An Solamenteng Remedyo!

SARONG tawo na an ngaran Lazaro asin an saiyang mga tugang na babae, si Marta asin Maria, an nag-iistar sa Betania, sarong banwaan na mga tolong kilometro sa luwas kan Jerusalem. Sarong aldaw kan mayo an katood nindang si Jesus, si Lazaro nagkahelang nin grabe. Nahadit na marhay sa saiya an mga tugang nia. Nagpadara sinda nin mensahe ki Jesus. Paghaloyhaloy pagkatapos na mabaretaan iyan, si Jesus nagduman tanganing dalawon si Lazaro. Mantang nasa dalan, inimpormaran ni Jesus an saiyang mga disipulo na sia maduman tanganing pukawon si Lazaro sa pagkatorog. Kan primero dai sia nasabotan kan saiyang mga disipulo, alagad lininaw ni Jesus an bagay na iyan, na nagsasabi: “Si Lazaro nagadan.”—Juan 11:1-14.

Kan mag-abot si Jesus sa linobngan ki Lazaro, nagtao nguna sia nin instruksion na haleon an gapo na nakatahob sa entrada kan lolobngan. Pakapamibi nin makosog, sia nagboot: “Lazaro, lumuwas ka!” Asin luminuwas si Lazaro. An tawong gadan na nin apat na aldaw nabuhay liwat.—Juan 11:38-44.

An pagkasaysay may labot ki Lazaro nagpapaheling na an pagkabuhay liwat iyo an seguradong remedyo sa kagadanan. Alagad talaga daw na nangyari an milagro na pagbuhay liwat ki Lazaro? Ipinepresentar iyan kan Biblia bilang katotoohan. Basahon an pagkasaysay sa Juan 11:1-44, asin maheheling nindo kun gurano kalinaw an mga detalye kaiyan. Puede daw nindong deharan na nangyari iyan? An pagdehar kaiyan tibaad magtao sa saindo nin dahelan na pagdudahan an pagigin totoo kan gabos na milagro na nakasurat sa Biblia, kaiba an pagkabuhay liwat mismo ni Jesu-Cristo. Asin “kun si Cristo dai binuhay liwat,” an sabi kan Biblia, “an saindong pagtubod daing serbi.” (1 Corinto 15:17) An pagkabuhay liwat sarong pundamental na katokdoan na sono sa Kasuratan. (Hebreo 6:1, 2) Pero, ano an kahulogan kan terminong “pagkabuhay liwat”?

Ano an Kahulogan kan “Pagkabuhay Liwat”?

Sa Kristianong Griegong Kasuratan, an terminong “pagkabuhay liwat” minalataw nin labing 40 beses. Iyan trinadusir hale sa sarong termino sa Griego na sa literal nangangahulogan na “pagtindog giraray.” An katimbang na ekspresyon sa Hebreo nangangahulogan na “pagkabuhay giraray kan mga gadan.” Pagkagadan nin sarong tawo, ano an bubuhayon liwat? Dai puedeng an hawak, na nalalapa asin minabalik sa kabokabo kan daga. An binubuhay liwat bakong an iyo man sanang hawak kundi an iyo man sanang persona na nagadan. Sa siring, kalabot sa pagkabuhay liwat an pagbabalik sa dati kan ugale sa buhay kan indibiduwal—an saiyang personalidad, an saiyang personal na kasaysayan, asin an gabos na detalye kan saiyang karakter.

Si Jehova Dios, na may sangkap na memorya, mayo nin problema sa paggirumdom sa mga ugale sa buhay kan mga nagadan. (Isaias 40:26) Mantang sia an Kagtugdas nin buhay, kayang-kaya ni Jehova na buhayon liwat an iyo man sanang persona sa bagong pormahon na hawak. (Salmo 36:9) Dugang pa, an Biblia nagsasabi na si Jehova Dios igwa nin “paghimuyawot”—sarong odok na paghidaw asin pagmawot—na buhayon liwat an mga gadan. (Job 14:14, 15) Naoogma nanggad kita na bako sanang kaya ni Jehova na buhayon liwat an sarong tawo kundi gusto man niang gibohon iyan!

