Magin Positibo Dawa Nagkakaproblema an Pag-agoman
Magin Positibo Dawa Nagkakaproblema an Pag-agoman
‘Sa mga mag-aragom ako nagboboot, alagad bakong ako kundi an Kagurangnan.’—1 COR. 7:10.
IKAKAPALIWANAG DAW NINDO?
Paano masasabi na an mga mag-agom pinagsaro nin Dios?
Paano makakatabang an mga elder sa mga Kristianong igwa nin mga problema sa pag-agoman?
Paano niato maninigong mansayon an pag-agoman?
1. Paano minamansay kan mga Kristiano an pag-agoman, asin taano?
KUN nag-aagom an mga Kristiano, nanunuga sinda sa atubangan nin Dios asin ini sarong paninimbagan na dai dapat pagbasangbasangon. (Par. 5:4-6) Huling si Jehova an Kagtugdas kan areglo na pag-agoman, masasabi na an mga mag-agom “pinagsaro” nia. (Mar. 10:9) An pagigin saro na ini nagdadanay sa paghiling nin Dios ano man an mga ley kan nasyon dapit sa pag-agoman. Maninigong mansayon kan mga lingkod ni Jehova an pag-agoman bilang nagdadanay na areglo baga man mga parasamba na nia sinda sa panahon kan saindang kasal o bako.
2. Anong mga hapot an eestudyaran sa artikulong ini?
2 An mapangganang pag-agoman puedeng magresulta sa dakulang kaogmahan. Alagad ano an puedeng gibohon kun nagkakaproblema an pag-agoman? Puede daw iyan na mapakosog? Ano an makakatabang sa mga dai na nagigin matoninong an pag-agoman?
IYAN DAW MAGIGIN MAGAYAGAYA O MAMONDO?
3, 4. Ano an puedeng mangyari kun bakong madonong an nagin desisyon nin saro sa pagpili nin agom?
3 Kun mapanggana an buhay may agom nin sarong Kristiano, iyan kagayagayahan asin nagtataong onra ki Jehova. Kun iyan bakong mapanggana, kamondoan nanggad iyan. An pagsunod sa paggiya nin Dios makakatabang sa sarong Kristiano na nagpaplanong mag-agom na magin marahay an kapinonan kan pag-agom nia. Sa ibong na lado, an saro na nagdedesisyon nin bakong madonong kun nagpipili nin maaagom puedeng makamate nin pagkadiskontento asin grabeng kamondoan. Halimbawa, an nagkapirang hoben nagpopoon nang makipag-date dawa bako pa sindang andam sa mga paninimbagan nin pagigin may agom. May mga naghahanap sa Internet nin magigin agom. Naghihidali sinda sa pag-agom, asin kamondoan an kinakaabtan. An iba nakakagibo nin magabat na kasalan mantang magkailusyon asin nagpapakasal man, alagad tibaad sa kapinonan pa sana kan saindang buhay may agom, dai nang gayo ninda iginagalang an lambang saro.
4 An nagkapirang Kristiano dai nagsusunod sa pagboot na mag-agom ‘sana sa Kagurangnan’ asin napapaatubang sa makolog na mga epekto nin pamilyang nababanga huli sa relihion. (1 Cor. 7:39) Kun iyan an kamugtakan mo, mamibi para sa kapatawadan asin tabang nin Dios. Dai nia hinahale an mga epekto kan nakaaging mga sala nin saro, alagad tinatabangan nia an mga nagsosolsol na makaya an mga pagbalo. (Sal. 130:1-4) Pagmaigotan mong paogmahon sia ngonyan asin sagkod lamang, asin ‘an kaogmahan ni Jehova an magigin saimong kakosogan.’—Neh. 8:10.
KUN NAMEMELIGRO AN PAG-AGOMAN
5. Mapadapit sa mamondong pag-agoman, anong kaisipan an maninigo tang likayan?
5 An mga mamondo sa saindang pag-agoman tibaad mag-isip-isip: ‘Sulit daw talagang isalbar an mamondong pag-agoman mi? Kun ikakabalik ko lang an panahon dangan magpoon giraray na iba an agom!’ Tibaad pinapangarap nindang taposon an pag-agoman, na sinasabi: ‘Ay, kun makakabutas sana ako! Ano daw kun makidiborsio ako? Dawa kun dai ako makakua nin sono sa Kasuratan na diborsio, tibaad puede man akong makipagsuwayan asin mag-ogma giraray sa buhay.’ Imbes na mag-isip nin arog kaiyan o magpantasia manongod sa iba kutanang kamugtakan nin buhay, maninigong gibohon kan mga Kristiano an pinakamakakaya ninda sa presenteng kamugtakan paagi sa pagsunod sa paggiya nin Dios.
