1, 2. Unsay bation ni Jehova dihang makita niyang naningkamot tang magmatinud-anon?

 SA NAGLAKAW pauli ang usa ka bata gikan sa eskuwelahan, nakakita siyag pitaka nga punog kuwarta. Unsay iyang himoon? Puwede niya ning kuhaon. Pero giuli niya kini sa tag-iya. Lipay kaayo ang inahan pagkahibalo niya sa gihimo sa iyang anak.

² Kadaghanang ginikanan malipay nga matinud-anon ang ilang mga anak. Ang atong langitnong Amahan, si Jehova, mao “ang Diyos sa kamatuoran,” ug malipay siya kon magmatinud-anon ta. (Salmo 31:5) Gusto natong mapalipay siya ug gusto tang “magmatinud-anon sa tanang butang.” (Hebreohanon 13:18) Hisgotan nato ang upat ka bahin sa kinabuhi diin lisod nga magmatinud-anon. Hisgotan sab nato ang mga kaayohan kon magmatinud-anon ta.

3-5. (a) Sa unsang paagi malimbongan nato ang atong kaugalingon? (b) Unsay makatabang aron magmatinud-anon ta sa atong kaugalingon?

³ Aron magmatinud-anon ta sa uban, kinahanglang magmatinud-anon ta sa atong kaugalingon. Dili kini sayon. Sa unang siglo, gilimbongan sa mga igsoon sa  kongregasyon sa Laodicea ang ilang kaugalingon kay nagtuo sila nga napalipay nila ang Diyos pero wala diay. (Pinadayag 3:17) Malimbongan sab nato ang atong kaugalingon kon bahin sa tinuod natong pagkatawo.

⁴ Ang tinun-an nga si Santiago miingon: “Kon may tawo nga naghunahuna nga siya magsisimba sa Diyos apan wala magkontrolar sa iyang dila, gilimbongan niya ang iyang kaugalingong kasingkasing, ug ang iyang pagsimba walay pulos.” (Santiago 1:26) Gilimbongan nato ang atong kaugalingon kon maghunahuna ta nga basta naa ra tay gihimong maayo, balewala ra sa Diyos kon dili ta maayog pamatasan o manginsulto o mamakak. Unsay makatabang aron dili nato malimbongan ang atong kaugalingon?

⁵ Kon manamin ta, makita nato ang atong hitsura. Kon magbasa tag Bibliya, makita nato ang atong tinuod nga pagkatawo. Ang Bibliya makatabang nato nga mahibaloan ang atong maayong mga hiyas ug kahuyangan. Mahibaloan nato kon unsay angay natong bag-ohon sa atong panghunahuna, panggawi, ug sinultihan. (Basaha ang Santiago 1:23-25.) Pero kon maghunahuna ta nga wala tay kahuyangan, dili nato mapauswag ang atong kaugalingon. Busa kinahanglang gamiton nato ang Bibliya aron magmatinud-anon ta sa atong kaugalingon. (Lamentaciones 3:40; Haggeo 1:5) Makatabang sab ang pag-ampo aron makita nato ang atong tinuod nga pagkatawo. Makaampo ta kang Jehova nga susihon ta niya ug tabangan nga makita ang atong mga kahuyangan aron matul-id nato kini. (Salmo 139:23, 24) Hinumdoman nato nga “gidumtan ni Jehova ang tawong limbongan, apan makigsuod Siya sa matul-id.”​—Proverbio 3:32.

6. Nganong ang magtiayon angayng magmatinud-anon sa usag usa?

⁶ Ang pagkamatinud-anon importante kaayo diha sa pamilya. Kon ang magtiayon matinud-anon sa usag usa, lig-on ang ilang relasyon ug makasalig gyod sila sa usag usa. Dunay daghang kahimtang nga ang usa dili matinud-anon sa iyang kapikas. Pananglitan, magbirigbirig siya o motan-awg pornograpiya o makigrelasyon sa lain. Matikdi ang giingon sa salmista: “Wala ko makig-uban sa mga malimbongon, ug gilikayan nako kadtong mga nagpakaaron-ingnon.” (Salmo 26:4) Kon dili ka matinud-anon sa imong kapikas, bisan diha sa imong hunahuna, makadaot na sa inyong kaminyoon.

7, 8. Unsaon nimo paggamit ang Bibliya sa pagtudlo sa mga anak nga importante ang pagkamatinud-anon?

 ⁷ Ang mga anak kinahanglang makakat-on sab nga importante ang pagkamatinud-anon. Magamit sa ginikanan ang Bibliya sa pagtudlo nila. Kini dunay mga pananglitan sa mga dili matinud-anon: si Acan, kinsa nahimong kawatan; si Gehazi, kinsa namakak aron makakuwarta, ug si Judas, kinsa nangawat ug kuwarta ug nagbudhi kang Jesus sa 30 ka sensilyong plata.​—Josue 6:17-19; 7:11-25; 2 Hari 5:14-16, 20-27; Mateo 26:14, 15; Juan 12:6.

