1. Paano napapahiro an dakul kun manungod sa mga pangangaipo sa langtad?

 KADAKUL kitang gibuhon mantang patapos na an sistemang ini. (Mat. 24:14; Luc. 10:2; 1 Ped. 5:2) Kita gabos gustong maglingkod ki Jehova nin lubos, sagkod sa makakaya ta. Dakul an nagpapahiwas kan saindang ministeryo. May mga gustong magpayunir. An iba gustong maglingkod sa Bethel o tumabang sa pagtugdok nin teokratikong mga pasilidad. Asin kadakul na brother an naghihinguwang makuwalipikar bilang mga ministeryal na lingkod o elder. (1 Tim. 3:1, 8) Siguradong ugmahon si Jehova na mahiling an pagigin andam kan saiyang banwaan!—Sal. 110:3; Isa. 6:8.

2. Ano an tibaad mamatian niyato kun dai ta naaabot an nagkapira sa espirituwal na mga pasuhan ta?

² Pero puwede kitang pangluyahan nin buot kun huruhalawig nang panahon an nag-agi tapos dai ta pa man giraray naaabot an nagkapira sa espirituwal na mga pasuhan ta. O tibaad madisganar kita dahil dai na puwede sato an nagkapirang pribilehiyo huli sa satong edad o iba pang kamugtakan. (Tal. 13:12) Iyan an sitwasyon ni Melissa. * Gustong-gusto niya kutang maglingkod sa Bethel o mag-eskuwela sa School for Kingdom Evangelizers, pero sinabi niya: “Lampas na ako sa kahagadan na edad. Para sako ngunyan, pangarap na sana an mga pribilehiyong iyan. Kun minsan, pinangluluyahan ako nin buot.”

3. Ano an mga tibaad kaipuhan na gibuhon nin nagkapira para makuwalipikar sa partikular na mga pribilehiyo?

³ Tibaad kaipuhan kan nagkapirang hoben asin makusog an salud na magin maygurang asin magpahiling nin partikular na mga kuwalidad bago makuwalipikar para sa dagdag na mga pribilehiyo. Halimbawa, tibaad dakul sindang aram, nakakadesisyon tulos, asin andam na magtrabaho; pero tibaad kaipuhan pa nindang magin mas mapasensiya, mas pulidong magtrabaho, o magin mas magalang.  Kun mapokus ka sa kinakaipuhan na mga kuwalidad, tibaad itao saimo an sarong pribilehiyo nin paglilingkod sa panahon na dai mo iyan inaasahan. Pag-isipan an eksperyensiya ni Nick. Kan 20 anyos siya, namundo siyang marhay huling dai siya nanombrahan bilang ministeryal na lingkod. Sinabi niya, “Naisip ko, siguradong may problema sako.” Pero dai nagsuko si Nick. Ginibo niya an pinakamakakaya niya para sa mga pribilehiyo na bukas sa saiya. Naglilingkod siya ngunyan bilang miyembro nin sarong Komite kan Sangay.

4. Ano an pag-uulayan ta sa artikulong ini?

⁴ Pinangluluyahan ka daw nin buot dahil dai mo pa naaabot an sarong espirituwal na pasuhan? Kun iyo, sabihon ki Jehova an manungod diyan. (Sal. 37:5-7) Puwede ka man maghagad nin suhestiyon sa maygurang na mga tugang sa kun paano mo mapapauswag an paglilingkod mo sa Diyos, dangan gibuhon an pinakamakakaya mo para iaplikar an sadol ninda. Kun gigibuhon mo iyan, posibleng marhay na makakamtan mo an pribilehiyong iyan o maaabot an pasuhan na iyan. Pero, arog ki Melissa na sinambit kasubago, tibaad dai talaga posible na maabot mo ngunyan an minamawot mong pribilehiyo. Pa’no na? Paano mo mapapagdanay an kaugmahan mo? Para masimbag iyan, pag-uulayan sa artikulong ini (1) kun sain ta mahahanap an kaugmahan, (2) kun paano ka magigin mas maugma, asin (3) kun ano an mga puwede mong magin pasuhan na makakadagdag sa kaugmahan mo.

5. Para magin maugma, sa ano kita dapat na magpokus? (Parahulit 6:9, NWT)

⁵ Arog kan mababasa sa Parahulit 6:9 (NWT), manunumpungan ta an kaugmahan kun hahanapon ta iyan sa tamang lugar. (Basahon.) An sarong tawo na ikinakaugma “kun ano an nahihiling kan mga mata” kontento sa kun ano an igwa siya, arog kan presenteng kamugtakan niya. Sa kabaliktaran, an tawo na naglalagaw-lagaw sa paglapag sa mga minamawot niya padagos sa pagpangarap sa sarong bagay na dai niya man talaga makukua. Kaya, ano an manunudan ta diyan? Para magin maugma, dapat na magpokus kita sa kun ano an igwa kita asin sa mga pasuhan na posible para sato na maabot.

