“ Pou nou pa antre nan tantasyon ”

“ Kontinye veye epi toujou kontinye priye, pou nou pa antre nan tantasyon. ” — MATYE 26:41.

• Ki sa Jezi te fè lè l te anba presyon ki rèd anpil nan fen lavi li, e ki sa li te ankouraje disip li yo pou yo fè (§ 1-4) ?

PRESYON an te rèd anpil. Li te pi rèd pase tout sa li te deja sibi yo. Jezi Kris, Pitit Bondye a, te rive nan dènye moman lavi li sou tè a. Jezi te vin rann li kont talè konsa yo t apral arete l, yo t apral kondane l amò, e yo t apral kloure l sou yon poto soufrans. Li te konnen chak desizyon l pran ak chak aksyon li poze t ap gen efè sou non Papa l. Jezi te konnen tou espwa lavi limanite te anbalan. Devan gwosè presyon sa a, ki sa l te fè ?

² Jezi t al nan jaden Jetsemane avèk disip li yo. Se kote Jezi te pi renmen ale. Pandan l la, li fè yon ti deplase kite disip li yo. Yon fwa li poukont li, li mande Papa li ki nan syèl la pou l ba l fòs, li vide tout kè l ba li nan lapriyè, se pa t yon fwa sèlman li te fè sa, men li te fè sa twa fwa. Malgre li te pafè, Jezi pa t santi li te ka sipòte presyon an poukont li. — Matye 26:36-44.

³ Jodi a, nou menm tou nou anba presyon. Nan bwochi sa a, nou te deja analize prèv ki montre n ap viv nan dènye jou sistèm mechan sa a. Tantasyon ak strès ki gen nan monn Satan an ap vin pi fò. Desizyon ak aksyon nenpòt nan nou ki pretann l ap sèvi vrè Dye a gen konsekans sou non Li e sa gen yon gwo efè sou espwa lavi nou chak nan monn nouvo li a. Nou renmen Jewova. Nou vle “ andire jiska lafen ”, lafen vi nou oswa lafen sistèm sa a, kèlkeswa sa k vin anvan an (Matye 24:13). Men, ki jan nou ka toujou wè nesesite pou nou aji vit e pou nou kontinye veye ?

⁴ Jezi konnen ni disip li yo ki t ap viv nan tan lontan ni sa k ap viv jodi a t ap anba presyon tou. Men sa li di yo : “ Kontinye veye epi toujou kontinye priye, pou nou pa antre nan tantasyon. ” ​(Matye 26:41). Ki sa pawòl sa yo vle di pou nou jodi a ? Ki tantasyon w jwenn ? E ki jan w ka “ kontinye veye ” ?

Tantasyon pou fè ki sa ?

• Poukisa Satan vize adoratè Jewova yo, e ki fason li tante yo (§ 5-8) ?

⁵ Chak jou nou tout nou jwenn tantasyon pou nou tonbe nan “ pyèj Dyab la ”. (2 Timote 2:26.) Labib fè nou konnen se adoratè Jewova yo Satan vize espesyalman (1 Pyè 5:8 ; Revelasyon 12:12, 17). Nan ki objektif ? Se pa nesesèman pou l retire lavi nou. Se pa yon viktwa pou Satan si nou mouri fidèl devan Bondye. Satan byen konnen, lè moman Jewova fikse a rive, l ap retire lanmò pa mwayen rezirèksyon. — Lik 20:37, 38.

⁶ Satan vle detwi yon bagay ki gen plis valè pase vi nou genyen kounye a : entegrite nou devan Bondye. Satan ap fè kou l konnen pou l pwouve li kapab fè nou vire do bay Jewova. Se sa k fè si l ta fè nou vin enfidèl, nou sispann preche bon nouvèl la oswa nou abandone prensip kretyen yo, sa t ap yon viktwa pou li (Efezyen 6:11-13) ! Se poutèt  sa, “ Tantatè a ” mete tantasyon devan nou. — Matye 4:3.

⁷ “ Riz ” Satan yo gen divès fòm (Efezyen 6:11, Bib la). Li kapab tante nou pou nou vin materyalis, pou nou gen krent, pou nou gen dout, oswa pou n kouri dèyè plezi. Men, youn nan metòd li genyen ki pi efikas se dekourajman. Antanke yon mètdam k ap veye okazyon, li konnen dezespwa kapab febli nou, pou fè nou tonbe byen fasil (Pwovèb 24:10). Espesyalman lè nou santi nou “ vin kraze ”, li tante nou pou l fè nou abandone. — Sòm 38:8.

