Maglakaw Segun sa Pagtubod, Bakong Segun sa Naheheling!

“Kita naglalakaw segun sa pagtubod, bakong segun sa naheheling.”​—2 CORINTO 5:7.

1. Ano an nagpapaheling na si apostol Pablo naglakaw segun sa pagtubod, bakong segun sa naheheling?

AN TAON 55 C.E. Mga 20 taon na an nakaagi poon kan an Kristianismo maogmang inako nin sarong lalaki na an dating ngaran Saulo, sarong paralamag sa mga Kristiano. Dai nia tinogotan na mainaan o lumuya an saiyang pagtubod sa Dios sa paglihis nin panahon. Minsan ngani dai nia naheling an mga bagay sa langit paagi sa saiyang pisikal na mga mata, marigon an saiyang pagtubod. Kun siring, kan sinusuratan an linahidan na mga Kristiano, na may langitnon na paglaom, si apostol Pablo nagsabi: “Kita naglalakaw segun sa pagtubod, bakong segun sa naheheling.”​—2 Corinto 5:7.

2, 3. (a) Paano niato ipinapaheling na kita naglalakaw segun sa pagtubod? (b) Ano an boot sabihon kan paglakaw segun sa naheheling?

² An paglakaw segun sa pagtubod naghahagad nin lubos na tiwala sa kakayahan nin Dios na giyahan an satong buhay. Dapat na lubos kitang kombensido na talagang aram nia kun ano an pinakamarahay para sa sato. (Salmo 119:66) Mantang kita naggigibo nin mga desisyon sa buhay asin minahiro sono dian, kinokonsiderar niato an “mga katunayan na dai niato naheheling.” (Hebreo 11:​1, The New English Bible) Kaiba digdi an ipinanugang “bagong kalangitan asin sarong bagong daga.” (2 Pedro 3:13) Sa ibong na lado, an paglakaw segun sa naheheling nangangahulogan na kita namumuhay sa paagi na an solamenteng giya iyo an naririsa kan satong pisikal na mga sentido. Peligroso ini huli ta puede iyan na sumagkod sa satong lubos na pag-ignoro sa kabotan nin Dios.​—Salmo 81:12; Eclesiastes 11:9.

³ Baga man kita kabilang sa “sadangoton na aripompon,” na may langitnon na pag-apod, o sa “ibang karnero,” na may daganon na paglaom, maninigo na isapuso kan lambang saro sa sato an konseho na maglakaw segun sa pagtubod asin bakong segun sa naheheling. (Lucas 12:32; Juan 10:16) Aramon niato kun paanong an pagsunod sa ipinasabong na sadol na ini maprotehir sa sato na dai mabiktima kan “dai nagdadanay na pag-ogma sa kasalan,” dai masiod nin materyalismo, asin dai malingawan an katapusan kan sistemang ini nin mga bagay. Sisiyasaton man niato an mga peligro nin paglakaw segun sa naheheling.​—Hebreo 11:25.

Pagsikwal sa “Dai Nagdadanay na Pag-ogma sa Kasalan”

4. Ano an pinili ni Moises, asin taano?

⁴ Imahinaron an buhay na puede kutanang nakamtan ni Moises, na aki ni Amram. Huling pinadakula kaiba kan mga aki kan hade sa suanoy na Egipto, si Moises may potensial na magkamit nin kapangyarihan, kayamanan, asin impluwensia. Puede kutanang nangatanosan si Moises: ‘Ako naedukar na marhay sa ipinag-oorgolyong kadonongan kan Egipto, asin ako makapangyarihan sa tataramon asin sa gibo. Kun ako magdadanay na kabilang kan pamilya kan hade, puede kong gamiton an sakong posisyon tanganing pakinabangon an sakong inaaping mga tugang na Hebreo!’ (Gibo 7:22) Imbes, pinili ni Moises na “maapi kaibanan kan banwaan nin Dios.” Taano? Ano an nagpahiro ki Moises na talikdan an gabos na ikakatao kan Egipto? An Biblia nagsisimbag: “Huli sa pagtubod [si Moises] naghale sa Egipto, alagad dai sia natatakot sa kaanggotan kan hade, huli ta sia nagpadagos na marigon na garo baga nakakaheling kan Saro na dai naheheling.” (Hebreo 11:24-27) An pagtubod ni Moises sa seguradong balos ni Jehova para sa katanosan nakatabang sa saiya na labanan an kasalan asin pagpangana saka an temporaryong kasingawan kaiyan.

