1. Ano an pagkatakot sa Diyos, asin taano ta kaipuhan na igwa kaiyan idtong mga namumuot ki Jehova?

 NAMUMUTAN kan mga Kristiyano an Diyos, asin may pagkatakot man sinda sa saiya. Para sa iba, garo baga magkakontra iyan. Pero an pagkatakot na pinag-uulayan ta bako idtong takot na nakakapatakig. Pag-uulayan ta an sarong espesyal na klase nin pagkatakot. An mga tawong may arog kaining pagkatakot nakakamati nin paghanga asin hararom na paggalang sa Diyos. Habo nindang mapamundo an saindang Ama sa langit asin maiwara an dayupot na relasyon ninda sa saiya.—Sal. 111:10; Tal. 8:13.

2. Base sa mga tataramon ni Hading David na nasa Salmo 86:11, anong duwang bagay an pag-uulayan ta?

² Basahon an Salmo 86:11. b Mantang iniisip-isip mo an mga tataramon na iyan, masasabi mo na nasabutan kan maimbod na hading si David an kahalagahan kan pagkatakot sa Diyos. Pag-ulayan ta kun paano ta puwedeng iaplikar an ipinasabong nin Diyos na mga tataramon ni David. Inot, pag-uulayan ta an nagkapirang dahilan kun taano ta dapat kitang magkaigwa nin hararom na paggalang sa pangaran nin Diyos. Ikaduwa, pag-uulayan ta kun paano ta maipapahiling sa satong pang-aroaldaw na pamumuhay na igwa kita nin hararom na paggalang sa pangaran nin Diyos.

3. Anong pangyayari an posibleng nakatabang ki Moises na padagos na magkaigwa nin hararom na paggalang sa pangaran nin Diyos?

³ Isipa kun ano an namatian ni Moises kan nasa laog siya kan gaak nin gapo asin mahiling niya sa sarong bisyon an pag-agi kan kamurawayan ni Jehova. Posibleng ini an pinakamakangangalas na eksperyensiya nin siisay man na tawo bago umabot si Jesus digdi sa daga! Nadangog ni Moises an minasunod na mga tataramon na minalataw na sarong anghel an nagsabi: “Si Jehova, si Jehova, Diyos na mahihirakon asin mapagmalasakit, dai tulos naaanggot asin abunda sa maimbod na pagkamuot saka katotoohan, nagpapahiling nin maimbod na pagkamuot sa rinibo, nagpapatawad nin salang gibo asin paglapas saka kasalan.” (Ex. 33:17-23; 34:5-7, NWT) Posibleng nagigirumduman ni Moises an pangyayaring iyan pag ginagamit niya an pangaran na Jehova. Kaya bakong makangangalas na pinatanidan ni Moises kan huri an banwaan nin Diyos na Israel na ‘magpahiling nin pagkatakot sa pangaran na ini na mamuraway asin kahanga-hanga.’​—Deut. 28:58, NWT.

4. Tanganing urog pang magrarom an paggalang ta ki Jehova, anong mga kuwalidad niya an marahay na hurop-hurupon ta?

⁴ Pag iniisip ta an pangaran na Jehova, marahay na hurop-hurupon ta kun anong klaseng persona an kagsadiri kan pangaran na iyan. Dapat tang girumdumon an mga kuwalidad niya, siring baga kan saiyang kapangyarihan, kadunungan, hustisya, asin pagkamuot. An paghurop-hurop sa mga iyan asin sa iba pa makakatabang na urog pang magrarom an paggalang ta sa saiya.—Sal. 77:11-15.

5-6. (a) Ano an kahulugan kan pangaran nin Diyos? (b) Sigun sa Exodo 3:13, 14 asin Isaias 64:8, sa anong mga paagi pinapangyari ni Jehova na maisagibo an mga bagay-bagay?

⁵ Ano an aram ta manungod sa kahulugan kan pangaran nin Diyos? Sinasabi nin dakul na iskolar na an pangaran na Jehova nangangahulugan na “Pinangyayari Niyang Magin.” Ipinapagirumdom kaiyan sato na mayong makakapugol ki Jehova na isagibo an kabutan niya, asin kaya niyang pangyarihon na maisagibo an mga bagay-bagay. Paano?

⁶ Pinapangyari ni Jehova na maisagibo an mga bagay-bagay paagi sa pagigin ano man na kinakaipuhan tanganing mautob an saiyang katuyuhan. (Basahon an Exodo 3:13, 14.) Parati kitang dinadagka na hurop-hurupon an kahanga-hangang  aspektong iyan kan personalidad nin Diyos. Kaya man ni Jehova na pangyarihon na an saiyang bakong perpektong mga tawong lingkod magin ano man na kinakaipuhan para makapaglingkod sa saiya asin mautob an katuyuhan niya. (Basahon an Isaias 64:8.) Sa mga paaging iyan pinapangyari ni Jehova na maisagibo an kabutan niya. Mayo nin makakapugol sa saiya sa pagpangyari na mautob an mga katuyuhan niya.​—Isa. 46:10, 11.

