• TAON NIN PAGKAMUNDAG: 1963

• GINIKANAN NA NASYON: BRITAIN

• IGWA KAIDTO NIN MAGAYUNON NA KARERA

AN BUHAY KO KAIDTO:

Namundag ako sa Croydon, South London, asin ako an ikaanom sa pamilyang may siyam na aki. An mga magurang ko tubong St. Vincent na sarong isla sa Caribbean. Nag-aatender si Nanay sa sarong simbahan nin Metodista. Mayo akong interes na makanuod manungod sa Diyos, pero gustong-gusto ko talagang makanuod manungod sa ibang mga bagay. Pag bakasyon sa eskuwelahan, parati akong nasa may danaw sa lugar mi, asin diyan nagbabasa ako nin dakulon na libro na pigsubli ko sa librarya.

Mga pirang taon pagkatapos kong mag-eskuwela, narealisar ko na gusto kong tumabang sa mga tawong daing kalaban-laban. Nagpuon akong magtabang sa mga daing maistaran saka sa mga may diperensiya sa pisikal asin sa mga may problema sa pakanuod. Dangan nagkua ako nin kurso sa health sciences sa sarong unibersidad. Pakagradwar, makangangalas ta nagkaigwa ako nin sunod-sunod na magagayon na posisyon sa trabaho, asin lalong nagigin maluho an pamumuhay ko. Bilang freelance management consultant asin social researcher, an kaipuhan ko lang sa trabaho iyo an laptop ko saka Internet. Maduman ako sa ibang nasyon nin pirang semana, madagos sa paborito kong hotel, mag-e-enjoy sa magagayon na tanawon, tapos ma-spa saka ma-gym para magdanay na nasa kondisyon an hawak. Para sako, talagang maugma ako sa buhay. Pero dai lamang nawara an pagmalasakit ko sa mga inaapi.

KUN PAANO BINAGO KAN BIBLIYA AN BUHAY KO:

Haloy ko nang pinag-iisipan, ‘Taano ta nabubuhay kita, saka ano an katuyuhan nin buhay?’ Pero dai ko pa lamang pinurbaran na hanapon an simbag sa Bibliya. Sarong aldaw kan 1999, an mas nguhod kong tugang na si Margaret, na nagin Saksi ni Jehova, binisita ako kaiba an Saksi niyang amiga, na nagpahiling sako nin personal na interes. Nag-uyon ako na makipag-adal nin Bibliya sa amiga kan tugang ko, pero haluyon an pag-uswag ko ta an kadaklan kan panahon ko nauubos kan karera saka kan pamumuhay ko.

Kan tig-init kan 2002, nagbalyo ako sa timog-sulnupan na England. Nagkua ako diyan nin postgraduate university degree course sa social research, sa katuyuhan na makakua nin doctorate. Nagpuon akong mas regular na mag-atender sa Kingdom Hall duman kaiba an aki kong lalaki. Totoo na nag-e-enjoy ako sa mas halangkaw na edukasyon, pero mas marahay an pag-adal ko sa Bibliya ta nakatabang iyan sako na mas masabutan an mga problema sa buhay asin maaraman an solusyon diyan. Narealisar ko na totoo an Mateo 6:24, na nagsasabing dai ka makakapaglingkod sa duwang kagurangnan. Saro lang an dapat na pilion—an Diyos o an kayamanan. Aram ko na kaipuhan kong magdesisyon kun ano an magigin priyoridad ko sa buhay.

Kan nakaaging taon, parati akong nag-iiba sa grupo nin mga Saksi na nag-aadal nin Bibliya sa sarong harong gamit an librong Is There a Creator Who Cares About You? * Nakumbinsir ako na an satong Kaglalang sana, si Jehova, an igwa kan solusyon sa mga problema kan katawuhan. Sa unibersidad tinutukduan ako na para masabutan an kahulugan nin buhay, dai kaipuhan na maniwala sa sarong Kaglalang. Angguton ako. Pagkatapos nin duwang bulan na pag-eskuwela sa unibersidad, nagpundo na ako asin nagdesisyon na tawan nin mas dakul na panahon an espirituwal na mga bagay.

An teksto sa Bibliya na nakapahiro sako na baguhon an pamumuhay ko iyo an Talinhaga 3:5, 6: “Magtiwala ka ki Jehova sa bilog mong puso, asin dai ka manarig sa sadiri mong pakasabot. Sa gabos mong lakad isipon mo siya, asin itatanos niya an saimong mga dalan.” An mamidbid an satong mamumuton na Diyos mas nakakakontento kisa sa ano man na materyal na kayamanan saka estado na maitatao nin doctorate. Mantang mas nakakanuod ako manungod sa katuyuhan ni Jehova para sa daga asin sa papel ni Jesus sa pagtao kan saiyang buhay alang-alang sa sato, mas nagugustuhan ko man na idusay an buhay ko sa satong Kaglalang. Nabawtismuhan ako kan Abril 2003. Pagkatapos kaiyan, luway-luway kong pinasimple an buhay ko.