5. Paano napaparigon an satong boot kan halimbawa ni Moises?

⁵ Sa parate kita man nangangaipo na gumibo nin masakit na mga desisyon manongod sa mga isyu na siring kaini: ‘Maninigo ko daw na haleon an  nagkapirang kaugalean o pinagkatodan na bakong lubos na kaoyon kan mga prinsipyo sa Biblia? Maninigo ko daw na akoon an trabaho na garo baga may materyal na mga bentaha alagad makakaolang sa sakong pagtalubo sa espirituwal?’ An halimbawa ni Moises nagpaparigon sa satong boot na dai gumibo nin mga pagpili na nagpapabanaag kan halipot na pananaw kan kinaban na ini; imbes, maninigo kitang magtubod sa may harayong pananaw na kadonongan kan “Saro na dai naheheling”​—si Jehova Dios. Arog ni Moises, pakamahalon logod niato an pakikikatood ni Jehova kisa sa ano pa man na bagay na ikakatao kan kinaban na ini.

6, 7. (a) Paano ipinaheling ni Esau na mas suno niang maglakaw segun sa naheheling? (b) Anong nagpapatanid na halimbawa an makukua niato ki Esau?

⁶ Ikomparar an kalaenan ni Moises ki Esau, na aki kan patriarkang si Isaac. Mas suno ni Esau an pagpanigo tolos kan mawot. (Genesis 25:30-34) “Dai nagpapahalaga sa sagradong mga bagay,” ipinanao ni Esau an saiyang mga deretso bilang matua “huli sa sarong pagkakan.” (Hebreo 12:16) Dai nia hinorophorop kun paano makakaapektar sa saiyang relasyon ki Jehova an saiyang desisyon na ipabakal an saiyang pagkamatua o kun ano an magigin impluwensia sa saiyang mga aki kan saiyang gigibohon. Mayo sia nin espirituwal na pagmansay. Ipinirong ni Esau an saiyang mga mata sa mahal na marhay na mga panuga nin Dios, na ibinibilang iyan na bakong gayong mahalaga. Sia naglakaw segun sa naheheling, bakong segun sa pagtubod.

⁷ Si Esau sarong nagpapatanid na halimbawa para sa sato ngonyan. (1 Corinto 10:11) Kun kita napapaatubang sa mga pagdedesisyon, baga man dakula o sadit, dai kita dapat na masugotan kan propaganda kan kinaban ni Satanas, na nagsasabi na dapat nindong makua an gusto nindo ngonyan mismo. Maninigo na hapoton niato an satong sadiri: ‘Nahahayag daw an arog-Esau na mga tendensia sa mga desisyon na ginigibo ko? An paghihingoa ko daw na makamtan an gusto ko ngonyan mangangahulogan na ipapagilid ko an espirituwal na intereses? Isinasapeligro daw kan sakong mga pinipili an sakong pakikikatood sa Dios asin an sakong balos sa ngapit? Anong klaseng halimbawa an itinatao ko sa iba?’ Kun ipinapabanaag kan satong mga pinipili an pag-apresyar sa sagradong mga bagay, bebendisyonan kita ni Jehova.​—Talinhaga 10:22.

