Ipinapabanaag Mo daw an Kamurawayan ni Jehova?
Ipinapabanaag Mo daw an Kamurawayan ni Jehova?
‘Kita nagpapabanaag siring sa mga salming kan kamurawayan ni Jehova.’—2 COR. 3:18, NW.
ANO AN ISISIMBAG NINDO?
Sa ibong nin pagkamakasalan niato, paano ta mapapamuraway si Jehova?
Paano kita natatabangan kan pamibi asin pag-atender sa Kristianong mga pagtiripon na ikapabanaag an kamurawayan nin Dios?
Ano an makakatabang sa sato na padagos na mapamuraway si Jehova?
1, 2. Taano ta rasonableng asahan na maaarog niato an mga kualidad ni Jehova?
SA PAANO man, kita gabos kaagid kan satong mga magurang. Huli kaini, bakong makangangalas kun may magsabi sa sarong aking lalaki, ‘Garo ka nanggad si Papa mo.’ Tibaad may magsabi man sa sarong aking babae, ‘Nagigirumdoman ko saimo si Mama mo.’ Asin parateng inaarog kan mga aki an nahihiling ninda sa saindang mga magurang. Alagad, kumusta kita? Maaarog daw niato an satong langitnon na Ama, si Jehova? Minsan ngani dai ta sia nahihiling, maaaraman ta an saiyang mahalagang marhay na mga kualidad paagi sa pag-adal sa saiyang Tataramon, pag-obserbar sa linalang nia, asin paghorophorop sa Kasuratan, nangorogna sa mga sinabi asin ginibo kan Aki nin Dios, si Jesu-Cristo. (Juan 1:18; Roma 1:20) Kaya, ikakapabanaag niato an kamurawayan ni Jehova.
2 Bago lalangon si Adan asin Eva, kompiado an Dios na kaya kan mga tawo na gibohon an kabotan nia sa sainda, ipabanaag an mga kualidad nia, asin pamurawayon sia. (Basahon an Genesis 1:26, 27.) Sa pagpahiling nin diosnon na debosyon, maninigo tang ipabanaag an mga kualidad kan Saro na naggibo sa sato. Kun ginigibo ta iyan, may marahayon kitang pribilehio na ipabanaag an kamurawayan nin Dios ano man an satong kultura, inadalan, o rasa. Taano? Huling ‘an Dios dai nagpapalaen nin mga tawo, kundi sa arin man na nasyon, an natatakot saiya asin naggigibo nin katanosan iyo an inaako nia.’—Gui. 10:34, 35.
3. Ano an namamatean nin mga Kristiano mantang naglilingkod sinda ki Jehova?
3 Ipinapabanaag kan linahidan na mga Kristiano an kamurawayan ni Jehova. Kun siring, an pinaniaki nin espiritu na si apostol Pablo nagsurat: “Kita gabos, mantang kita na may lalawgon na daing tahob nagpapabanaag siring sa mga salming kan kamurawayan ni Jehova, nagkakariliwat na magin kapareho kan ladawan na iyan na may paorog nang paorog na kamurawayan.” (2 Cor. 3:18, NW) Kan magbaba si propeta Moises hale sa Bukid nin Sinai dara an mga tablang may nakasurat na Sampulong Togon, an saiyang lalawgon nagliwanag o nagsinag huling nakipag-olay sa saiya si Jehova. (Ex. 34:29, 30) Dawa ngani dai iyan naeksperyensiahan nin mga Kristiano asin dai man nagsisinag an lalawgon ninda, nahihiling an kagayagayahan ninda kun sinasabi sa iba an manongod ki Jehova, sa saiyang mga kualidad, asin sa marahayon na katuyohan nia sa katawohan. Arog kan pinakintab na mga salming na metal kan suanoy na panahon, ipinapabanaag kan mga linahidan asin kan saindang daganon na kairiba an kamurawayan ni Jehova sa buhay asin ministeryo ninda. (2 Cor. 4:1) Ipinapabanaag mo daw an kamurawayan ni Jehova paagi sa saimong diosnon na paggawe asin regular na pakikikabtang sa paghuhulit kan Kahadean?