⁸ Sa Bibliya, duna poy daghang pananglitan sa mga matinud-anon: si Jacob, kinsa nagdasig sa iyang mga anak nga iuli ang kuwarta nga ilang nakita; si Jepte ug ang iyang anak nga babaye, kinsa mituman sa ilang panaad sa Diyos; ug si Jesus, kinsa matinud-anon bisan sa lisod nga mga kahimtang. (Genesis 43:12; Maghuhukom 11:30-40; Juan 18:3-11) Kini nga mga pananglitan makatabang sa mga anak nga masabtan kon unsa ka importante ang pagkamatinud-anon.

9. Kon matinud-anon ang ginikanan, sa unsang paagi ni makatabang sa mga anak?

⁹ Ang ginikanan dunay makat-onan niining importanteng prinsipyo sa Bibliya: “Ikaw nga nagtudlo sa uban, dili ba nimo tudloan ang imong kaugalingon? Ikaw nga nagwali, ‘Ayawg pangawat,’ nagapangawat ka ba?” (Roma 2:21) Mahibalo ang mga anak kon ang gibuhat sa ginikanan lahi sa ilang gisulti. Kon tudloan nato ang atong mga anak nga magmatinud-anon pero kita mismo dili matinud-anon, maglibog sila. Kon makita sa mga anak nga namakak ang ilang ginikanan bisan sa gagmayng butang, lagmit mao poy ilang himoon.  (Basaha ang Lucas 16:10.) Pero kon makita sa mga anak nga matinud-anon ang ilang ginikanan, makatabang ni nga mahimo silang kasaligang ginikanan dihang naa na silay mga anak.​—Proverbio 22:6; Efeso 6:4.

10. Unsaon nato pagpakita nga matinud-anon ta dihang makig-estorya sa mga igsoon?

¹⁰ Kinahanglan sab nga matinud-anon ta sa atong mga igsoon sa pagtuo. Ang normal nga estoryahanay sayon rang mahimong tabi o kaha pagbutangbutang pa gani. Kon duna tay itabi ug wala ta mahibalo kon tinuod ba ni, basin nagpakaylap na tag bakak nga estorya. Mas maayong ‘magbantay ta sa atong baba.’ (Proverbio 10:19) Ang pagkamatinud-anon wala magpasabot nga isulti nato ang tanan natong nahunahunaan, nahibaloan, o nadungog. Bisag tinuod ang butang nga atong isulti, lagmit dili ta angayng manghilabot ana, o basin dili ni kinahanglang isulti o dili maayong isulti. (1 Tesalonica 4:11) Ang uban sakit manulti kay kuno nagsulti lang sila sa tinuod. Pero ingong katawhan ni Jehova, gusto nato nga kanunayng maayo ang atong sinultihan.​—Basaha ang Colosas 4:6.

11, 12. (a) Nganong mograbe ang kahimtang sa nakasala kon dili niya isulti ang tinuod? (b) Unsang mga pangutana ang puwede natong pamalandongon? (c) Unsaon nato pagpakita nga matinud-anon ta sa organisasyon ni Jehova?

¹¹ Si Jehova naghatag sa mga ansiyano sa responsabilidad nga tabangan ang kongregasyon. Mas sayon para sa mga ansiyano nga tabangan ta kon matinud-anon ta nila. Ngano? Kon nagsakit ka ug moadto sa doktor, dili ba nimo isulti ang tanan nimong gibati? Kon dili ka mosulti, unsaon ka niya pagtabang? Sa susama,  kon makahimo tag seryosong sayop, dili nato ni itago. Moduol ta sa mga ansiyano ug isulti kanila ang tinuod. (Salmo 12:2; Buhat 5:1-11) Karon hunahunaa ning lahi nga kahimtang: Unsa man kon nahibaloan nimo nga nakahimog seryosong sayop ang imong higala? (Levitico 5:1) Moingon ba ka: “Kon tinuod kong higala, dili nako ni itug-an”? O hunahunaon ba nimo nga ang mga ansiyano maoy makatabang niya aron mapasig-uli ug mapalig-on ang iyang relasyon kang Jehova?​—Hebreohanon 13:17; Santiago 5:14, 15.

¹² Kinahanglan sab nga matinud-anon ta sa organisasyon ni Jehova dihang mohatag sa atong report, sama nianang sa ministeryo. Ug matinud-anon ta dihang moaplay ingong payunir o sa bisan unsang matang sa pag-alagad.​—Basaha ang Proverbio 6:16-19.

13. Kon bahin sa negosyo, unsaon nato pagpakita nga matinud-anon ta sa atong igsoon?

¹³ Ang atong pagsimba dili angayng sagolan ug negosyo. Pananglitan, dili ta magnegosyo diha sa Kingdom Hall o sa ministeryo ug dili ta mamentaha sa mga igsoon. Kon mga Saksi ang imong empleyado, suweldohi sila sa eksaktong panahon ug sa gisaad nimong kantidad ug ihatag ang mga benepisyo nga gipangayo sa balaod. Mahimong maglakip kini sa medical insurance o paghatag ug leave nga may suweldo. (1 Timoteo 5:18; Santiago 5:1-4) Kon Saksi ang imong amo, ayaw pagdahom ug espesyal nga pagtagad. (Efeso 6:5-8) Paneguroa nga motrabaho ka sa gikasabotang gitas-on sa panahon ug pagkugi sa imong trabaho.​—2 Tesalonica 3:10.

