1-2. (a) Ano an namamatian ni Jehova sa mga tuyong naggigibo nin kasalan? (b) Ano an gusto ni Jehova na gibuhon kan mga nagkasala?

 SI Jehova bakong kunsintidor na Diyos; dai niya kinukunsinti an kasalan. (Sal. 5:​4-6) Hinahagad niya na igalang ta an saiyang matanos na mga pamantayan, na mahihiling niyato sa saiyang Tataramon. Siyempre, dai si Jehova nag-aasa nin pagkaperpekto sa bakong perpektong mga tawo. (Sal. 130:​3, 4) Kasabay kaiyan, dai niya kinukunsinti an “mga tawong bakong diyosnon na idinadahilan an daing kapantay na kabuutan [niya] para sa daing pakundangan na paggawi.” (Jud. 4) Sa katunayan, sinambit sa Bibliya an mapadapit sa “paglaglag sa mga bakong diyosnon” sa giyera nin Diyos na Armagedon.​—2 Ped. 3:7; Kap. 16:16.

² Minsan siring, habo ni Jehova na malaglag an siisay man. Arog kan nainot nang pinag-ulayan niyato sa seryeng ini nin mga artikulo, malinaw na sinasabi kan Bibliya na “gusto niya na an gabos makapagsulsol.” (2 Ped. 3:9) Inaarog kan Kristiyanong mga elder si Jehova mantang mapasensiya nindang hinihinguwang tabangan an mga nagkasala na baguhon an saindang paggawi asin mag-ako giraray kan pag-uyon ni Jehova. Pero, bakong gabos na nagkasala positibo an pag-ako sa tabang na iyan. (Isa. 6:9) An iba nagpapadagos sa salang gibo sa ibong kan pauruutrong paghihinguwa kan mga elder na tabangan sindang magsulsol. Ano an dapat gibuhon sa siring na sitwasyon?

“HALION NINDO AN MARAOT NA TAWO”

 3. (a) Ano an sinasabi kan Bibliya na dapat gibuhon sa mga nagkasalang dai nagsusulsol? (b) Taano ta nasabi niyato na garo man sana pinili kan nagkasala na halion siya sa kongregasyon?

³ Pag an sarong nagkasala habong magsulsol, mayong ibang magigibo an mga elder kundi sunudon an instruksiyon na nasa 1 Corinto 5:13: “Halion nindo an maraot na tawo diyan sa saindo.”  Garo man sana pinili kan nagkasala an konsekwensiyang iyan; inaani niya an itinanom niya. (Gal. 6:7) Taano ta nasabi niyato iyan? Huling nagsayuma siyang maghimati sa pauruutrong paghihinguwa kan mga elder na tabangan siyang magsulsol. (2 Ha. 17:​12-15) Ipinapahiling kan ginigibo niya na pinili niyang dai magsunod sa mga pamantayan ni Jehova.​—Deu. 30:​19, 20.

 4. Taano ta nagtatao nin paisi pag hinali sa kongregasyon an sarong dai nagsusulsol na nagkasala?

⁴ Pag an dai nagsusulsol na nagkasala hinali sa kongregasyon, sarong paisi an itatao tanganing ipaaram sa kongregasyon na bako na siyang Saksi ni Jehova. a An katuyuhan kan paising iyan bako para ipasupog an nagkasala kundi tanganing masunod kan kongregasyon an maka-Kasuratan na sadol na “ipundo an pakikiiba” sa tawong iyan, “maski an magkakan kaiba” niya. (1 Cor. 5:​9-11) May marahay na dahilan kaya itinao an instruksiyon na iyan. Isinurat ni apostol Pablo: “An kadikit na lebadura nakakapausbog sa bilog na masa nin harina.” (1 Cor. 5:6) An mga dai nagsusulsol na nagkasala puwedeng makapaluya sa determinasyon kan mga nagmamaigot na mamuhay kauyon kan matanos na mga pamantayan ni Jehova.​—Tal. 13:20; 1 Cor. 15:33.