GUSTO NIATONG IPABANAAG AN KAMURAWAYAN NI JEHOVA
4, 5. (a) Arog ni Pablo, igwa kita nin anong pakikipaglaban? (b) Paano kita naaapektaran nin kasalan?
4 Bilang mga lingkod ni Jehova, gusto nanggad niatong tawan nin onra asin pamurawayon an satong Kaglalang sa gabos niatong ginigibo. Minsan siring, parate nanggad na dai ta nagigibo an gusto niato. Kinaipuhan ni Pablo na labanan an problemang iyan. (Basahon an Roma 7:21-25.) Ipinaliwanag ni Pablo kun taano ta may siring kitang pakikipaglaban: ‘An gabos nagkasala, asin dai nakaabot sa kamurawayan nin Dios.’ (Roma 3:23) Iyo, huli sa namana sa makasalan na si Adan, an katawohan nagin sakop kan maringis na ‘Hade na Kasalan.’—Roma 5:12; 6:12.
5 Ano an kasalan? Iyan nanonongod sa ano man na kontra sa personalidad, pamamaagi, pamantayan, asin kabotan ni Jehova. Rinaraot kan kasalan an relasyon nin saro sa Dios. Huli sa kasalan, minasalto kita sa marka, kun paanong an sarong parapana minasalto man sa saiyang target. Nagkakasala kita, tinutuyo man niato o dai. (Bil. 15:27-31) An kasalan hararom na nakagamot sa mga tawo asin isinusuway sinda kaiyan sa saindang Kaglalang. (Sal. 51:5; Isa. 59:2; Col. 1:21) Huli kaini, an katawohan sa pangkagabsan lubos na siblag ki Jehova asin dai nagkakaigwa kan pambihirang oportunidad na ipabanaag an kamurawayan nin Dios. Daing duda, an kasalan an pinakagrabeng diperensia na nagpapasakit sa katawohan.
6. Sa ibong nin pagkamakasalan niato, paano ta mapapamuraway an Dios?
6 Sa ibong nin pagkamakasalan niato, ipinapahiling ni Jehova na sia “an Dios [na nagtatao] nin paglaom.” (Roma 15:13) Itinao nia an paagi tanganing mahale an kasalan—an atang na pantubos ni Jesu-Cristo. Paagi sa pagtubod sa atang na iyan, bako na kitang ‘oripon nin kasalan,’ kundi nasa kamugtakan na kitang ipabanaag an kamurawayan ni Jehova. (Roma 5:19; 6:6; Juan 3:16) Kun papagdadanayon niato an inooyonan na relasyon na ini sa Dios, siertong aakoon niato an bendisyon ni Jehova ngonyan saka an mga pakinabang kan pagkaperpekto asin buhay na daing katapusan. Minsan ngani makasalan pa kita, dakulang onra nanggad na mansayon nin Dios bilang mga indibiduwal na nakakapabanaag kan saiyang kamurawayan!
PAGPAPABANAAG KAN KAMURAWAYAN NIN DIOS
7. Ano an dapat tang admitiron tanganing ikapabanaag niato an kamurawayan nin Dios?
7 Tanganing angay kitang magpabanaag kan kamurawayan nin Dios, dapat tang onestong akoon na makasalan kita. (2 Cron. 6:36) Dapat niatong admitiron an satong makasalan na mga tendensia asin magmaigot na kontrolon iyan tanganing tunay na mapamuraway an Dios. Halimbawa, kun naghihiling kita nin pornograpiya, na kasalan na nakakahale nin onra, dapat tang admitiron na kaipuhan niato nin espirituwal na tabang—dangan magpatabang kita. (Sant. 5:14, 15) Ini an enot na dapat gibohon tanganing lubos niatong mapamuraway an Dios. Bilang mga nagsasamba ki Jehova, dapat tang padagos na siyasaton an satong sadiri tanganing masierto kun baga nakakaabot kita sa matanos na mga pamantayan nia. (Tal. 28:18; 1 Cor. 10:12) Ano man an satong makasalan na mga tendensia, dapat tang padagos na paglabanan iyan tanganing ikapabanaag niato an kamurawayan nin Dios.