6. Anong parabula an pag-uulayan ta ngunyan, asin sa ano kita mapokus?

⁶ Posible daw talaga na magin kontento ka sa kun ano an igwa ka na? Para sa dakul, dai, huling natural sa tawo na magparaadal nin bagong mga bagay. Pero an totoo, posible iyan. Puwede kitang magin maugma asin dai sana basta makontento sa kun ano an ‘nahihiling kan satong mga mata.’ Paano ta magigibo iyan? Para maaraman, pag-ulayan ta an parabula ni Jesus manungod sa mga talento na mahihiling sa Mateo 25:14-30. Mapokus kita sa kun ano an maitutukdo sato kaiyan manungod sa kun paano magin maugma asin magin mas maugma pa ngani sa mga bendisyon na igwa kita ngunyan.

7. Sumaryuhon an parabula ni Jesus manungod sa mga talento.

⁷ Sa parabula, sarong tawo an madali nang magbiyahe. Bago maghali, inapod niya an saiyang mga uripon asin tinawan an kada saro sainda nin mga talento na ipagnenegosyo ninda. * Isinaisip niya an kakayahan kan lambang saro sa sainda, kaya tinawan niya nin limang talento an inot na uripon, nin duwang talento an ikaduwa, asin nin saro an ikatulo. Ginamit na marhay kan inot na duwang uripon an itinao sa sainda. Pero an ikatulong uripon, mayong ginibo sa kuwarta na itinao saiya, kaya hinali siya sa serbisyo kan saiyang kagurangnan.

8. Ano an posibleng dahilan kaya maugma an inot na uripon?

⁸ Siguradong ugmahon an inot na uripon na ipinagkatiwala sa saiya an lima sa mga talento  kan saiyang kagurangnan. Dakulaon na kuwarta nanggad iyan, asin ipinapahiling kaiyan kun gurano kadakula an tiwala saiya kan saiyang kagurangnan! Pero kumusta man an ikaduwang uripon? Puwede kutanang nadisganar siya dahil bakong arog kadakul kan sa inot na uripon an itinao sa saiyang talento. Pero ano an ginibo niya?

9. Manungod sa ikaduwang uripon, anong mga bagay an mayong sinasabi an ilustrasyon? (Mateo 25:22, 23)

⁹ Basahon an Mateo 25:22, 23. Mayong sinabi si Jesus na naanggot saka naghinanakit an ikaduwang uripon dahil duwa sanang talento an itinao sa saiya. Saka mayo man sinabi si Jesus na nagreklamo an uripon: ‘Ini sana an sako? Pareho man sana baga kami nin kakayahan kan uripon na tinawan nin limang talento! Kun dai ako pinapahalagahan kan kagurangnan ko, itatalbong ko na sana an duwang talentong ini tapos matrabaho ako para sa sadiri ko.’

10. Ano an ginibo kan ikaduwang uripon sa mga talento niya?

¹⁰ Arog kan inot na uripon, sineryosong marhay kan ikaduwang uripon an responsabilidad na itinao sa saiya asin mahigos na nagtrabaho para paglingkudan an saiyang kagurangnan. Bilang resulta, nadoble niya an mga talento na itinao saiya kan kagurangnan. Abundang binalusan an kahigusan saka kakayahan kan uripon na ini. Naugma saiya an kagurangnan niya, kinomendaran siya, asin tinawan pa ngani nin dagdag na responsabilidad!

11. Paano kita magigin mas maugma?

¹¹ Kaagid kaiyan, puwede kitang magin mas maugma paagi sa pagtao nin lubos na atensiyon sa ano man na itao satong gibuhon sa paglilingkod ki Jehova. ‘Idusay an bilog mong panahon’ sa gibuhon na paghuhulit, asin lubos na makikabtang sa mga aktibidad sa kongregasyon. (Gibo 18:5; Heb. 10:24, 25) Mag-andam na marhay para sa  mga pagtiripon tanganing makatao ka nin nakakapakusog na mga komento sa materyal na pinag-aadalan. Seryosuhon an ano man na asignasyon para sa estudyante na itinatao saimo sa mga pagtiripon sa tahaw kan semana. Kun pinakiulayan kang tumabang sa sarong trabaho sa kongregasyon, magin nasa oras asin maaasahan. Dai mansayon an ano man na asignasyon na itinatao saimo na bako iyan mahalaga kaya dai kaipuhan na tawan nin panahon. Hinguwahon na pauswagon an saimong mga kakayahan. (Tal. 22:29) Mantang mas pokus ka sa espirituwal na mga aktibidad saka asignasyon mo, magigin mas marikas an pag-uswag mo saka magigin mas maugma ka. (Gal. 6:4) Magigin mas pasil man saimo na magin maugma para sa iba pag natawan sinda nin sarong pribilehiyo na gusto mong makamtan.—Roma 12:15; Gal. 5:26.

