“Dai Ka Matakot. Ako Mismo an Matabang sa Saimo”

PINATANIDAN ni Jesus an saiyang mga parasunod: “Padagos na ibibilanggo kan Diablo an nagkapira sa saindo tanganing kamo lubos na mabalo.” Minsan siring, bago sana kan patanid na iyan, si Jesus nagsabi: “Dai ka matakot sa mga bagay na madali mo nang tioson.” Huling padagos na ginagamit ni Satanas an huma nin pagkabilanggo bilang sarong paagi na mapapondo an paghuhulit kan Kahadean, may posibilidad nanggad na persegiron nin nagkapirang gobyerno an tunay na mga Kristiano. (Kap. 2:10; 12:17) Huli kaini, ano an makakatabang sa sato na magin andam sa mga pakana ni Satanas asin ‘dai matakot,’ arog kan isinadol ni Jesus?

Siempre, an kadaklan sa sato nakamate na nin takot. Pero, sinisierto sa sato kan Tataramon nin Dios na sa tabang ni Jehova, makakaya niatong dai madaog nin takot. Paano? An sarong paagi na tinatabangan kita ni Jehova na magin andam na atubangon an pagtumang iyo an pagsabi sa sato kan mga taktika na ginagamit ni Satanas asin kan mga representante kaini. (2 Cor. 2:11) Tanganing iilustrar ini, estudyaran niato an sarong pangyayari kan mga panahon kan Biblia. Eestudyaran man niato an nagkapirang halimbawa nin maimbod na mga kapagtubod sa presenteng panahon na ‘nanindogan tumang sa mga pakana kan Diablo.’—Efe. 6:11-13.

Inatubang nin Hadeng May Takot sa Dios an Maraot na Tagapamahala

Kan ikawalong siglo B.C.E., sunod-sunod an nagin kapangganahan kan maraot na si Hadeng Senaquerib nin Asiria tumang sa nagkapirang nasyon. Huling kompiadong marhay, determinado siang sakopon an banwaan ni Jehova asin an saindang kabiserang siudad, an Jerusalem, na pinaghahadean kan may takot sa Dios na si Ezequias. (2 Ha. 18:1-3, 13) Mayong duda na inaprobetsaran ni Satanas an situwasyon, na sinutsutan si Senaquerib na gibohon an saiyang mga plano tanganing mapoho sa daga an tunay na pagsamba.—Gen. 3:15.

Nagpadara si Senaquerib nin delegasyon sa Jerusalem tanganing pasukoon an siudad na iyan. Kaiba sa delegasyon si Rabsaces, na iyo an pangenot na representante sa pagtaram kan hade. * (2 Ha. 18:17) An pasohan ni Rabsaces iyo na paluyahon an boot kan mga Judio asin pasukoon na dai sinda minalaban. Ano an mga paagi na ginamit ni Rabsaces tanganing matakot an mga Judio?

Maimbod Dawa Napasuway

Sinabihan ni Rabsaces an mga representante ni Ezequias: “Ini an sinabi kan poderosong hade, an hade nin Asiria: ‘Ano man ining kasarigan na pinagtitiwalaan mo? . . . Uya! nagtitiwala ka sa suporta kan ronot na gahong ini, an Egipto, na, kun isosogkod iyan nin sarong tawo, seguradong matutusok kaiyan an saiyang palad asin malagbas  iyan dian.’” (2 Ha. 18:19, 21) Bakong totoo an akusasyon ni Rabsaces, huling si Ezequias dai man nakipag-alyansa sa Egipto. Pero, idinoon kan akusasyon an gusto ni Rabsaces na malinaw na magirumdoman nin mga Judio: ‘Mayong matabang sa saindo. Nagsosolo kamo.’

