1. Paano niyato naaraman na nabubuhay kita sa “huring mga aldaw”?

NAMUNDAG ka daw pagkatapos kan taon 1914? Kun iyo, nabubuhay ka sa panahon kan “huring mga aldaw” kan presenteng sistemang ini nin mga bagay. (2 Tim. 3:1) Gabos kita nakakabareta kan dapit sa mga pangyayari na ihinula ni Jesus na mauutob sa panahon na ini. Kaiba diyan an mga giyera, grabeng gutom, mga linog, mga epidemya, pag-urog nin karatan, asin persekusyon sa mga lingkod ni Jehova. (Mat. 24:3, 7-9, 12; Luc. 21:10-12) Nahihiling ta man na an mga tawo minagawi arog kan ihinula ni apostol Pablo. (Hilingon an kahon na “ An Ugali kan mga Tawo Ngunyan.”) Bilang mga parasamba ni Jehova, kumbinsido kita na nabubuhay kita sa panahon kan “huring kabtang kan mga aldaw.”—Miq. 4:1, NW.

2. Anong mga hapot an kaipuhan niyatong maaraman an simbag?

² Huling dakul na taon na an naglihis puon kan 1914, siguradong nabubuhay na kita sa huring kabtang kan “huring mga aldaw.” Huling haranihon na an katapusan kan sistemang ini, kaipuhan niyatong maaraman an simbag sa nagkapirang mahalagang hapot: Ano an mga mangyayari sa pagtatapos kan “huring mga aldaw”? Asin ano an inaasahan ni Jehova na gigibuhon niyato mantang hinahalat ta an mga pangyayaring iyan?

3. Sigun sa propesiya na nasa 1 Tesalonica 5:1-3, anong proklamasyon an gigibuhon kan mga nasyon?

³ Basahon an 1 Tesalonica 5:1-3. Sinambit digdi ni Pablo an “aldaw ni Jehova.” Sigun sa konteksto, nanunungod ini sa peryodo nin panahon na mapuon sa pag-atake sa “Dakulang Babilonya,” an pambilog na kinaban na imperyo nin palsong relihiyon, asin matatapos sa Armagedon. (Kap. 16:14, 16; 17:5) Bago mismo  mag-abot an “aldaw” na iyan, an mga nasyon maproklamar nin “Katuninungan asin katiwasayan!” (Sa ibang mga traduksiyon: “Katuninungan asin kaligtasan.”) Ginagamit kun minsan kan mga lider sa kinaban an kaagid na mga ekspresyon pag pinag-uulayan ninda an dapit sa pagpakusog kan relasyon kan mga nasyon sa lambang saro. * Alagad bakong arog kaiyan an mangyayari kun dapit sa pagproklamar nin “katuninungan asin katiwasayan” na sinasambit kan Bibliya. Taano? Huling pag mangyari na ini, iisipon kan dakul na tawo na nagibo man nanggad kan mga lider sa kinaban na magin mas ligtas na lugar an kinaban. Pero an totoo, susundan iyan nin “biglang pagkalaglag” sa pagpuon kan “grabeng kasakitan.”—Mat. 24:21.

4. (a) Ano an kaipuhan pa niyatong maaraman mapadapit sa deklarasyon nin “katuninungan asin katiwasayan”? (b) Ano an aram na niyato manungod diyan?

⁴ May mga naaaraman na kita mapadapit sa deklarasyon nin “katuninungan asin katiwasayan.” Minsan siring, may mga bagay man na dai ta aram. Dai ta aram kun ano an magigin dahilan kan proklamasyon na iyan o kun paano iyan gigibuhon. Asin dai niyato aram kun baga saro sanang beses na pagproklamar iyan o sunod-sunod na mga anunsiyo. Ano man an mangyari, ini an aram ta: Dai kita dapat magpadaya asin isipon na kaya talaga kan mga lider sa kinaban na magtao nin katuninungan sa bilog na kinaban. Imbes, iyan an deklarasyon na sinasabi sa sato kan Bibliya na abangan niyato. Iyan an tanda na an “aldaw ni Jehova” mapuon na!

5. Uyon sa 1 Tesalonica 5:4-6, ano an dapat tang gibuhon tanganing magin andam kita para sa “aldaw ni Jehova”?

⁵ Basahon an 1 Tesalonica 5:4-6. Sinasabi sa sato kan sadol ni Pablo kun paano ta masisigurado na andam kita para sa “aldaw ni Jehova.” Dai kita dapat “magparaturog siring kan ginigibo kan iba.” Dapat na “magdanay kitang mata” asin pirming magin alerto. Halimbawa, kaipuhan niyatong magin alerto sa peligro na maikompromiso an satong neutralidad paagi sa pakikiambit sa mga isyu sa pulitika. Huling kun makikiambit kita, puwede kitang magin “kabtang kan kinaban.” (Juan 15:19) Aram niyato na an Kahadian nin Diyos an solamenteng paglaom ta para makamtan an katuninungan sa bilog na kinaban.