8. Minsan ngani bako kitang perpekto, ano an maninigo niatong gibohon?
8 Si Jesus an solamenteng tawo na nabuhay asin nagadan na dai nagkulang sa pagpaogma sa Dios asin pagpabanaag kan Saiyang kamurawayan. Minsan ngani bako kitang arog ni Jesus na perpekto, puede asin maninigo niatong pagmaigotan na sunodon an halimbawa nia. (1 Ped. 2:21) Naririsa ni Jehova an paghihingoa asin an pag-oswag niato, asin binebendisyonan nia an satong sinserong pagmamaigot na mapamuraway sia.
9. Ano an papel kan Biblia sa buhay nin mga Kristiano na gustong maabot an mga kahagadan nin Dios?
9 An nasusurat na Tataramon ni Jehova makakatabang sa sato na masabotan kun paano niato orog na ikakapabanaag an kamurawayan nia. Mahalagang marhay an hararom na pag-adal sa Kasuratan asin an mapaghorophorop na pagbasa kan Biblia. (Sal. 1:1-3) Matatabangan kitang umoswag kun aroaldaw niatong babasahon an Kasuratan. (Basahon an Santiago 1:22-25.) An kaaraman sa Biblia iyo an basehan kan satong pagtubod asin an paagi tanganing mapakosog an determinasyon ta na likayan an magabat na kasalan asin paogmahon si Jehova.—Sal. 119:11, 47, 48.
10. Paano an pamibi makakatabang na mas lubos niatong mapaglingkodan si Jehova?
10 Tanganing ikapabanaag an kamurawayan nin Dios, kaipuhan man niatong ‘magmaigot sa pamimibi.’ (Roma 12:12) Puede asin maninigo kitang mamibi ki Jehova na tabangan kitang paglingkodan sia sa paaging inaako nia. Sa katuyohan na iyan, puede kitang maghagad nin banal na espiritu, orog na pagtubod, kosog na mapaglabanan an sugot, asin kakayahan na ‘magamit nin tanos an tataramon nin katotoohan.’ (2 Tim. 2:15; Mat. 6:13; Luc. 11:13; 17:5) Kun paanong an aki nagsasarig sa saiyang ama, kaipuhan man niatong magsarig sa satong langitnon na Ama, si Jehova. Kun makikiolay kita sa saiya na tabangan kitang mas lubos siang mapaglingkodan, makakaasa kita na gigibohon nia iyan. Nungka logod niatong isipon na istorbo kita sa saiya! Imbes, sa pamibi omawon niato sia, pasalamatan, hagadon an paggiya nia nangorogna kun nasa pagbalo, asin hagadon an tabang nia na mapaglingkodan niato sia sa mga paaging napapamuraway an banal niang ngaran.—Sal. 86:12; Sant. 1:5-7.
11. Paano nakakatabang sa sato an mga pagtiripon kan kongregasyon na ikapabanaag an kamurawayan nin Dios?
11 Ipinagkatiwala nin Dios sa “maimbod asin mapagmansay na oripon” an pag-asikaso kan saiyang namomotan na mga karnero. (Mat. 24:45-47, NW; Sal. 100:3) An grupong oripon interesadong marhay kun paano niato gabos ipinapabanaag an kamurawayan ni Jehova. Paagi sa satong mga pagtiripon, tinatabangan ninda kitang gumibo nin mga pagliliwat sa buhay niato, kun paanong an sarong paratahi pinapakarhay an satong bado tanganing mas gumayon an itsura niato. (Heb. 10:24, 25) Kun siring, pirme logod kitang umabot na nasa oras, huling kun ugale na niatong umabot nin huri, dai kita makikinabang sa nagkapirang espirituwal na ‘pagpakarhay’ na kaipuhan niato tanganing mapaoswag an satong pamumuhay bilang mga lingkod ni Jehova.
