Maggayagaya sa Paglaom sa Kahadean!

SARONG magayagayang okasyon an dahelan na natipon an 5,784 nagdadangog kan Marso 10, 2001, sa tolong lugar sa Estado nin Nueva York na ginamit kan dakulang pamilyang Bethel. An okasyon iyo an gradwasyon kan ika-110 na klase kan paadalan nin Gilead para sa mga misyonero.

Si Carey Barber, miembro kan Namamahalang Grupo kan Mga Saksi ni Jehova, maogmang inako an gabos asin binuksan an programa, na nagsasabi: “Ikinaoogma niatong maaraman na 110 na klase nin mga estudyante sa Gilead an nasanay na ngonyan bilang mga misyonero asin idinestino sa mga teritoryo sa bilog na globo.”

Kun Paano Magdadanay na Magayagaya

Pakatapos kan pambukas na pahayag ni Tugang na Barber, si Don Adams nagpahayag sa mga nagdadangog, kaiba an 48 magradwar na estudyante, sa temang “An Bendisyon ni Jehova an Nakapayayaman sa Sato.” Ibinabasar an saiyang pahayag sa Talinhaga 10:​22, pinagirumdom nia an mga nagdadangog na sinususteniran asin binebendisyonan ni Jehova an saiyang mga lingkod kun ineenot ninda an intereses kan Kahadean sa saindang buhay. Pinarigon nia an boot kan mga estudyante na akoon an bago nindang asignasyon na igwa kan kaparehong espiritu nin pagigin andam na ipinaheling ni apostol Pablo kan sia agdahon na ‘bumalyo pasiring sa Macedonia asin tumabang.’ (Gibo 16:9) Minsan ngani may mga problema na dapat pangganahan, an pagigin andam ni Pablo na maghulit kun saen sia pinaduman nagresulta sa dakol na magayagayang bendisyon.

Natapos kan mga miembro kan magradwar na klase an saindang limang bulan na pag-adal kan Biblia asin pagsasanay bilang preparasyon para sa pagmimisyonero. Pero, inenkaminar sinda ni Daniel Sydlik, sarong miembro kan Namamahalang Grupo kan Mga Saksi ni Jehova, na magpadagos na magin mga nag-aadal. Nagtataram sa temang “Magin Tunay na mga Disipulo,” sia nagsabi: “An pagkadisipulo nangangahulogan nin daing ontok na pagkuyog sa mga tataramon ni Jesus. Kalabot dian an satong pagigin andam na pirmeng maghinanyog sa saiyang mga tataramon, sa saiyang mensahe, sa saiyang katokdoan.” Sinabi nia na an mga disipulo ni Cristo dai nagdedesisyon na dai naghihinanyog sa boses kan Kagurangnan; an kadonongan nin Dios natatago sa buhay ni Cristo. (Colosas 2:3) Mayo nin siisay man sa sato an puedeng madangog an mga tataramon ni Jesus nin sarong beses dangan makakokonklusyon na aram ta na gabos an manongod sa saiya, kaya inenkaminar ni Tugang na Sydlik an mga magradwar na padagos na makanood, mag-aplikar, asin itokdo an Kristianong katotoohan, na nagreresulta sa katalingkasan.​—Juan 8:​31, 32.

Tanganing magdanay na magayagaya sa paglilingkod sa Dios, an saro dapat na andam na umako nin disiplina asin pagtatanos. “Itatanos daw Kamo kan Saindong Bato?” an iinatubang na hapot kan instruktor sa Gilead na si Lawrence Bowen. Ipinaheling nia na sa Biblia an piguratibong bato konektado sa kairairaroming mga kaisipan asin emosyon nin saro. Puedeng itanos kaiyan an saro kun an ipinasabong na sadol hale sa Tataramon nin Dios  nakataros sa kalaoglaoging mga aspekto kan personalidad nin saro. (Salmo 16:7; Jeremias 17:10) An fiel na pamumuhay nin saro puede pa nganing makapahiro nin hararom sa boot ni Jehova. Pakabasaha kan Talinhaga 23:​15, 16, naghapot an nagpapahayag: “Itatanos daw kamo kan saindong bato?” Sinabi pa nia: “Ipinamimibi mi na iyo, asin sa siring pangyayarihon nindo na maeksperyensiahan ni Jehova an kairairaroming kaogmahan sa boot nia. Mapupukaw nindo an saiyang kairairaroming mga emosyon. Iyo, mapagagayagaya nindo an mga bato nin Dios mantang maimbod kamong nagdadanay sa saindong asignasyon.”