⁸ Toutotan n ap rantre pi fon nan dènye jou yo, sanble rezon pou dekourajman yo ap ogmante, e nou pa egzante. (Gade kare “ Kèk rezon ki konn lakòz dekourajman. ”) Kèlkeswa koz la, dekourajman kapab detwi fòs nou. “ Rachte moman apwopriye ” pou responsablite espirityèl tankou etidye Labib, asiste reyinyon, e patisipe nan predikasyon, kapab yon defi si nou santi nou faya fizikman, mantalman e sikolojikman (Efezyen 5:15, 16). Pa bliye, Tantatè a vle w abandone. Men, lè nou konsidere tan n ap viv ladan l lan, se pa lemoman pou w ap lese grennen oswa pou w bliye nesesite pou w aji vit (Lik 21:34-36). Ki jan w kapab reziste anba tantasyon e kontinye veye ? Annou konsidere kat sijesyon ki kapab ede w.

“ Toujou kontinye priye ”

• Pou nou reziste anba tantasyon, poukisa nou dwe toujou kontinye priye (§ 9-12) ? Poukisa nou dwe reyalis nan sa n ap atann (§ 13-15) ? Poukisa nou dwe sonje kesyon ki te soulve yo (§ 16-17) ? E poukisa nou dwe “ pwoche bò kote Bondye ” ​(§ 18-20) ?

⁹ Konte sou Jewova pa mwayen lapriyè. Sonje egzanp Jezi nan jaden Jetsemane a. Lè l te anba gwo strès ki mete l sou tansyon, ki sa l te fè ? Li te mande Jewova pou l ede l, li te tèlman mete tout li menm nan priyè a, “ swè l te vin tankou gout san k ap tonbe atè ”. (Lik 22:44.) Fè yon ti reflechi. Jezi te konnen Satan byen. Pandan Jezi te nan syèl la, li te konn obsève tout tantasyon Satan te konn itilize pou l pyeje sèvitè Bondye yo. Sepandan, Jezi pa t met nan tèt li l ap kapab venk fasilman kèlkeswa sa Tantatè a ta met devan l. Si Pitit Bondye a ki pafè santi nesesite pou li priye pou l jwenn èd ak fòs nan men Bondye, alewè pou nou menm ! — 1 Pyè 2:21.

¹⁰ Sonje tou, apre Jezi te fin di disip li yo pou yo “ toujou kontinye priye ”, li te di : “ Se vre, lespri a vijilan, men lachè a fèb. ” ​(Matye 26:41). Ki lachè Jezi t ap pale la a ? Sètènman se pa t chè pa l. Pa t gen okenn feblès nan chè li antanke moun ki pafè (1 Pyè 2:22). Men, se pa t menm bagay pou disip li yo. Akoz yo eritye enpèfeksyon ak tandans fè peche, yo t ap bezwen èd espesyal pou yo reziste anba tantasyon (Women  7:21-24). Se poutèt sa li te ankouraje yo, ansanm ak tout lòt vrè kretyen ki t ap vin apre yo, pou yo priye pou yo jwenn èd pou lite anba tantasyon (Matye 6:13). Jewova reponn priyè sa yo (Sòm 65:2). Ki jan ? Omwen de fason.

¹¹ Premyèman, Bondye ede nou rekonèt tantasyon yo. Tantasyon Satan yo tankou pèlen yo tann nan yon chemen ki fènwa. Si ou pa wè yo, w ap pran ladan yo. Grasa Labib ansanm ak piblikasyon ki baze sou Labib, Jewova flache pyèj Satan yo. Konsa, li pèmèt nou evite tonbe nan tantasyon. Depi plizyè ane, nou toujou ap jwenn avètisman nan liv, nan kongrè pou n evite danje tankou : pè moun, imoralite seksyèl, materyalis, ak yon bann lòt tantasyon Satan mete devan nou (Pwovèb 29:25 ; 1 Korentyen 10:8-11 ; 1 Timote 6:9, 10). Èske w pa kontan poutèt Jewova fè nou konnen plan Satan yo (2 Korentyen 2:11) ? Tout avètisman sa yo se repons priyè nou te fè pou nou mande èd pou n reziste anba tantasyon.