Dai pa sana nahahaloy, tanganing takoton an tunay na mga Kristiano, ginamit man kan mga paratumang sa tunay na pagsamba an huma na isusuway sinda. Ginirumdom nin sarong Kristiana, na nabilanggo huli sa saiyang pagtubod asin dakol na taon na isinuway sa mga kapagtubod nia, kun ano an nakatabang sa saiya na dai madaog nin takot. Sia nagsabi: “An pamimibi nakatabang sa sako na magin dayupot ki Jehova . . . Ginirumdom ko an pagsierto sa Isaias 66:2 na hineheling nin Dios ‘an sarong nagsasakit nin makuri asin nagsosolsol sa espiritu.’ Pirme ining nakakapakosog asin nakakarangang marhay sa sako.” Sarong tugang man na lalaki na dakol na taon na ibinilanggo nin solo an nagsabi: “Narealisar ko na an sadit na rektanggulong selda puede man na magin uniberso kun an saro dayupot sa Dios.” Iyo, an dayupot na relasyon ki Jehova nagtao sa duwang Kristianong ini kan kosog na kaipuhan tanganing makaya an pagigin napasuway. (Sal. 9:9, 10) An mga parapersegir puede sindang isuway sa pamilya, mga katood, asin kapagtubod, alagad aram kan nakabilanggong mga Saksi na an mga paratumang sa sainda nungkang ikakasuway sinda ki Jehova.—Roma 8:35-39.

Kun siring, mahalaga nanggad na gamiton niato an lambang oportunidad na mapakosog an satong relasyon ki Jehova! (Sant. 4:8) Maninigo na regular na hapoton niato an satong sadiri: ‘Gurano katotoo si Jehova para sa sako? An saiya daw na mga tataramon talagang nakakaimpluwensia sa sakong mga desisyon, sadit man o dakula, sa pangaroaldaw na buhay?’ (Luc. 16:10) Kun naghihingoa kitang mapagdanay an dayupot na relasyon sa Dios, mayo kitang dahelan na matakot. Sa pagrepresentar sa mga Judio na nagsasakit nin makuri, si propeta Jeremias nagsabi: “Inapod ko an saimong ngaran, O Jehova, sa sarong kotkot na hararomon . . . Nagrani ka kan aldaw na ako padagos na nag-aapod sa saimo. Sinabi mo: ‘Dai ka matakot.’”—Lam. 3:55-57.

Dai Nagibong Papagduwaduwahon an mga Lingkod nin Dios

Si Rabsaces naggamit nin tusong pangangatanosan tanganing papagduwaduwahon an banwaan. Sia nagsabi: “Bako daw na [ki Jehova] an haralangkaw na lugar asin an mga altar na hinale ni Ezequias? . . . Si Jehova mismo nagsabi sa sako, ‘Tumukad ka tumang sa dagang ini, asin laglagon mo iyan.’” (2 Ha. 18:22, 25) Sa siring, ginibong argumento ni Rabsaces na dai makikipaglaban si Jehova para sa Saiyang banwaan huling anggot Sia sa sainda. Alagad kabaliktaran kaiyan an totoo. Si Jehova naogma ki Ezequias asin sa mga Judio na nagbalik sa tunay na pagsamba.—2 Ha. 18:3-7.

Ngonyan, an nagpapakanang mga parapersegir tibaad magsabi nin kadikit na totoong impormasyon tanganing magkaigwa nin puntong pagkakaoyonan alagad tuso nindang linalaogan nin kaputikan an katotoohan na iyan, na naglalaom na maresulta iyan sa pagduwaduwa. Halimbawa, kun minsan, an nakabilanggong mga tugang sinasabihan na nagkompromiso na an sarong tugang na nangengenot sa saindang nasyon kaya puede man na magkompromiso sinda asin bayaan ninda an saindang mga paniniwala. Minsan siring, an pangangatanosan na iyan nasudyang papagduwaduwahon an mga may kabatidan na Kristiano.

Estudyare an nangyari sa sarong Kristiana durante kan Guerra Mundial II. Mantang nakabilanggo, pinahelingan sia nin nasusurat na kapahayagan na nagpaparisa na sarong tugang na may paninimbagan an nagbaya na sa saiyang pagtubod. Naghapot an parausisa kun naniniwala sia sa  Saksing iyan. An tugang nagsimbag, “[Sia] saro sanang bakong sangkap na tawo.” Sinabi pa nia na sagkod na sinusunod kan tawong iyan an mga prinsipyo sa Biblia, ginagamit sia nin Dios. “Alagad mantang an saiyang kapahayagan bako nang kaoyon kan Biblia, bako ko na siang tugang.” Madonong na sinunod kan maimbod na Kristianang iyan an konseho kan Biblia: “Dai ka magtiwala sa mga noble, ni sa aki nin daganon na tawo, na sa saiya mayo nin kaligtasan.”—Sal. 146:3.

