsa, menm jan ak tèt li. Madanm nan, bò kote pa l, dwe gen yon gwo respè pou mari l. ” — EFEZYEN 5:33.

1, 2. Ki kesyon enpòtan tout moun ki marye ta dwe poze tèt yo, e poukisa ?

ANN sipoze ou ta resevwa yon pake ki vlope ak yon papye kado ki gen yon etikèt sou li ki ekri : “ Frajil. ” Ki sa w t ap fè avè l ? Natirèlman ou t ap pran tout prekosyon posib pou w pa andomaje l. Ki sa nou ka di konsènan maryaj, ki se yon kado ?

² Men sa Nawomi, yon vèv izrayelit, te di de jèn medam ki te rele Òpa ak Rit : “ Se pou Jewova fè nou yon don, e se pou nou chak jwenn yon kote trankil lakay mari nou. ” ​(Rit 1:3-9). Anrapò ak yon bon madanm, Labib di : “ Eritaj papa yo se kay ak richès, men yon madanm ki prevwayan se Jewova ki bay li. ” ​(Pwovèb 19:14). Si w se yon moun marye, ou bezwen konsidere konjwen w kòm yon kado ki sot nan men Jewova. Ki sa w fè ak kado sa a Bondye ba w la ?

3. Ki egzòtasyon Pòl bay, mari ak madanm gen enterè obeyi ?

³ Nan yon lèt apot Pòl te ekri kretyen premye syèk yo, li te di pawòl sa yo : “ Se pou chak moun an patikilye renmen madanm li konsa, menm jan ak tèt li. Madanm nan, bò kote pa l, dwe gen yon gwo respè pou mari l. ” ​(Efezyen 5:33). Reflechi sou fason mari ak madanm ka obeyi egzòtasyon sa a anrapò ak fason yo pale.

Fè atansyon ak “ bagay deregle ki koz doulè ” a

4. Ki jan lang nan ka gen yon enfliyans pozitif oswa negatif ?

⁴ Selon sa yon ekriven biblik ki rele Jak di, lang nan se “ yon bagay deregle ki koz doulè, li plen ak pwazon ki lakòz lanmò ”. (Jak 3:8.) Jak te konnen verite fondamantal sa a : yon lang ki deregle ka lakòz anpil dega. Sandout, li te abitye ak pwovèb biblik ki konpare pawòl yo di san reflechi ak “ kout epe ”. Sepandan, menm pwovèb la di : “ Lang moun ki saj yo se gerizon. ” ​(Pwovèb 12:18). Vrèmanvre, pawòl nou di ka gen yon efè pisan. Yo ka blese oswa yo ka geri. Ki efè pawòl ou di gen sou konjwen w ? Si w ta mande l sa, ki sa l t ap reponn ?

5, 6. Ki sa k ka fè li difisil pou kèk moun metrize lang yo ?

⁵ Si pawòl ki blesan vin antre tikras pa tikras nan maryaj ou, ou ka amelyore sitiyasyon an. Men, w ap bezwen fè efò. Poukisa ? Youn nan rezon yo, se paske nou bezwen lite  ak enpèfeksyon ki nan nou an. Peche nou eritye a gen yon move enfliyans ni sou sa youn panse de lòt, ni sou fason youn pale ak lòt. Men sa Jak te ekri : “ Si yon moun pa bite nan pawòl, li se yon moun pafè ki kapab bride tout kò l tou. ” — Jak 3:2.

⁶ Nonsèlman nou enpafè, men anbyans familyal nou te leve ladan l lan jwe yon wòl tou nan move itilizasyon nou fè ak lang nou. Gen moun ki te leve nan kay kote paran yo te “ san lespri antant, [...] san metriz, fewòs ”. (2 Timote 3:1-3.) Souvan, timoun ki grandi nan yon anviwònman konsa konn gen menm atitid la lè yo vin gran. Natirèlman, si nou pale yon fason ki blesan, nou pa ka pran pretèks ni sou enpèfeksyon nou ni sou move fason nou leve. Sepandan, lefètke nou konn tout sa, sa ede nou konprann poukisa li difisil pou kèk moun metrize lang yo pou yo pa di pawòl ki blesan.

‘ Rejte medizans ’

7. Ki sa Pyè te vle di lè li te ankouraje kretyen yo pou yo “ rejte [...] tout kalite medizans ” ?

⁷ Lè yon moun sèvi ak pawòl ki blesan nan maryaj li pou kèlkeswa rezon an, sa ka yon siy ki montre li manke lanmou ak respè pou konjwen l. Pyè te gen bonjan rezon pou l ankouraje kretyen yo pou yo “ rejte [...] tout kalite medizans ”. (1 Pyè 2:1.) Mo grèk lè yo tradui l ki bay “ medizans ” lan siyifi “ langaj derespektan ”. Li gen sans ‘ lanse mo sou yon moun ’. Sa byen dekri efè yon lang deregle ka genyen !