6. Ipaliwanag an sinabi ni Jesus sa Mateo 19:9.
6 Kun an sarong Kristiano makikidiborsio, an pagigin libre niang mag-agom giraray sono sa Kasuratan nakadepende sa kamugtakan. Si Jesus nagsabi: ‘An siisay man na bumulag sa saiyang agom na babae, na bakong huli sa pagpasambay, asin mag-agom nin iba, nakakaginibo nin pagsambay.’ (Mat. 19:9) Sa orihinal na lenguahe, an terminong ginamit digdi na “pagpasambay” nangangahulogan nin “pakikisaro,” na kaiba an pagsambay asin iba pang magabat na seksuwal na mga kasalan. Mahalaga na mapagngayongayong turotimbangon an iniisip na pagdiborsio kun mayo man sa mag-agom nin nagkasala nin seksuwal na imoralidad.
7. Ano an tibaad isipon nin mga nagmamasid kun bakong mapanggana an relasyon nin Kristianong mag-agom?
7 Kun bakong mapanggana an pag-agoman, tibaad ipinaparisa kaiyan na maluya an espirituwalidad nin saro. Pinalataw ni apostol Pablo an seryosong hapot na ini: ‘Kun an lalaki dai tataong mangataman kan saiyang harong, paano an pag-ataman nia kan [kongregasyon] nin Dios?’ (1 Tim. 3:5) Sa katunayan, kun an mag-agom pareho nagsasabi na Kristiano sinda alagad bakong mapanggana an saindang pag-agoman, tibaad isipon nin mga nagmamasid na dai man talaga ginigibo kan mag-agom an ihinuhulit ninda.—Roma 2:21-24.
8. Kun magdesisyon na magsuwayan an Kristianong mag-agom, ano an seguradong kamugtakan ninda sa espirituwal?
8 Kun an bautisadong mag-agom nagpaplanong magsuwayan o magdiborsio na mayong sono sa Kasuratan na basehan, seguradong igwa sinda nin problema sa espirituwal. Posibleng dai iinaaplikar kan saro o tibaad kan mag-agom an mga prinsipyo na sono sa Kasuratan. Kun tunay sindang ‘nagsasarig ki Jehova sa bilog nindang puso,’ mayong dahelan na maniwala na dai ninda malilikayan an bakong mapangganang pag-agoman.—Basahon an Talinhaga 3:5, 6.
9. Paano binendisyonan an nagkapirang Kristiano sa mapasensiang paghihingoa ninda may koneksion sa pag-agoman?
9 Dakol na pag-agoman an nagin mapanggana nanggad dawa kan enot garo baga dai iyan magigin mapanggana. An mga Kristianong dai minasuko tolos sa depisil na pag-agoman parateng nagkakamit nin marahay na balos. Isip-isipa an puedeng mangyari sa pamilyang nababanga huli sa relihion. Si apostol Pedro nagsurat: ‘Kamo na mga agom na babae, magpasakop sa saindong mga agom na lalaki tanganing, minsan kun may dai minatubod sa tataramon, sinda madará na dai kan tataramon huli kan pamumuhay nin saindang mga agom na babae, sa paghiling kan saindong mabining pamumuhay na may pagkatakot.’ (1 Ped. 3:1, 2) Iyo, huli sa marahay na paggawe kan agom nia, puedeng akoon nin bakong kapagtubod an katotoohan! An siring na ikinasalbar na pag-agoman nagtataong onra sa Dios asin puedeng magin dakulang bendisyon sa mag-agom asin sa siisay man na mga aki ninda.
10, 11. Anong dai linalaoman na mga problema an puedeng lumataw sa pag-agoman, alagad sa ano makakasierto an sarong Kristiano?
10 Sa pagmawot na paogmahon si Jehova, an kadaklan na Kristianong daing agom nagpipili nin bautisadong kapagtubod bilang agom. Dawa siring, sa dai linalaoman puedeng magbago an mga kamugtakan. Halimbawa, tibaad an saro sa mag-agom magkaigwa nin grabeng mga problema sa emosyon. O pakalihis kan kasal, tibaad an saro sa sainda magin inaktibong parahayag. Sa pag-ilustrar: Si Linda, * na maigot na Kristiana asin dedikadong ina, daing maginibo kan an bautisadong agom nia nagpoon na mamuhay nin bakong sono sa Kasuratan, dai nagsolsol, dangan natiwalag. Ano an maninigong gibohon nin sarong Kristiano kun an saiyang buhay bilang may agom garo baga mayo na nanggad nin paglaom huli sa siring na dahelan?