An pagkaigwa nin tamang kaaraman sa Tataramon nin Dios asin pag-aplikar sa hatol kaiyan matabang sa sato na likayan an mapandayang pangangatanosan na puedeng makapaluya sa determinasyon niato na magtagal. (Efe. 4:13, 14; Heb. 6:19) Huli kaini, tanganing andamon an satong sadiri na malinaw na makapag-isip kun ginigipit, kaipuhan niatong tawan nin prioridad an pagbasa sa Biblia aroaldaw asin personal na pag-adal. (Heb. 4:12) Iyo, ngonyan na an panahon na pararomon an satong kaaraman asin pakosogon an satong pagtubod. An sarong tugang na nagtagal nin dakol na taon na pagkabilanggo nin solo nagsabi: “Gusto kong dagkahon an gabos na pahalagahan nanggad an gabos na espirituwal na kakanon na itinatao sa sato, huling dai niato aram kun gurano nanggad an magigin halaga kaiyan sa sato pag-abot nin panahon.” Tunay nanggad, kun maingat niatong pinag-aadalan an Tataramon nin Dios asin an mga publikasyon na itinatao ngonyan kan grupong oripon, kun siring, sa masakit na mga panahon sa buhay, ‘ipapagirumdom’ sa sato kan banal na espiritu an mga nanodan niato.—Juan 14:26.

Protektado Tumang sa Pananakot

Prinobaran ni Rabsaces na takoton an mga Judio. “Makipustahan ka tabi sa kagurangnan ko na hade nin Asiria,” an sabi nia, “asin tatawan taka nin duwang ribong kabayo tanganing helingon kun baga igwa kang mga mapapakabayo dian. Kun siring, paano mo mapapatalikod an sarong gobernador na kaiba sa pinakahababang mga lingkod kan sakong kagurangnan?” (2 Ha. 18:23, 24) Sa punto de vista nin tawo, si Ezequias asin an saiyang banwaan mayong kalabanlaban sa makapangyarihan na hukbo nin Asiria.

An mga parapersegir ngonyan puede man na magin garo baga sobra kakosog, nangorogna kun suportado sinda kan Estado. Iyan nanggad an nangyari sa mga parapersegir na Nazi durante kan Guerra Mundial II. Prinobaran nindang takoton an dakol sa mga lingkod nin Dios. An saro sa satong mga tugang, na dakol na taon na nabilanggo, kan huri nag-estorya kun paano sia tinakot. Sa sarong pangyayari, sarong opisyal an naghapot sa saiya: “Naheling mo kun paano binadil an saimong tugang? Ano an nanodan mo dian?” An simbag nia: “Saksi ako para ki Jehova asin magdadanay akong arog kaiyan.” “Kun siring, ika an sunod na babadilon,” an patakot kan opisyal. Minsan siring, marigon na nanindogan an satong tugang kaya pinondohan na sia kan kaiwal. Ano an nakatabang sa saiya na atubangon an siring na patakot? Sia nagsimbag: “Nagtiwala ako sa ngaran ni Jehova.”—Tal. 18:10.

Paagi sa lubos na pagtubod ki Jehova, kita igwa nin dakulang kalasag na nagpoprotehir sa sato tumang sa gabos na ginagamit ni Satanas tanganing kolgan kita sa espirituwal na paagi. (Efe. 6:16) Huli kaini, marahay na hagadon niato ki Jehova sa pamibi na tabangan kitang maparigon an satong pagtubod. (Luc. 17:5) Kaipuhan man niatong gamiton sa tama an nakakapakosog sa pagtubod na mga areglong itinatao kan grupong maimbod na oripon. Kun napapaatubang sa mga patakot, napapakosog kita kun ginigirumdom niato an pagsierto ni Jehova ki propeta Ezequiel, na kinaipuhan na magpaabot nin mensahe sa mga tawong matagas an puso. Sinabihan sia ni Jehova: “Ginibo ko an saimong lalawgon na siring nanggad katagas kan saindang lalawgon asin an saimong angog na siring nanggad katagas kan saindang angog. Siring sa brilyante, na mas matagas pa kisa sa gapong kiskisan, ginibo ko an saimong angog.” (Ezeq. 3:8, 9) Kun kaipuhan, puede kitang tabangan ni Jehova na magin siring katagas kan brilyante arog kan kinaipuhan na mangyari ki Ezequiel.

