1, 2. (a) Ano an nagkapirang responsabilidad nin sarong Israelitang pastor? (b) Paano an mga magurang nakakaagid sa mga pastor?

MASAKITON an trabaho nin mga pastor sa suanoy na Israel. Apuwera sa init asin lipot na kaipuhan nindang tiuson, kaipuhan man nindang protektaran an saindang aripumpon sa naninibang mga hayop asin sa mga parahabon. Regular na iniinspeksiyon kan mga pastor an mga karnero asin binubulong an mga may hilang o may lugad. Tinatawan ninda nin espesyal na atensiyon an mga kordero huling maluluya pa an mga ini kumpara sa darakula nang karnero.—Gen. 33:13.

² An Kristiyanong mga magurang may pagkakaagid sa mga pastor huling nagpapahiling sinda nin mahalagang marhay na mga kuwalidad siring kan literal na mga pastor. May responsabilidad sindang padakulaon an mga aki ninda ‘sa pagsagwi asin hatol ni Jehova.’ (Efe. 6:4) Pasil daw iyan? Bako! An mga aki pirming napapaatubang sa kadakul-dakul na propaganda ni Satanas asin may mga kaluyahan sinda huli sa pagkabakong perpekto. (2 Tim. 2:22; 1 Juan 2:16) Kun may mga aki ka, paano mo sinda matatabangan? Pag-ulayan ta an tulong bagay na magigibo mo tanganing pasturan an saimong mga aki—midbidon sinda, pakakanon sinda, asin giyahan sinda.

3. Paano maaaraman kan mga magurang an kamugtakan kan saindang mga aki?

³ An sarong marahay na pastor maingat na iniinspeksiyon an lambang karnero tanganing masiyerto na marahay an salud kan mga ini. Sa piguratibong paagi, arog man kaiyan an puwede mong gibuhon sa saimong mga aki. An Bibliya nagsasabi: ‘Aramon mong marhay an kamugtakan kan saimong aripumpon.’ (Tal. 27:23, NW) Tanganing magibo ini, kaipuhan mong tawan nin atensiyon an gawi-gawi kan saimong mga aki asin aramon an saindang mga iniisip saka namamatian. Paano mo magigibo iyan? An saro sa pinakaepektibong paagi iyo an parating pakikipag-ulay sa sainda.

4, 5. (a) Anong praktikal na mga suhestiyon an makakatabang sa mga aki na masabi sa saindang mga magurang an mga iniisip asin namamatian ninda? (Hilingon an ritrato sa kapinunan kan artikulo.) (b) Ano an ginibo mo tanganing dai mag-alangan an saimong mga aki na makipag-ulay sa saimo?

⁴ Narisa nin nagkapirang magurang na mas masakit makaulay an mga aki kun sinda mga tin-edyer na—tibaad habo na nindang makipag-ulay asin mag-alangan na sindang magsabi kan iniisip saka namamatian ninda. Kun arog kaiyan an saimong mga aki, ano an puwede mong gibuhon? Imbes na piriton an saimong mga aki na makipag-ulay sa saimo nin seryoso asin halawig, purbaran na kaulayon sinda sa relaks na mga pagkakataon. (Deut. 6:6, 7) Tibaad kaipuhan mong dugangan an saimong paghihinguwa na makaibanan sinda. Puwede kamong maglakaw-lakaw o mamasyar, magkawat, o magkaibanan na gibuhon an mga trabaho sa harong. Sa siring na bakong pormal na mga kamugtakan, tibaad magigin mas relaks an mga hoben asin mas andam na magsabi kan mga iniisip asin namamatian ninda.

⁵ Paano kun garo baga nag-aalangan pa man giraray an saimong aki na makipag-ulay sa saimo? Purbaran an ibang paagi. Halimbawa, imbes na haputon an saimong aki kun kumusta an aldaw niya, puwede mo ngunang iistorya an mga ginibo mo sa maghapon. Tibaad mag-istorya man siya kan mga nangyari sa saiya sa maghapon. O kun gusto mong maaraman an iniisip kan saimong aki manungod sa sarong bagay, dai mo siya pagdiretsuhon. Imbes, puwede mong ihapot kun ano an masasabi kan saro sa mga katuod niya dapit sa bagay na iyan. Dangan, haputon mo siya kun ano an maisasadol niya sa katuod niya.