Si Jesu-Cristo igwa man nin importanteng marhay na kabtang sa pagbuhay liwat sa mga gadan. Labing kadikit sa sangtaon pagkatapos na ponan nia an saiyang ministeryo, si Jesus nagsabi: “Kun paanong an Ama minabangon kan mga gadan asin binubuhay sinda, binubuhay man kan Aki an mga boot niang buhayon.” (Juan 5:21) Bako daw na an eksperyensia ni Lazaro nagpapaheling na si Jesu-Cristo igwa nin kapangyarihan saka pagmawot na buhayon liwat an mga gadan?

 Kumusta man an ideya na may sarong bagay sa laog niato na padagos na nabubuhay pagkagadan niato? Sa katunayan, magkakontra an katokdoan na pagkabuhay liwat asin an ideya na inmortal an kalag o espiritu nin tawo. Kun may sarong bagay sa laog niato na nagdadanay na buhay pagkagadan niato, ano pa an serbi kan pagkabuhay liwat? An tugang ni Lazaro na si Marta dai nagtutubod na kan magadan an saiyang tugang, ini padagos na nag-eeksister sa rona nin mga espiritu. Nagtutubod sia sa pagkabuhay liwat. Kan aseguraron sia ni Jesus: “An saimong tugang mabangon,” si Marta nagsabi: “Aram ko na sia mabangon sa pagbuhay liwat sa huring aldaw.” (Juan 11:23, 24) Asin kan sia binuhay liwat, si Lazaro dai nag-estorya nin ano man na mga eksperyensia manongod sa buhay pagkagadan. Sia gadan. “Kun dapit sa mga gadan, mayo man lamang sinda nin pakaaram,” an sabi kan Biblia. “Mayo nin gibohon ni pagplano ni kaaraman ni kadonongan sa Sheol [an pankagabsan na lolobngan nin katawohan], an lugar na saimong papadumanan.”—Eclesiastes 9:5, 10.

Kun siring, oyon sa Biblia, an solamenteng remedyo sa kagadanan iyo an pagkabuhay liwat. Alagad sa dai mabilang na nagkagaradan, sairisay an bubuhayon liwat, asin saen?

Sairisay an Bubuhayon Liwat?

“An oras maabot na an gabos na nasa mga lolobngan na girumdoman makakadangog kan . . . tingog [ni Jesus] asin maruluwas,” an sabi ni Jesus. (Juan 5:28, 29) Segun sa panugang ini, an mga nasa lolobngan na girumdoman—mga nasa memorya ni Jehova—bubuhayon liwat. Kun siring, an hapot iyo ini, Sa gabos na nagkagaradan, sairisay an talagang nasa memorya nin Dios na naghahalat nin pagkabuhay liwat?

Sa libro kan Biblia na Hebreo kapitulo 11 nakalista an ngaran kan mga lalaki asin babae na maimbod na naglingkod sa Dios. Sinda saka an maimbod na mga lingkod nin Dios na nagkagaradan kan nakaagi pa sanang mga taon an makakabilang sa mga bubuhayon liwat. Kumusta man an mga tawong dai nakaabot sa mga pamantayan nin Dios sa katanosan, tibaad huli sa kadaihan nin kaaraman? Sinda daw nasa memorya man nin Dios? Iyo, dakol sinda, huling nanunuga an Biblia: “Magkakaigwa nin pagkabuhay liwat an mga matanos sagkod an mga bakong matanos.”—Gibo 24:15.

