Sa sinundan na artikulo, pinag-ulayan ta an tanda na itinao ni Jesus. An tandang iyan nagtao nin malinaw na ebidensiya na an Kahadian nin Diyos inestablisar na sa langit na an Hadi iyo si Jesu-Cristo.

Sinasabi kan Bibliya na pag naghadi na si Jesus sa Kahadian, papalayason niya sa langit si Satanas asin an mga demonyo kaini. Kaya sa daga na sana sinda ngunyan nakakapag-impluwensiya, iyan an saro sa mga dahilan kaya nagin marauton an mga pangyayari puon kan taon 1914.—Kapahayagan 12:7, 9.

Sa ibong kan naglalalang kamugtakan kan kinaban, may mga ginibo si Jesus bilang Hadi kan Kahadian nin Diyos para tabangan an mga tawo sa bilog na kinaban. Huli sa pambilog na kinaban na pagtutukdo sa Bibliya na ihinula ni Jesus, dakul an nakakanuod asin nagsusunod kan mga prinsipyo sa Bibliya sa saindang pang-aroaldaw na pamumuhay. (Isaias 2:2-4) Minilyon an nakanuod na magkaigwa nin mas maugmang pamilya asin nin balanseng pagmansay sa trabaho saka materyal na mga bagay. An mga tawong iyan tinutukduan para makinabang sinda ngunyan asin nagigin an klase nin mga tawo na gusto nin Diyos na magin sakop kan saiyang Kahadian.

Maski ngani naghahadi na si Jesus sa langit, namamahala pa man giraray sa daga an mga gobyerno nin tawo. Pero, sinabi nin Diyos ki Jesus: “Sige na, mandaog ka sa tahaw kan saimong mga kalaban.” (Salmo 110:2) Dai mahahaloy, lubos nang lalaglagon ni Jesus an gabos na kaiwal saka tatawan nin kaginhawahan an mga andam na magsunod sa Diyos.

Sa panahon na iyan, an Kahadian nin Diyos mahiro para

• Laglagon an palsong relihiyon. Mawawara na an mga relihiyon na nagtukdo nin mga kaputikan manungod sa Diyos asin nagpadipisil sa buhay kan mga tawo. Ilinaladawan kan Bibliya an palsong relihiyon bilang sarong hostes. Magigin nakakabigla para sa dakul na tawo an pagkalaglag kaiyan.—Kapahayagan 17:15, 16.

• Tapuson an pamamahala nin tawo. An Kahadian nin Diyos mahiro para tapuson an gabos na pamamahala nin tawo.—Kapahayagan 19:15, 17, 18.

• Halion an maraot na mga tawo. Kumusta man an mga tawo na determinado sa paggibo nin maraot asin habong magsunod sa Diyos? “Kun manungod sa mga maraot, tatakrason sinda sa daga.”—Talinhaga 2:22.

• Halion si Satanas asin an mga demonyo. Si Satanas asin an mga demonyo dai na “[mailalagalag] an mga nasyon.”—Kapahayagan 20:3, 10.

Ano an kahulugan kaini para sa mga tawo na inaako an Kahadian nin Diyos?

Bilang namamahalang Hadi sa langit, gigibuhon ni Jesus an mga bagay na dai nuarin man magigibo nin siisay man na tagapamahalang tawo. Kaiba niya an 144,000 na mga kapwa tagapamahala na pinili hali sa katawuhan. (Kapahayagan 5:9, 10; 14:1, 3) Sisiguraduhon niya na mangyayari an kabutan nin Diyos digdi sa daga. Ano an gigibuhon kan Kahadian nin Diyos para sa mga nakaistar sa daga?

• Hahalion an hilang asin kagadanan. “Mayo nin residente an magsasabi: ‘May hilang ako,’” asin “an kagadanan mawawara na.”—Isaias 33:24; Kapahayagan 21:4.

• Magdadara nin tunay na katuninungan asin katiwasayan. “An katuninungan kan saimong mga aking lalaki magigin abunda,” asin “an lambang saro sa sainda matukaw sa sirong kan saiyang puon nin ubas asin kan saiyang puon nin higera, asin mayo nin siisay man na mantatakot sa sainda.”—Isaias 54:13; Mikas 4:4.

• Magtatao nin nakakakontentong trabaho. “Lubos na ikakaugma kan sakuyang mga pinili an mga gibo kan saindang mga kamot. Dai sinda magpapagal nin sayang sana.”—Isaias 65:22, 23.

• Sosolusyunan an mga problema sa kapalibutan. “An kaawagan asin an alang na daga maggagaya-gayang marhay, asin an disyertong kapatagan magigin maugma asin mamumurak arog kan azafran.”—Isaias 35:1.

• Tutukduan an mga tawo kan dapat nindang gibuhon para mabuhay nin daing katapusan. “Ini nangangahulugan nin buhay na daing katapusan, an mamidbid ninda ika, an iyo sanang tunay na Diyos, asin an saro na saimong isinugo, si Jesu-Cristo.”—Juan 17:3.

Gusto nin Diyos na makamtan mo an mga bendisyon na iyan. (Isaias 48:18) Ipapaliwanag sa sunod na artikulo kun ano an puwede mong gibuhon ngunyan para makamtan mo an magayunon na puturong ini.