¹² Dezyèmman, Jewova reponn priyè nou lè li ban nou fòs pou nou andire anba tantasyon. Pawòl li a di : “ Bondye [...] pap kite nou tante depase sa nou ka sipòte, men ansanm ak tantasyon an l ap ouvri yon chemen tou. ” ​(1 Korentyen 10:13). Bondye pap janm pèmèt yon tantasyon depase nou yon fason pou nou ta manke fòs espirityèl pou nou reziste, si nou kontinye konte sou li. Ki jan li “ ouvri yon chemen ” pou nou ? ‘ Moun ki mande l lespri sen l, li bay yo l. ’ ​(Lik 11:13). Lespri sa a kapab ede nou sonje prensip biblik ki kapab ranfòse detèminasyon nou pou nou fè sa ki dwat e ki kapab ede nou pran desizyon ki saj (Jan 14:26 ; Jak 1:5, 6). Li kapab ede nou demontre kalite nou bezwen yo menm pou nou venk move tandans (Galat 5:22, 23). Lespri Bondye kapab menm motive kretyen parèy nou pou yo ‘ tounen pou nou yon èd ki bay fòs ’. (Kolosyen 4:11.) Èske w pa rekonesan poutèt Jewova aji avèk amou pou l reponn priyè ou fè pou w mande èd ?

Se pou nou reyalis nan sa n ap atann

¹³ Pou nou kontinye veye, nou bezwen reyalis nan sa n ap atann. Akoz presyon ki gen nan lavi a, pafwa nou tout konn santi nou fatige. Men nou dwe sonje, Bondye pa janm pwomèt nou n ap gen yon vi san pwoblèm nan sistèm sa a ki la depi lontan an. Menm nan tan biblik yo, sèvitè Bondye te konn rankontre pwoblèm, san konte pèsekisyon, pòvrete, depresyon ak maladi. — Travay 8:1 ; 2 Korentyen 8:1, 2 ; 1 Tesalonisyen 5:14 ; 1 Timote 5:23.

¹⁴ Jodi a, nou menm tou nou gen lo pwoblèm pa nou. Nou kapab rankontre pèsekisyon, strès ekonomik. Nou kapab ap lite anba depresyon, anba maladi oswa nou kapab ap soufri lòt fason ankò. Si Jewova te fè mirak pou l pwoteje nou kont tout malè, èske sa pa t ap bay Satan yon baz pou l pwovoke Jewova (Pwovèb 27:11) ? Jewova kite sèvitè l yo sibi tantasyon ak eprèv, e nan kèk ka, li konn menm kite yo mouri anvan lè anba men opozan. — Jan 16:2.

¹⁵ Ki sa Jewova pwomèt menm ? Jan nou te wè sa anvan, li pwomèt l ap ede nou kenbe djanm anba kèlkeswa tantasyon nou ta rankontre, toutotan nou met konfyans nou nan li nètale (Pwovèb 3:5, 6). Pa mwayen Pawòl li, lespri li ak òganizasyon l lan, li pwoteje nou espirityèlman, li ede nou pou nou konsève relasyon nou avèk li. Si nou kenbe relasyon sa a entak, menmsi nou mouri, nou pote laviktwa. Pa gen anyen ki kapab anpeche Bondye rekonpanse sèvitè fidèl  li yo, pa menm lanmò (Ebre 11:6). Nan monn nouvo a ki toupre rive kounye a, Jewova pap manke pa reyalize tout rès pwomès estrawòdinè li fè pou li beni moun ki renmen l. — Sòm 145:16.

Sonje kesyon ki te soulve yo

¹⁶ Pou nou andire jiska lafen, nou bezwen sonje kesyon trèzenpòtan ki te soulve yo ki gen rapò ak rezon ki fè Bondye pèmèt mechanste. Si pafwa pwoblèm pèsonèl nou yo sanble twòp pou nou e nou anvi abandone, li bon pou nou sonje, Satan te defye souvrènte lejitim Jewova. Blofè a mete atachman ak entegrite adoratè Bondye yo an dout tou (Jòb 1:8-11 ; 2:3, 4). Ni kesyon ki te soulve yo, ni fason Jewova chwazi pou l rezoud yo, pi enpòtan pase pwòp vi nou. Ki jan nou fè di sa ?