 5. Paano ta dapat mansayon an saro na hinali sa kongregasyon, asin taano?

⁵ Kaya, paano ta dapat mansayon an sarong kapagtubod na hinali sa kongregasyon? Dawa ngani dai kita nakikiiba-iba sa saiya, dapat niyato siyang mansayon bilang nawawarang karnero, bakong saro na mayo nang pag-asang magbago. An sarong karnero na naparayo sa aripumpon puwedeng makabalik. Girumdumon na an nawawarang karnerong iyan nagdusay kaidto kan saiyang sadiri ki Jehova. Nakakamundo lang ta dai siya sa ngunyan namumuhay kauyon kan pagdusay na iyan, kaya delikado an sitwasyon niya. (Ezek. 18:31) Minsan siring, sagkod na yaon pa an pagkahirak ni Jehova, may paglaom pa na magbalik an tawong iyan. Paano ipinapahiling kan mga elder an paglaom na iyan dawa sa nagkasala na hinali sa kongregasyon?

KUN PAANO TINATABANGAN KAN MGA ELDER AN MGA HINALI

 6. Anong mga lakdang an gigibuhon kan mga elder tanganing tabangan an saro na hinali sa kongregasyon?

⁶ An saro daw na hinali sa kongregasyon biyo nang pinabayaan, asin siya na an bahala kun paano siya mabalik ki Jehova? Dai nanggad! Pag ipinapaaram sa dai nagsusulsol na nagkasala na hahalion siya sa kongregasyon, ipapaliwanag sa saiya kan komite nin mga elder kun anong mga lakdang an puwede niyang gibuhon tanganing makabalik sa kongregasyon. Pero urog pa diyan an gigibuhon kan mga elder. Sa kadaklan na pagkakataon, sasabihon ninda sa nagkasala na gusto nindang makipag-ulay giraray sa saiya pakalihis nin pirang bulan para aramon kun nagbago na an sabuot niya. Kun gusto kan nagkasala na makipag-ulay giraray sa sainda, sa sunod na pakikipag-ulay na iyan mamumuton siyang dadagkahon kan mga elder na magsulsol asin bumalik. Dawa kun dai nagbago an sabuot niya sa pagkakataon na iyan, hihinguwahon kan mga elder na kontakon siya sa pana-panahon.

 7. Paano inaarog kan mga elder si Jehova sa pagigin mapagmalasakit sa saro na hinali sa kongregasyon? (Jeremias 3:12)

⁷ Hinihinguwa kan mga elder na arugon si Jehova sa pagigin mapagmalasakit sa saro na hinali sa kongregasyon. Halimbawa, dai na hinalat ni Jehova an saiyang masinuway na banwaan, an suanoy na mga Israelita, na magsulsol na nguna. Imbes, siya an nag-inot na humiro para tabangan sinda bago pa sinda magpahiling nin ano man na senyales nin pagsulsol. Arog kan sinambit sa ikaduwang artikulo kan seryeng ini, iinilustrar ni Jehova an saiyang pagmalasakit paagi  sa pagsabi ki propeta Oseas na patawadon an saiyang agom dawa kaidtong naggigibo pa ini nin kasalan. (Os. 3:1; Mal. 3:7) Bilang pag-arog ki Jehova, talagang gusto kan Kristiyanong mga elder na bumalik sa kongregasyon an nagkasala, asin dai ninda pinapadipisil sa nagkasala an paggibo kaiyan.​—Basahon an Jeremias 3:12.

 8. Paano an parabula ni Jesus manungod sa aking naparaot an buhay nakakatabang sa sato na urog pang masabutan an pagigin mapagmalasakit asin mahihirakon ni Jehova? (Lucas 15:7)

⁸ Girumdumon an parabula ni Jesus manungod sa aking naparaot an buhay, na pinag-ulayan sa ikaduwang artikulo kan seryeng ini. Kan matanaw kan ama an saiyang aki na pabalik na sa saindang harong, “duminalagan ini saka kinugos siya asin mapagpadaba siyang hinadukan.” (Luc. 15:20) Mangnuhon na dai na hinalat kan ama na makimahirak an saiyang aki na patawadon niya. Siya na an nag-inot na humiro para sabaton ini, arog kan gigibuhon nin siisay man na mamumuton na ama. Hinihinguwa kan mga elder na ipahiling an kaagid na sabuot sa mga naparayo. Gusto ninda na an nawarang mga karnerong ini “magpuli na.” (Luc. 15:​22-24, 32) Pag an sarong parakasala nagbalik, nagkakaigwa nin kaugmahan sa langit, asin pati man digdi sa daga!—Basahon an Lucas 15:7.

