An mga Parapakilaban Tumang sa Dios Dai Manggagana!

“Sierto na makikilaban sinda tumang sa saimo, alagad ta dai sinda manggagana sa saimo.”​—JEREMIAS 1:19.

1. Anong sugo an inako ni Jeremias, asin gurano kahaloy na nagpadagos an saiyang gibohon?

SINUGO ni Jehova an hoben na si Jeremias na magin propeta sa mga nasyon. (Jeremias 1:5) Nangyari ini durante kan pagreynar kan marahay na si Hadeng Josias nin Juda. An makahulang ministeryo ni Jeremias nagpadagos sa maribok na panahon bago kinongkistar kan Babilonya an Jerusalem asin sagkod sa pagkadistiero kan banwaan nin Dios.​​—Jeremias 1:​1-3.

2. Paano pinasarig ni Jehova si Jeremias, asin an pakikilaban tumang sa propetang iyan nangahulogan nin ano?

² An mga mensahe nin paghokom na ipahahayag ni Jeremias seguradong poponan nin pagtumang. Kun siring, pinakosog sia nin Dios para sa mangyayari. (Jeremias 1:​8-​10) Halimbawa, an boot kan propeta pinasarig kan mga tataramon na: “Sierto na makikilaban sinda tumang sa saimo, alagad ta dai sinda manggagana sa saimo, huling ‘ako nasa saimo,’ an sabi ni Jehova, ‘tanganing iligtas ka.’” (Jeremias 1:19) An pakikilaban tumang ki Jeremias mangangahulogan nin pakikilaban tumang sa Dios. Ngonyan, si Jehova igwa nin arog-propetang grupo nin mga lingkod na an gibohon kapareho kan ki Jeremias. Arog sa saiya, pusoan na ibinabalangibog ninda an makahulang tataramon nin Dios. Asin an mensaheng ini may epekto sa gabos na indibiduwal asin nasyon para sa ikararahay o ikararaot, depende sa reaksion ninda dian. Siring kaidtong panahon ni Jeremias, yaon an mga nakikilaban tumang sa Dios paagi sa pagtumang sa saiyang mga lingkod asin sa saindang mga aktibidad na iinasignar nin Dios.

 Inaatake an mga Lingkod ni Jehova

3. Taano ta inaatake an mga lingkod ni Jehova?

³ An banwaan ni Jehova inaatake poon pa sa kapinonan kan ika-20 siglo. Sa dakol na kadagaan, an mga tawong may maraot na intension naghingoang olangon​—iyo, pasilensiohon​—an pagbalangibog kan maogmang bareta kan Kahadean nin Dios. Sinda sinusutsutan kan pangenot na Kaiwal niato, an Diablo, na “naglalakaw na siring sa nagngangarob na leon, na naghahanap nin masisiba.” (1 Pedro 5:8) Kan matapos an “itinalaan na mga panahon kan mga nasyon” kan 1914, pinatukaw nin Dios an saiyang Aki bilang bagong Hade sa daga, na may pagboot na: “Mandaog ka sa tahaw kan saimong mga kaiwal.” (Lucas 21:24; Salmo 110:2) Ginagamit an saiyang kapangyarihan, pinalayas ni Cristo si Satanas sa langit asin ilinaom sia sa palibot kan daga. Sa pakaaram na halipot na sana an saiyang panahon, ilinuluwas kan Diablo an saiyang grabeng kaanggotan sa linahidan na mga Kristiano asin sa saindang kairiba. (Kapahayagan 12:​9, 17) Ano an nagin resulta kan paorootrong pag-atake kan mga parapakilaban na ini tumang sa Dios?

4. Anong mga pagbalo an inagihan kan banwaan ni Jehova durante kan panahon kan Guerra Mundial I, alagad ano an nangyari kan 1919 asin 1922?