8, 9. Ki sa k ka rive lè yon moun di pawòl ki blesan, e poukisa konjwen yo ta dwe evite fè sa ?

⁸ Pawòl ki derespektan yo ka pa parèt twò grav. Men, reflechi sou sa k rive lè yon mari oswa yon madanm sèvi ak mòd pawòl sa yo. Lè yon moun di konjwen l enbesil, parese oswa egoyis, se kòmsi li rezime tout pèsonalite konjwen l lan nan yon etikèt, e yon etikèt ki rabesan anplis ! Sètènman, se aji yon fason ki di e ki san pitye. Ki sa nou ka di konsènan pawòl egzajere ki mete aksan sou defo yon konjwen ? Èske pawòl tankou “ ou toujou anreta ” oswa “ ou pa janm pran tan pou w koute m ” se pa pawòl ki egzajere vre ? Konjwen an pap pa bay yon repons pou l defann tèt li. E sa ka fè yon gwo diskisyon met pye. — Jak 3:5.

⁹ Konvèsasyon ki gen pawòl derespektan ladan yo fè gen tansyon nan yon maryaj, e sa ka gen konsekans grav tou. Men sa Pwovèb 25:24 di : “ Li pi bon pou w abite nan kwen yon do kay pase pou w abite avèk yon madanm ki renmen fè kont, byenke nan yon kay an komen. ” Natirèlman, menm bagay la aplikab tou pou yon mari ki renmen fè kont. Tikras pa tikras, pawòl ki blesan ki sot nan bouch nenpòt nan konjwen yo ka kraze yon relasyon, petèt sa ka lakòz yon mari oswa yon madanm santi konjwen l pa renmen l oswa li ka santi li pa merite pou yo renmen l. Li enpòtan anpil pou yon moun metrize lang li. Men, ki jan sa ka fèt ?

‘ Bride lang nan ’

10. Poukisa li enpòtan pou nou metrize lang nou ?

¹⁰ Jak 3:8 di : “ Lang nan, pèsonn pami lèzòm pa ka donte l. ” Sepandan, menm jan yon kavalye bride yon cheval pou l kontwole mouvman cheval la, nou ta dwe fè tout sa nou kapab pou nou bride lang nou. “ Si yon moun panse li se yon bonjan adoratè epoutan li pa bride lang li, men li kontinye ap twonpe pwòp kè li, adorasyon moun sa a pa gen valè. ” ​(Jak 1:26 ; 3:2, 3). Pawòl sa yo montre fason nou sèvi ak lang nou gen anpil enpòtans. Nonsèlman sa gen efè sou relasyon nou ak konjwen nou, men sa gen efè tou sou relasyon nou ak Jewova Dye. — 1 Pyè 3:7.

11. Ki jan nou ka veye pou yon ti mezantant pa tounen yon gwo diskisyon ?

¹¹ Li saj pou w veye sou fason w ap pale ak konjwen w. Si gen yon sitiyasyon ki fè gen tansyon nan mitan nou, fè yon efò pou w diminye tansyon an. Reflechi sou  yon sitiyasyon ki te egziste nan lavi Izarak ak madanm li Rebeka. Men ki jan Jenèz 27:46–28:4 rapòte sa k te pase : “ Rebeka pa t sispann di Izarak : ‘ Mwen vin rayi lavi m akoz pitit fi Èt yo. Si se pami pitit fi Èt yo, menm jan ak sa yo ki abite nan peyi a, Jakòb ta chwazi yon madanm, sa m bezwen viv fè ? ” Pa gen anyen ki endike Izarak te reponn mal. Okontrè, li te voye Jakòb, pitit gason yo a, al chèche yon madanm ki krenn Bondye e ki pa t ap vin yon sous pwoblèm pou Rebeka. Ann sipoze ta vin gen yon mezantant ant yon mari ak madanm li. Si lè y ap pale, yo di “ mwen ” olye yo di “ ou ”, sa ka evite pou yon senp ti mezantant pa vin tounen yon gwo diskisyon. Pa egzanp olye pou w di : “ Ou pa janm pase tan ansanm avè m ! ”, sa w panse si w di pito : “ Mwen ta renmen nou pase plis tan ansanm ” ? Mete aksan sou pwoblèm nan e non pa sou moun nan. Evite chèche kiyès ki gen rezon oswa kiyès ki gen tò. Women 14:19 di pou nou “ pousuiv bagay ki favorize lapè ak bagay ki ankourajan ni pou youn ni pou lòt ”.