Paglikay sa Siod nin Materyalismo

8. Anong patanid an inako kan mga Kristiano na taga Laodicea, asin taano ta interesado kita dian?

⁸ Sa sarong kapahayagan ki apostol Juan sa paghinanapos kan enot na siglo, itinao kan pinamuraway na si Jesu-Cristo an sarong mensahe sa kongregasyon na nasa Laodicea, Asia Minor. Iyan sarong mensahe nin patanid tumang sa materyalismo. Minsan ngani mayaman sa materyal, an mga Kristiano na taga Laodicea dukha sa espirituwal. Imbes na padagos na maglakaw segun sa pagtubod, tinogotan ninda an materyal na mga rogaring na tahoban an saindang espirituwal na pakamansay. (Kapahayagan 3:14-18) An materyalismo may kaagid na epekto ngonyan. Pinapaluya kaiyan an satong pagtubod asin pinapaontok kita sa ‘pagdalagan na may pakatagal sa paorumbasan’ para sa buhay. (Hebreo 12:1) Kun kita bakong maingat, puedeng agawan nin lugar kan mga “kaalingan kan buhay na ini” an espirituwal na mga aktibidad sagkod sa punto na iyan ‘biyong mapuot.’​—Lucas 8:14.

9. Paano kita pinoprotehiran kan pagkakontento asin pag-apresyar sa espirituwal na kakanon?

⁹ An importanteng marhay tanganing maprotehiran sa espirituwal iyo an pagkakontento imbes na an paggamit nin lubos kan kinaban na ini asin an pagpayaman sa materyal. (1 Corinto 7:31; 1 Timoteo 6:6-8) Kun kita naglalakaw segun sa  pagtubod asin bakong segun sa naheheling, nakakanompong kita nin kagayagayahan sa presenteng espirituwal na paraiso. Mantang kita nagkakakan nin masustansiang espirituwal na kakanon, bako daw na kita napapahiro na ‘magkururahaw sa kagayagayahan huli sa marahay na kamugtakan kan puso’? (Isaias 65:​13, 14) Dugang pa, ikinakaogma niatong marhay an satong pakikiasosyar sa mga nagpapaheling kan mga bunga kan espiritu nin Dios. (Galacia 5:​22, 23) Mahalaga nanggad na makanompong kita nin satispaksion asin karepreskohan sa itinatao ni Jehova sa espirituwal na paagi!

10. Anong mga hapot an maninigo niatong ihapot sa satong sadiri?

¹⁰ An nagkapirang hapot na maninigo niatong ihapot sa satong sadiri iyo ini: ‘Gurano kahalaga kan materyal na mga bagay sa sakong buhay? Ginagamit ko daw an sakong materyal na mga rogaring sa pamumuhay sa kasingawan o sa pagsuportar sa tunay na pagsamba? Ano an nagtatao sa sako kan pinakadakulang satispaksion? An pag-adal daw sa Biblia asin pakikiasosyar sa Kristianong mga pagtiripon, o an mga katapusan kan semana na libre sa Kristianong mga paninimbagan? Itinatagama ko daw an dakol na katapusan kan semana para sa pag-aling-aling imbes na gamiton an siring na panahon para sa ministeryo sa langtad asin iba pang mga aktibidad na konektado sa dalisay na pagsamba?’ An paglakaw segun sa pagtubod nangangahulogan na nagdadanay kitang sibot sa gibong pan-Kahadean, na nagtitiwala nin lubos sa mga panuga ni Jehova.​—1 Corinto 15:58.