⁴ An linahidan na mga lingkod ni Jehova napaatubang sa dakol na pagbalo sa pagtubod durante kan Guerra Mundial I. Sinda pinag-olog-olog asin pinakaraot, linapag nin sururog, asin binugbog. Siring sa ihinula ni Jesus, ‘ikinaongis sinda kan gabos  na nasyon.’ (Mateo 24:9) Sa tahaw nin pagkataranta sa guerra, an mga kaiwal kan Kahadean nin Dios naggamit nin sarong taktika na ginamit na kaidto tumang ki Jesu-Cristo. May kaputikan na binansagan ninda an banwaan ni Jehova na mga sedisyoso, asin inatake ninda an pinakasentro kan naheheling na organisasyon nin Dios. Kan Mayo 1918, ilinuwas an mga mandamiento pederal para sa pag-arestar sa presidente kan Watch Tower Society, si J. F. Rutherford, asin sa pito kan saiyang pinakadayupot na kairiba. Magabat na mga sentensiang pagkabilanggo an itinao sa walong lalaki na ini asin ipinadara sa bilibid pederal sa Atlanta, Georgia, E.U.A. Pakalihis nin siyam na bulan pinaluwas sinda. Kan Mayo 1919 an korte de apelasyon sa sirkito nagdesisyon na an mga akusado dai nagkaigwa nin imparsial na pagbista, asin kun siring binawi an sentensia. An kaso pinabalik tanganing bistahon liwat, alagad kan huri iinatras kan gobyerno an demanda, na biyong napatunayan na daing sala si Tugang na Rutherford asin an saiyang kairiba. Pinonan liwat ninda an saindang mga aktibidad, asin an mga kombension na ginibo sa Cedar Point, Ohio, kan 1919 asin kan 1922 nagpakosog liwat sa paghuhulit kan Kahadean.

5. Ano an nangyari sa Mga Saksi ni Jehova sa Nazi Alemania?

⁵ Naglataw an mga diktadura kan mga taon nin 1930, asin an Alemania, Italia, asin Hapon nagsararo tanganing magin an mga kapangyarihan na Axis. Sa kapinonan kan dekadang iyan, an sa barbarong paglamag ginibo tumang sa banwaan nin Dios, nangorogna sa Nazi Alemania. Inimponer an mga pagbabawal. Rinekisa an mga harong, asin inarestar an mga nag-iistar. Rinibo an ilinaog sa mga kampo de konsentrasyon huli ta habo nindang talikdan an saindang pagtubod. Katuyohan kan pakikilaban tumang sa Dios asin sa saiyang banwaan na paraon an Mga Saksi ni Jehova sa totalitaryong lugar na idto. * Kan an mga Saksi magduman sa mga korte sa Alemania tanganing ipakilaban an saindang mga diretso, an Ministri nin Hustisya kan Imperyo nag-andam nin halawig na opinyon tanganing seguradohon na dai sinda manggagana. Iyan nagsabi: “An mga korte dai dapat na masudya dahelan sana sa garo baga legal na mga pormalidad; kundi dapat na maghingoa asin humanap nin mga paagi sa ibong kan pormal na mga problema, tanganing maotob an saindang importanteng marhay na mga obligasyon.” Nangahulogan ini na an hustisya dai makakamit. An mga Nazi marigon na nagsabi na an mga aktibidad kan Mga Saksi ni Jehova sarongat, o kontra, asin ‘nakadidisturbo sa Nasyonal na Sosyalistikong areglo.’

6. Anong mga paghihingoa an ginibo tanganing papondohon an satong gibohon durante kan Guerra Mundial II asin pakatapos kaiyan?