7. Paano niyato urog na maaapresyar an satong Ama sa langit?

⁷ Urog tang maaapresyar an satong Ama sa langit paagi sa paghurop-hurop sa mga ginibo niya asin sa mga pinangyari niyang magibo ta. Halimbawa, pag hinuhurop-hurop ta an makangangalas na mga linalang, napapahanga kitang marhay sa mga ginibo ni Jehova, sa mga pinangyari niyang mag-eksister. (Sal. 8:3, 4) Asin pag hinurop-hurop ta kun ano an pinangyari ni Jehova na mahaman niyato tanganing maisagibo ta an kabutan niya, urog na nagrararom an satong paggalang sa saiya. Talagang kahanga-hanga an pangaran na Jehova! Kalabot diyan an gabos na manungod sa satong Ama, an gabos na ginibo niya, asin an gabos na gigibuhon pa niya.​—Sal. 89:7, 8.

8. Sigun sa Deuteronomio 32:2, 3, ano an gusto ni Jehova na gibuhon kan mga lingkod niya sa saiyang pangaran?

⁸ Kan madali nang maglaog sa Dagang Panuga an mga Israelita, may itinukdong kanta si Jehova ki Moises. (Deut. 31:19) Kaipuhan man na itukdo ni Moises an kantang iyan sa banwaan. (Basahon an Deuteronomio 32:2, 3.) c Mantang hinurop-hurop ta an bersikulo 2 asin 3, malinaw na habo ni Jehova na itago an saiyang pangaran, na garo baga labi-labi kasagrado kaiyan para sambiton. Gusto niya na maaraman kan gabos an pangaran niya! Sarong pribilehiyo talaga para sa banwaan na madangog si Moises mantang itinutukdo niya sa sainda an manungod ki Jehova asin an Saiyang mamuraway na pangaran! Arog sa maluyang uran na kapaki-pakinabang sa mga pananom, an mga itinukdo sa sainda ni Moises nakapakusog sa pagtubod ninda asin nakaranga sa sainda. Paano niyato masisigurado na arog kaiyan an satong pagtutukdo?

9. Paano kita makakatabang na mapakangbanal an pangaran ni Jehova?

⁹ Pag naghaharong-harong kita o nasa ministeryo sa publiko, puwede tang gamiton an satong Bibliya para ipahiling sa mga tawo an personal na pangaran nin Diyos, an Jehova. Puwede ta sindang alukan nin magayon na publikasyon, o pahilingan nin magagayon na video asin mga materyal sa satong website na nagtataong onra ki Jehova. Sa trabaho, eskuwelahan, o mantang nasa biyahe, puwede kitang makahanap nin mga oportunidad na maipakipag-ulay sa iba an manungod sa satong namumutan na Diyos asin sa saiyang personalidad. Pag sinasabi ta sa iba an manungod sa mamumuton na katuyuhan ni Jehova para sa katawuhan asin sa daga, tibaad primerong beses pa lang nindang madangog iyan. Mantang sinasabi ta sa iba an katotoohan manungod sa satong mamumuton na Ama, nakakatabang kita na mapakangbanal an pangaran nin Diyos. Natatabangan ta an mga tawo na masabutan na an mga itinukdo sa sainda mga kaputikan asin pakaraot palan manungod ki Jehova. An itinutukdo ta sa mga tawo iyo an pinakanakakapakusog asin pinakanakakarangang mga katukduan.—Isa. 65:13, 14.

10. Pag nagkokondukta nin mga pag-adal sa Bibliya, taano ta bako sanang pagtutukdo kan mga kahagadan asin pamantayan nin Diyos an kaipuhan tang gibuhon?

¹⁰ Pag nagkokondukta nin mga pag-adal sa Bibliya, gusto tang tabangan an satong mga tinutukduan na maaraman an pangaran ni Jehova asin gamiton iyan. Apuwera diyan, gusto ta sindang tabangan na lubos na mamidbid si Jehova. Magigibo ta daw iyan kun itutukdo ta lang sainda an mga instruksiyon, mga pamantayan nin Diyos, asin an mga susundon sa paggawi? Puwedeng manudan nin sarong mahusay na tinutukduan an manungod sa mga pagbuot nin Diyos, asin tibaad hangaan niya iyan. Pero masunod daw ki Jehova an tinutukduan  huli ta namumutan niya Siya bilang sarong Persona? Tandaan, aram ni Eva an pagbuot nin Diyos, pero dai niya tunay na namumutan an Paratao nin Katugunan; arog man kaiyan si Adan. (Gen. 3:1-6.) Kaya bako sanang pagtutukdo sa iba manungod sa matanos na mga kahagadan asin pamantayan nin Diyos an kaipuhan tang gibuhon.