KUN PAANO AKO NAKINABANG:

An magin amigo ni Jehova daing kaagid an halaga. Kan mamidbid ko siya, nagkaigwa ako nin tunay na panglaog na katuninungan asin kaugmahan. Nakamati man ako nin dakulang kaugmahan sa pakikiiba sa iba pang tunay na mga parasamba nin Diyos.

An pagkapaha ko sa kaaraman padagos na napapaniguan paagi kan mga nanunudan ko sa Bibliya asin sa mga Kristiyanong pagtiripon. Gustong-gusto ko man na ihiras sa iba an sakong pagtubod. Ini na an nagin karera ko, na diyan tunay kong matatabangan an mga tawo, na magkaigwa nin mas marahay na buhay ngunyan asin nin pambihirang paglaom na mabuhay sa bagong kinaban. Puon Hunyo 2008, nasa pambilog na panahon na ministeryo ako, asin mas maugma saka mas kontento talaga ako ngunyan. Nahanap ko an tunay na katuyuhan nin buhay, asin dahil diyan, talagang nagpapasalamat ako ki Jehova.

• TAON NIN PAGKAMUNDAG: 1973

• GINIKANAN NA NASYON: AUSTRIA

• DATING PARASUGAL

AN BUHAY KO KAIDTO:

Nagdakula ako sa sadit na banwa nin Braunau, Austria. Mayaman an lugar na iyan, asin bihira an krimen. Katoliko an pamilya mi saka nagdakula ako sa relihiyon na iyan.

May nangyari kan aki pa ako na nagkaigwa nin dakulang epekto sako. Kan 1984, kan mga 11 anyos ako, nagigirumduman ko na nagkakawat kami kaidto nin soccer kan saro sa mga dayupot kong amigo. Kan hapon man sanang idto, nagadan siya sa aksidente sa awto. Naapektaran akong marhay kan pagkagadan kan amigo ko. Sa laog nin mga taon pagkatapos kan aksidente, iniisip-isip ko kun ano an nangyayari sato pag kita nagadan.

Pagkatapos kong mag-eskuwela, nagtrabaho ako bilang elektrisyan. Dawa nagin parasugal ako asin nagpupusta nin darakulang kuwarta, dai ako nagkaproblema sa pinansiyal. Dakul na panahon an itinao ko sa mga sport, saka nagustuhan kong marhay an musikang heavy metal asin punk rock. Pirmi akong nasa disko saka mga parti. Nakapokus ako sa pagpasiram-siram saka imoral an pamumuhay ko, pero bako akong maugma.

KUN PAANO BINAGO KAN BIBLIYA AN BUHAY KO:

Kan 1995, may nagtuktok sa pinto na sarong may edad na Saksi asin inalukan ako nin sarong libro na nagtutukar kan simbag kan Bibliya sa hapot na, Ano an nangyayari sato pag kita nagadan? Iniisip-isip ko pa man giraray an pagkagadan kan sakong hoben na amigo, kaya kinua ko an libro. Binasa ko bako lang an kapitulo manungod sa kagadanan kundi pati an bilog na libro!

Nasimbag kan binasa ko an mga hapot ko manungod sa kagadanan. Pero bako lang iyan an nanudan ko. Dahil nagdakula akong Katoliko, nakapokus an pagtubod ko panginot na ki Jesus. Pero, dahil sa pag-adal kong marhay kan Bibliya, nagkaigwa ako nin dayupot na pakikiamigo sa Ama ni Jesus, an Diyos na Jehova. Nagngalas ako kan maaraman kong si Jehova bakong masekreto saka indiperente kundi ipinapamidbid niya talaga an sadiri niya sa mga naghahanap saiya. (Mateo 7:7-11) Nanudan ko na may pagmati si Jehova. Naaraman ko man na pirmi niyang ginigibo an ano man na sabihon niya. Iyan an dahilan kaya nagkainteres talaga ako sa mga propesiya sa Bibliya asin na pag-adalan kun paano iyan nautob. An mga nadiskubre ko nakapakusog sa pagtubod ko sa Diyos.