6. Gusto niyatong tabangan an iba na gibuhon an ano, asin taano?

⁶ Apuwera sa gusto niyatong magdanay na mata, gusto man niyatong tabangan an iba na mapagmata sa ihinula kan Bibliya na mangyayari sa kinaban. Tandaan niyato na pag nagpuon na an grabeng kasakitan, magigin huri nang marhay para sa mga tawo na magpuon na maglingkod ki Jehova. Iyan an dahilan kaya apuradong marhay an satong gibuhon na paghuhulit! *

7. Ano an inaasahan sa sato ni Jehova na gigibuhon ta ngunyan?

⁷ Sa halipot na panahon na natatada bago magpuon an “aldaw” ni Jehova, inaasahan niya sa sato na magdadanay kitang sibot sa  paghuhulit. Kaipuhan tang siguraduhon na “dakul an ginigibo [niyato] sa gibuhon kan Kagurangnan.” (1 Cor. 15:58) Ihinula ni Jesus kun ano an gigibuhon niyato. Kan sabihon niya an mapadapit sa gabos na mahalagang mangyayari sa panahon kan huring mga aldaw, sinabi pa niya: “Siring man, sa gabos na nasyon, an maugmang bareta kaipuhan na ihulit nguna.” (Mar. 13:4, 8, 10; Mat. 24:14) Isipa na sana: Sa kada pagluwas mo sa ministeryo, nakikikabtang ka sa pag-utob kan propesiyang iyan sa Bibliya!

8. Ano an nagpapatunay na padagos na nag-uuswag an gibuhon na paghuhulit kan Kahadian?

⁸ Ano an masasabi niyato sa pag-uswag kan gibuhon na paghuhulit kan Kahadian? Kada taon, nag-aabante an gibuhon. Halimbawa, isipa an dapit sa paglangkaw kan bilang kan mga parahayag kan Kahadian sa bilog na kinaban sa panahon kan huring mga aldaw. Kan 1914, igwa nin 5,155 parahayag sa 43 na kadagaan. Ngunyan, igwa na nin mga 8.5 milyones na parahayag sa 240 kadagaan! Pero dai pa tapos an satong gibuhon. Kaipuhan pa niyatong padagos na ibalangibog na an Kahadian nin Diyos an solamenteng solusyon sa gabos na problema kan katawuhan.—Sal. 145:11-13.

9. Taano ta kaipuhan niyatong padagos na ihulit an mensahe kan Kahadian?

⁹ Dai matatapos an satong gibuhon na paghuhulit kan Kahadian sagkod na dai pa sinasabi ni Jehova na tapos na iyan. Pirang panahon na sana daw an natatada para mamidbid kan mga tawo an Diyos na Jehova asin si Jesu-Cristo? (Juan 17:3) Dai ta aram. Basta an aram ta, sagkod na dai pa nagpupuon an grabeng kasakitan, an siisay man na “igwang pusong nasa tamang kamugtakan para sa buhay na daing katapusan” puwede pang maghimati sa maugmang bareta. (Gibo 13:48) Paano niyato matatabangan an mga tawong ini bago mahuri an gabos?

10. Anong tabang an itinatao sa sato ni Jehova tanganing itukdo sa mga tawo an katotoohan?

¹⁰ Paagi sa saiyang organisasyon, itinatao sa sato ni Jehova an gabos na kaipuhan ta para itukdo sa mga tawo an katotoohan. Halimbawa, tinatawan kita nin pagsasanay kada semana sa pagtiripon sa tahaw kan semana. Tinatabangan kita kan pagtiripon na ini na maaraman kun ano an sasabihon ta sa inot na pakikipag-ulay asin sa pagdalaw liwat. Asin tinutukduan kita diyan kun paano magkondukta nin pag-adal sa Bibliya. Tinawan man kita kan organisasyon ni Jehova nin mga kasangkapan sa satong Toolbox sa Pagtutukdo. Tinatabangan kita kan mga kasangkapan na ini na . . .

• makapuon nin pag-uulay,

• mapukaw an interes kan kagharong,

• mapakusog an pagmawot kan mga tawo na lalo pang makanuod,

•   maitukdo sa mga Bible study an katotoohan, asin

• imbitaran an mga interesado na buksan an satong website asin magbisita sa satong mga Kingdom Hall.