 9. Paano mamumuton na dinadagka ni Jehova an mga nagkasala na bumalik?

⁹ Base sa mga napag-ulayan ta na, malinaw na dai kinukunsinti ni Jehova an dai nagsusulsol na mga nagkasala. Dawa arog kaiyan, dai niya tinatalikdan an mga nagkasala. Gusto niya na magbalik sinda. An namamatian ni Jehova para sa mga nagsusulsol na nagkasala ipinahayag sa Oseas 14:4: “Papaumayan ko sinda, asin magigin maimbod na sinda sa sako. Mamumutan ko sinda nin gikan sa buot, huli ta nawara na an kaanggutan ko.” Makusugon nanggad na dahilan ini para sa mga elder na magin mapagrisa sinda sa ano man na senyales nin pagsulsol. Asin makusugon nanggad na dahilan ini para sa mga nagbaya ki Jehova na dai na magpaliman-liman na bumalik.

10-11. Paano hinihinguwa kan mga elder na tabangan an mga indibidwal na kaidto pa hinali sa kongregasyon?

¹⁰ Paano man an mga indibidwal na kaidto pa hinali sa kongregasyon, tibaad dakul na taon na an nakaagi? Tibaad dai na man ninda ginigibo an kasalan na nagin dahilan kan pagkahali sa sainda. Sa nagkapirang sitwasyon, tibaad dai na ngani ninda magirumduman kun taano ta hinali sinda. Gurano man kahaloy nang naparayo sa kongregasyon an saro, hihinguwahon kan mga elder na hanapon asin dalawon siya. Sa mga pagdalaw na iyan, mapamibi pa ngani an mga elder kaiba siya asin mamumuton na dadagkahon na bumalik sa kongregasyon. Siyempre, kun an saro dakul na taon nang naparayo sa kongregasyon, siguradong maluya nang marhay an saiyang espirituwalidad. Kaya, kun sabihon niyang gusto niya nang bumalik sa kongregasyon, puwedeng iareglo kan mga elder na may magkondukta sa saiya nin pag-adal sa Bibliya, dawa ngani dai pa siya ibinabalik. Sa gabos na sitwasyon, an mga elder an magibo nin areglo na makonduktahan siya nin pag-adal sa Bibliya.

¹¹ Bilang pag-arog sa pagmalasakit ni Jehova sa siring na mga indibidwal, hinihinguwa kan mga elder na hanapon an pinakadakul na posible asin tabangan sindang maaraman na bukas an pinto para sa pagbabalik ninda. Pag an sarong nagkasala nagpapahiling na nin pagsulsol asin binayaan na an saiyang makasalan na pamumuhay, puwede na tulos siyang ibalik.​—2 Cor. 2:​6-8.

12. (a) Sa anong mga sitwasyon dapat na magin lalo nang maingat an mga elder? (b) Taano ta dai ta dapat isipon na imposible para sa partikular na mga klase nin nagkasala na mag-ako kan pagkahirak ni Jehova? (Hilingon man an nota sa ibaba.)

¹² May mga sitwasyon na kaipuhan kan mga elder na magin lalo nang maingat bago ibalik sa kongregasyon an saro. Halimbawa, kun an saro naggibo nin pag-abuso sa aki o apostasya o kun  siya nagpakana na tapuson an pag-inaguman ninda kan agom niya, kaipuhan na siguraduhon kan mga elder na talagang tunay siyang nagsusulsol. (Mal. 2:14; 2 Tim. 3:6) Dapat nindang protektaran an aripumpon. Kasabay kaiyan, kaipuhan tang marealisar o masabutan na aakuon giraray ni Jehova an siisay man na nagkasala na nagpapahiling nin tunay na pagsulsol asin nagpundo na sa salang gibo. Kaya dawa ngani naggigibo nin maninigong pag-iingat an mga elder sa mga indibidwal na patraydor na trinatar an iba, dai sinda dapat mag-abot sa punto na sasabihon nindang  may partikular na mga klase nin nagkasala na nungkang mag-aako kan pagkahirak ni Jehova. b—1 Ped. 2:10.

KUN ANO AN PUWEDENG GIBUHON KAN KONGREGASYON

13. Ano an pagkakaiba kan pagtratar ta sa saro na sinagwi kan mga elder asin sa saro na hinali sa kongregasyon?

¹³ Arog kan pinag-ulayan sa sinusundan na artikulo, kun minsan may itinataong paisi na an saro sinagwi. Sa arog kaiyan na sitwasyon, puwede kitang padagos na makiiba-iba sa saiya, huling aram tang nagsulsol siya asin ipinundo na an saiyang salang gibo. (1 Tim. 5:20) Parte pa man giraray siya kan kongregasyon asin nangangaipo kan pampakusog na nakukua sa pakikiasosyar sa mga kapagtubod. (Heb. 10:​24, 25) Pero, iba an sitwasyon kun an saro hinali sa kongregasyon. ‘Ipinupundo ta an pakikiiba-iba’ sa tawong iyan, “maski an magkakan kaiba kan tawong iyan.”​—1 Cor. 5:11.

