1-2. a) Ki jan Jewova wè moun ki fè peche e ki pa repanti yo? b) Ki sa Jewova ta renmen pou tout moun ki peche yo fè?

 JEWOVA pa yon Bondye sitirè, li pa aksepte tout kalite konduit (Sòm 5:​4-6). Li mande n pou n respekte prensip li yo ki jis, yon seri prensip li ban nou nan Pawòl li a. Natirèlman, Jewova pa atann pou sèvitè l yo ki enpafè aji yon fason ki pafè (Sòm 130:​3, 4). Anmenmtan, li pa tolere ‘moun ki san respè pou li, ki pran favè san parèy li a fè l sèvi eskiz pou yo lage kò yo nan konduit derespektan’. (Jid 4.) Anfèt, Bib la pale de “destriksyon moun ki pa gen respè pou Bondye yo” nan lagè Bondye pral fè nan Amagedon an. — 2 Pyè 3:7; Rev. 16:16.

² Sepandan, Jewova pa ta renmen pèsonn moun detwi. Jan nou te wè sa nan atik ki te vin anvan nan seri a, Bib la fè konnen aklè Bondye “ta renmen pou tout moun rive repanti”. (2 Pyè 3:9.) Menm jan ak Jewova, ansyen yo montre yo gen pasyans lè y ap eseye ede yon moun ki peche pou l repanti e pou l vin pwòch ak Jewova ankò. Men, se pa tout moun ki peche ki byen reyaji (Eza. 6:9). Gen kèk moun ki kontinye aji mal malgre tout efò ansyen yo fè pou ede yo repanti. Ki sa ansyen yo dwe fè nan yon sitiyasyon konsa?

 “RETIRE MECHAN AN”

3. a) Ki sa Bib la di yo dwe fè ak moun ki peche ki pa repanti yo? b) Nan yon sans, poukisa nou kapab di se moun ki peche a ki chwazi retire tèt li nan kongregasyon an?

³ Lè yon moun ki peche pa repanti, ansyen yo oblije suiv konsèy nou jwenn nan 1 Korentyen 5:13 la ki di: “Retire mechan an nan mitan nou.” Nan yon sans, se moun ki peche a ki chwazi konsekans sa a, li jis rekòlte sa li menm li te simen (Gal. 6:7). Ki rezon ki fè n di sa? Se paske li te refize byen reyaji devan tout efò ansyen yo te fè pou yo ede l repanti (2 Wa 17:​12-15). Aksyon l yo montre li pa chwazi obeyi prensip Jewova yo. — Det. 30:​19, 20.

4. Lè yo retire yon moun ki peche ki pa repanti nan kongregasyon an, poukisa yo fè yon anons pou kongregasyon an?

⁴ Lè yo retire yon moun ki peche ki pa repanti nan kongregasyon an, yo fè yon anons pou fè kongregasyon an konnen li pa yon Temwen Jewova ankò. a Se pa pou yo imilye moun ki peche a ki fè yo fè anons sa a. Okontrè, yo fè anons sa a pou kongregasyon an kapab suiv konsèy Bib la bay ki mande pou nou “sispann frekante” moun sa a e pou nou “pa menm manje ak” yon moun konsa (1 Kor. 5:​9-11). Gen bonjan rezon ki fè Bib la ban nou konsèy sa a. Men sa apot Pòl te ekri: “Yon tikras ledven fè tout pat la leve.” (1 Kor. 5:6). Si yo pa retire yon moun ki peche ki pa repanti nan kongregasyon an, lòt moun gendwa panse yo pa bezwen fè efò pou yo obeyi kòmandman Jewova yo. — Pwo. 13:20; 1 Kor. 15:33.