Siyempre, bakong igo an pagkaigwa sana kan mga kasangkapan na ini. Kaipuhan niyatong gamiton iyan. * Halimbawa, kun pagkatapos nin nakakaugmang pakikipag-ulay sa sarong interesado, nagwalat ka nin tract o magasin, igwa siyang mababasang dagdag na impormasyon sagkod na madalaw mo na siya liwat. Responsabilidad kan lambang saro sa sato na pirming magin sibot kada bulan sa gibuhon na paghuhulit kan Kahadian.

11. Taano ta ginibo an Online Bible Study Lessons?

¹¹ Saro pang paagi na tinatabangan ni Jehova an mga tawo na maaraman an katotoohan iyo an Online Bible Study Lessons sa jw.org^®. Taano ta ginibo an mga leksiyon na ini? Kada bulan, dakulon na tawo sa bilog na kinaban an naghahanap sa Internet nin mga leksiyon sa Bibliya. Puwedeng matabangan kan mga leksiyon sa satong website an mga tawong ini na magpuon na manudan an katotoohan sa Tataramon nin Diyos. May mga makakaulay ka man na tibaad mag-alangan na mag-ako nin personal na pag-adal sa Bibliya. Kun arog kaiyan, ipahiling sa sainda an feature na ini sa satong website o padarahan sinda nin link kan mga leksiyon. *

12. Ano an mga puwedeng manudan sa Online Bible Study Lessons?

¹² Tinutukar sa satong Online Bible Study Lessons an mga temang: “The Bible and Its Author,” “The Bible’s Main Characters,” asin “The Bible’s Message of Hope.” Sa mga temang iyan, manunudan nin saro:

• Kun paano makakatabang sa saiya an Bibliya

• Kun siisay si Jehova, si Jesus, asin an mga anghel

• Kun taano ta linalang nin Diyos an mga tawo

• Kun taano ta may pagsakit asin karatan

Tinutukar man sa mga leksiyon kun paano ni Jehova . . .

• tatapuson an pagsakit asin kagadanan,

• bubuhayon liwat an mga gadan, asin

• isasalida sa bakong epektibong pamamahala nin tawo an Kahadian nin Diyos.

13. Sinasalidahan daw kan mga leksiyon online an areglo nin pag-adal sa Bibliya? Ipaliwanag.

¹³ An mga leksiyon online dai man sinasalidahan an satong areglo nin pag-adal sa Bibliya. Itinao sa sato ni Jesus an pribilehiyong gumibo nin mga disipulo. Mawot niyato na hilingon kan mga interesado an mga leksiyon online, na magustuhan ninda iyan, asin na mapahiro sinda na urog pang magsiyasat. Kun mangyari iyan, tibaad mag-ako sinda nin pag-adal sa Bibliya. Sa katapusan kan lambang leksiyon, iniimbitaran an parabasa na mag-submit nin request para may personal na magtukdo sa saiya sa Bibliya. Paagi sa satong website, may average na labing 230 request nin pag-adal sa Bibliya an nareresibi ta kada aldaw sa bilog na kinaban! Mahalagang marhay nanggad an personal na pagtutukdong iyan!

14. Sigun sa instruksiyon ni Jesus na nasa Mateo 28:19, 20, ginigibo ta an satong pinakamakakaya na gibuhon an ano, asin taano?

¹⁴ Basahon an Mateo 28:19, 20. Mantang nagkokondukta kita nin mga pag-adal sa Bibliya, kaipuhan niyatong gibuhon an satong pinakamakakaya na “gumibo [nin mga disipulo], na tinutukduan sinda na utubon an gabos na bagay na ipinagbuot [ni Jesus].” Kaipuhan niyatong tabangan an mga tawo na masabutan kun gurano kaimportante sa sainda na manindugan sinda sa kampi ni Jehova asin kan saiyang Kahadian. Nangangahulugan iyan na papahiruon ta an mga tawo na isapuso an katotoohan paagi sa pag-aplikar kan mga nanudan ninda, pagdusay  kan saindang buhay ki Jehova, asin pagpabawtismo. Iyan an solamenteng paagi para makaligtas sinda sa aldaw ni Jehova.—1 Ped. 3:21.

15. Mayo kita nin panahon para sa ano, asin taano?

¹⁵ Arog kan sinambit kasubago, dikiton na sana an panahon na natatada bago umabot an katapusan kan sistemang ini nin mga bagay. Kaya mayo kita nin panahon para padagos na tukduan sa Bibliya an mga tawong dai naggigibo nin mga pagbabago sa saindang buhay para ipahiling na gusto nindang magin disipulo ni Cristo. (1 Cor. 9:26) Apurado an satong gibuhon! Dakulon pang tawo an kaipuhan na mapaabutan kan mensahe kan Kahadian bago mahuri an gabos.