‘ Rejte rankin malveyan, kòlè ak move san ’

12. Pou nou metrize lang nou, ki sa nou ka mande nan priyè nou, e poukisa ?

¹² Metrize lang nou vle di plis pase veye sa n ap di. Anfèt, se kè nou ki pwodui pawòl yo, se pa bouch nou. Men sa Jezi te di : “ Yon bon moun rale bon bagay soti nan bon trezò li genyen nan kè l, men yon move moun rale move bagay soti nan move trezò li genyen. Paske se dapre sa ki nan kè a ann abondans bouch li pale. ” ​(Lik 6:45). Pakonsekan, si w vle kontwole lang ou, petèt ou bezwen priye menm jan ak David ki te di : “ Kreye nan mwen yon kè pirifye, o Dye, e mete anndan mwen yon lespri nouvo, yon lespri fèm. ” — Sòm 51:10.

13. Ki jan rankin malveyan, kòlè ak move san ka fè nou pale yon fason ki blesan?

¹³ Pòl te egzòte Efezyen yo pou yo rejte nonsèlman pawòl ki blesan, men tou, santiman ki fè yon moun di pawòl sa yo. Men sa l te ekri : “ Se pou nou retire nan nou menm tout rankin malveyan, ni kòlè, ni move san, ni eskandal, ni vye pawòl ansanm ak tout mechanste. ” ​(Efezyen 4:31). N ap remake anvan Pòl te site ‘ eskandal ak vye pawòl ’, li te mansyone ‘ rankin malveyan, kòlè ak move san ’. Se gwo kòlè san kontwòl k ap bouyi pa anndan nou ki ka eksploze pou bay yon pakèt pawòl ki blesan. Donk, mande tèt ou : ‘ Èske m kenbe rankin ak move san nan kè m ? Èske m “ toujou prèt pou [m] eksploze ” ? ’ ​(Pwovèb 29:22). Si se ka pa w, priye Bondye pou l ede w venk tandans sa yo e pou w demontre metriz, yon fason pou w pa kite kòlè w eklate. Men sa Sòm 4:4 di : “ Nou mèt ajite, men pa peche. Pale nan kè nou, sou kabann nou, e ret an silans. ” Si w santi ou kòmanse enève, e ou pè pou w pa pèdi metriz, suiv konsèy ki nan Pwovèb 17:14 la ki di : “ Anvan chirepit la pete, wete kò w. ” Pandan yon ti moman, rale kò w jiskaske danje a pase.

14. Ki jan rankin ka afekte yon maryaj ?

¹⁴ Li pa fasil pou yon moun metrize l lè l fè yon move san oswa lè l ankòlè, sitou lè sa ki lakòz li se sa Pòl rele “ rankin malveyan ”. Mo grèk Pòl te itilize a, se yon mo ki bay ide yon “ etadespri ki kenbe rankin e ki refize rekonsilye ” e ki karakterize yon ‘ malveyans ki konte tout ti erè ’. Pafwa rankin nan konn tankou yon gwo baryè ki ant mari a ak madanm li, e sitiyasyon an ka dire anpil tan. Lè yon pwoblèm pa fin rezoud nèt, sa ka vin fè youn frèt ak lòt. Men, sa pa itil anyen pou w kontinye kenbe rankin pou yon bagay mal ki te rive. Sa k te fèt la pa ka defèt. Yon erè ou te padone, ou ta dwe bliye l. Lanmou “ pa teni kont de bagay mal yo fè l ”. — 1 Korentyen 13:4, 5.

15. Ki sa k ap ede moun ki abitye pale di ak moun pou yo chanje fason yo pale ?

¹⁵ E si nan fanmi kote w te leve a, souvan yo  te konn pale di youn ak lòt, e sa fè w vin abitye pale konsa tou ? Ou ka pote chanjman nan domèn sa a. Ou deja bay tèt ou yon seri limit nan divès domèn nan lavi a ou byen deside pou w pa franchi. Ki limit w ap chwazi bay pawòl w ap di ? Èske w ap sispann pale anvan pawòl ou yo kòmanse vin blesan ? Sandout, w ap anvi adopte limit tèks Efezyen 4:29 fikse a : “ Pa kite okenn pawòl pouri sot nan bouch nou. ” Sa mande pou w “ retire ansyen pèsonalite a sou [ou] ansanm ak mès li yo, e [pou w] abiye [...] avèk nouvo pèsonalite a, pèsonalite ki ap renouvle grasa konesans egzak la, selon imaj Moun ki kreye l la ”. — Kolosyen 3:9, 10.