Dai nahaloy, narealisar ko na an mga Saksi ni Jehova sana an talagang interesado na tabangan an mga tawo na masabutan an Bibliya. Isinusurat ko an mga teksto na sinasambit sa mga publikasyon kan mga Saksi tapos hinahanap ko iyan sa sakong Katolikong Bibliya. Mantang mas ginigibo ko iyan, lalo ko man na narerealisar na nanumpungan ko na an katotoohan.

Sa pag-adal ko nin Bibliya, nanudan ko na inaasahan ni Jehova na mamumuhay ako kauyon kan saiyang mga pamantayan. Kan mabasa ko an Efeso 4:22-24, narealisar ko na kaipuhan kong halion an “luma [kong] personalidad,” na minolde kan “dati [kong] dalan nin paggawi” asin na kaipuhan kong “isulot an bagong personalidad na linalang sigun sa kabutan nin Diyos.” Kaya ipinundo ko na an sakong imoral na pamumuhay. Napag-isip-isip ko man na kaipuhan ko nang ipundo an pagsugal, dahil ginigibo ako kaiyan na magin materyalistiko saka mahanab. (1 Corinto 6:9, 10) Aram ko na tanganing magibo ko an mga pagbabagong iyan, kaipuhan kong ipundo an pakikiiba sa mga dati kong amigo asin maghanap nin bagong mga amigo na kapareho ko nin mga pamantayan.

Bako idtong madali. Pero nagpuon akong mag-atender sa mga pagtiripon kaiba kan mga Saksi sa Kingdom Hall, saka nagkakaigwa na ako nin bagong mga amigo sa kongregasyon na inaatenderan ko. Ipinagpadagos ko man an personal na pag-adal nin Bibliya. Nakatabang sako an mga iyan na mabago an mga gusto kong musika saka an mga pasuhan ko sa buhay asin na pakarhayon an itsura ko. Kan 1995, nabawtismuhan ako bilang saro sa mga Saksi ni Jehova.

KUN PAANO AKO NAKINABANG:

Igwa na ako nin tamang pagmansay sa kuwarta saka mga pagsadiri. Kaidto arangguton ako, pero ngunyan mas mapasensiya na ako. Dai na man ako sobra-sobrang nahahadit sa puturo.

Gustong-gusto ko an pagigin parte kan internasyonal na grupo nin mga tawong naglilingkod ki Jehova. May mga problema man sinda pero maimbod pa man giraray sindang naglilingkod sa Diyos. Nauugma akong marhay ta ngunyan naitatao ko na an gabos kong panahon saka kusog, bako sa paghihinguwang mapaniguan an sadiri kong mga pagmawot, kundi sa pagsamba ki Jehova asin sa paggibo nin marahay sa iba.

• TAON NIN PAGKAMUNDAG: 1963

• GINIKANAN NA NASYON: ENGLAND

• NAWARAN NA KAIDTO NIN GANA SA BUHAY

AN BUHAY KO KAIDTO:

Namundag ako sa England, pero kan mga siyete anyos ako, naglipat sa Australia an pamilya mi. Nag-istar kami sa Gold Coast, na pasyaran nin mga turista sa Queensland, Australia. Bako kaming mayaman, pero pirmi man kaming igwa kan mga pangangaipo mi.

Dawa marahay an kamugtakan mi sa buhay kan nagdadakula ako, bako man talaga akong maugma. Nawaran talaga akong gana sa buhay. Parainom na marhay si Tatay. Dai ko talaga kaidto padaba si Tatay, panginot na dahil sa pagigin parainom niya saka sa kun paano niya tinatrato si Nanay. Kan huri, kan maaraman ko an mga naeksperyensiyahan niya kan suldados siya sa Malaya, saka ko lang nasabutan kun taano ta arog siya ka’to.

Nagpuon akong magpangana sa pag-inom kan hayskul na ako. Sa edad na 16, nagpundo na ako sa pag-eskuwela asin nag-navy. Nagpuon akong magdroga asin nagin adikto sa tabako. Lalo man akong nagdedepende sa alkohol. Kun kaidto nagpapangana ako sa pag-inom sa puro lang kan semana, pero uminabot iyan sa punto na aroaldaw na.

Kan ako pa-20 sagkod labi pa sanang 20 anyos, pinunan kong kuwestiyunon kun baga igwang Diyos. ‘Kun talagang igwang Diyos,’ an sabuot ko, ‘taano ta tinutugutan niyang magsakit saka magadan an mga tawo?’ Naggibo pa ngani ako nin mga tula na binabasol an Diyos sa gabos na karatan sa kinaban.