¹⁷ Lefètke Bondye pèmèt difikilte pou yon ti tan, sa bay lòt moun tan pou yo pran pozisyon pou laverite. Reflechi sou pwen sa a : Jezi te soufri pou nou ka gen lavi (Jan 3:16). Èske nou pa rekonesan pou sa ? Men, èske nou dispoze andire difikilte pou yon ti tan ankò yon fason pou lòt moun toujou ka gen lavi ? Pou nou andire jiska lafen, nou dwe rekonèt sajès Jewova pi gran lontan pase sajès pa nou (Izayi 55:9). Li pral met fen nan mechanste nan moman ki pi bon pou rezoud kesyon ki te soulve yo yon fwa pou tout pou pwòp bonè etènèl nou. Vrèman, èske gen lòt fason ki pi bon pou l ta fè sa ? Pa gen enjistis lakay Bondye ! — Women 9:14-24.

“ Pwoche bò kote Bondye ”

¹⁸ Pou nou kontinye wè nesesite pou nou aji vit, nou bezwen rete pwòch Jewova. Pa janm bliye Satan ap fè tout sa k nan pouvwa l pou l detwi bon relasyon nou genyen avèk Jewova. Satan ta renmen nou kwè lafen an pap janm vini. Li ta renmen nou kwè sa pap mennen okenn kote pou n ap preche bon nouvèl la oswa pou n ap viv selon prensip Labib yo. Men, li “ se yon mantè e li se papa manti ”. (Jan 8:44.) Nou dwe detèmine pou nou “ kenbe tèt ak Dyab la ”. Relasyon nou ak Jewova se yon bagay nou pa dwe janm pran alalejè. Avèk amou, Labib ban nou ankourajman sa a : “ Pwoche bò kote Bondye e l ap pwoche bò kote nou. ” ​(Jak 4:7, 8). Ki jan nou ka pwoche pi pre Jewova ?

¹⁹ Medite nan lapriyè se yon bagay ki esansyèl. Lè presyon lavi a sanble twòp pou ou, vide kè w bay Jewova. Plis ou presi, se plis l ap fasil pou w wè repons li bay priyè w yo. Repons lan ka pa toujou egzakteman sa w te gen nan tèt ou a. Men si dezi w se pou w onore Bondye e pou w kenbe entegrite w, l ap ba w èd ou bezwen yon fason pou w ka reyisi kenbe (1 Jan 5:14). Tank w ap wè fason l ap gide w nan lavi w, se tank w ap vin pi pwòch li. Jan sa parèt nan Bib la, li esansyèl tou pou nou fè lekti ak refleksyon sou kalite Jewova yo ak sou fason li aji. Meditasyon konsa ede nou pou nou konnen l pi byen, sa touche kè nou e sa fè lanmou nou vin pi pwofon pou li (Sòm 19:14). Plis pase nenpòt lòt bagay, lanmou sa a ap ede w pou w reziste anba tantasyon e pou w kontinye veye. — 1 Jan 5:3.

²⁰ Pou nou rete pwòch Jewova, li enpòtan tou pou nou rete pwòch kretyen parèy nou. N ap pale sou sa nan dènye pati bwochi a.

KESYON POU ETID

[Kare nan paj 25]

Kèk rezon ki konn lakòz dekourajman

Pwoblèm sante oswa pwoblèm laj. Si nou soufri yon maladi kwonik oswa si nou avanse nan laj e sa diminye kapasite nou, nou kapab vin deprime paske nou pa ka fè plis nan sèvis Bondye. — Ebre 6:10.

Lè nou pa satisfè. Nou kapab vin dekouraje si nou wè pa gen anpil moun ki byen reyaji parapò ak efò nou fè nan preche Pawòl Bondye a. — Pwovèb 13:12.

Lè nou panse nou pa vo anyen. Akoz move tretman yon moun sibi pandan plizyè ane, li ka vin gen konviksyon moun pa renmen l, menm Jewova tou. — 1 Jan 3:19, 20.

Lè yo blese santiman nou. Si yon moun santi yon kretyen parèy li ofanse l anpil, sa ka tèlman vekse l, li ka menm anvi sispann asiste reyinyon oswa sispann patisipe nan predikasyon. — Lik 17:1.

Pèsekisyon. Moun ki pa gen menm lafwa avè w kapab fè opozisyon, yo ka pèsekite w oswa yo ka pase w nan rizib. — 2 Timote 3:12 ; 2 Pyè 3:3, 4.

[Foto nan paj 26]

Jezi ankouraje nou pou nou “ toujou kontinye priye ” pou nou jwenn èd pou konbat tantasyon.