⁶ Durante kan Guerra Mundial II, inimponer an mga pagbabawal asin restriksion sa banwaan nin Dios sa Australia, Canada, asin iba pang kadagaan na konektado sa Britanong Republika​​—sa Aprika, Asia, asin mga isla sa Caribe asin sa Pasipiko. Sa Estados Unidos, an maimpluwensiang mga kaiwal asin nadayang mga tawo naggibo nin ‘karibokan na minukna paagi sa dekreto.’ (Salmo 94:20) Alagad an mga isyu may labot sa pagsaludo sa bandera asin mga ordinansa nin mga komunidad na nagbabawal sa paghuhulit sa harong-harong ipinakilaban sa mga korte, asin an paborableng mga desisyon sa Estados Unidos nagin depensang suporta para sa katalingkasan sa pagsamba. Sa tabang ni Jehova, daing nangyari sa mga paghihingoa nin mga kaiwal. Kan matapos an guerra sa Europa, hinale an mga pagbabawal. Pinaluwas an rinibong Saksi na ibinilanggo sa mga kampo de konsentrasyon, alagad dai pa tapos an laban. Ensegida pakatapos kan Guerra Mundial II, nagpoon an Malipot na Guerra. An mga nasyon sa Sirangan na Europa orog pang ginipit an banwaan ni Jehova. Ginibo an opisyal na aksion tanganing mag-entremeter sa asin papondohon an satong mga aktibidad na paghuhulit, paontokon an sirkulasyon nin mga babasahon sa Biblia, paraon an satong pampublikong mga asamblea. Dakol an ibinilanggo o dinara sa mga kampo nin pagtrabaho.

Magpadagos sa Paghuhulit!

7. Ano an naeksperyensiahan kan Mga Saksi ni Jehova sa Polandia, Rusya, asin sa iba pang kadagaan sa nakaagi pa sanang mga taon?

⁷ Mantang nag-aagi an mga dekada, nabuksan an gibohon na paghuhulit kan Kahadean. An Polandia, minsan ngani sakop pa kan pamamahalang Komunista, nagtogot na magkaigwa nin sarong aldaw na mga kombension kan 1982. May internasyonal na mga kombension na ginibo duman kan 1985. Suminunod an darakulang internasyonal na mga kombension kan 1989, na rinibo an nag-atender hale sa Rusya asin Ukraine. Kan taon na idto an Hungaria  asin Polandia legal na rinekonoser an Mga Saksi ni Jehova. Kan tigrakdag nin 1989, narumpag an Lanob nin Berlin. Pakalihis nin pirang bulan, kita legal na rinekonoser sa Sirangan na Alemania, asin dai nahaloy pakalihis kaiyan may internasyonal na kombension na ginibo sa Berlin. Asin sa kapinonan kan ultimong dekada kan ika-20 siglo, pinonan an mga paghihingoa na personal na makaolay an mga tugang sa Rusya. Kinaolay an nagkapira sa mga opisyal sa Moscow, asin kan 1991, an Mga Saksi ni Jehova legal na irinehistro. Poon kaidto dakulaon an inoswag kan gibohon sa Rusya asin sa mga republika na kabtang kan dating Unyon Sobyet.

8. Ano an nangyari sa banwaan ni Jehova durante kan 45 taon pagkatapos kan Guerra Mundial II?

⁸ Minsan ngani uminontok an paglamag sa nagkapirang lugar, iyan uminorog sa ibang lugar. Durante kan 45 taon pagkatapos kan ikaduwang guerra mundial, dakol na kadagaan an nagsayuma na legal na rekonoseron an Mga Saksi ni Jehova. Saro pa, inimponer an mga pagbabawal sa sato o sa satong mga aktibidad sa 23 na kadagaan sa Aprika, 9 sa Asia, 8 sa Europa, 3 sa Latin Amerika, asin 4 sa nagkapirang islang nasyon.

9. Ano an inagihan kan mga lingkod ni Jehova sa Malawi?

⁹ An Mga Saksi ni Jehova sa Malawi nag-agi nin maringis na paglamag poon kan 1967. Dahelan sa saindang neutral na paninindogan bilang tunay na mga Kristiano, an mga kapagtubod niato duman habong bumakal nin mga kard nin partido politikal. (Juan 17:16) Kasunod kan miting kan Partido Kongreso nin Malawi kan 1972, naotro an panriringis. An mga tugang pinalayas sa saindang mga harong asin dai tinawan nin trabaho. Rinibo an duminulag sa nasyon tanganing makalikay na gadanon. Alagad nanggana daw an mga parapakilaban tumang sa Dios asin sa saiyang banwaan? Dai nanggad! Pakatapos na mabaliktad an mga kamugtakan, sarong pinakahalangkaw na kabilangan na 43,767 parahayag kan Kahadean an nagreport sa Malawi kan 1999, asin labing 120,000 an nag-atender sa pandistritong mga kombension duman. Sarong bagong sangang opisina an itinogdok sa kabiserang siudad.