AROGON NIATO AN DIOS
12. Paano niato maaarog an Dios?
12 Kun gusto niatong ikapabanaag an kamurawayan ni Jehova, dapat kitang ‘magin paraarog sa Dios.’ (Efe. 5:1) An sarong paagi na maarog si Jehova iyo an pag-arog niato sa saiyang pagmansay sa mga bagay-bagay. Kun mamumuhay kita na bakong oyon sa saiyang kaisipan, dai niato sia matatawan nin onra asin makakadanyar iyan sa sato. Mantang an kinaban na nakapalibot sa sato nasa impluwensia kan saro na maraot, si Satanas na Diablo, dapat kitang magmaigot na kaongisan an ikinakaongis ni Jehova asin magkaigwa nin hararom na pagkamoot sa namomotan nia. (Sal. 97:10; 1 Juan 5:19) Dapat na odok sa puso kitang magtubod na an solamenteng tamang paagi na paglingkodan an Dios iyo an paggibo kan gabos na bagay para sa saiyang kamurawayan.—Basahon an 1 Corinto 10:31.
13. Taano ta dapat niatong ikaongis an kasalan, asin papahiroon kita kaini na gibohon an ano?
13 Ikinakaongis ni Jehova an kasalan, asin maninigo na kita iyo man. Dapat na dai man lamang niato probaran na rumani dian, kundi rayoan ta sagkod sa mapupuede an ano man na puedeng magin dahelan na kita magkasala. Halimbawa, kaipuhan tang mag-ingat na dai maimpluwensiahan nin apostasiya, sarong kasalan na gigibohon kitang bakong angay na magpamuraway sa Dios. (Deut. 13:6-9) Kaya, dapat tang biyong likayan an mga apostata o an siisay man na naghihingakong tugang alagad naglalapastangan sa Dios. Ini an dapat tang gibohon dawa pa kapamilya ta sinda. (1 Cor. 5:11) Dai kita makikinabang kun poprobaran niatong patunayan na sala an mga argumento kan mga apostata o kan mga nagkikritika sa organisasyon ni Jehova. Sa katunayan, peligroso sa espirituwal asin bakong tama na basahon an mga sinasabi ninda, baga man paagi sa literatura o Internet.—Basahon an Isaias 5:20; Mateo 7:6.
14. Kun pinagmamaigotan tang ipabanaag an kamurawayan nin Dios, anong kualidad an maninigong magin risang-risa sa sato, asin taano?
14 An sarong marahayon na paagi na maarog niato an satong langitnon na Ama iyo an pagpahiling nin pagkamoot. Iyo, arog nia, maninigo kitang magin mamomoton. (1 Juan 4:16-19) Sa katunayan, paagi sa pagkaminorootmootan niato namimidbid kita bilang mga disipulo ni Jesus asin mga lingkod ni Jehova. (Juan 13:34, 35) Minsan ngani nakakaolang sa sato kun beses an namana niatong kasalan, dapat kitang maghingoang magin mamomoton sa gabos na panahon. Kun papataluboon niato an pagkamoot asin an iba pang diosnon na mga kualidad, malilikayan tang gumawe nin bakong maboot asin magkasala.—2 Ped. 1:5-7.
15. Kun namomotan niato an iba, paano ta sinda tatrataron?
15 Napapahiro kita nin pagkamoot na gumibo nin mararahay na bagay para sa iba. (Roma 13:8-10) Halimbawa, huli sa pagkamoot ta sa satong agom, pinapagdadanay niatong daing digta an higdaan nin mag-agom. An pagkamoot niato sa mga elder, pati na an paggalang niato sa saindang gibohon, matabang sa sato na magin makinuyog asin mapagpasakop sa paggiya ninda. An mga aki na namomoot sa mga magurang ninda nagkukuyog asin nagtatao nin onra sa sainda saka dai nagtataram nin maraot manongod sa sainda. Kun namomotan niato an satong kapwa, dai ta sinda ibibilang na mas hababa sa sato ni kakaolayon ta man sinda nin mayong paggalang. (Sant. 3:9) Asin an mga elder na namomoot sa mga karnero nin Dios mapagpadangat sa pagtratar sa sainda.—Gui. 20:28, 29.