6. Paano mamamatian kan saimong mga aki na may oras ka para sa sainda asin na madali kang dulukon?

⁶ Siyempre, tanganing dai mag-alangan an saimong mga aki na makipag-ulay sa saimo, kaipuhan na mahiling ninda na puwede ka nindang kaulayon ano man na oras asin na madali kang dulukon. Kun an mga magurang masakit makaulay huling garo baga pirming sibot-sibot, posibleng sadirihon na sana kan mga hoben an problema ninda. Ano man an buot sabihon kan pagigin madaling dulukon? Urog pa an kalabot kisa sa pagsabi sanang, “Puwede mo akong dulukon ano man na oras.” Kaipuhan na mamatian kan mga aki mo na dai mo babaliwalaon an mga problema ninda ni magigin sobra man an reaksiyon mo sa sainda. Dakul na magurang an nagpahiling nin marahay na halimbawa sa bagay na ini. Sinabi kan 19 anyos na si Kayla: “Nasasabi ko gabos ki Papa. Dai siya nagsasaliot, saka dai niya ako hinuhusgaran; nagdadangog sana siya. Pagkatapos, pirming pinakamarahay na sadol an itinatao niya sako.”

7. (a) Paano magigin balanse an mga magurang kun pinag-uulayan an pakikipag-date? (b) Paano puwedeng dai tinutuyong mapaanggot nin mga magurang an saindang mga aki?

⁷ Dawa sensitibong mga tema an pag-uulayan—arog kan pakikipag-date—magin maingat ta tibaad puro mga patanid na sana an masabi mo imbes na itukdo sa saimong mga aki kun paano iyan aatubangon nin tama. Sa pag-ilustrar: Ipamugtak na naglaog ka sa sarong restawran asin nahiling mo na an nasa menu puro sana mga patanid manungod sa hilo o hudong sa kakanon. Posibleng marhay na maluwas ka asin mahanap nin ibang restawran. Tibaad arog man kaiyan an magin reaksiyon kan saimong mga aki kun pagdulok ninda sa saimo tanganing maghagad nin sadol, puro istriktong mga patanid sana an yaon sa saimong  “menu.” (Basahon an Colosas 3:21.) Imbes, magin balanse sa saimong pakikipag-ulay. Sinabi ni Emily na sarong hoben na sister: “Pag kinakaulay ako kan mga magurang ko manungod sa pakikipag-date, bakong gayong negatibo an sinasabi ninda sa bagay na iyan. Sinasabi ninda na maugmang mamidbid an sarong tawo asin makahanap nin magigin agom. Nakatabang ini sako na magin komportableng ipakipag-ulay iyan sa sainda. An totoo, kun magkakaigwa ako nin kailusyon dai ko iyan itatago sainda.”

8, 9. (a) Ano an mga pakinabang nin pagdangog na dai nagsasaliot? (b) Ano an magagayon na eksperyensiya mo sa pagdangog sa saimong mga aki?

⁸ Kauyon kan sinabi ni Kayla, maipapahiling mong madali kang dulukon kun mapasensiya mong dinadangog an saimong mga aki. (Basahon an Santiago 1:19.) Sinabi ni Katia na sarong nagsosolong ina: “Dati, bako nanggad akong mapasensiya sa aki kong babayi. Dai ko siya pinapatapos sa pagtaram niya. Kun minsan, garo pagalon na ako tanganing magdangog pa saiya o habo ko sana talagang maistorbo. Ngunyan na binago ko na an ugali ko, binago na man kan aki ko an ugali niya. Mas nakikikooperar na siya sako.”

⁹ Arog man kaiyan an naeksperyensiyahan ni Ronald na ama nin sarong tin-edyer na babayi. “Kan sabihon niyang may namumutan siyang kaeskuwela niyang lalaki, sa primero angguton ako,” an sabi ni Ronald. “Pero kan maisip-isip ko na si Jehova mapasensiya asin rasonable sa mga lingkod niya, naisip ko na mas marahay kun tatawan ko nguna siya nin pagkakataon na sabihon an namamatian niya bago ko siya itama. Marahay sanang iyan an ginibo ko! Sa inot na pagkakataon, nasabutan ko an namamatian kan aki ko. Kan matapos siyang magtaram, nagin mas pasil na sako na kaulayon siya sa mamumuton na paagi. Nangalas ako ta talagang inako niya an konseho ko. Sinabi niyang gusto niya talagang baguhon an saiyang paggawi.” Kun pirmi mong kinakaulay an saimong mga aki, mas maaaraman mo an saindang mga iniisip asin namamatian. Bilang resulta, mas matatabangan mo sinda sa paggibo ninda nin mga desisyon sa buhay. *

10, 11. Paano mo matatabangan an saimong mga aki na dai maparayo?