14. Unsay angayng himoon sa mga Kristohanon sa dili pa makigsosyo?

¹⁴ Unsa man kon makigsosyo ta sa usa ka igsoon?  Mahimong maglakip kini sa pagpamuhonan o pagpangutang. Niini nga mga kahimtang, dunay makatabang nga prinsipyo sa Bibliya: Isulat ang tanang gikasabotan! Dihang mipalit ug yuta si propetang Jeremias, naghimo siyag duha ka kopya sa kasabotan, ang usa gipapirmahan sa duha ka saksi, ug ang duha ka dokumento gipatipigan aron magamit sa umaabot. (Jeremias 32:9-12; tan-awa usab ang Genesis 23:16-20.) Para sa uban, morag wala silay pagsalig sa ilang igsoon kon maghimo silag kasabotan. Pero ang tinuod, makatabang ni nga malikayan ang daghang dili pagsinabtanay, kahiubos, ug pag-awayay. Bisan diha sa negosyo, hinumdomi nga ang kalinaw sa kongregasyon mas importante kay sa bisan unsang transaksiyon sa negosyo.​—1 Corinto 6:1-8; tan-awa ang Endnote 30.

15. Unsay gibati ni Jehova sa pagpanikas diha sa negosyo?

¹⁵ Kinahanglang matinud-anon ta sa tanan, apil sa dili mga Saksi ni Jehova. Importante kang Jehova nga matinud-anon ta. “Ang limbongan nga timbangan dulumtanan kang Jehova, apan ang eksakto nga bato sa timbangan makapahimuot niya.” (Proverbio 11:1; 20:10, 23) Sa panahon sa Bibliya, ang mga timbangan sagad gamiton sa negosyo. Pero ang ubang negosyante manikas sa mga pumapalit. Kulang ang ilang ihatag o sobra ang ilang singlon. Karon usab, komon ang pagpanikas diha sa negosyo. Kon gidumtan ni Jehova sa una ang pagpanikas, kini gidumtan sab niya karon.

16, 17. Unsang mga buhat sa pagkadili-matinud-anon ang angay natong likayan?

¹⁶ Dunay daghang situwasyon nga kita puwedeng  matental nga dili magmatinud-anon, sama sa pag-aplay ug trabaho, pagpil-ap ug mga form sa gobyerno, o dihang mag-eksam. Para sa daghan, dili sayop ang pagpamakak, paghinobra, o paghatag ug makailad nga mga tubag. Dili ta angayng matingala niini. Ang Bibliya nagtagna nga sa kataposang mga adlaw niining sistemaha, ang mga tawo unya “mahigugmaon sa kaugalingon, mahigugmaon sa kuwarta, . . . walay gugma sa pagkamaayo.”​—2 Timoteo 3:1-5.

¹⁷ Usahay, morag miasenso ang mga dili matinud-anon. (Salmo 73:1-8) Sa laing bahin, ang usa ka Kristohanon mahimong mawad-ag trabaho, mabiktima sa pagpanikas, o dili ayohog tratar diha sa trabahoan tungod sa iyang pagkamatinud-anon. Pero moresulta nig mga panalangin. Sa unsang paagi?

18. Nganong importante kaayo ang maayong reputasyon?

¹⁸ Talagsa na lang ta makakita karon ug tawong matinud-anon ug kasaligan. Pero kitang tanan dunay kahigayonan nga makabaton ug ingon niana nga reputasyon. (Miqueas 7:2) Tinuod, ang uban magyagayaga nimo kon matinud-anon ka ug tawgon pa gani ka nilang buangbuang. Pero maapresyar sa uban ang imong pagkamatinud-anon ug saligan ka nila tungod niini. Nailhan ang mga Saksi ni Jehova sa tibuok kalibotan sa ilang pagkamatinud-anon. Ang uban mas ganahan nga mga Saksi ang ilang empleyado kay nailhan silang matinud-anon. Ug dihang ang ubang empleyado tangtangon sa trabaho kay dili matinud-anon, ang mga Saksi sagad dili tangtangon.

19. Sa unsang paagi ang pagkamatinud-anon makaapektar sa imong relasyon kang Jehova?

 ¹⁹ Ang pagkamatinud-anon sa tanang butang mohatag nimog maayong konsensiya ug kalinaw sa hunahuna. Mahimo tang sama ni Pablo, kinsa misulat: “Segurado mi nga hinlo ang among konsensiya.” (Hebreohanon 13:18) Labaw sa tanan, ang imong mahigugmaong Amahan, si Jehova, makamatikod ug moapresyar sa imong paningkamot nga magmatinud-anon sa tanang butang.​—Basaha ang Salmo 15:1, 2; Proverbio 22:1.