Pagmaigotan na Helingon an Iba nin Siring sa Pagheling sa Sainda ni Jehova

“An pagheling nin Dios bakong arog kan pagheling nin tawo.”​—1 SAMUEL 16:7.

1, 2. Paanong an pagheling ni Jehova ki Eliab laen kisa pagheling ni Samuel, asin ano an manonodan niato digdi?

KAN ika-11 siglo B.C.E., isinugo ni Jehova si propeta Samuel sa sarong hilom na misyon. Pinagbotan nia an propeta na magduman sa harong nin sarong lalaki na an ngaran Jese asin lahidan an saro sa mga aking lalaki ni Jese na magigin hade sa Israel. Kan maheling ni Samuel an panganay na aki ni Jese, si Eliab, segurado na siang nanompongan na nia an pinili nin Dios. Alagad nagsabi si Jehova: “Dai ka magheling sa saiyang lalauogon asin sa langkaw kan tindog nia, huli ta hinaboan ko sia. Huli ta an pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.” (1 Samuel 16:6, 7) An nagin pagheling ni Samuel ki Eliab bakong siring sa pagheling sa saiya ni Jehova. *

² Madali nanggad na masala an mga tawo sa saindang paghusgar sa iba! Sa sarong kampi, tibaad madaya kita nin mga indibiduwal na nakaaakit sa panluwas alagad daing prinsipyo sa panlaog na pagkatawo. Sa ibong na kampi, tibaad estrikto asin mahigpit kita sa satong paghusgar sa sinserong mga indibiduwal na an personalidad ikinauuyam niato.

3, 4. (a) Kun may maglataw na problema sa pag-oltanan nin duwang Kristiano, ano an maninigo na determinadong gibohon kan lambang saro? (b) Ano an mga maninigo na ihapot niato sa satong sadiri kun igwa kita nin seryosong dai pagkasinabotan nin sarong kapagtubod?

³ Puedeng maglataw an mga problema kun marikas kita sa paghusgar sa iba​—maski sa dakol nang taon na mga kamidbid niato. Tibaad igwa kamo nin seryosong pinag-iwalan nin sarong Kristiano na dati nindong dayupot na katood. Boot daw nindong ibalik an pagkakatood nindo? Ano an matabang sa saindo na magibo ini?

⁴ Taano ta dai helingon nin lubos, haloy, asin positibo an Kristianong tugang nindo na iyan? Asin gibohon ini na kinokonsiderar an mga tataramon ni Jesus: “Dai nin makadodolok sa sako kun dai sia dagkahon kan Ama na nagsugo sa sako.” (Juan 6:44) Dangan hapoton an saindong sadiri, ‘Taano ta dinagka ni Jehova an tawong ini sa Saiyang Aki? Anong kawiliwiling mga kualidad an yaon sa indibiduwal na iyan? Iniignoro o minemenos ko daw an mga kualidad na ini? Tadaw ngani ta nagin magkatood kami kaidto? Ano an nakadagka sako sa tawong ini?’ Sa primero, tibaad depisil na makaisip kamo nin marahay na mga kualidad, lalo na kun haloy-haloy na kamong may maraot na boot. Minsan  siring, mahalagang marhay na lakdang ini sa pagresolber kan dai pagkasinabotan nindong duwa. Sa pag-ilustrar kun paano ini magigibo, hanapon niato an positibong mga kualidad nin duwang lalaki na kun beses hineheling sa negatibong paagi. Sinda si propeta Jonas asin si apostol Pedro.