12. Ano an mga ginibo kan duwang Saksi para magin mas maugma sinda?

¹² Nagigirumduman mo si Melissa, su sister na gusto kutang maglingkod sa Bethel o mag-eskuwela sa School for Kingdom Evangelizers? Dawa dai na mangyayari iyan, sinabi niya: “Hinihinguwa kong lubos na makikabtang sa paglilingkod ko bilang payunir asin na purbaran an gabos na pamamaagi nin paghuhulit. Nagtao iyan sako nin dakulang kaugmahan.” Asin ano an ginibo ni Nick para makayanan an pagkadisganar kan dai siya nombrahan bilang ministeryal na lingkod? “Nagpokus ako sa mga pribilehiyo na bukas sako—an pakikikabtang sa ministeryo saka pagtao nin nakakapakusog na mga komento sa pagtiripon. Nag-aplay man ako na maglingkod sa Bethel asin kan sunod mismong taon nagpuon akong maglingkod diyan.”

13. Ano an magigin resulta kun itatao mo an saimong lubos na atensiyon sa asignasyon mo ngunyan? (Parahulit 2:24, NWT)

¹³ Kun lubos mong itatao an saimong atensiyon sa asignasyon mo ngunyan, matatawan ka daw nin mas dakul na responsabilidad pag-abot nin panahon? Puwedeng mangyari iyan, arog ki Nick. Pero kun dai, arog ki Melissa, puwede ka pa man giraray na magin mas maugma, asin makakamati ka nin dakulang pagkakontento sa mga ginigibo mo para ki Jehova. (Basahon an Parahulit 2:24, NWT.) Apuwera kaiyan, siguradong makakamati ka nin dakulang kaugmahan dahil aram mong an saimong mga paghihinguwa nakakapaugma sa satong Kagurangnan, si Jesu-Cristo.

14. Manungod sa satong espirituwal na mga pasuhan ano an dapat tang isaisip?

¹⁴ An pagpokus daw sa mga asignasyon ta ngunyan nangangahulugan na mapundo na kita sa paghanap nin mga paagi para pahiwason an satong paglilingkod ki Jehova? Dai nanggad! Dapat kitang magkaigwa nin espirituwal na mga pasuhan na makakatabang sato na padagos na hinguwahon na magin produktibo sa ministeryo asin makatabang sa satong mga tugang. Maaabot ta an mga pasuhan na iyan kun madunong saka mapakumbaba kitang mapokus sa paglilingkod sa iba imbes na sa satong sadiri.—Tal. 11:2; Gibo 20:35.

15. Ano an nagkapirang pasuhan na makakatabang saimo na lalo kang magin maugma?

¹⁵ Ano an mga puwede mong gibuhon na pasuhan? Maghagad nin tabang ki Jehova para maaraman mo kun anong mga pasuhan an posible para saimo na maabot. (Tal. 16:3; Sant. 1:5) Puwede mo daw magin pasuhan an saro sa mga sinambit sa  inot na parapo kan artikulong ini—an pag-auxiliary o pagregular payunir, paglilingkod sa Bethel, o pagtabang sa mga proyekto sa pagtugdok kan organisasyon? O tibaad nasa kamugtakan ka na mag-adal nin bagong lengguwahe tanganing ipalakop an maugmang bareta o maghulit pa ngani sa sarong teritoryo na iba an lengguwahe. Para sa urog pang impormasyon manungod sa mga pasuhan na ini, puwede mong hilingon an kapitulo 10 kan librong Organisado sa Paggibo kan Kabutan ni Jehova asin puwede kang makipag-ulay sa  mga elder sa saindong kongregasyon. * Mantang hinihinguwa mong maabot an mga pasuhan na iyan, mahihiling kan iba an pag-uswag mo asin lalo kang magigin maugma.

16. Ano an puwede mong gibuhon kun dai mo pa maaabot sa ngunyan an sarong pasuhan?

¹⁶ Pero paano kun dai mo pa maaabot sa ngunyan an arin man sa mga pasuhan na sinambit sa artikulong ini? An puwede mong gibuhon iyo na maghanap nin ibang pasuhan, saro na posible para saimo na maabot. Pag-isipan an nagkapirang halimbawa kaiyan.