Naghahanap Sinda nin Sarahotan

10. Siring kan nangyari ki Daniel, ano an ginibo kan mga paratumang sa banwaan nin Dios sa presenteng aldaw?

¹⁰ Dai matagalan kan mga apostata, klerigo, asin iba pa an satong mensahe hale sa Tataramon nin Dios. Iniimpluwensiahan nin relihiosong mga kabtang kan Kakristianohan, an mga paratumang naghahanap nin legal daang paagi tanganing ipangatanosan an saindang pakikilaban tumang sa sato. Anong mga taktika an ginagamit kun minsan? Bueno, ano an ginibo kan mga kakomplot sa pag-atake ki propeta Daniel? Sa Daniel 6:​4, 5, satong mababasa: “An halangkaw na mga opisyal asin an mga satrapa mismo daing ontok na naghihingoang makakua nin sarahotan tumang ki Daniel manongod sa kahadean; alagad mayo sindang nakua na sarahotan o maraot na bagay, mantang sia mapagtitiwalaan asin mayo nin nakua sa saiya na kapabayaan o maraot na bagay. Bilang resulta an pusog na mga lalaking ini nagsasarabi: ‘Dai kita makakakua sa Daniel na ini nin ano man na sarahotan, kundi kaipuhan na hanapon niato iyan tumang sa saiya sa ley kan saiyang Dios.’” Ngonyan, an mga paratumang naghahanap man nin sarahotan. Sinda maribok na nag-iinsistir manongod sa “peligrosong mga kulto” asin naghihingoa na ini an iapod sa Mga Saksi ni Jehova. Paagi sa pagmisrepresentar, padangog, asin kaputikan, inaatake ninda an satong pagsamba asin an satong fiel na pagsuportar sa diosnon na mga prinsipyo.

11. Ano an putik na mga sinasabi nin nagkapirang paratumang sa Mga Saksi ni Jehova?

¹¹ Sa nagkapirang kadagaan, an relihioso asin politikal na mga elemento nagsasayumang admitiron na kita nagsasagibo kan “klase nin pagsamba na malinig asin daing digta sa pagheling kan satong Dios.” (Santiago 1:27) Minsan ngani ginigibo an satong Kristianong mga aktibidad sa 234 kadagaan, sinasabi nin mga paratumang na kita bakong “midbid na relihion.” Kan madali na an sarong internasyonal na kombension kan 1998, kinotar nin sarong peryodiko sa Atenas an klerong Griegong Ortodokso na nagsasabi na “[an Mga Saksi ni Jehova] bakong ‘midbid na relihion,’” apisar kan laen na desisyon kan Korte Para sa mga Diretso nin Tawo sa Europa. Pakalihis nin pirang aldaw, an saro pang peryodiko sa siudad man sanang iyan kinotar an representante sa pagtaram nin sarong iglesia na nagsabi: “[An Mga Saksi ni Jehova] dai puedeng magin ‘Kristianong kongregasyon,’ huling mayo sinda nin ipinagkapareho sa Kristianong pagtubod na irinepresentar ni Jesu-Cristo.” Makangangalas ini, ta mayo nin ibang grupong relihioso apuera sa Mga Saksi ni Jehova na nagtatao nin orog na pagdodoon sa pag-arog ki Jesus!