Sadiosan na Pagheling ki Jonas

5. Ano an isinugo ki Jonas, asin ano an ginibo nia?

⁵ Si Jonas naglingkod bilang propeta sa kahadean nin Israel sa amihanan kan kaaldawan ni Hadeng Jeroboam II, na aki ni Joas. (2 Hade 14:23-25) Sarong aldaw, pinagbotan ni Jehova si Jonas na humale sa Israel asin magduman sa Ninive, an kabisera kan poderosong Imperyo nin Asiria. An asignasyon nia? Patanidan an mga nag-eerok dian na an saindang dakulang siudad lalaglagon. (Jonas 1:​1, 2) Imbes na sunodon an instruksion nin Dios, nagdulag si Jonas! Nagsakay sia sa sarong barko na pa-Tarsis, harayo sa Ninive.​—Jonas 1:3.

6. Taano ta pinili ni Jehova si Jonas na magduman sa Ninive?

⁶ Ano an minasabong sa isip nindo kun iniisip nindo si Jonas? Iniisip daw nindo na sia sarong masinuway na propeta? Iyan an tibaad magin konklusyon nin hababaw na pagheling sa saiya. Alagad ninombrahan daw nin Dios si Jonas bilang propeta huli ta sia masinuway? Siempre dai! Si Jonas siertong igwa nin nagkapirang kawiliwiling kualidad. Estudyare an saiyang rekord bilang propeta.

7. Sa anong mga kamugtakan naglingkod kaidto si Jonas ki Jehova sa Israel, asin paano an pakaaram kaini nakaaapektar sa pagheling nindo sa saiya?

⁷ Si Jonas totoong nagmaigot nin fiel sa Israel, sarong teritoryo na dai nanggad naghihimate. Ilinadawan ni propeta Amos, na nabuhay haros kasabay ni Jonas, na an mga Israelita kaidto mga materyalistiko na mamomoton sa kasingawan. * Maraot an mga nangyayari sa daga, alagad an mga Israelita biyong daing pakilabot sa mga iyan. (Amos 3:13-15; 4:4; 6:4-6) Pero, padagos na fiel na inootob ni Jonas an sugo sa saiya na maghulit sa sainda. Kun kamo parabalangibog kan maogmang bareta, aram nindo kun gurano kadepisil makipag-olay sa mga tawong  naninigoan na sa sadiri asin indiperente. Kaya, kun siring, baga man rinerekonoser an mga kaluyahan ni Jonas, dai niato paglingawan an saiyang mga kualidad na pagigin fiel asin pakatagal mantang sia naghuhulit sa bakong fiel na mga Israelita.

8. Anong mga angat an mapapaatubang sa sarong propetang Israelita sa Ninive?

⁸ An asignasyon na magduman sa Ninive may kalabot na orog pa nganing masakit na angat. Tanganing makaabot sa siudad na iyan, si Jonas kinaipuhan na magbaklay nin mga 800 kilometros​—sarong masakit na pagbaklay nin mga sambulan. Kun yaon na dian, an propeta kaipuhan na maghulit sa mga Asirio, na midbid na marhay sa saindang karingisan. An sadistikong pagpasakit parate nang kabtang kan saindang pakikilaban. Ipinaghambog pa ngani ninda an saindang kadahasan. Bakong makangangalas na an Ninive inapod na “siudad nin pagpabolos nin dugo”!—Nahum 3:1, 7.

9. Kan mameligro an mga marinero dahel sa makosog na bagyo, anong mga kualidad an ipinaheling ni Jonas?

⁹ Magabat an boot na kuyogon an pagboot ni Jehova, si Jonas nagsakay sa barko na parayo sa asignasyon sa saiya. Minsan siring, si Jehova dai nawaran nin paglaom sa saiyang propeta o nag-areglo na salidahan sia. Imbes, huminiro si Jehova tanganing tabangan si Jonas na makapag-isip-isip. Nagpaabot an Dios nin sarong makosog na bagyo sa dagat. An barkong sinasakyan ni Jonas inaapwak-apwak kan mga alon. Magagadan an inosenteng mga tawo, dahel sana ki Jonas! (Jonas 1:4) Ano an gigibohon ni Jonas? Huling habo niang magadan an mga marinero sa barko dahel sa saiya, sinabihan sinda ni Jonas: “Buhata nindo ako asin iholog nindo ako sa dagat, asin an dagat matoninong para sa saindo.” (Jonas 1:12) Mayo siang dahelan na isipon na isasalbar sia ni Jehova, kan sa katapustapusi talagang ihinolog sia kan mga marinero sa dagat. (Jonas 1:15) Minsan siring, si Jonas andam na magadan tanganing dai magadan an mga marinero. Bako daw na naheheling niatong nahayag digdi an mga kualidad na kosog nin boot, kapakumbabaan, asin pagkamoot?