¹⁰ Aram nin sarong marahay na pastor na puwedeng maparayo sa aripumpon an arin man sa mga karnero niya. Tibaad magsabsab ini nin duot sa huruharani dangan dikit-dikit na mapaparayo sagkod na mapasuway na sa aripumpon. Sa kaparehong paagi, an sarong aki puwedeng dikit-dikit na maparayo asin mameligro  sa espirituwal huling natentaran siya nin maraot na kairiba o libangan. (Tal. 13:20) Paano ka makakatabang na dai iyan mangyari sa saiya?

¹¹ Sa pagtutukdo sa saimong mga aki, kaipuhan na humiro tulos kun may mahiling kang posibleng kaluyahan ninda. Magmaigot na pakusugon an Kristiyanong mga kuwalidad na yaon na sa sainda pero nangangaipo pang pauswagon. (2 Ped. 1:5-8) An regular na pampamilyang pagsamba marahayon na panahon tanganing magibo iyan. Manungod sa areglong ini, sinabi kan An Satong Ministeryo sa Kahadian na Oktubre 2008: ‘Dinadagka an mga payo nin pamilya na isaabaga an saindang paninimbagan sa atubangan ni Jehova tanganing masiyerto na nasusunod ninda an makahulugan asin regular na programa nin pampamilyang pag-adal sa Bibliya.’ Inaaprobetsaran mo daw an mamumuton na areglong ini tanganing pasturan an saimong mga aki? Makakapagtiwala ka na pinapahalagahan na marhay kan saimong mga aki an pag-inot mo kan saindang espirituwal na pangangaipo.—Mat. 5:3, NW; Fil. 1:10.

12. (a) Paano nakinabang an mga hoben sa regular na pampamilyang pagsamba? (Iiba an kahon na “ Pinapahalagahan Ninda Iyan.”) (b) Paano ka personal na nakinabang sa pampamilyang pagsamba?

¹² Pag-isipan an sinabi kan tin-edyer na si Carissa manungod sa kun paano nakinabang an saindang pamilya sa Pampamilyang Pagsamba. “Gustong-gusto ko pag gabos kami iribang nakatukaw asin nag-uurulay. Mantang ginigibo mi ini, nagigin mas dayupot kami sa lambang saro saka dakul kaming maugmang bagay na dai malilingawan. Pirming sinisigurado ni Papa na igwa kaming Pampamilyang Pagsamba. Nahihiling kong sineseryoso niya iyan kaya napapakusog akong seryosuhon man iyan. Huli kaiyan, mas iginagalang ko siya bilang sakong ama asin espirituwal na payo.” Sinabi kan hoben na sister na si Brittney: “Mas naparani ako sa mga magurang ko huli sa Pampamilyang Pagsamba. Ipinahiling kaini sako na interesado sindang madangog an mga problema ko asin na talagang nagmamakulog sinda sako. Nakakatabang ini na magin makusog asin sararo an samong pamilya.” Malinaw nanggad, an pagpapakakan sa espirituwal sa saimong mga aki—lalo na paagi sa pampamilyang pagsamba—iyo an panginot na paagi tanganing magin saro kang marahay na pastor. *

13. Paano mamomotibar an sarong aki na maglingkod ki Jehova?

¹³ An sarong mahusay na pastor naggagamit nin sugkod tanganing giyahan asin protektaran an saiyang aripumpon. An panginot niyang katuyuhan iyo na giyahan an saiyang mga karnero sa “marahay na pasabsaban.” (Ezeq. 34:13, 14) Bilang magurang, bako daw na arog man kaiyan an espirituwal na pasuhan mo? Gusto mong giyahan an saimong mga aki na maglingkod ki Jehova. Gusto mong mamatian ninda an arog kan isinurat kan salmista: ‘An paggibo kan saimong kabutan, Diyos ko, [an ikinakaugma ko] asin an saimong tugon uya sa laog nin sakuyang puso.’ (Sal. 40:8) An mga hoben na magkakaigwa nin siring na pagpapahalaga idudusay an saindang sadiri ki Jehova asin mapabawtismo. Siyempre, maninigo nindang gibuhon an siring na lakdang kun may igo na sindang kaaraman asin kun igwa sinda nin tunay na pagmawot na maglingkod ki Jehova.

14, 15. (a) Ano an maninigong magin pasuhan kan Kristiyanong mga magurang? (b) Taano ta tibaad magduwa-duwa an sarong hoben manungod sa tunay na pagsamba?