An pangultimong pahayag sa kabtang na ini kan programa itinao ni Mark Noumair, na naglingkod bilang misyonero sa Kenya bago nagin instruktor sa Gilead. An saiyang pahayag na an titulo “Mas Marahay an Pakaheling kan mga Mata” itinampok an halaga kan pagkultibar nin pagkakontento. Kaoyon kan Eclesiastes 6:​9, irinekomendar ni Tugang na Noumair: “Atubangon an katotoohan. Iyan an ‘pakaheling kan mga mata.’ Imbes na magpantasya manongod sa gusto nindong gibohon alagad dai nindo nagigibo, magkonsentrar na gamiton sa pinakaikararahay an saindong presenteng sirkunstansia. An pamumuhay sa kinaban na imahinasyon sana, pagkaigwa nin bakong makatanosan na mga inaasahan, o pagparaisip sa negatibong mga bagay sa saindong asignasyon gigibohon sana kamong magin diskontento.” Iyo, magsaen man kita o ano man an mga sirkunstansia, an pagkultibar nin diosnon na pagkakontento sa sato mismong sirkunstansia magbubunga nin magayagayang espiritu sa paglilingkod sa satong Kaharohalangkaweng Kaglalang.

 Magayagayang mga Eksperyensia sa Paglilingkod sa Kahadean Asin sa Gilead

Pakatapos kan siring na praktikal na mga hatol hale sa mga diskursong iyan, an mga estudyante nagsaysay nin nagkapirang eksperyensia ninda mantang nakikikabtang sa ministeryo sa publiko durante kan saindang limang bulan na kurso. Sa pangengenot ni Wallace Liverance, rehistrador kan Paadalan nin Gilead, isinaysay kan magradwar na mga estudyante kun paano ninda irinekomendar an saindang sadiri bilang mga ministro nin Dios. (2 Corinto 4:2) Napukaw ninda an nagkapira na gamiton an tao nin Dios na konsensia. Ipinaheling kan mga eksperyensia kan mga estudyante kun paano naponan an mga pag-adal sa Biblia sa sinserong mga indibiduwal na nanompongan ninda sa tinampo, sa ministeryong pagharongharong, asin sa iba pang kamugtakan. Sa manlaenlaen na okasyon, sinabi nin mga tawong interesado na an mga publikasyon kan organisasyon ni Jehova na basado sa Biblia may tanog nin katotoohan. An sarong kagharong naghimate nin positibong marhay sa sarong partikular na teksto sa Biblia. Sia ngonyan nakikipag-adal na sa Biblia sa mga Saksi ni Jehova.

Sunod, ininterbio ni Joel Adams an mga naggradwar sa Gilead kan nakaaging mga taon. An saiyang tema “Nungkang Pumondo sa Pag-adal, Nungkang Pumondo sa Paglilingkod ki Jehova.” An mga ininterbio may napapanahon na sadol para sa bagong mga misyonero. Ginigirumdom an nakaagi nia bilang miembro kan ika-26 na klase kan Gilead, si Harry Johnson nagsabi: “Itinokdo samo na ginigiyahan ni Jehova kaidto pa an saiyang banwaan asin gigiyahan nia an saiyang banwaan. An kompiansang iyan nagin pamparigon sa boot sa bilog na nag-aging mga taon.” Si William Nonkes, miembro kan ika-53 na klase nin Gilead, sinadol an mga magradwar: “Orog sa gabos, girumdomon an mga prinsipyo sa Biblia, asin iaplikar iyan sa gabos na desisyon na kaipuhan nindong gibohon sa buhay ngonyan asin sagkod lamang. Bilang resulta, makapagdadanay kamo sa saindong asignasyon, asin mapapasaindo an nagsosopay na bendisyon ni Jehova.”