12. Sa satong espirituwal na pakikilaban, ano an dapat tang gibohon?

 ¹² Hinihingoa niato na idepensa asin patunayan sa legal na paagi an maogmang bareta. (Filipos 1:7) Dugang pa, dai niato ikokompromiso o paluluyahon an satong marigon na fiel na pagsuportar sa mga pamantayan nin Dios sa katanosan. (Tito 2:​10, 12) Arog ki Jeremias, ‘hinahagkosan ta an satong habayan asin itinataram an gabos na ipinagboboot sa sato ni Jehova,’ na dai tinotogotan an mga parapakilaban tumang sa Dios na patakoton kita. (Jeremias 1:​17, 18) An Banal na Tataramon ni Jehova malinaw na tinandaan an tamang dalan na dapat niatong lakawan. Nungka na boot niatong manarig sa maluyang “takyag na laman” o maghingoang ‘magpaili sa lindong nin Egipto,’ an boot sabihon, sa kinaban na ini. (2 Cronica 32:8; Isaias 30:3; 31:​1-3) Sa espirituwal na pakikilaban, dapat na padagos kitang magtiwala ki Jehova sa bilog niatong puso, magpagiya sa saiya sa satong mga lakad, asin dai manarig sa satong sadiring pakasabot. (Talinhaga 3:​5-7) Sagkod na mayo sa sato an pagsuportar ni Jehova asin bakong sia mismo an nagbabantay sa sato, an gabos niatong ginigibo magigin “basang sana.”​​—Salmo 127:1.

Pinaglalamag Alagad Dai Nagkokompromiso

13. Taano ta masasabi na nasudya an satanikong pag-atake ki Jesus?

¹³ An pangenot na halimbawa nin dai nagkokompromisong debosyon ki Jehova iyo si Jesus, na putik na sinahotan nin sedisyon asin pagparibok sa inestablisar na areglo. Pakatapos na siyasaton an kaso ni Jesus, gusto siang butasan ni Pilato. Alagad an kadaklan, na sinutsutan kan mga namomoon sa relihion, nagkururahaw na ipako si Jesus, minsan ngani sia daing sala. Bilang kasalida nia, hinagad nindang butasan si Barrabas​—sarong tawo na nabilanggo dahelan sa sedisyon asin paggadan! Prinobaran giraray ni Pilato na kombensiron an bakong rasonableng mga paratumang, alagad sa katapustapusi nagpadara sia sa maribok na pag-insistir kan publiko. (Lucas 23:​2, 5, 14, 18-​25) Minsan ngani si Jesus nagadan sa sarong harigi, biyong nasudya an makababaldeng satanikong pag-atake sa daing sala na Aki nin Dios, ta binuhay liwat ni Jehova si Jesus asin ilinangkaw sia sa Saiya  mismong too. Asin kan aldaw nin Pentecostes 33 C.E., paagi sa pinamuraway na si Jesus, an banal na espiritu ibinubo, na ineestablisar an Kristianong kongregasyon​—sarong “bagong linalang.”​—2 Corinto 5:17; Gibo 2:​1-4.

14. Ano an nagin resulta kan an mga parasunod ni Jesus olangon kan Judiong relihiosong elemento?

¹⁴ Dai nahaloy pakatapos kaiyan an mga apostol hinuma kan relihiosong elemento, alagad an mga parasunod na iyan ni Cristo dai nag-ontok sa pagtaram manongod sa mga bagay na naheling asin nadangog ninda. An mga disipulo ni Jesus namibi: “Jehova, risaha an saindang mga patakot, asin itogot mo sa saimong mga oripon na padagos na magtaram kan saimong tataramon sa bilog na pagkapusoan.” (Gibo 4:29) Sinimbag ni Jehova an saindang mga pagngayongayo paagi sa pagpano sa sainda nin banal na espiritu asin pagpakosog sa sainda na ipadagos an saindang daing takot na pagbalangibog. Dai nahaloy an mga apostol pinagbotan giraray na umontok sa paghuhulit, alagad si Pedro asin an iba pang apostol nagsimbag: “Dapat na kuyogon niamo an Dios bilang namamahala imbes na mga tawo.” (Gibo 5:29) An mga patakot, pag-arestar, asin paghampak dai makapopogol sa sainda sa pagpahiwas kan saindang aktibidad na pan-Kahadean.