10. Ano an nangyari pagkatapos na inotro ni Jehova an asignasyon ki Jonas?

¹⁰ Sa katapustapusi, isinalbar ni Jehova si Jonas. An bago pa sana daw na mga ginibo ni Jonas nagin dahelan na dai na sia kualipikadong maglingkod giraray sa Dios sa opisyal na katongdan? Dai, maheherakon asin mamomoton na inotro ni Jehova an sugo sa propeta na maghulit sa mga taga Ninive. Pagdatong ni Jonas sa Ninive, may kosog nin boot na sinabihan nia an mga nag-eerok dian na an saindang grabeng karatan nakaabot na sa Dios asin na an saindang siudad lalaglagon sa ika-40 aldaw. (Jonas 1:2; 3:4) Pagkadangog kan prangkang mensahe ni Jonas, nagsolsol an mga taga Ninive, asin dai linaglag an saindang siudad.

11. Ano an nagpapaheling na nakanood si Jonas nin mahalagang leksion?

¹¹ Bako pa man giraray tama an punto de vista ni Jonas. Pero paagi sa sarong praktikal na halimbawa, mapasensiang tinabangan ni Jehova si Jonas na manodan na Sia nagheheling bako sanang sa itsura. Sinisiyasat Nia an puso. (Jonas 4:5-11) An bagay na nakanood si Jonas nin mahalagang leksion risang-risa sa sadiosan na pagkasaysay na isinurat nia mismo. An saiyang pagigin andam na ipaaram an saiyang mga pagkukulang sa makasusupog na detalye dugang pang patotoo kan saiyang kapakumbabaan. Kaipuhan an kosog nin boot tanganing admitiron an sala!

12. (a) Paano niato naaaraman na kapareho ni Jesus si Jehova sa pagheling sa mga tawo? (b) Ineenkaminar kita na papagdanayon an anong pagheling sa mga tawo na hinuhulitan niato kan maogmang bareta? (Helingon an kahon sa pahina 18.)

¹² Pakalihis nin dakol na siglo, si Jesu-Cristo may positibong sinabi manongod sa sarong pangyayari sa buhay ni Jonas. Sia nagsabi: “Kun paanong si Jonas yaon sa laog kan tulak kan dakulang sira nin tolong aldaw asin tolong banggi, siring man an Aki nin tawo mamumugtak sa puso kan daga sa laog nin tolong aldaw asin tolong banggi.” (Mateo 12:40) Pagbinuhay na liwat si Jonas, maaaraman nia na an panahon mismo ni Jesus sa lolobngan ikinomparar Nia sa madiklom na panahon na ini sa  buhay kan propeta. Bako daw na naoogma kitang maglingkod sa sarong Dios na dai nawawaran nin paglaom sa saiyang mga lingkod kun sinda nasasala? An salmista nagsurat: “Kun paanong an ama nagpapaheling nin pagkaherak sa saiyang mga aki, si Jehova nagpapaheling man nin pagkaherak sa mga natatakot sa saiya. Huli ta sia mismo nakaaaram na gayo kan pagkaporma sa sato, na ginigirumdom na kita kabokabo.” (Salmo 103:13, 14) Tunay nanggad, dakol an magigibo kan “kabokabo” na ini—kabale an bakong sangkap na mga tawo ngonyan—paagi sa pagsuportar kan banal na espiritu nin Dios!