11 Tibaad ihapot mo, ‘Dapat daw na padagos akong maghingoa na isalbar an pag-agoman mi ano man an mangyari?’ Mayo nin siisay man na puede o maninigong gumibo nin siring na desisyon para sa saimo. Pero, igwa nin marahay na mga dahelan na dai sumuko sa nagluluyang pag-agoman. Mahalagang marhay sa Dios an diosnon na lalaki o babae na, huli sa konsensia, nagtatagal sa mga pagbalo nin depisil na pag-agoman. (Basahon an 1 Pedro 2:19, 20.) Paagi sa saiyang Tataramon asin espiritu, tatabangan ni Jehova an sarong Kristiano na maigot na naghihingoang mapakosog an nagkakaproblemang pag-agoman.
ANDAM SINDANG TUMABANG
12. Paano kita mamansayon kan mga elder kun mapatabang kita sa sainda?
12 Kun may mga problema kamo sa pag-agoman, dai mag-alangan na humagad nin espirituwal na tabang sa maygurang na mga Kristiano. An mga elder naglilingkod bilang mga pastor kan aripompon asin maoogma sindang tabangan kamo paagi sa ipinasabong na konsehong yaon sa Kasuratan. (Gui. 20:28; Sant. 5:14, 15) Dai pag-isipon na kun mahagad kamo nin espirituwal na tabang sa mga elder asin ipapakipag-olay sa sainda an magabat na problema sa pag-agoman mawawara an paggalang ninda sa saindong mag-agom. Maorog an mamomoton na paggalang ninda sa saindo mantang nahihiling ninda na odok nindong minamawot na paogmahon an Dios.
13. Anong konseho an yaon sa 1 Corinto 7:10-16?
13 Kun nagpapatabang an mga Kristianong bakong Saksi an agom, kinokonsulta kan mga elder an konsehong arog kan isinurat ni Pablo: ‘Alagad sa mga mag-aragom ako nagboboot, alagad bakong ako kundi an Kagurangnan, na an babae dai bumulag sa saiyang agom. Alagad kun bumulag sia, dai sia magpaagom, o kun dai, makiulian sia sa saiyang agom; asin an lalaki dai bumaya sa saiyang agom. Huli ta paano mo maaaraman, O agom na babae, kun baga ililigtas mo an saimong agom? O paano mo maaaraman, O agom na lalaki, kun baga ililigtas mo an saimong agom?’ (1 Cor. 7:10-16) Sarong bendisyon nanggad kun an bakong kapagtubod na agom madará sa tunay na pagsamba!
14, 15. Noarin puedeng pag-isipan nin Kristianong agom an pagsuway, alagad taano ta mahalaga an mapagngayongayo asin onestong pagtao nin atension dian?
14 Sa anong mga kamugtakan puedeng “bumulag” o sumuway an Kristianang agom? An nagkapira nagdesisyon na sumuway huli ta habo sindang sustentohan kan saindang agom. An iba man nagsuway huli sa grabeng pangongolog sa pisikal o huli ta biyong namemeligro an saindang espirituwalidad.
15 Sarong personal na desisyon kun baga masuway o dai. Minsan siring, kaipuhan na mapagngayongayo asin onestong tawan nin atension kan bautisadong agom an bagay na ini. Halimbawa, an bakong kapagtubod sana daw an may paninimbagan sa namemeligrong espirituwalidad, o an Kristiano daw nagin pabaya sa pag-adal sa Biblia asin iregular sa pag-atender sa mga pagtiripon saka sa ministeryo?
16. Ano an maninigong makapugol sa mga Kristiano na pabiglabiglang magdesisyon mapadapit sa diborsio?
16 An katunayan na iniingatan ta an satong relasyon sa Dios asin nagpapasalamat para sa balaog niang pag-agoman dapat na makapugol sa sato na pabiglabiglang magdesisyon mapadapit sa diborsio. Bilang mga lingkod ni Jehova, interesado kita sa pagpakangbanal kan saiyang ngaran. Kun siring, sierto nanggad na nungka kitang mahanap nin paagi na taposon an pag-agoman tanganing makaagom nin iba.—Jer. 17:9; Mal. 2:13-16.
17. Sa anong mga kamugtakan masasabi na inapod nin Dios sa katoninongan an may agom na mga Kristiano?
17 An sarong Kristiano na may agom na bakong kapagtubod maninigong magmaigot na papagdanayon an pag-agoman. Pero, dai man kaipuhan na makamateng may sala an sarong Kristiano kun, sa ibong kan sinserong paghihingoa nia na isalbar an pag-agoman, an bakong kapagtubod na agom nagsasayumang makiiba sa saiya. “Kun an daing pagtubod bumulag, pabulaga sia,” an isinurat ni Pablo. ‘An tugang na lalaki o babae dai nasasakop sa kaoripnan sa siring na bagay, kundi inapod kamo nin Dios sa katoninongan.’—1 Cor. 7:15. *
MAGLAOM KI JEHOVA
18. Dawa kun bakong posible na isalbar an pag-agoman, ano an puedeng marahay na resulta nin mga paghihingoang gibohon iyan?