16. Paano makakatabang sa satong ministeryo an pagpahiling nin pagkamoot?
16 An pagkamoot maninigong magin risang-risa sa satong ministeryo. Huli sa hararom niatong pagkamoot ki Jehova, dai ta totogotan na mangluya an satong boot huli sa kawaran nin interes o negatibong reaksion nin nagkapirang kagharong. Imbes, padagos tang ihuhulit an maogmang bareta. Papahiroon kita nin pagkamoot na mag-andam na marhay asin maghingoang magin epektibo sa ministeryo. Kun talagang namomotan niato an Dios asin an satong kapwa, dai ta mamansayon na pagabat o obligasyon an paghuhulit kan Kahadean. Imbes, ibibilang niato iyan na dakulang pribilehio asin gigibohon niato iyan nin may kagayagayahan.—Mat. 10:7.
PADAGOS NA PAMURAWAYON SI JEHOVA
17. Taano ta nakikinabang kita sa pag-admitir na nagkukulang kita sa kamurawayan nin Dios?
17 An kinaban sa pangkagabsan dai nakakaaram kun gurano kaseryoso an kasalan, alagad kita iyo. Huli kaini, aram ta na kaipuhan niatong paglabanan an satong makasalan na mga tendensia. Huling inaako niato na makasalan kita, nasasanay niato an satong konsensia na pahiroon kita na gumawe nin tama kun nagpopoon na tumalubo sa satong isip asin puso an salang tendensia. (Roma 7:22, 23) Totoo, tibaad maluya kita, alagad puede kitang pakosogon nin Dios na gibohon an tama sa ano man na situwasyon.—2 Cor. 12:10.
18, 19. (a) Ano an nakakatabang sa sato na magin mapanggana sa satong pakikipaglaban sa maraot na mga puersang espiritu? (b) Ano an maninigong magin determinasyon niato?
18 Tanganing mapamuraway ta si Jehova, dapat man niatong labanan an maraot na mga puersang espiritu. Mapanggana niatong magigibo iyan sa tabang kan espirituwal na pangalasag hale sa Dios. (Efe. 6:11-13) Daing ontok na pinagmamaigotan ni Satanas na agawon ki Jehova an kamurawayan na maninigo sana sa Saiya. Padagos man na hinihingoa kan Diablo na raoton an relasyon niato ki Jehova. Alagad, dakulang sampaling nanggad ki Satanas kun kita asin an minilyon na bakong perpektong lalaki, babae, asin aki nagdadanay na maimbod asin nagpapamuraway sa Dios! Kaya, padagos niatong omawon si Jehova, arog kan mga linalang sa langit na nagsabi: ‘Angay ka, samong Kagurangnan asin samong Dios, na mag-ako kan kamurawayan asin kan kagalangan patin kan kapangyarihan, huli ta ika an naglalang kan gabos na bagay, asin huli kan saimong kabotan sinda luminuwas asin linalang.’—Kap. 4:11.
19 Magin determinasyon logod niato na padagos na pamurawayon si Jehova, ano man an mangyari. Seguradong naggagayagaya sia na dakolon na maimbod na indibiduwal an naggigibo kan saindang pinakamakakaya na arogon sia asin ipabanaag an saiyang kamurawayan. (Tal. 27:11) An sato logod na saboot magin arog kan ki David, na nag-awit: ‘Pag-oomawon taka, O Jehova, Dios ko, sa bilog kong puso, asin papamurawayon ko sagkod lamang an saimong ngaran.’ (Sal. 86:12) Minamawot nanggad niato na umabot na an panahon na perpekto na niatong ikakapabanaag an kamurawayan ni Jehova asin maoomaw sia sagkod lamang! Iyan an maogmang maeeksperyensiahan kan makinuyog na katawohan. Ipinapabanaag mo daw an kamurawayan ni Jehova Dios ngonyan, na naglalaom na gigibohon iyan sagkod lamang?
[Mga Hapot Para sa Pag-adal]
[Mga Ritrato sa pahina 27]
Ipinapabanaag mo daw an kamurawayan ni Jehova sa mga paaging ini?