“ Konvèsasyon konfidansyèl ” : yon nesesite

16. Poukisa li pa bon pou maryaj la lè yon konjwen chwazi pou l pa pale ak lòt konjwen an ?

¹⁶ Lè yon mari oswa yon madanm chwazi pou l pa pale ak konjwen l, li pa fè anyen ki itil, e sa ka menm lakòz pwoblèm. Se pa fòseman pini yon konjwen vle pini lòt la lè konsa, paske se ka santi li santi l desi oswa li santi l dekouraje. Toutfwa, lè youn refize pale ak lòt, sa pa gen ni de ni twa rezilta : sa fè gen plis tansyon e sa pap rezoud pwoblèm nan. Tankou yon madan marye te di : “ Yonfwa nou retounen pale ankò, nou pa janm chita pale sou pwoblèm nan. ”

17. Ki sa kretyen ki gen tansyon nan maryaj yo ta dwe fè ?

¹⁷ Lè gen pwoblèm k ap pèsiste nan yon maryaj, ou pap annik rete konsa ou wè l rezoud. Pwovèb 15:22 di : “ Pwojè yo echwe kote ki pa gen konvèsasyon konfidansyèl, men nan anpil konseye gen reyalizasyon. ” Ou bezwen chita ansanm ak konjwen w pou nou pale sou pwoblèm nan. Fè tout efò w pou w koute konjwen w avèk kè w ak lespri w  byen dispoze. Si sa pa posib, ou kapab chèche èd nan dispozisyon sa a ki gen nan kongregasyon kretyen an, anpalan de ansyen yo. Yo gen konesans sou Ekriti yo e yo gen eksperyans nan mete prensip biblik yo ann aplikasyon. Mesye sa yo “ tankou yon kachèt kont van, tankou yon refij kont tanpèt lapli ”. — Izayi 32:2.

Ou kapab genyen batay la

18. Ki batay yo dekri nan Women 7:18-23 ?

¹⁸ Pou nou rive bride lang nou, fòk nou lite. E nou bezwen lite tou pou nou metrize aksyon nou. Men sa apot Pòl te ekri pou l dekri difikilte li te jwenn : “ Mwen konnen nan mwen menm, sa vle di nan chè mwen, pa gen anyen ki bon ki abite ladan l. Paske kapasite pou m vle a prezan lakay mwen, men kapasite pou m fè sa ki byen an pa prezan. Paske, byen m ta renmen fè a se pa li m fè, e mal mwen pa ta renmen fè a se li m pratike. Si kounye a sa m pa swete a se sa m fè, sa k ap fè l la se pa mwen menm ankò, men se peche ki abite nan mwen an. ” Akoz “ lalwa peche ki nan manm [nou] ”, nou gen tandans mal sèvi ak lang nou e ak lòt pati nan kò nou (Women 7:18-23). Sepandan, nou dwe kontinye batay, e nou ka ranpòte laviktwa grasa èd Bondye.

19, 20. Ki jan egzanp Jezi ka ede mari yo ak madanm yo bride lang yo ?

¹⁹ Nan yon relasyon ki baze sou lanmou ak respè, pa gen plas pou pawòl ki di san reflechi, ni pou pawòl ki blesan. Reflechi sou egzanp Jezi Kris kite nan domèn sa a. Jezi pa t janm sèvi ak pawòl derespektan lè l t ap pale ak disip li yo. Menm pandan dènye nuit Pitit Bondye a te pase sou tè a anvan l mouri, lè apot li yo t ap diskite pou yo konnen kiyès ki pi gran pami yo, li pa t blame yo (Lik 22:24-27). Men ki egzòtasyon Labib bay : “ Mari, se pou nou kontinye renmen madanm nou, tankou Kris tou te renmen kongregasyon an, e li te livre tèt li pou li. ” — Efezyen 5:25.

²⁰ E madanm nan li menm ? Li “ dwe gen yon gwo respè pou mari l ”. (Efezyen 5:33.) Èske yon madanm ki gen respè pou mari l ap rele sou li, ap di l vye pawòl ? Pòl te ekri : “ Men, mwen vle nou konnen chèf tout gason se Kris, e chèf fi se gason, e chèf Kris se Bondye. ” ​(1 Korentyen 11:3). Madanm yo dwe soumèt devan chèf yo, menm jan Kris soumèt devan Chèf pa l (Kolosyen 3:18). Menmsi okenn imen enpafè pa ka imite Jezi yon fason ki pafè, si mari yo ak madanm yo “ suiv tras li fidèlman ”, sa ap ede yo genyen batay y ap mennen kont move itilizasyon lang nan. — 1 Pyè 2:21.

Ki sa nou sot aprann ?

• Ki jan yon lang ki deregle ka lakòz pwoblèm nan yon maryaj ?

• Poukisa li difisil pou nou bride lang nan ?

• Ki sa k ka ede nou kontwole pawòl n ap di ?

• Ki sa nou ta dwe fè lè gen tansyon nan maryaj nou ?

[Kesyon]

[Foto nan paj 12]

Ansyen yo bay èd ki baze sou Labib.