5. Ki jan nou dwe konsidere yon moun yo retire nan kongregasyon an, e poukisa?

⁵ Kounye a, ki jan nou dwe konsidere yon kwayan parèy nou yo retire nan kongregasyon an? Byenke nou pap pase tan ansanm avè l, nou pa dwe konsidere l kòm yon ka pèdi, men pito, kòm yon mouton ki pèdi. Yon mouton ki pèdi kapab retounen nan patiraj li ankò. Sonje, mouton ki pèdi a te vwe Jewova lavi l. Malerezman, li pa kontinye viv ann amoni ak ve li te fè a, e sa fè l nan yon sitiyasyon ki danjere (Eze. 18:31). Sepandan, toutotan Jewova dispoze fè mizèrikòd, gen espwa pou moun sa a retounen. Ki jan ansyen yo ka montre yo gen menm espwa sa a lè yo retire yon moun ki te peche nan kongregasyon an?

FASON ANSYEN YO EDE MOUN YO RETIRE NAN KONGREGASYON AN

6. Ki etap ansyen yo ap suiv pou yo ede yon moun yo te retire nan kongregasyon an?

⁶ Èske lè yo retire yon moun nan kongregasyon an yo lage l poukont li pou l degaje l retounen vin jwenn Jewova? Non, jamè! Lè komite ansyen an fè yon moun ki peche ki pa repanti konnen y ap retire l nan kongregasyon an, y ap esplike l ki etap li kapab suiv pou l retounen nan kongregasyon an. Men, ansyen yo ap fè plis pase sa. Nan pifò ka, y ap fè moun ki peche a konnen yo ta renmen reyini yon lòt fwa ankò avè l, apre kèk mwa fin pase, pou yo wè si l chanje etadespri. Si moun ki peche a dakò reyini ak ansyen yo yon lòt fwa ankò, nan pwochen reyinyon an, ansyen yo ap fè tout sa yo kapab pou yo ede l repanti e pou l retounen. Menmsi l poko chanje lè sa a, detanzantan, ansyen yo ap fè efò pou yo pran kontak avè l pou yo ka reyini avè l pi devan.

7. Ki jan ansyen yo montre yo gen konpasyon menm jan ak Jewova lè y ap ede yon moun yo retire nan kongregasyon an? (Jeremi 3:12).

 ⁷ Ansyen yo fè efò pou yo montre yo gen konpasyon menm jan ak Jewova lè y ap ede yon moun yo retire nan kongregasyon an. Pa egzanp, Jewova pa t tann pou pèp Izrayèl tan lontan an ki te vire do ba li fè premye pa a. Okontrè, li te pran devan pou l ede yo anvan menm yo te bay siy ki montre yo te vle repanti. Jan sa parèt nan dezyèm atik ki nan seri sa a, Jewova te mande Oze pou l padone madanm li e pou l fè l retounen vin jwenn li, menm lè madanm nan te kontinye ap fè peche grav. Konsa, Jewova te montre pèp li a li gen anpil konpasyon (Oze 3:1; Mal. 3:7). Menm jan ak Jewova, ansyen yo vrèman vle ede moun ki peche a retounen nan kongregasyon an, e yo pa rann li difisil pou l fè sa. — Li Jeremi 3:12.

8. Ki jan parabòl Jezi te bay konsènan pitit gason gaspiyè a ede nou pi byen konprann fason Jewova santi l konsènan moun ki kite l yo? (Lik 15:7).

⁸ Jan sa te parèt nan dezyèm atik ki nan seri sa a, sonje fason papa a te reyaji nan parabòl pitit gason gaspiyè Jezi te bay la. Lè papa a te wè pitit gason l lan k ap retounen lakay li, papa a “kouri, li ba l yon akolad e li bo l avèk tandrès”. (Lik 15:20.) N ap remake papa a pa t tann pitit gason l lan mande l padon. Okontrè, li te pran devan, menm jan nenpòt papa ki gen lanmou t ap fè sa. Se fason sa a Jewova santi l konsènan moun ki kite l yo, e ansyen yo fè tout sa yo kapab pou yo imite Jewova. Nan yon sans, yo vle pou mouton sa yo ki pèdi retounen lakay yo (Lik 15:​22-24, 32). Lè yon moun ki peche retounen, sa bay kè kontan nan syèl la e sa bay kè kontan tou sou tè a! — Li Lik 15:7.