Pagdanay na Harani sa Isip an Katapusan

11. Paano an paglakaw segun sa pagtubod nakakatabang sa sato na magdanay na harani sa isip an katapusan?

¹¹ An paglakaw segun sa pagtubod nagtatabang sa sato na rayoan an sa laman na mga punto de vista na harayo pa an katapusan o na iyan dai na madatong. Bakong arog kan mga mapagduda na inoolog-olog an hula sa Biblia, naririsa niato kun paano inootob kan mga pangyayari sa kinaban an ihinula kan Tataramon nin Dios para sa satong kaaldawan. (2 Pedro 3:​3, 4) Halimbawa, bako daw na sa pankagabsan an aktitud asin ugale kan mga tawo nagpapatunay na kita nabubuhay sa “huring mga aldaw”? (2 Timoteo 3:1-5) Paagi sa mga mata nin pagtubod, naheheling niato na an presenteng mga pangyayari sa kinaban bako sanang pagkaotro kan kasaysayan. Imbes, an mga iyan iyo an ‘tanda kan presensia ni Cristo asin kan pagtatapos kan sistema nin mga bagay.’​—Mateo 24:1-14.

12. Paano naotob kan enot na siglo an mga tataramon ni Jesus na nakarekord sa Lucas 21:​20, 21?

¹² Estudyaran an sarong pangyayari kan enot na siglo kan satong Komun na Kapanahonan na may pagkakaagid sa satong kaaldawan. Kan uya pa digdi sa daga, pinatanidan ni Jesu-Cristo an saiyang mga parasunod: “Kun maheling na nindo an Jerusalem na napapalibotan nin nagkakampong mga hukbo, dangan aramon nindo na harani na an paggaba sa saiya. Dangan an mga nasa Judea magpoon nang dumulag pasiring sa kabukidan, asin an mga nasa tahaw nia magruluwas.” (Lucas 21:​20, 21) Bilang kaotoban kan hulang ini, an Jerusalem sinalikopan kan mga hukbong Romano na pinapangenotan ni  Cestio Gallo kan 66 C.E. Alagad an mga hukbo biglang uminatras, na nagtatao kan tanda asin kan oportunidad para sa mga Kristianong yaon duman na “dumulag pasiring sa kabukidan.” Kan 70 C.E., nagbalik an mga hukbong Romano, sinakyada an siudad nin Jerusalem, asin linaglag an templo kaiyan. Irinereport ni Josefo na labing sarong milyon na Judio an nagadan, asin 97,000 an dinarang bihag. Hinokoman nin Dios an Judiong sistemang iyan nin mga bagay. An mga naglakaw segun sa pagtubod asin naghimate sa patanid ni Jesus nakadulag sa kalamidad.

13, 14. (a) Ano an madali nang mangyari? (b) Taano ta maninigo kitang magdanay na mapagbantay sa kaotoban kan hula sa Biblia?

¹³ Madali nang mangyari sa satong kaaldawan an kaagid kaiyan. An mga elemento sa laog kan Naciones Unidas mapapalabot sa paggibo kan paghokom nin Dios. Kun paanong an mga hukbong Romano kan enot na siglo inorganisar sa katuyohan na papagdanayon an Pax Romana (Romanong Katoninongan), an Naciones Unidas sa presente minukna sa katuyohan na magin sarong instrumento sa pagpapadanay nin katoninongan. Minsan ngani an mga hukbong Romano naghingoa na sa limitadong paagi gibohon na ligtas sa peligro an bilog na kinaban kan panahon na idto, sinda an nagin paralaglag kan Jerusalem. Kaagid kaiyan ngonyan, ipinaparisa kan hula sa Biblia na an militarisadong mga nasyon sa laog kan Naciones Unidas ibibilang an relihion na nakakaparibok na elemento asin mahiro tanganing laglagon an Jerusalem sa presenteng aldaw​—an Kakristianohan​—siring man an iba pang kabtang kan Dakulang Babilonya. (Kapahayagan 17:12-17) Iyo, an enterong sakop kan pambilog na kinaban na imperyo nin falsong relihion madali nang laglagon.

