Sinisimbag sa artikulong ini an mga tibaad ihinahapot mo asin ipinapaheling man kun saen mo iyan mababasa sa saimong Biblia. Maoogma an mga Saksi ni Jehova na ipakipag-olay sa saimo an mga simbag na ini.

1. Espesipiko daw an mga hula sa Biblia?

Solamente an Dios na Makakamhan sa Gabos an detalyadong nakakaheling kan mga mangyayari sa maabot. (Amos 3:7) Halimbawa, ihinula nia kaidto pang enot na mga panahon an pag-abot kan saro na aapodon na Mesiyas, o Cristo. An Mesiyas magikan sa maimbod na tawong si Abraham. Sia magigin tagapamahala asin gigibohon niang posible na makamtan liwat kan masinunod na mga tawo an bendisyon na perpektong buhay na mayo nin helang. (Genesis 22:18; Isaias 53:4, 5) An Ipinanuga na ini magikan sa Betlehem.—Basahon an Miqueas 5:2.

Si Jesus iyo an Mesiyas. Labing pitong siglo bago pa mangyari, ihinula kan Biblia na an Mesiyas ipapangaki nin sarong birhen asin hahamakon. Itatao nia an saiyang buhay para sa kasalan nin dakol na tawo, asin ilolobong sia sa kaibanan kan mga mayaman. (Isaias 7:14; 53:3, 9, 12) Sinabi man kan Biblia, labing limang siglo bago pa mangyari, na malaog sia sa Jerusalem sakay nin asno asin papasaloiban sa kantidad na 30 pidasong pirak. Naotob an gabos na detalye.—Basahon an Zacarias 9:9; 11:12.

2. Sinasabi daw nin Dios an petsa kan kaotoban kan mga hula nia?

Labing limang siglo bago pa mangyari, ihinula kan Biblia an eksaktong taon kan pag-abot kan Mesiyas. An panahon sagkod na dumatong sia kinukuenta paagi sa simbolikong mga semana na inaapod na “mga semana nin mga taon,” na an kada aldaw katumbas nin sarong taon. Kaya, an kada “semana” pitong taon an lawig. Magkakaigwa nin 7 patin 62 na semana, na may total na 69 semana nin mga taon. An katumbas kaiyan 483 na taon. Kasuarin nagpoon an peryodong iyan nin mga taon? Segun sa Biblia, nagpoon iyan kan mag-abot sa Jerusalem an lingkod nin Dios na si Nehemias asin ponan nang itogdok liwat an siudad. Pinapatunayan kan kasaysayan nin Persia na an petsa kaiyan 455 B.C.E. (Nehemias 2:1-5) Binautismohan si Jesus bilang Mesiyas pakalihis nin 483 na taon, kan taon 29 C.E., na eksakto sa panahon.—Basahon an Daniel 9:25.

  3. Naootob na daw ngonyan an mga hula sa Biblia?

May ihinula si Jesus na importanteng mga pangyayari sa satong panahon. Sinambit sa saiyang hula an maogmang bareta kan Kahadean nin Dios, na magtatao nin pambilog na kinaban na kaginhawahan sa mga namomoot sa Dios. Tataposon kan Kahadean an bilog na maraot na sistema nin mga bagay na kinabubuhayan niato.—Basahon an Mateo 24:14, 21, 22.

Detalyadong sinasabi kan mga hula sa Biblia an mga pangyayari sa panahon kan pagtatapos kan presenteng sistema nin mga bagay. Ihinahayag kan Biblia na an daga raraoton nin mga tawo, na kabaliktaran kan tibaad inaasahan sa panahon nin progreso. Madakol an kasakitan huli sa mga giera, kakulangan nin kakanon, linog, asin helang. (Lucas 21:11; Kapahayagan 11:18) Maruro an pamantayan sa moral. Sa depisil na mga panahon na ini, ihuhulit kan mga parasunod ni Jesus an maogmang bareta kan Kahadean nin Dios sa gabos na nasyon.—Basahon an Mateo 24:3, 7, 8; 2 Timoteo 3:1-5.

4. Ano an magigin puturo kan katawohan?

An Dios na Makakamhan sa Gabos may itinagamang marahay na mga bagay para sa maimbod na katawohan. Hale sa langit, an bilog na daga pamamahalaan kan Mesiyas na si Jesu-Cristo, kaiba kan 144,000 na pinili hale sa daga. Sinda an minakompuesto sa gobyernong Kahadean, na mamamahala sa laog nin sangribong taon. An mga gadan bubuhayon liwat asin magkakaoportunidad na hokoman bilang angay na mag-ako nin buhay na daing katapusan. Apuera kaini, papaomayan kan Kahadean an gabos na nabubuhay sa panahon na iyan. Mawawara na an helang asin kagadanan.—Basahon an Kapahayagan 5:10; 20:6, 12; 21:4, 5.

Para sa dugang pang impormasyon, helingon an pahina 23-25 asin 197-201 kan librong Ano Man Nanggad an Itinotokdo kan Biblia?, ipinapaheling digdi.