9. Ki sa Jewova ankouraje moun ki peche yo fè?

⁹ Dapre sa nou gentan wè deja, li klè, Jewova pa dakò ak moun k ap fè peche e ki pa repanti. Sepandan, li pa vire do bay moun k ap fè peche yo. Li vle yo retounen vin jwenn li. Epitou, lè yon moun repanti, gade ki jan Jewova santi l konsènan moun sa a selon Oze 14:4: “M ap geri yo e yo pap aji yon fason ki montre yo pa fidèl ankò. M ap renmen yo san pèsonn pa fòse m, paske mwen pa an kòlè sou yo ankò.” Se pa ti ankouraje sa ankouraje ansyen yo pou yo chèche nenpòt siy ki montre yon moun ki peche kòmanse repanti. Epitou, se pa ti ankouraje sa ankouraje moun ki kite Jewova yo pou yo retounen vin jwenn li san pèdi tan.

10-11. Ki jan ansyen yo ap eseye ede moun ki gen lontan depi yo te retire yo nan kongregasyon an?

¹⁰ E moun yo te retire nan kongregasyon an, petèt sa gen anpil ane yo? Moun sa yo gendwa sispann pratike peche ki fè yo te retire yo nan kongregasyon an. Nan kèk ka, yo gendwa pa menm sonje rezon ki fè yo te retire yo nan kongregasyon an. Nan kèlkeswa ka a, ansyen yo ap eseye pran kontak ak moun sa yo epi vizite yo. Pandan vizit sa yo, ansyen yo kapab menm ofri moun sa yo pou yo priye ak yo e y ap ankouraje yo pou yo retounen nan kongregasyon an. Si yon moun te kite kongregasyon an sa gen anpil ane, se sèten l ap fèb anpil nan domèn espirityèl. Se sa k fè, si yon moun vle retounen nan kongregasyon an, ansyen yo ap pran dispozisyon pou yon moun etidye Labib avè l, menm lè l poko reyentegre. Nan kèlkeswa ka a, se ansyen yo k ap pran dispozisyon pou yon moun etidye Labib ak moun nan.

 ¹¹ Ansyen yo fè efò pou yo imite konpasyon Jewova gen pou sèvitè l yo. Se sa k fè, ansyen yo ap chèche tout moun ki kite Jewova e y ap ankouraje yo retounen vin jwenn li. Lè yon moun ki peche montre li repanti e li abandone move konduit li te genyen an, yo ka reyentegre l nan kongregasyon an san pèdi tan. — 2 Kor. 2:​6-8.

12. a) Bay kèk sitiyasyon ki mande pou ansyen yo plis pridan. b) Poukisa nou pa dwe panse li enposib pou kèk moun ki peche benefisye mizèrikòd Jewova? (Gade nòt la.)

¹² Nan kèk sitiyasyon, ansyen yo bezwen montre yo plis pridan anvan yo reyentegre yon moun. Pa egzanp, si yon moun te koupab akoz li te fè abi sou timoun, oswa li te vin aposta oubyen li te fè konplo pou l  ka mete fen nan yon maryaj, ansyen yo bezwen asire yo moun sa a repanti toutbon (Mal. 2:14; 2 Tim. 3:6). Yo dwe pwoteje kongregasyon an. Anmenmtan, nou bezwen rann nou kont, Jewova ap aksepte kèlkeswa moun ki peche ki montre li repanti toutbon e ki sispann aji mal. Se vre ansyen yo ap pran anpil prekosyon ak moun ki te aji an trèt yo, men yo pa ta dwe rive nan pwen pou yo ta di gen kèk moun ki peche ki pap janm ka benefisye mizèrikòd Jewova. b — 1 Pyè 2:10.

SA KONGREGASYON AN KA FÈ

13. Ki diferans ki genyen ant fason nou aji ak yon moun ansyen yo bay yon reprimann ak fason nou aji ak yon moun ansyen yo retire nan kongregasyon an?

¹³ Jan nou te egzamine sa nan atik anvan an, pafwa yo fè yon anons pou fè kongregasyon an konnen yon moun te resevwa yon reprimann. Nan ka sa a, nou kapab kontinye frekante moun nan, paske nou konnen li repanti e li abandone move konduit li te genyen an (1 Tim. 5:20). Li toujou fè pati kongregasyon an e li bezwen ankourajman nan men kwayan parèy li yo (Ebre 10:​24, 25). Sepandan, se pa menm sitiyasyon ditou ak yon moun yo retire nan kongregasyon an. Nou “sispann frekante” moun sa a, “nou pa menm manje ak yon moun konsa”. — 1 Kor. 5:11.