18 Kun napapaatubang sa ano man na problema sa pag-agoman, maghagad ki Jehova nin kosog nin boot asin pirmeng maglaom sa saiya. (Basahon an Salmo 27:14.) Estudyare si Linda, na nasambitan kasubago. An saiyang buhay bilang may agom suminagkod sa diborsio, minsan ngani dakol na taon niang hiningoang isalbar iyan. Namatean daw nia na sinayang sana nia an saiyang panahon? “Dai nanggad,” an sabi nia. “An mga paghihingoa ko nagtao nin marahay na patotoo sa mga nagmamasid. May malinig akong konsensia. Orog sa gabos, an mga panahon na iyan nakatabang sa aki ming babae na magdanay na marigon sa katotoohan. Nagdakula siang maigot asin dusay na Saksi ni Jehova.”
19. Ano an puedeng mangyari kun naghihingoang isalbar an pag-agoman?
19 An Kristianang si Marilyn maogma na nagtiwala sia sa Dios asin nagparahingoang isalbar an saindang pag-agoman. “Natetentaran ako kaidtong suwayan an agom ko huling dai sia nagsusustento asin namemeligro an espirituwalidad ko,” an sabi nia. “Pero, elder an agom ko bago sia naimbuelto sa nagkapirang bakong madonong na negosyo. Nagpoon na siang dai mag-atender sa mga pagtiripon, asin basta na sana kami dai na nag-oolay. Kan magsalakay an mga terorista sa siudad mi natakot akong marhay kaya nasakitan akong makiiba sa ibang tawo. Dangan narealisar ko na igwa man ako nin sala. Nagpoon kaming mag-olay giraray, ibinalik mi an samong pampamilyang pag-adal, asin nagin regular sa mga pagtiripon. An mga elder maboot asin matinabang na marhay. An samong pag-agoman nagin maogma giraray. Pag-abot nin panahon, nakualipikar giraray an agom ko sa mga pribilehio sa kongregasyon. Makolog na leksion idto pero may maogmang resulta.”
20, 21. Kun dapit sa pag-agoman, ano an maninigong determinado niatong gibohon?
20 Baga man kita may agom o mayo, pirme kitang humiro na may kosog nin boot asin maglaom ki Jehova. Kun may mga problema kita sa pag-agoman, maninigong pagmaigotan niatong resolberan iyan, na ginigirumdom na an pinagsaro sa pag-agoman ‘bako nang duwa, kundi sarong laman.’ (Mat. 19:6) Asin tandaan niato na kun magtatagal kita sa nababangang pamilya sa ibong nin mga kasakitan, puede niatong maeksperyensiahan an kagayagayahan na makaibanan sa tunay na pagsamba an bakong kapagtubod na agom.
21 Ano man an satong mga kamugtakan, magdesisyon logod kita na lumakaw nin maingat tanganing magkaigwa nin marahay na patotoo sa mga nagmamasid na nasa luwas kan kongregasyon. Kun namemeligro an satong pag-agoman, maigot kitang mamibi, onestong pakasiyasaton an satong mga motibo, maingat na horophoropon an Kasuratan, asin humagad nin espirituwal na tabang sa mga elder. Orog sa gabos, logod na magin determinado kita na paogmahon si Jehova Dios sa gabos na bagay asin magpahiling nin tunay na pagpahalaga sa saiyang marahayon na balaog na pag-agoman.
[Mga Nota sa Ibaba]
^ par. 10 Sinalidahan an mga ngaran.
^ par. 17 Hilingon an “Magdanay Kamo sa Pagkamoot nin Dios,” pahina 219-221; The Watchtower na Nobyembre 1, 1988, pahina 26-27; Setyembre 15, 1975, pahina 575.
[Mga Hapot Para sa Pag-adal]
[Blurb sa pahina 10]
An mga Kristianong dai tolos minasuko sa nagkakaproblemang pag-agoman parateng nagkakamit nin marahay na balos
[Blurb sa pahina 12]
Pirmeng maglaom ki Jehova asin maghagad sa saiya nin kosog nin boot
[Ritrato sa pahina 9]
Binebendisyonan ni Jehova an Kristianong agom na naghihingoang pakosogon an nagkakaproblemang pag-agoman
[Ritrato sa pahina 11]
An Kristianong kongregasyon puedeng magin gikanan nin karangahan asin espirituwal na tabang
