Tanganing maaraman kun nuarin an katapusan kan kinaban, kaipuhan ta ngunang masabutan kun paano ginagamit kan Bibliya an terminong “kinaban.” An Griegong tataramon na koʹsmos, na sa parati itinatradusir na “kinaban,” sa kadaklan na pagkakataon nanunungod sa kinaban nin katawuhan, lalo na sa mga tawong suway sa Diyos asin kontra sa saiyang kabutan. (Juan 15:18, 19; 2 Pedro 2:5) Kun minsan, an koʹsmos nanunungod sa sistema kan sosyedad nin tawo.—1 Corinto 7:31; 1 Juan 2:15, 16. a

Ano an “katapusan kan kinaban”?

 An fraseng “katapusan kan kinaban,” na mahihiling sa dakul na traduksiyon nin Bibliya, puwede man na itradusir na “pagtatapos kan sistema nin mga bagay,” o ‘katapusan kan panahon.’ (Mateo 24:3; An Marahay na Bareta Biblia) Nanunungod iyan, bako sa kalaglagan kan daga o kan bilog na katawuhan, kundi sa katapusan kan sistema kan sosyedad nin tawo.—1 Juan 2:17.

 Itinutukdo kan Bibliya na “lalaglagon an mga maraot” tanganing magkaigwa nin nakakaugmang buhay an marahay na mga tawo sa daga. (Salmo 37:9-11, NWT) An paglaglag na ini mangyayari sa “grabeng kasakitan,” na magtatapos sa giyera nin Armagedon.—Mateo 24:21, 22; Kapahayagan 16:14, 16.

Nuarin an katapusan kan kinaban?

 Sinabi ni Jesus: “Mapadapit sa aldaw asin oras na iyan, daing siisay man na nakakaaram, maski an mga anghel sa kalangitan o maski an Aki, kundi an Ama sana.” (Mateo 24:36, 42) Sinabi niya pa na an pag-abot kan katapusan magigin dai inaasahan, “sa oras na dai nindo pighuhuna.”—Mateo 24:44.

 Dawa dai ta aram an eksaktong aldaw asin oras, nagtao si Jesus nin “tanda,” o mga pangyayari, na paagi kaiyan maaaraman ta an peryodo nin panahon na masagkod sa katapusan kan kinaban. (Mateo 24:3, 7-14) An peryodong iyan nin panahon inaapod kan Bibliya na “panahon kan katapusan,” “mga panahon kan katapusan,” asin “huring mga aldaw.”—Daniel 12:4, NWT; God’s Word Bible; 2 Timoteo 3:1-5.

Igwa daw nin ano man na matatada pagkatapos kan katapusan kan kinaban?

 Igwa. Yaon pa man giraray an daga, dahil sinasabi kan Bibliya na ‘dai iyan sagkod lamang mahihiro’ sa kinamumugtakan kaiyan. (Salmo 104:5) Asin mapapano nin tawo an daga, arog kan ipinapanuga kan Bibliya: ‘Masasadirihan kan mga matanos an daga, asin mag-iirok sinda duman sagkod lamang.’ (Salmo 37:29, BPV) Papangyarihon nin Diyos an orihinal na katuyuhan niya para sa daga:

•   Paraiso.—Isaias 35:1; Lucas 23:43.

•   Katiwasayan asin pagigin abunda.—Miqueas 4:4.

•   Kapaki-pakinabang asin nakakaugmang trabaho para sa gabos.—Isaias 65:21-23.

•   Mayo na nin hilang asin paggurang.—Job 33:25; Isaias 33:24.