14. Ki jan kretyen yo ka sèvi ak konsyans yo ki fòme grasa Bib la nan fason y ap aji ak yon moun yo te retire nan kongregasyon an? (Gade foto a tou.)

¹⁴ Sou baz sa nou sot egzamine la yo, èske sa vle di nou dwe meprize yon moun yo retire nan kongregasyon an? Sa pa vle di sa. Se sèten, nou pap frekante yon moun konsa. Men, kretyen yo ka sèvi ak konsyans yo ki fòme grasa Labib pou yo deside si y ap ka envite yon moun yo te retire nan kongregasyon an, petèt yon fanmi oswa yon moun ki te pwòch yo anvan, pou l asiste yon reyinyon nan kongregasyon an. Si moun sa a vin asiste reyinyon an, ki jan nou ta dwe aji avè l?  Anvan sa, nou pa t ap salye yon moun konsa. Yon lòt fwa ankò, se chak kretyen ki bezwen sèvi ak konsyans li ki fòme grasa Bib la pou l deside ki sa l ap fè. Gen moun ki gendwa santi yo alèz pou yo salye moun sa a oswa pou yo swete l byenvini nan reyinyon an. Sepandan, nou pa dwe gen yon konvèsasyon ki long ansanm ak moun nan oswa pase tan avèk li nan lòt okazyon.

15. De ki kalite moun y ap pale de yo nan 2 Jan 9-11? (Gade tou kare ki gen tit “ Èske Jan ak Pòl t ap pale konsènan menm kalite peche a?”)

¹⁵ Kèk moun gendwa ap mande tèt yo: ‘Èske Bib la pa di yon kretyen ki salye yon moun konsa patisipe nan move aksyon l yo?’ (Li 2 Jan 9-11.) Nan kontèks la, apot la te bay konsèy sa a konsènan aposta yo ak lòt moun k ap ankouraje moun gen move konduit (Rev. 2:20). Se sa k fè, si yon moun ap fè pwomosyon pou ansèyman aposta oswa l ap ankouraje moun fè move bagay, ansyen yo pap pran dispozisyon pou yo vizite l. Natirèlman, li posib pou yon moun konsa repanti. Annatandan, nou pap ni salye yon moun konsa ni envite l asiste yon reyinyon kongregasyon an.

IMITE KONPASYON AK MIZÈRIKÒD JEWOVA

16-17. a) Ki sa Jewova vle pou moun ki peche yo fè? (Ezekyèl 18:32). b) Ki jan ansyen yo kapab travay ansanm ak Jewova lè y ap eseye ede yon moun ki peche?

¹⁶ Ki sa nou te aprann nan seri sa a ki te gen senk atik ladan l? Jewova pa vle pèsonn moun detwi! (Li Ezekyèl 18:32.) Li vle pou moun ki peche yo rekonsilye avè l (2 Kor. 5:20). Se rezon sa a ki fè, nan tout listwa, Jewova toujou ap ankouraje pèp li a ki vire do ba li ansanm ak moun ki rebele kont li yo pou yo repanti e pou yo retounen vin jwenn li. Ansyen nan kongregasyon yo gen privilèj pou yo travay ansanm ak Jewova toutpandan y ap fè tout sa yo kapab pou yo ede moun ki peche yo repanti. — Wom. 2:4; 1 Kor. 3:9.

¹⁷ Imajine lajwa ki gen nan syèl la lè moun ki peche yo repanti! Jewova, Papa nou ki nan syèl la, kontan anpil chak fwa youn nan mouton l yo ki te pèdi retounen nan kongregasyon an. Lè nou medite sou konpasyon Jewova gen lakay li, sou mizèrikòd li ak sou favè san parèy li fè nou, sa fè nou vin renmen l plis toujou. — Lik 1:78.