17. Sigun sa 1 Timoteo 4:13, 15, ano an puwedeng gibuhon nin sarong brother para magin mas mahusay na paratukdo?

¹⁷ Basahon an 1 Timoteo 4:13, 15. Kun saro kang bawtisadong brother, puwede mong hinguwahon na pauswagon an kakayahan mo sa pagpahayag asin pagtutukdo. Taano? Huling kun ‘itatao mo an saimong lubos na atensiyon’ sa pagbasa, pagpahayag, asin pagtutukdo magigin bendisyon iyan sa mga nagdadangog sa saimo. Purbaran na gibuhon na pasuhan na pag-adalan saka iaplikar an lambang kuwalidad sa pagtaram na tinutukar sa brosyur na Magin Mahusay sa Pagbasa Asin Pagtutukdo. Magpokus sa sarong kuwalidad, asin maigot na praktison iyan sa harong, dangan hinguwahon na ipahiling an kuwalidad na iyan sa mga asignasyon mo sa pagpahayag. Maghagad nin suhestiyon sa auxiliary counselor o sa iba pang elder na “nagpapahiling nin kaigutan sa saindang pagpahayag asin pagtutukdo.” * (1 Tim. 5:17) Magpokus bako lang sa kun paano mo iaaplikar an leksiyon sa brosyur kundi pati man sa kun paano mo matatabangan an mga nagdadangog na  kumusog an pagtubod ninda o na maiaplikar ninda an mga nanunudan ninda. Kun gigibuhon mo iyan, magigin mas maugma ka asin sinda.

18. Ano an makakatabang sa sato na maabot an mga pasuhan sa satong ministeryo?

¹⁸ Gabos kita may asignasyon na maghulit asin gumibo nin mga disipulo. (Mat. 28:19, 20; Roma 10:14) Gusto mo daw na pauswagon an mga kakayahan mo sa mahalagang marhay na gibuhon na ini? Gumibo nin espesipikong mga pasuhan mantang pinag-aadalan saka inaaplikar mo an mga nanunudan mo sa brosyur na Pagtutukdo. Puwede kang makakua nin iba pang praktikal na mga suhestiyon sa An Satong Kristiyanong Pamumuhay Asin Ministeryo—Workbook Para sa Pagtiripon saka sa mga video nin sampol na pakikipag-ulay na ipinapahiling sa mga pagtiripon sa tahaw kan semana. Purbaran an manlain-lain na ideya para maaraman kun ano an pinakaepektibo. Kun susunudon mo an mga suhestiyon na ini, siguradong mamamatian mo an daing kaagid na kaugmahan kan pagigin sarong mahusay na Kristiyanong ministro.—2 Tim. 4:5.

19. Ano an puwede mong gibuhon para mapatalubo an Kristiyanong mga kuwalidad?

¹⁹ Pag nagpipili ka nin mga pasuhan dai paglingawan an saro sa pinakamahalaga—an pagpatalubo nin Kristiyanong mga kuwalidad. (Gal. 5:22, 23; Col. 3:12; 2 Ped. 1:5-8) Ano an puwede mong gibuhon para maabot an pasuhan na iyan? Halimbawa, ipamugtak na gusto mong magkaigwa nin mas makusog na pagtubod. Puwede kang magbasa nin mga artikulo sa satong mga publikasyon na nagtatao nin praktikal na mga suhestiyon para mapakusog an saimong pagtubod. Siguradong makikinabang ka sa paghiling nin mga programa sa JW Broadcasting^® manungod sa kun paano nagpahiling nin pambihirang pagtubod an nagkapirang tugang mantang napapaatubang sa manlain-lain na pagbalo. Dangan mag-isip nin mga paagi na diyan maaarog mo an pagtubod ninda.

20. Paano ta madadagdagan an satong kaugmahan asin mababawasan an satong pagkadisganar?

²⁰ Gabos kita siguradong gustong gumibo nin mas urog pa para ki Jehova kisa sa kaya tang gibuhon ngunyan. Sa bagong kinaban nin Diyos, makakapaglingkod na kita saiya nin lubos. Mantang dai pa iyan nag-aabot, kun aaprobetsaran ta an ano man na oportunidad na bukas sa sato, madadagdagan ta an satong kaugmahan asin mababawasan an ano man na pakamati nin pagkadisganar. An mas mahalaga pa, makakatao kita nin onra asin kaumawan ki Jehova, an satong “maugmang Diyos.” (1 Tim. 1:11) Kaya lugod na ikaugma ta nanggad an mga pribilehiyo na igwa kita!