Paglaban sa mga Sugot

Napatunayan nin mga paratumang na kun dai nagigin mapanggana an gabos na paaging ginamit ninda, kun beses kayang raoton nin nakakaakit na mga balos an integridad nin saro. Ginamit man ni Rabsaces an paaging ini. Sinabi nia sa mga nasa Jerusalem: “Ini an sinabi kan hade nin Asiria: ‘Sumuko kamo sa sako, asin luwason nindo ako . . .  sagkod na mag-abot ako asin darahon ko nanggad kamo sa sarong daga na kapareho kan sadiri nindong daga, daga nin tipasi asin bagong arak, daga nin tinapay asin mga ubasan, daga nin mga poon nin lanang oliba asin tangguli; asin padagos kamong mabuhay tanganing dai kamo magadan.’” (2 Ha. 18:31, 32) An paglaom na makakakan nin bagong tinapay asin makainom nin bagong arak seguradong nakakaakit na marhay para sa mga nalalaom sa lanob kan siudad na nasasalikopan!

An siring na alok ginamit tanganing probaran na paluyahon an determinasyon nin sarong nakabilanggong misyonero. Sinabihan sia na dadarahon sia sa “komportableng istaran” sa sarong “magayon na hardin” sa laog nin anom na bulan tanganing makapag-isip-isip sia. Minsan siring, an tugang nagdanay na alisto sa espirituwal asin dai ikinompromiso an mga prinsipyo nia bilang Kristiano. Ano an nakatabang sa saiya? Kan huri, ipinaliwanag nia: “Pirme kong iniisip na tunay na paglaom an manongod sa Kahadean. . . . Dai ako makokombensir na magkompromiso huling naparigon ako nin kaaraman dapit sa kahadean nin Dios saka segurado akong totoo iyan, asin nungka akong nagduwaduwa dian.”

Gurano katotoo sa sato an Kahadean nin Dios? An depisil na mga pagbalo natagalan kan patriarkang si Abraham, ni apostol Pablo, asin ni Jesus mismo huli ta tunay sa sainda an Kahadean. (Fil. 3:13, 14; Heb. 11:8-10; 12:2) Kun padagos niatong ineenot sa satong buhay an Kahadean asin ginigirumdom an nagdadanay na mga bendisyon kaiyan, makakaya man niatong labanan an sugot na akoon an mga alok na temporaryong pakaginhawa sa mga pagbalo.—2 Cor. 4:16-18.

Dai Kita Papabayaan ni Jehova

Sa ibong kan gabos na paghihingoa ni Rabsaces na takoton an mga Judio, si Ezequias asin an mga sakop nia marigon na nagtiwala ki Jehova. (2 Ha. 19:15, 19; Isa. 37:5-7) Dangan, an saindang pamibi na paghagad nin tabang sinimbag ni Jehova paagi sa pagsugo nin anghel tanganing gadanon sa sarong banggi an 185,000 na parapakilaban sa kampo nin mga Asirio. Kan suminunod mismong aldaw, si Senaquerib may kasusupgan na buminalik tolos sa saiyang kabisera, an Ninive, kaiba an pipira sanang natada sa saiyang hukbo.—2 Ha. 19:35, 36.

Malinaw nanggad, dai pinabayaan ni Jehova an mga nagtiwala sa saiya. An mga halimbawa kan satong mga tugang sa presenteng panahon na marigon na naninindogan sa ibong nin pagbalo nagpapaheling na ginigibo man iyan ni Jehova ngonyan. Sa siring, may marahay na dahelan na an satong langitnon na Ama nag-aasegurar sa sato: “Ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’”—Isa. 41:13.

[Nota sa Ibaba]

[Blurb sa pahina 13]

Labing 30 beses sa saiyang Tataramon na inaasegurar ni Jehova mismo an saiyang mga lingkod: “Dai ka matakot”

[Ritrato sa pahina 12]

Sa anong paagi nagkakaagid an mga taktikang ginamit ni Rabsaces kaidto asin an ginagamit kan mga kaiwal kan banwaan nin Dios ngonyan?

[Mga Ritrato sa pahina 15]

An dayupot na relasyon ki Jehova nakakatabang sa sato na mapagdanay an integridad sa ibong nin pagbalo