14. Paano gagamiton kan mga Kristiyano an saindang konsiyensiyang sinanay sa Bibliya sa pagtratar ninda sa mga hinali sa kongregasyon? (Hilingon man an ritrato.)

¹⁴ Buot sabihon daw kan mga pinag-ulayan niyato biyo ta nang dai iintindihon an saro na hinali sa kongregasyon? Dai man. Totoo na dai kita makikiiba-iba sa saiya. Alagad puwedeng gamiton kan mga Kristiyano an saindang konsiyensiyang sinanay sa Bibliya pag nagdedesisyon kun baga iimbitaran ninda na mag-atender sa pagtiripon sa kongregasyon an saro na hinali sa kongregasyon—tibaad sarong kapamilya o saro na kadayupot ninda kaidto. Paano siya tatrataron kun mag-atender siya sa satong mga pagtiripon? Kaidto, dai niyato tatara-tarahon an siring na indibidwal. Sa giraray, sa arog kaiyan na sitwasyon, kaipuhan na gamiton kan lambang Kristiyano an saindang konsiyensiyang sinanay sa Bibliya. Tibaad para sa iba, okey sa sainda na tara-tarahon o i-welcome siya sa pagtiripon. Pero, dai kita makikipag-istoryahan nin halawig o makikiiba-iba sa saiya.

15. Anong klase nin mga nagkasala an ilinaladawan sa 2 Juan 9-11? (Hilingon man an kahon na “ Parehong Klase Daw nin Kasalan an Tinutukar ni Juan Asin ni Pablo?”)

¹⁵ Tibaad isipon kan iba, ‘Bakong sinasabi  kan Bibliya na an sarong Kristiyano na nagtatara-tara o nagkukumusta sa siring na indibidwal nagigin kadamay na sa saiyang maraot na mga gibo?’ (Basahon an 2 Juan 9-11.) Ipinapahiling sa konteksto kan tekstong ini na an pinapanungdan kan instruksiyon na ini iyo an mga apostata asin an iba pang aktibong nagpopromotir nin salang gibo. (Kap. 2:20) Kun siring, kun an sarong tawo aktibong nagpopromotir nin apostatang mga katukduan o iba pang salang gibo, dai magibo nin areglo an mga elder na dalawon siya. Siyempre, may paglaom pa man na makapag-isip-isip siya. Pero sagkod na dai pa iyan nangyayari, dai niyato tatara-tarahon an siring na tawo, ni iimbitaran ta siya na mag-atender sa satong mga pagtiripon.

ARUGON AN PAGIGIN MAPAGMALASAKIT ASIN MAHIHIRAKON NI JEHOVA

16-17. (a) Ano an gusto ni Jehova na gibuhon kan mga nagkasala? (Ezekiel 18:32) (b) Paano maipapahiling kan mga elder na mga kapwa trabahador sinda ni Jehova?

¹⁶ Ano an mga nanudan ta sa seryeng ini na may limang kabtang? Habo ni Jehova na malaglag an siisay man! (Basahon an Ezekiel 18:32.) Gusto niya na makipag-ulian sa saiya an mga nagkasala. (2 Cor. 5:20) Iyan an dahilan kaya sa bilog na kasaysayan, pauruutrong dinagka ni Jehova an saiyang masinuway na banwaan—pati man an masinuway na mga indibidwal—na magsulsol asin bumalik sa saiya. May pribilehiyo an mga elder sa kongregasyon na magin mga kapwa trabahador ni Jehova mantang hinihinguwa nindang tabangan an mga nagkasala na magsulsol.​—Roma 2:4; 1 Cor. 3:9.

¹⁷ Imahinara an kaugmahan sa langit pag may mga parakasalang nagsusulsol! An satong Ama sa langit, si Jehova, namamatian mismo an kaugmahan na iyan sa kada may saro sa saiyang nawawarang mga karnero na minabalik sa kongregasyon. An satong pagkamuot ki Jehova padagos na minakusog mantang hinuhurop-hurop ta an saiyang pagmalasakit, pagkahirak, asin daing kapantay na kabuutan.​—Luc. 1:78.