Minsan siring, bakong gabos na nabuhay kasuarin man maako nin pagkabuhay liwat. “Kun maggibo kita nin tuyong pagkakasala  pakatapos na maako niato an tamang kaaraman sa katotoohan,” an sabi kan Biblia, “mayo na nin natatadang atang para sa mga kasalan, kundi yaon an siertong makatatakot na paghalat sa paghokom.” (Hebreo 10:26, 27) May mga nakakomiter nin mga kasalan na mayo nin kapatawadan. Mayo sinda sa Hades (pankagabsan na lolobngan nin katawohan) kundi nasa Gehenna, sarong simbolikong lugar nin daing sagkod na pagkalaglag. (Mateo 23:33) Pero, kaipuhan na mag-ingat kita na dai magbanabana kun baga an sarong tawo bubuhayon liwat o dai. Sa Dios an paghokom na ini. Aram nia kun siisay an nasa Hades asin kun siisay an nasa Gehenna. Sa kabtang niato, marahay na mamuhay kita kaoyon kan kabotan nin Dios.

Pagkabuhay Liwat Pasiring sa Langit—Para Kiisay?

An pinakapambihirang pagkabuhay liwat iyo an ki Jesu-Cristo. Sia “ginadan sa laman, alagad binuhay sa espiritu.” (1 Pedro 3:18) Mayo nin tawong nakaeksperyensia kasuarin man nin arog kaiyan na pagkabuhay liwat bago kaidto. Si Jesus mismo nagsabi: “Mayo nin tawo na nagsakat sa langit kundi idtong naghilig hale sa langit, an Aki nin tawo.” (Juan 3:13) Iyo, an Aki nin tawo an enot na binuhay bilang espiritung persona. (Gibo 26:23) Asin igwang nagsurunod na iba pa. An Kasuratan nagsasabi: “An lambang saro sa saiyang sadiring ranggo: si Cristo an enot na bunga, dangan an mga rogaring ni Cristo sa panahon kan saiyang presensia.”—1 Corinto 15:23.

Sarong sadit na grupo nin mga tawo—“an mga rogaring ni Cristo”—an bubuhayon liwat pasiring sa langit para sa espesyal na katuyohan. (Roma 6:5) Sinda mamamahala kaiba ni Cristo bilang “mga hade sa daga.” (Kapahayagan 5:9, 10) Dugang pa, sinda maglilingkod bilang mga saserdote sa bagay na makikikabtang sinda sa paghale sa mga epekto kan kasalan na minana kan katawohan sa enot na tawo, si Adan. (Roma 5:12) An mga mamamahala kaiba ni Cristo bilang mga hade asin saserdote may kabilangan na 144,000. (Kapahayagan 14:1, 3) Anong klaseng hawak an itatao sa sainda kun sinda buhayon liwat? “Espirituwal na hawak,” an sabi kan Biblia. Gigibohon kaining posible na sinda mag-erok sa langit.—1 Corinto 15:35, 38, 42-45.

Noarin mangyayari an langitnon na pagkabuhay liwat? “Sa panahon kan . . . presensia” ni Cristo, an simbag kan 1 Corinto 15:23. An mga pangyayari sa kinaban poon kan 1914 malinaw na nagpapaheling na an presensia ni Cristo saka an “pagtatapos kan sistema nin mga bagay” nagpoon kan taon na iyan. (Mateo 24:3-7) Kaya may dahelan na magkonklusyon na an pagbuhay liwat sa maimbod na mga Kristiano pasiring sa langit nagpoon na, minsan ngani, siempre, dai naheheling nin mga tawo. Nangangahulogan iyan na an mga apostol asin an enot na mga Kristiano binuhay na pasiring sa langitnon na buhay. Kumusta man an mga Kristianong nabubuhay ngonyan na may seguradong paglaom na tao nin Dios na mamahala kaiba ni Cristo sa langit? Sinda bubuhayon “sa sarong pagpirok nin mata,” o tolos-tolos pagkagadan ninda. (1 Corinto 15:52) Mantang an pagbuhay liwat sa sadit na grupong ini nin 144,000 naeenot sa pagbuhay liwat sa dakulang kabilangan na bubuhayon liwat sa daga, iyan inaapod na “mas amay na pagkabuhay liwat” asin “enot na pagkabuhay liwat.”—Filipos 3:11; Kapahayagan 20:6.