¹⁴ An paglaglag sa falsong relihion iyo an magigin kapinonan kan dakulang kahorasaan. Sa ultimong kabtang kan dakulang kahorasaan, an natatadang mga elemento kan maraot na sistemang ini nin mga bagay malalaglag. (Mateo 24:​29, 30; Kapahayagan 16:​14, 16) An paglakaw segun sa pagtubod pinapapagdanay kitang mapagbantay sa kaotoban kan hula sa Biblia. Dai kita nadadayang mag-isip na an arin man na ahensia na gibo nin tawo arog kan Naciones Unidas kinakasangkapan nin Dios sa pagtao nin tunay na katoninongan asin katiwasayan. Kun siring, bako daw na maninigong ipaheling kan satong paagi nin pamumuhay an satong kombiksion na “an dakulang aldaw ni Jehova harani na”?​—Sofonias 1:14.

Paglakaw Segun sa Naheheling​—Gurano Kapeligroso?

15. Apisar kan pakaeksperyensia ninda kan bendisyon nin Dios, nahulog sa anong siod an nasyon nin Israel?

¹⁵ An mga eksperyensia kan suanoy na Israel nag-iilustrar kan mga peligro sa pagtogot na lumuya an pagtubod nin saro huli sa paglakaw segun sa naheheling. Apisar na nakaheling mismo kan sampulong damat na nagsupog sa falsong mga dios kan Egipto dangan nakaeksperyensia nin pambihirang pagliligtas sa Dagat na Pula, an mga Israelita may kasumbikalan na naggibo nin bulawan na ogbon na baka asin nagpoon na sambahon iyan. Sinda napungot asin napagal sa paghalat ki Moises, na “nahahaloy na humilig hale sa bukid.” (Exodo 32:1-4) An kadaihan nin pasensia nagpahiro sa sainda na sambahon an sarong idolo na naheheling kan pisikal na mata. An paglakaw ninda segun sa naheheling nakainsulto ki Jehova asin nagresulta sa paggadan sa “mga tolong ribong lalaki.” (Exodo 32:25-29) Kanigoan kamakamomondo kun an sarong nagsasamba ki Jehova ngonyan gumibo nin mga desisyon na nagpaparisa nin pagdeskompiar ki Jehova asin nin kadaihan nin kompiansa sa kakayahan nia na otobon an saiyang mga panuga!

16. Paano naapektaran an mga Israelita kan panluwas na mga itsura?

¹⁶ An panluwas na mga itsura nagkaigwa nin negatibong epekto sa mga Israelita sa iba pang mga paagi. Huli sa paglakaw segun sa naheheling sinda nagtakig huli sa takot sa saindang mga kaiwal.  (Bilang 13:​28, 32; Deuteronomio 1:28) Nagin dahelan iyan na angaton ninda an autoridad ni Moises na tao nin Dios asin magreklamo manongod sa kamugtakan ninda sa buhay. Huli sa kadaihan na ini nin pagtubod mas ginusto ninda an Egipto na kontrolado nin demonyo kisa sa Dagang Panuga. (Bilang 14:1-4; Salmo 106:24) Siertong nakolgan na marhay an boot ni Jehova mantang naheheling nia an grabeng kadaihan nin paggalang kan saiyang banwaan sa saindang dai naheheling na Hade!

17. Ano an dahelan na hinaboan kan mga Israelita an paggiya ni Jehova kan kaaldawan ni Samuel?

¹⁷ Sa giraray, kan kaaldawan ni propeta Samuel, an pinaboran na nasyon nin Israel nahulog sa siod nin paglakaw segun sa naheheling. An banwaan nagpoon na magmawot na magkaigwa nin hade na naheheling ninda. Minsan ngani ipinaheling na ni Jehova na sia an Hade ninda, bako ining igo tangani na sinda maglakaw segun sa pagtubod. (1 Samuel 8:4-9) Sa sadiri nindang ikakapahamak, may kalolongan nindang hinaboan an daing kasalasala na paggiya ni Jehova, na mas ginusto pang magin kapareho kan nakapalibot na mga nasyon.​—1 Samuel 8:​19, 20.