Timbang na Pagheling ki Pedro

13. Anong mga ugale ni Pedro an tibaad sumabong sa isip, alagad taano ta pinili sia ni Jesus bilang apostol?

¹³ Pag-olayan niato ngonyan sa halipot an ikaduwang halimbawa, an ki apostol Pedro. Kun ipapaladawan saindo si Pedro, tolos-tolos daw nindong maiisip an mga karakteristiko na arog kan pabiglabigla, pusokpusokan, asin pangahas pa ngani? May beses na talagang naheling ki Pedro an siring na mga ugale. Minsan siring, pinili daw kutana ni Jesus si Pedro bilang saro sa 12 apostol nia kun si Pedro talagang pabiglabigla, pusokpusokan, o pangahas na tawo? (Lucas 6:12-14) Siempre dai! Malinaw na inignoro ni Jesus an mga depektong ini asin minansay an positibong mga kualidad ni Pedro.

14. (a) Ano an tibaad dahelan kan garo baga pagkaprangka ni Pedro? (b) Taano ta maninigo kitang magpasalamat na si Pedro parateng naghahapot?

¹⁴ May beses na si Pedro nagin representante sa pagtaram kan ibang apostol. Tibaad sa pagheling nin nagkapira ebidensia ini nin kadaihan nin kababaan nin boot. Alagad totoo daw talaga iyan? May mga nagsasabi na si Pedro tibaad mas matua sa iba pang apostol​—mas matua ngani gayod ki Jesus. Kun tama iyan, tibaad ini an dahelan kun taano ta si Pedro an parateng gayo na naeenot magtaram. (Mateo 16:22) Minsan siring, may saro pang dapat konsideraron. Si Pedro sarong tawong espirituwal. An pagmawot niang magkaigwa nin kaaraman an nagpahiro sa saiya na magparahapot. Nakinabang kita dian. Dakol an mahalagang marhay na sinabi ni Jesus bilang simbag sa mga hapot ni Pedro, asin isinurat an mga ini sa Biblia. Halimbawa, bilang simbag sa sinabi ni Pedro an pagtaram ni Jesus manongod sa “fiel na mayordomo.” (Lucas 12:41-44) Asin isip-isipa an hapot ni Pedro: “Binayaan mi na an gabos na bagay asin nagsunod saimo; ano man nanggad an yaon para sa samo?” Nagresulta ini sa nakapakokosog na panuga ni Jesus: “An gabos na nagbaya nin mga harong o mga tugang na lalaki o mga tugang na babae o ama o ina o mga aki o mga daga para sa sakuyang ngaran maako nin mas dakol pa asin magmamana nin buhay na daing katapusan.”—Mateo 15:15; 18:​21, 22; 19:27-29.

15. Taano ta masasabi na si Pedro totoong maimbod?

¹⁵ Si Pedro igwa nin saro pang marahayon na kualidad—sia maimbod. Kan an dakol sa mga disipulo pumondo sa pagsunod ki Jesus huli ta dai ninda nasasabotan an saro sa saiyang katokdoan, si Pedro an nagtaram para sa 12 apostol asin nagsabi: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan.” (Juan 6:66-68) Sierto nanggad na ikinaogma kan puso ni Jesus an mga tataramon na iyan! Kan huri, kan dumatong an sururog tanganing arestaron an Kagurangnan, an kadaklan sa saiyang mga apostol nagdurulag. Minsan siring, sinundan ni Pedro an mga tawo sa haroharayo asin  naglaog sia mismo sa patyo kan halangkaw na saserdote. Kosog nin boot, bakong katalawan, an nagdara sa saiya duman. Mantang inuusisa si Jesus, uminayon si Pedro sa sarong grupo nin mga Judio na nagpapahimbong sa maliwanag na kalayo. Namidbid sia kan saro sa mga oripon kan halangkaw na saserdote asin sinahotan sia na kaiba ni Jesus. Iyo, pinaindahan ni Pedro an saiyang Kagurangnan, alagad dai niato paglingawan na an kaimbodan asin pagmalasakit ki Jesus an nagbugtak ki Pedro sa delikadong situwasyon na idto, situwasyon na mayo nin kosog nin boot na atubangon kan kadaklan sa mga apostol.—Juan 18:15-27.