¹⁴ Pero paano kun garo dai nag-uuswag sa espirituwal an saimong mga aki asin tibaad kinukuwestiyon pa ngani an saindang pagtubod? Magmaigot na itadom sa sainda an pagkamuot sa Diyos na Jehova asin an pagpapahalaga sa gabos na ginibo niya para sa sato. (Kap. 4:11) Dangan, kun sinda andam na, sinda na mismo an madesisyon na sambahon an Diyos.

¹⁵ Pero paano kun nagduduwa-duwa an saimong mga aki? Paano mo sinda papasturan asin tatabangan na mahiling na an paglilingkod ki Jehova an talagang pinakamarahay na paagi nin pamumuhay asin an magtatao sa sainda nin nagdadanay na kaugmahan? Pagmaigutan na aramon an talagang dahilan kan saindang mga pagduwa-duwa.  Halimbawa, talaga daw na dai uyon an saimong aki sa mga katukduan kan Bibliya, o kulang sana an saiyang kumpiyansa na idepensa iyan sa mga kaedad niya? Talaga daw na dai kumbinsido an saimong aki na sarong kadunungan an pagsunod sa mga pamantayan nin Diyos, o mamundo sana siya ta pagmati niya mayo nin gustong makikatuod sa saiya?

16, 17. Sa anong mga paagi matatabangan nin mga magurang an mga aki ninda na isapuso an katotoohan?

¹⁶ Ano man an dahilan kan saindang pagduwa-duwa, matatabangan mo an saimong aki na mahali iyan. Paano? An sarong suhestiyon na napatunayan nang praktikal asin epektibo kan dakul na magurang iyo an paghapot sa saindang aki: “Para saimo, madali daw o masakit an buhay nin sarong Kristiyano? Ano sa paghuna mo an mga pakinabang kan pagigin Kristiyano? Ano daw an mga pagsasakripisyo na kaipuhan mong gibuhon? Mas dakul daw an mga pagsasakripisyo niyato kumpara sa mga pakinabang na inaako niyato ngunyan asin aakuon pa sa maabot na panahon? Taano ta nasabi mo iyan?” Siyempre, dapat mong ihapot an mga iyan sa sadiri mong tataramon asin sa mabuot saka may pagmakulog na paagi, na bakong garo nag-iimbestigar. Tibaad gusto nindong pag-ulayan an Marcos 10:29, 30. Tibaad gusto kan nagkapirang hoben na isurat an saindang mga iniisip sa duwang kolum—an sarong kolum para sa mga pagsasakripisyo asin an saro para sa mga pakinabang. Kun mahihiling ninda ini sa papel, tibaad maaraman ninda an ano man na problema asin makakatabang ini sa sainda na makaisip nin mga solusyon. Kun tinutukduan ta an mga interesado sa mga librong Itinotokdo kan Biblia asin “Pagkamoot nin Dios,” mas lalo nang dapat niyatong gibuhon iyan sa sato mismong mga aki! Ginigibo mo daw iyan?

¹⁷ Maabot an panahon na kaipuhan kan saimong mga aki na magdesisyon kun siisay an paglilingkudan ninda. Dai pag-isipon na awtomatiko nindang aakuon an saimong pagtubod. Dapat nindang isapuso an katotoohan. (Tal. 3:1, 2) Kun garo nasasakitan an saimong aki na gibuhon iyan, dagkahon siyang siyasaton an saiyang pagtubod. Tabangan siyang pag-isipan an mga hapot na siring kan: “Taano ta masasabi kong talagang may Diyos? Ano an nakakumbinsir sako na talagang nagmamakulog sako si Jehova? Taano ta nagtutubod ako na talagang para sa ikakarahay ko an pagsunod sa mga pamantayan ni Jehova?” Ipahiling na saro kang marahay na pastor paagi sa mapasensiyang paggiya sa saimong aki o mga aki na patunayan na an paglilingkod ki Jehova an pinakamarahay na paagi nin pamumuhay. *—Roma 12:2.

18. Paano maaarog nin mga magurang an Kahuruhalangkawing Pastor na si Jehova?

¹⁸ Gustong arugon kan gabos na tunay na Kristiyano an Kahuruhalangkawing Pastor. (Efe. 5:1; 1 Ped. 2:25) Lalo nang kaipuhan na aramon kan mga magurang an kamugtakan kan saindang aripumpon—an saindang namumutan na marhay na mga aki—asin gibuhon an gabos nindang makakaya na giyahan an mga aki ninda pasiring sa mga bendisyon na itinagama ni Jehova para sa mga ini. Kaya, pasturan an saimong mga aki paagi sa padagos na pagpadakula sa sainda sa dalan nin katotoohan!