16. Uyon sa Kapahayagan 18:2, 4, 5, 8, ano an dapat na gibuhon niyato gabos? (Hilingon man an nota sa ibaba.)

¹⁶ Basahon an Kapahayagan 18:2, 4, 5, 8. Sinasabi sa mga bersikulong ini an saro pang inaasahan ni Jehova sa saiyang mga parasamba. Dapat na malinaw na ipahiling kan gabos na tunay na Kristiyano na bako sindang kabtang kan Dakulang Babilonya. Bago manudan an katotoohan, an sarong tinutukduan sa Bibliya tibaad miyembro nin sarong palsong relihiyon. Tibaad nag-aatender siya kaidto sa relihiyosong mga seremonya kaiyan asin nagpapartisipar sa mga aktibidad kaiyan. O tibaad nagdodonar siya sa siring na organisasyon. Bago maaprubaran bilang dai pa bawtisadong parahayag an sarong tinutukduan sa Bibliya, kaipuhan nguna niyang siguraduhon na bako na siyang kabtang kan palsong relihiyon. Dapat siyang magtao nin surat nin paghali o lubos na putulon an saiyang pagigin miyembro kan relihiyon na iyan asin sa ano man na iba pang organisasyon na konektado sa Dakulang Babilonya. *

17. Anong klase nin trabaho an dapat na likayan nin sarong Kristiyano, asin taano?

¹⁷ Dapat na siguraduhon nin sarong tunay na Kristiyano na an saiyang sekular na trabaho mayo nin ano man na koneksiyon sa Dakulang Babilonya. (2 Cor. 6:14-17) Halimbawa, dai siya dapat magin empleyado sa simbahan. Siring man, dai gugustuhon nin sarong Kristiyano na empleyado nin sarong negosyo na maggibo nin dakulang trabaho sa sarong pasilidad na ginagamit sa palsong pagsamba. Asin kun may sadiri siyang negosyo, siguradong dai siya makua o maako nin trabaho na konektado sa ano man na kabtang kan Dakulang Babilonya. Taano ta marigon an satong paninindugan sa bagay na ini? Huling habo niyatong magkaigwa nin kabtang sa mga gibo asin kasalan kan relihiyosong mga organisasyon na maati sa paghiling ni Jehova.—Isa. 52:11. *

18. Paano nanindugan an sarong brother sa mga prinsipyo sa Bibliya kun dapit sa saiyang sekular na trabaho?

 ¹⁸ Pirang taon na an nakaagi, may elder na karpintero na inalukan nin sarong kontraktor na gibuhon an sarong sadit na trabaho sa sarong simbahan sa banwa kun sain nakaistar an brother. Aram kan kontraktor na pirming nagsasayuma an brother na magtrabaho sa mga simbahan. Pero sa pagkakataon na idto, gustong-gusto na talaga kan kontraktor na makakua nin matrabaho kaiyan. Alagad, nanindugan an brother sa mga prinsipyo sa Bibliya asin sinayumahan an trabaho. Kan sunod na semana, ipinahiling sa lokal na diyaryo an ritrato kan ibang karpintero na nagkakabit nin krus sa simbahan. Kun nagkompromiso an brother, tibaad siya kuta an nasa ritrato. Isipa na sana an magigin epekto kuta kaiyan sa paghiling sa saiya kan mga kapwa niya Kristiyano! Isipa man kun ano an mamamatian ni Jehova.

19-20. (a) Ano an mga naaraman niyato? (b) Ano pa an dapat niyatong maaraman?

¹⁹ Sinasabi kan Bibliya na an sunod na mahalagang propesiya na madali nang mangyari iyo an pagproklamar kan mga nasyon nin “katuninungan asin katiwasayan.” Huli sa itinukdo sa sato ni Jehova, aram niyato na dai makakamtan kan mga nasyon an tunay asin nagdadanay na katuninungan. Ano an dapat niyatong gibuhon bago umabot an pangyayaring iyan na susundan nin biglang pagkalaglag? Inaasahan sa sato ni Jehova na pirmi kitang magigin sibot sa paghuhulit kan mensahe kan Kahadian asin sa paggibo nin mga disipulo. Kasabay kaiyan, kaipuhan niyatong magdanay na siblag sa gabos na palsong relihiyon. Kaiba diyan an paghali bilang miyembro kan Dakulang Babilonya asin paglikay sa mga trabaho na konektado diyan.

²⁰ Igwa pa nin masurunod na mga mangyayari sa panahon kan “huring mga aldaw.” Asin may iba pang bagay na inaasahan sa sato ni Jehova na gigibuhon ta. Ano an mga iyan, asin paano kita makakapag-andam para sa gabos na bagay na madali nang mangyari? Hilingon ta sa masunod na artikulo.