18. Anong mga leksion an manonodan niato manongod sa mga peligro sa paglakaw segun sa naheheling?

¹⁸ Bilang mga lingkod ni Jehova sa presenteng aldaw, minamahal niato an satong marahay na relasyon sa Dios. Gustong-gusto niatong manodan asin iaplikar sa satong buhay an mahahalagang leksion sa mga pangyayari kaidto. (Roma 15:4) Kan an mga Israelita maglakaw segun sa naheheling, nalingawan ninda na ginigiyahan sinda nin Dios paagi ki Moises. Kun bako kitang maingat, puede man niatong malingawan na si Jehova Dios asin an Moises na Orog na Dakula, si Jesu-Cristo, an naggigiya sa Kristianong kongregasyon ngonyan. (Kapahayagan 1:12-16) Dapat kitang magmaan na dai magkaigwa nin sa tawong punto de vista sa daganon na kabtang kan organisasyon ni Jehova. An pagkaigwa niato kaiyan puedeng magbunga nin mapagreklamong aktitud asin pagkawara nin pag-apresyar sa mga representante ni Jehova saka sa espirituwal na kakanon na itinatao kan “maimbod asin mapagmansay na oripon.”​—Mateo 24:45.

Magin Desididong Maglakaw Segun sa Pagtubod

19, 20. Ano an desidido nindong gibohon, asin taano?

¹⁹ “Kita nakikipaggumolan,” an sabi kan Biblia, “bakong tumang sa dugo asin laman, kundi tumang sa mga gobyerno, tumang sa mga autoridad, tumang sa mga namamahala sa kinaban sa kadikloman na ini, tumang sa maraot na mga puersang espiritu sa langitnon na mga lugar.” (Efeso 6:12) An satong pangenot na kaiwal iyo si Satanas na Diablo. An saiyang katuyohan raoton an satong pagtubod ki Jehova. Dai nia papalampason an ano man na klase nin pan-agyat na puedeng makapasuki sa sato parayo sa satong desisyon na maglingkod sa Dios. (1 Pedro 5:8) Ano an makakaprotehir sa sato na dai madaya kan panluwas na itsura kan sistema ni Satanas? An paglakaw segun sa pagtubod, bakong segun sa naheheling! An pagtitiwala asin pagkompiar sa mga panuga ni Jehova maprotehir sa sato na dai makaeksperyensia nin ‘pagkabagbag may labot sa satong pagtubod.’ (1 Timoteo 1:19) Kun siring, magin determinado nanggad kitang padagos na maglakaw segun sa pagtubod, na biyong kompiado sa bendisyon ni Jehova. Asin padagos logod kitang mamibi na madulagan niato an gabos na bagay na nakatalagang mangyari sa haraning ngapit.​—Lucas 21:36.

²⁰ Mantang kita naglalakaw segun sa pagtubod, bakong segun sa naheheling, igwa kita nin marahayon na Arogan. “Si Cristo nagdusa para sa saindo,” an sabi kan Biblia, “na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) Totokaron kan sunod na artikulo kun paano kita padagos na makakalakaw arog kan paglakaw nia.

Nagigirumdoman daw Nindo?

• Ano an nanodan nindo sa mga halimbawa ni Moises asin Esau manongod sa paglakaw segun sa pagtubod, bakong segun sa naheheling?

• Ano an importanteng marhay tanganing malikayan an materyalismo?

• Paanong an paglakaw segun sa pagtubod nakakatabang sa sato na malikayan an punto de vista na harayo pa an katapusan?

• Taano ta peligroso an paglakaw segun sa naheheling?

[Mga Hapot Para sa Pag-adal]

[Ritrato sa pahina 17]

Si Moises naglakaw segun sa pagtubod

[Ritrato sa pahina 18]

Parate daw na nakakaolang sa saindong teokratikong mga aktibidad an pag-aling-aling?

[Ritrato sa pahina 20]

Paano nagpoprotehir sa saindo an pagtao nin atension sa Tataramon nin Dios?