16. Huli sa anong praktikal na dahelan kinonsiderar niato an positibong mga kualidad ni Jonas asin ni Pedro?

¹⁶ An positibong mga kualidad ni Pedro nakalabi kisa mga pagkukulang nia. Totoo man iyan ki Jonas. Kun paanong hineling niato si Jonas asin si Pedro nin mas positibo kisa normal na pagheling niato, dapat man niatong sanayon an satong sadiri na magin mas positibo sa paghusgar niato sa satong espirituwal na mga tugang sa presenteng aldaw. An paggibo kaiyan magbubunga nin mas marahay na relasyon sa sainda. Taano ta totoong kinakaipuhan ini?

Pag-aplikar kan Leksion Ngonyan

17, 18. (a) Taano ta puedeng lumataw an mga dai pagkasinabotan sa pag-oltanan nin mga Kristiano? (b) Anong hatol sa Biblia an makatatabang sa sato na resolberan an mga problema sa kapagtubod?

¹⁷ An mga lalaki, babae, asin mga aki sa ano man na kamugtakan nin pagbuhay saka inadalan patin rasa sararong naglilingkod ki Jehova ngonyan. (Kapahayagan 7:​9, 10) Manlaenlaen nanggad na personalidad an naheheling niato sa Kristianong kongregasyon! Huling kita naglilingkod sa Dios na haraning nagkakairibanan, dai malilikayan na kun beses malataw an dai pagkaintindihan.—Roma 12:10; Filipos 2:3.

¹⁸ Minsan ngani bako kitang buta sa mga pagkukulang kan satong mga tugang, bako kita dian nakaturuhok. Pinagmamaigotan niato na arogon si Jehova, na manongod saiya nag-awit an salmista: “Kun mga sala an saimong binabantayan, O Jah, O Jehova, siisay an makatitindog?” (Salmo 130:3) Imbes na iyo na sanang pagparaintindihon an mga ugale na tibaad magin dahelan nin pagkabaranga niato, ‘sinusunod niato an mga bagay na nagpapatoninong asin an mga bagay na nagpapakosog sa lambang saro.’ (Roma 14:19) Pinagmamaigotan niato na helingon an mga indibiduwal nin siring sa pagheling sa sainda ni Jehova, na iniignoro an mga depekto asin nagtuturuhok sa marahay na mga kualidad. Kun ginigibo niato ini, makatatabang iyan sato na ‘padagos na magpatiriostios.’—Colosas 3:13.

19. Sabihon an praktikal na mga lakdang na puedeng gibohon nin sarong Kristiano sa paghusay sa seryosong mga dai pagkasinabotan.

¹⁹ Paano kun may lumataw na mga dai pagkasinabotan na dai talaga niato mahale sa satong puso? (Salmo 4:4) Nangyari na daw ini sa pag-oltanan nindo asin nin sarong kapagtubod? Taano ta dai hingoahon na husayon an problema? (Genesis 32:13-15) Enot, dumolok ki Jehova sa pamibi, na hinahagad an saiyang paggiya. Dangan, mantang isinasaisip an marahayon na mga karakteristiko kan tawong iyan, dolokon sia na may “kahoyoan na nanonongod sa kadonongan.” (Santiago 3:13) Sabihon sa saiya na gusto nindong makipagkatoninongan. Girumdomon an ipinasabong na hatol: “Magin listo kun dapit sa pagdangog, maluway kun dapit sa pagtaram, maluway kun dapit sa grabeng kaanggotan.” (Santiago 1:19) An sadol na magin “maluway kun dapit sa grabeng kaanggotan” nagpaparisa na an ibong na lado tibaad humiro o magtaram na puedeng ikaanggot nindo. Kun mangyari iyan, arangon an tabang ni Jehova na papagdanayon an pagpopogol sa sadiri. (Galacia 5:​22, 23) Pabayaan na magtaram an saindong tugang, asin magdangog kamo nin maingat. Dai sia pagpapondohon, dawa kun dai kamo oyon sa gabos niang sinasabi. Tibaad sala an saiyang punto de  vista, pero punto de vista nia iyan. Hingoahon na helingon an problema base sa saiyang punto de vista. Puedeng kabale nanggad dian an pagheling sa saindong sadiri paagi sa mga mata kan tugang nindong iyan.​—Talinhaga 18:17.