11. Pag nagtutukdo manungod sa mga pagbuot asin pamantayan nin Diyos, paano ta puwedeng tabangan an satong mga tinutukduan na mamutan an Paratao nin Katugunan?

¹¹ An mga kahagadan asin pamantayan ni Jehova pirming para sa ikakarahay ta. (Sal. 119:97, 111, 112) Pero tibaad bakong arog kaiyan an magin pagmansay kan satong mga tinutukduan sagkod na dai ninda nasasabutan na ginibo ni Jehova an mga pagbuot na iyan huling namumutan niya kita. Kaya puwede tang ihapot sa satong mga tinutukduan: “Sa hiling mo, taano daw ta ipinapagibo o dai ipinapagibo nin Diyos an bagay na ini sa mga lingkod niya? Ano an itinutukdo kaini sa sato manungod sa saiya bilang Persona?” Kun tatabangan ta an satong mga tinutukduan na mag-isip manungod ki Jehova asin na magkaigwa nin tunay na pagkamuot para sa saiyang mamuraway na pangaran, posibleng marhay na maabot niyato an puso ninda. Mamumutan kan satong mga tinutukduan bako sana an mga tugon kundi pati man an Paratao nin Katugunan. (Sal. 119:68) Magkukusog an saindang pagtubod asin matatagalan ninda an maabot na dipisil na mga pagbalo.—1 Cor. 3:12-15.

12. Sa anong pagkakataon nabanga an puso ni David, asin ano an nagin resulta?

¹² Mahalagang marhay an mga tataramon na nasa Salmo 86:11: “Tawan mo ako nin dai nababangang puso.” (NWT) Pinasabngan si Hading David na isurat an mga tataramon na iyan. Kan siya nabubuhay, nahiling niya na madalion sanang tugutan na mabanga an puso. Sa sarong pagkakataon, kan nasa bubungan siya kan harong niya, nahiling niyang nagkakarigos an agom nin ibang lalaki. Kan oras na idto, bilog pa daw an puso ni David o nabanga na? Aram niya an pamantayan ni Jehova: “Dai mo pagmawuton na mapasaimo an agom kan saimong kapwa.” (Ex. 20:17, NWT) Pero, minalataw na padagos siyang naghiling. Nabanga an puso niya sa pagmawot niya sa babaying si Bat-seba asin sa pagmawot niya na mapaugma si Jehova. Dawa ngani haloy nang namumutan ni David si Jehova asin may pagkatakot siya sa Saiya, nagpadara siya sa saiyang makasadiring pagmawot. Huli kaiyan, nakagibo si David nin maraot na mga bagay. Nagdara siya nin katuyawan sa pangaran ni Jehova. Nagdara man si David nin grabeng danyos sa inosenteng mga tawo, kaiba na an saiya mismong pamilya.—2 Sam. 11:1-5, 14-17; 12:7-12.

13. Paano ta naaraman na nagkaigwa giraray nin dai nababangang puso si David?

¹³ Dinisiplina ni Jehova si David, asin naibalik niya an marahay niyang relasyon ki Jehova. (2 Sam. 12:13; Sal. 51:2-4, 17) Nagirumduman ni David an problema asin grabeng kamunduan na resulta kan tugutan niyang mabanga an puso niya.  Tinabangan daw ni Jehova si David na magkaigwa nin dai nababangang puso? Iyo, huling kan huri sinambit sa Tataramon ni Jehova na si David sarong lalaki na “nagin bilog an . . . puso ki Jehova na saiyang Diyos.”—1 Ha. 11:4; 15:3, NWT.

14. Ano an kaipuhan tang ihapot sa satong sadiri, asin taano?

¹⁴ An halimbawa ni David nakakapakusog sa sato pero saro man na patanid. An pakakomiter niya nin magabat na kasalan sarong patanid para sa mga lingkod nin Diyos ngunyan. Kita man baguhan o haloy nang naglilingkod ki Jehova, kaipuhan niyatong ihapot sa satong sadiri, ‘Linalabanan ko daw an mga pagpurbar ni Satanas na bangaon an sakong puso?’