15. Siisay si Gamaliel, asin ano an isinadol nia sa relihiosong mga paratumang sa mga parasunod ni Jesus?

¹⁵ Ano an reaksion kan relihiosong mga namamahala? “Sinda nagkarulugad na gayo asin nagmawot na gadanon [an mga apostol].” Minsan siring, an sarong paratokdo kan Ley na an ngaran Gamaliel, sarong Fariseo, yaon duman, asin sia iginagalang kan bilog na banwaan. Ilinuluwas nin kadikit na oras sa sala kan Sanhedrin an mga apostol, sinadol nia an relihiosong mga paratumang na idto: “Mga lalaki nin Israel, tawe nindo nin atension an saindong sadiri kun manongod sa intension nindong gibohon dapit sa mga tawong ini. . . . Sinasabi ko sa saindo, Dai kamo makilabot sa mga tawong ini, kundi pabayae sana nindo sinda; (huli ta, kun an pakanang ini o an gibohon na ini gikan sa mga tawo, iyan madadaog; alagad kun iyan gikan sa Dios, dai nindo sinda madadaog;) ta kun dai, tibaad kamo makua na sa katunayan mga parapakilaban tumang sa Dios.”​—Gibo 5:​33-39.

Daing Armas na Ginibo Tumang sa Sato na Magkakaepekto

16. Sa sadiring pananaram nindo, paano nindo sasabihon an asegurasyon na itinatao ni Jehova sa saiyang banwaan?

¹⁶ Tama an sadol ni Gamaliel, asin nagpapahalaga kita kun may nagtataram para sa sato. Asin nagpapasalamat man kita na an katalingkasan sa pagsamba sinurog paagi sa mga desisyon nin korte kan makatanosan na mga huwes. Siempre, an fiel na pagsuportar niato sa Tataramon nin Dios ikinaaanggot kan klero nin Kakristianohan asin iba pang namomoon sa Dakulang Babilonya, an pankinaban na imperyo nin falsong relihion. (Kapahayagan 18:​1-3) Minsan ngani sinda asin an mga naiimpluwensiahan ninda nakikilaban tumang sa sato, igwa kita kan asegurasyon na ini: “‘An ano man na armas na gibohon tumang sa saimo dai magkakaepekto, asin an arin man na dila na tumindog tumang sa saimo sa paghokom saimong kokondenaron. Iyo ini an rogaring na panonondon kan mga lingkod ni Jehova, asin an saindang katanosan gikan sa sako,’ an sabi ni Jehova.”​—Isaias 54:17.

17. Minsan ngani nakikilaban tumang sa sato an mga paratumang, taano ta makosog an boot ta?

¹⁷ An satong mga kaiwal nakikilaban tumang sa sato na mayo nin dahelan, alagad dai kita nawawaran nin kosog nin boot. (Salmo 109:​1-3) Nungka niatong totogotan an mga naoongis sa satong mensahe hale sa Biblia na patakoton kita sagkod na ikompromiso an satong pagtubod. Minsan ngani inaasahan ta na madadagdagan an satong espirituwal na pakikilaban, aram ta an magigin resulta. Arog ki Jeremias, maeeksperyensiahan ta an kaotoban kan makahulang mga tataramon: “Sierto na sinda makikilaban tumang sa saimo, alagad ta dai sinda manggagana sa saimo, huling ‘ako nasa saimo,’ an sabi ni Jehova, ‘tanganing iligtas ka.’” (Jeremias 1:19) Iyo, aram ta na an mga nakikilaban tumang sa Dios dai manggagana!

[Nota sa Ibaba]

Ano an Isisimbag Nindo?

• Taano ta inaatake an mga lingkod ni Jehova?

• Sa anong mga paagi nakikilaban tumang sa banwaan ni Jehova an mga paratumang?

• Taano ta makaseseguro kita na an mga parapakilaban tumang sa Dios dai manggagana?

[Mga Hapot Para sa Pag-adal]

[Ritrato sa pahina 17]

Inasegurar si Jeremias na si Jehova nasa kaibanan nia

[Ritrato sa pahina 18]

Mga natadang buhay sa kampo de konsentrasyon

[Ritrato sa pahina 18]

Madahas na pagsururog tumang sa Mga Saksi ni Jehova

[Ritrato sa pahina 18]

Si J. F. Rutherford asin kairiba

[Ritrato sa pahina 21]

Sa nangyari ki Jesus, an mga parapakilaban tumang sa Dios dai nanggana