20. Kun hinuhusay an mga dai pagkaintindihan, anong dugang pang mga lakdang an posibleng marhay na maresulta sa pagkaulian?

²⁰ Kun kamo naman an mataram, magin maboot. (Colosas 4:6) Sabihon nindo sa saindong tugang kun ano an inaapresyar nindo sa saiya. Humagad nin dispensasyon sa ano man na nagin kabtang nindo sa nagin dai pagkasinabotan. Kun an saindong mapakumbabang paghihingoa magresulta sa pagkaulian, magpasalamat ki Jehova. Kun dai, padagos na arangon an paggiya ni Jehova mantang naghahanap kamo nin dugang pang oportunidad na makipagkatoninongan.—Roma 12:18.

21. Paano kamo natabangan kan pagtokar na ini na helingon an iba nin siring sa pagheling sa sainda ni Jehova?

²¹ Namomotan ni Jehova an gabos niang lingkod. Naoogma siang gamiton kita gabos sa paglilingkod sa saiya sa ibong kan satong mga pagkabakong sangkap. Mantang orog niatong nanonodan an manongod sa saiyang pagheling sa iba, matalubo an satong pagkamoot sa satong mga tugang. Kun luminipot na an satong pagkamoot sa sarong kapwa Kristiano, puedeng palaadon liwat iyan. Kanigoan na bendisyon an mapapasato kun kita desididong maghihingoa na magkaigwa nin positibong pagheling sa iba—iyo, na helingon sinda nin siring sa pagheling sa sainda ni Jehova!

[Mga Nota sa Ibaba]

Ano an Isisimbag Nindo?

• Paano hineheling ni Jehova an mga pagkukulang kan saiyang fiel na mga lingkod?

• Anong positibong mga kualidad ni Jonas asin ni Pedro an masasabi nindo?

• Anong pagmansay dapit sa saindong Kristianong mga tugang an determinado nindong papagdanayon?

[Mga Hapot Para sa Pag-adal]

[Kahon sa pahina 18]

Isipon Kun Ano an Pagheling nin Dios sa Iba

Mantang hinohorophorop nindo an pagkasaysay sa Biblia manongod ki Jonas, naheheling daw nindo an pangangaipo na bagohon an saindong pagheling sa mga tawo na regular nindong hinuhulitan kan maogmang bareta? Tibaad sinda garo naninigoan na sa sadiri o indiperente, arog kan mga Israelita, o tibaad kontra sa mensahe nin Dios. Minsan siring, ano an pagheling sa sainda ni Jehova Dios? Maski an nagkapirang indibiduwal na prominente sa sistemang ini nin mga bagay tibaad pag-abot nin aldaw rumani ki Jehova, kun paanong an hade sa Ninive nagsolsol bilang resulta kan paghuhulit ni Jonas.—Jonas 3:6, 7.

[Ritrato sa pahina 15]

Hineheling daw nindo an iba nin siring sa pagheling sa sainda ni Jehova?

[Ritrato sa pahina 16, 17]

May naheling si Jesus na positibong masasabi manongod sa eksperyensia ni Jonas