15. Paano puwedeng makaprotektar sa sato an pagkatakot sa Diyos kun may mahiling kitang malaswang mga ritrato?

¹⁵ Halimbawa, ano an ginigibo mo kun makahiling ka sa TV o sa Internet nin sarong ritrato na puwedeng makapukaw nin imoral na mga pagmawot? Tibaad pasil sanang isipon na an ritrato o pelikulang idto bako man talagang pornograpiko. Pero posible daw na sarong bagay iyan na ginagamit ni Satanas para bangaon an puso mo? (2 Cor. 2:11) Puwede iyan na iagid sa tarom nin patok na ginagamit para baakon an sarong troso. Dai man tulos mababanga an troso sa primerong pagtama kan tarom kan patok. Pero mababanga man giraray iyan pagkatapos nin pauruutrong pagpatok. May pagkakapareho daw an malaswang mga ritrato asin an tarom nin patok? An sarong bagay na garo sadit asin dai man makakadanyar puwedeng madali sanang magin dahilan na an sarong tawo makagibo nin mga kasalan na makakabanga kan puso niya asin makakahali kan saiyang integridad. Kaya dai tugutan na makalaog sa puso mo an ano man na bakong marahay na bagay! Pagdanayon iyan na dai nababanga para magkaigwa nin pagkatakot sa pangaran ni Jehova!

16. Pag may sugot, ano an mga dapat niyatong ihapot sa satong sadiri?

¹⁶ Apuwera sa malaswang mga ritrato, may dakul na iba pang bagay na ginagamit si Satanas para tentaran kita na gumibo nin sala. Ano an ginigibo ta sa mga iyan? Madali sanang isipon na bako man marauton an mga bagay na iyan. Halimbawa, tibaad  isipon ta: ‘Dai man ako matitiwalag pag ginibo ko ini, kaya siguradong bako man ini gayong seryoso.’ Salang marhay nanggad an arog kaiyan na kaisipan. Marahay na ihapot niyato sa satong sadiri: ‘Pinupurbaran daw ni Satanas na gamiton an sugot na ini para mabanga an puso ko? Pag nagpadara ako sa salang mga pagmawot, magdadara daw ako nin katuyawan sa pangaran ni Jehova? An gigibuhon ko daw makakaparani sa sako sa sakuyang Diyos, o makakaparayo?’ Hurop-hurupon an mga hapot na iyan. Mamibi para sa kadunungan asin magin onesto sa pagsimbag sa mga iyan, dai pagdayaon an sadiri. (Sant. 1:5) An paggibo kaiyan puwedeng magin tunay na proteksiyon. Matatabangan ka kaiyan na marigon na sayumahan an mga sugot, arog kan ginibo ni Jesus kan sabihon niya: “Humali ka Satanas!”—Mat. 4:10.

17. Taano ta bakong marahay kun banga an satong puso? Iilustrar.

¹⁷ Bakong marahay kun banga an satong puso. Isipa an sarong team sa isport na an mga miyembro bakong magkasurundo. May mga miyembro na gustong sadiri sana an maumaw, an iba habong magsunod sa mga patakaran, asin may nagkapira na mayo nin respeto sa coach. Posibleng marhay na madaog an arog kaiyan na team. Sa kabaliktaran, an sarong team na nagkakasararo posibleng marhay na manggana. Puwedeng magin arog kan mapangganang team na iyan an puso mo kun an mga kaisipan mo, pagmawot, asin namamatian dai nababanga sa paglilingkod ki Jehova. Tandaan, gustong-gusto ni Satanas na bangaon an puso mo. Gusto niya na an mga kaisipan, pagmawot, asin namamatian mo magin kontra sa mga pamantayan ni Jehova. Pero dapat na bilog an puso mo para makapaglingkod ka ki Jehova. (Mat. 22:36-38) Dai nanggad pagtugutan si Satanas na bangaon an puso mo!

18. Kauyon kan mga tataramon na nasa Miqueas 4:5, ano an determinado mong gibuhon?

¹⁸ Ipamibi ki Jehova an arog kan ipinamibi ni David: “Tawan mo ako nin dai nababangang puso para magkaigwa ako nin pagkatakot sa saimong pangaran.” Gibuhon an gabos na makakaya mo na mamuhay kauyon kan pamibing iyan. Kada aldaw, determinadong ipahiling sa mga desisyon mo, magpuon sa saradit sagkod sa darakula, na igwa ka nin hararom na paggalang sa banal na pangaran ni Jehova. Kun ginigibo mo iyan, bilang saro sa mga Saksi ni Jehova, marahay an magigin epekto kaiyan sa pangaran nin Diyos. (Tal. 27:11) Asin gabos kita makakapagsabi kan arog kan sinabi ni propeta Miqueas: “Malakaw kita sa ngaran ni Jehova na satuyang Diyos sagkod nuarin pa man.”—Miq. 4:5, NWT.