Naghali ako sa navy kan 23 anyos ako. Tapos, naglaog ako sa manlain-lain na trabaho asin nagpasiring pa ngani sa ibang nasyon sa laog nin sarong taon, pero bako pa man giraray akong maugma. Habo kong magkaigwa nin mga pasuhan o may maabot na ano man. Mayo akong gana sa maski ano. An pangarap na magkaigwa nin harong, permanenteng trabaho, saka an ma-promote, para sako, gabos ’yan daing saysay. An “nakakapaugma” lang sako iyo an pag-inom saka pagdangog nin musika.

Nagigirumduman ko su partikular na pangyayari kaidto na namatian ko talagang gusto kong magkaigwa nin katuyuhan an buhay ko. Nasa Poland ako kaidto asin nagpapasyar sa sikat na kampo de-konsentrasyon sa Auschwitz. May mga nabasa na ako manungod sa grabeng mga karatan na nangyari duman. Pero kan yaon na mismo ako duman asin mahiling an mahiwason na kampo, nagin emosyonal akong marhay. Dai ko talaga maisip kun paano nagibo nin mga tawo na magin arog kaiyan karingis sa kapwa ninda. Nagigirumduman ko kaidto na naglalakaw-lakaw ako sa kampo, nagluluha, mantang naghahapot, ‘Ta’no?’

KUN PAANO BINAGO KAN BIBLIYA AN BUHAY KO:

Kan 1993, pagkabalik ko haling ibang nasyon, pinunan kong basahon an Bibliya para maghanap nin simbag. Dai nahaloy, duwang Saksi ni Jehova an nagtuktok sa pinto tapos inimbitaran akong umatender sa sarong kumbensiyon na isinasagibo sa kaharaning istadyum. Nagdesisyon akong mag-atender.

Nakaduman ako sa istadyum na idto pirang bulan na an nakaagi para maghiling nin sport, pero ibang-iba talaga an nahiling ko sa kumbensiyon na ini. Magalang an mga Saksi saka marahay an pagbado, saka pormal an mga aki. Tapos pakapangudto, nagngalas talaga ako sa nahiling ko. Ginatos na Saksi an nagpangudto sa playing field, pero pagbalik ninda sa saindang tukawan, mayo lamang akong nahiling ni sarong basura na nawalat! An mas pa diyan, mahihiling mo na kontento sinda saka matuninong—sarong bagay na minamawot ko. Mayo akong magirumduman sa arin man sa mga pahayag kan aldaw na idto, pero dai ko talaga malilingawan an paggawi kan mga Saksi.

Kan banggi, naisip ko an pinsan ko na nagbabasa nin Bibliya asin nag-adal nin manlain-lain na relihiyon. Mga taon na an nakaagi, sinabi niya sako na sinabi ni Jesus na mamimidbid an tunay na relihiyon paagi sa bunga kaiyan. (Mateo 7:15-20) Naisip ko na dapat aramon ko kun ta’no ta ibang-iba an mga Saksi. Sa inot na pagkakataon sa buhay ko, nagin medyo positibo ako saka nakamati nin paglaom.

Kan sunod na semana, nagbalik an duwang Saksi na nag-imbitar sako na umatender sa kumbensiyon. Inalukan ninda ako nin pag-adal sa Bibliya, na inako ko man. Nagpuon man akong mag-atender sa Kristiyanong mga pagtiripon kaiba ninda.

Mantang nag-aadal ako nin Bibliya, biyong nagbago an pagmansay ko sa Diyos. Naaraman ko na bako siya an kawsa nin karatan asin pagsakit asin na siya mismo nakukulgan pag naggigibo nin maraot an mga tawo. (Genesis 6:6; Salmo 78:40, 41) Nagin determinado talaga ako na nungkang kulgan si Jehova. Gusto kong paugmahon an puso niya. (Talinhaga 27:11) Nagpundo na ako sa pagpangana sa pag-inom asin sa paggamit nin tabako, saka nagpundo na man ako sa pagigin imoral. Kan Marso 1994, nabawtismuhan ako bilang saro sa mga Saksi ni Jehova.

KUN PAANO AKO NAKINABANG:

Tunay na akong maugma asin kontento. Dai na ako nagdedepende sa arak pag may problema ako. Imbes, nanudan ko nang ipasa ki Jehova an mga pasan ko.—Salmo 55:22.

Sa nakaaging sampulong taon, magkaibanan kami kan magayon kong agom na si Karen, asin may marahayon akong stepdaughter na Nella an pangaran. Maugma kaming tulo sa pagtao nin dakul na panahon sa Kristiyanong ministeryo para tabangan an mga tawo na maaraman an katotoohan manungod sa Diyos. May katuyuhan na man giraray an buhay ko.