“Pinasarig na Gibohon an Kabotan ni Jehova” an tema na pinili ni Richard Rian para sa saiyang kabtang sa programa. An saro sa mga ininterbio nia iyo si John Kurtz, gradwado sa ika-30 klase, na 41 taon sa España bilang sarong misyonero. Kan hapoton manongod sa kurikulum sa Gilead, si Tugang na Kurtz nagsabi: “An prinsipal na aadalan na libro iyo an Biblia. Dangan igwa kami nin mga pantabang sa pag-adal kan Biblia tanganing tabangan kaming masabotan an Biblia. An mga iyan makukua kan gabos. Mayo nin hilom na impormasyon na itinatao sa Gil­ead. Piripirme kong idinodoon ini huli ta madalion na makua kan gabos an impormasyon na itinatao sa Gilead.”

Kinompleto ni Tugang na Gerrit Lösch, miembro kan Namamahalang Grupo kan Mga Saksi ni Jehova, an espirituwal na programa paagi sa pagpahayag sa temang “Yaon sa Asin Nasa Irarom kan mga Pakpak ni Jehova.” Ipinaliwanag nia kun paano an proteksion asin suporta nin Dios sa saiyang fiel na mga lingkod iiniilustrar sa Biblia kan mga pakpak kan agila. (Deuteronomio 32:​11, 12; Salmo 91:4) An nasa edad nang agila kun minsan binibiklad an mga pakpak kaiyan sa laog nin dakol na oras tanganing protehiran an mga siwo kaiyan. Kun beses, kinokopkopan pa ngani kan inang agila an mga siwo kaini tanganing protehiran an mga ini sa malipot na doros. Sa kaagid na paagi asin kaoyon kan saiyang katuyohan, si Jehova puedeng tumabang sa saiyang fiel na mga lingkod, partikularmente kun sinda napapaatubang sa espirituwal na mga pagbalo. Dai itinotogot ni Jehova na masugotan an saiyang mga lingkod nin labi sa makakaya ninda kundi nagtatao nin luluwasan tanganing iyan matagalan ninda. (1 Corinto 10:13) Si Tugang na Lösch nagkonklusyon sa pagsabi: “Tanganing magdanay na protehido sa espirituwal, dapat kitang magdanay sa irarom kan mga pakpak ni Jehova. Nangangahulogan ini na kita dai dapat na magpatalubo nin espiritu nin independensia. Pirme kitang magdanay na harani ki Jehova asin sa saiyang arog-inang organisasyon, na dai isinisiblag an satong sadiri sa saindang paggiya asin mamomoton na hatol.”

Binasa kan tsirman an mga telegrama asin pataratara hale sa mga nagpapaabot nin pangungumusta sa bilog na globo. Dangan suminunod an pagtao nin mga diploma. Kan establisaron an Paadalan nin Gil­ead, an katuyohan magkaigwa nin limitado sanang kabilangan nin mga klase sa laog nin limang taon. Alagad sa laog nin 58 taon pinapagdanay ni Jehova Dios na nagpupunsionar an paadalan. Siring kan pagkasabi ni Tugang na Barber sa saiyang pambukas na pahayag: “Kanigoan karahay nanggad na rekord an nahaman kan mga gradwado sa Gilead poon kan 1943, kan inaguraron an Gilead! An saindang pinagsararong paghihingoa nagresulta sa pagkadagdag sa literal kan ginatos na ribong mahoyo sa daga sa mamuraway na organisasyon ni Jehova.” Iyo, an paadalan na ini sa pagmimisyonero nakakontribwir sa minilyon na maggayagaya sa paglaom sa Kahadean.

[Kahon sa pahina 24]

ESTADISTIKA KAN KLASE

Bilang nin mga nasyon na irinepresentar: 8

Bilang nin mga nasyon na inasignaran: 18

Bilang nin mga estudyante: 48

Promedyong edad: 34

Promedyong taon sa katotoohan: 18

Promedyong taon sa bilog na panahon na ministeryo: 13

[Ritrato sa pahina 25]

Ika-110 na Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.