Sairisay an Bubuhayon Liwat sa Daga?

Oyon sa Kasuratan, an dakulang mayoriya kan mga gadan bubuhayon liwat sa daga. (Salmo 37:29; Mateo 6:10) Ilinaladawan an saiyang pambihirang bisyon kan mga binuhay liwat, si apostol Juan nagsurat: “Itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian, asin an lambang saro hinokoman segun sa saindang mga gibo. Asin an kagadanan asin Hades iinapon sa danaw nin kalayo. Ini iyo an ikaduwang kagadanan, an danaw nin kalayo.” (Kapahayagan 20:11-14) An mga nasa Hades, o Sheol—an pankagabsan na lolobngan nin katawohan—nasa memorya nin Dios. An lambang saro sa sainda bubuhayon liwat. (Salmo 16:10; Gibo 2:31) Asin an lambang saro hohokoman segun sa ginibo nia pagkatapos na buhayon sia liwat. Kun siring, ano an mangyayari sa kagadanan asin Hades? An mga iyan iaapon sa “danaw nin kalayo.” Nangangahulogan ini na dai na sinda maaapektaran kan kagadanan na minana nin mga tawo ki Adan.

 Isip-isipa na sana an maogmang oportunidad na binuksan kan panugang pagkabuhay liwat para sa mga nagadanan nin namomotan! Kan buhayon liwat ni Jesus an solong aki kan babaeng balo sa Nain, kanigoan na kaogmahan an seguradong namatean kaini! (Lucas 7:11-17) Asin may labot sa mga magurang nin 12 anyos na aking babae na binuhay liwat ni Jesus, an Biblia nagsasabi: “Tolos-tolos sinda haros mawara sa sadiri huli sa labi-labi kadakulang kaogmahan.” (Marcos 5:21-24, 35-42; Lucas 8:40-42, 49-56) Sa ipinanuga nin Dios na bagong kinaban, nakakaogma nanggad na sabaton an mga namomotan.

Ano an puedeng magin epekto sa sato ngonyan kan pakaaram kan katotoohan manongod sa pagkabuhay liwat? “An kadaklan na tawo natatakot sa kagadanan asin nagmamaigot na dai pag-isipon iyan,” an sabi kan The World Book Encyclopedia. Taano? Huli ta para sa kadaklan na tawo, an kagadanan sarong misteryo—sarong bagay na dai aram asin dapat na katakotan. An pakaaram kan katotoohan manongod sa kamugtakan kan mga gadan asin an pagkaigwa kan paglaom na pagkabuhay liwat makakatao nin kosog nin boot sa sato kun mapaatubang kita sa “ultimong kaiwal, an kagadanan.” (1 Corinto 15:26) An kaaraman na ini nagpapangyari man na mas magin pasil na tioson an kolog na namamatean niato sa pagkagadan nin sarong dayupot na katood o paryente.

Noarin mapoon an daganon na pagkabuhay liwat? An daga ngonyan pano nin kadahasan, iriwal, pagpabolos nin dugo, asin polusyon. Kun an mga gadan buhayon liwat sa arog kaining kamugtakan sa daga, seguradong an ano man na kaogmahan magigin temporaryo sana. Minsan siring, an Kaglalang nanunuga na sa dai na mahahaloy tataposon nia an presenteng kinaban na nasa irarom kan kontrol ni Satanas. (Talinhaga 2:21, 22; Daniel 2:44; 1 Juan 5:19) An katuyohan nin Dios para sa daga madali nang maotob. Dangan, sa matoninong na bagong kinaban na gigibohon nin Dios, binilyon na nagtotorog ngonyan sa kagadanan an bubuhayon liwat.

[Ritrato sa pahina 7]

An kadaklan kan mga gadan bubuhayon liwat sa daga